الهام واللي كان الحلقة الاخيرة

 علاقة محرمة 2.

      الصراع 

                     الحلقة الثانية 

من تأليفي 

محمد منصور **منص**

وقبل ما نبدأ نوحد الله ونصلي علي خير خلق الله سيدنا محمد.

اللهم صل وسلم علي محمد صلاة تحل بيها العقد وتفك بيها الكرب

ماهيا قاعدا في مكتب فخم بتتفرج علي شاشة خاصة بكاميرا المراقبة اللي بتصور كل اللي بيحصل في اوضة الجلسات وشافت هدير وهي بتشيل جهاز ال VR. وبتعلقة جنب الكرسي اللي كانت قاعدة عليه وخرجت الموبيل بتاعها واتصلت ب ماهيا اللي بصت للموبيل بتاعها اللي كان علي المكتب وردت وقالت

اية خلاص

هدير اللي كانت مبسوطة جدا

لسة مخلصة الجلسة حالا. بجد الجهاز بتاعك دة اختراع. دة انا كاني كنت مع راجل بجد

ماهيا

ومش اي راجل دة راجل وسيم تتمني اي امراة

هدير

هو موز اوي بصراحة. 

ضحكت ماهيا وقالت

شقية انتي برضو

ضحكت هدير وهي بتقول

مالقيش منه في الحقيقية. دة

ماهيا

بعدين ابقي اجيب له الحقيقي. بتاعه 

هدير

طيب انتي فين دلوقتي

ماهيا

انا ثواني وهكون قصاد منك

وقفلت ماهيا وحطت موبيلها علي المكتب تاني وهي بتضحك، ،،،،،،،

ونرجع ل مفيدة اللي كانت في اوضتها بترفع الهدوم عند بطنها وعماله تبص ل بطنها باستغراب شديد بطنها بتكبر وكانها حامل بقالها خمس شهور مع انها في تاني شهر من الحمل يعني مش معقول تكون بطنها كبيرة كدة وتحط ايدها علي بطنها تلاقي بطنها سخنة وفيها بقع حمراء وتنزل مفيدة هدومها وتروح تقعد علي سريرها وتقول

مستحيل دة يكون حمل طبيعي. انا جوة بطني كيان يخوف. ولازم اخلص منه بس قبل ما اخلص منه هفضح يسرا. **ملحوظة يسرا اللي هي ماهيا*

وطالما انا مش قادرة اقول علي اللي حصل. هكتبه وانشره علي الفيس

وراحت مفيدة ل موبيلها وفتحت صفحة الفيس وبدات تكتب لكنها كانت بتكتب بلغة مش مفهومة لغة ملهاش علاقة باللغات اللي يعرفوها اهل الارض بصت للي مكتوب و مسحته ورجعت تكتب تاني و برضو لقت نفسها بتكتب نفس اللغة مسحت وحاولت تالت ورابع لغاية ما يأست ورمت الموبيل علي الارض وهنا تسمع صوت خبط جاي من تحت السرير والخبط دة كان في الارضية الباركي اللي مصنوع من الخشب التركي لكن الغريب ان الخبط جاي من تحت الباركي مش من فوقه وكأن في حد تحت منه اترعبت والخبط فضل يزيد ما بقتش عارفة تعمل اية. لكنها رفعت ملايا السرير وبصت تحت السرير لقت الباركي بيطلع من تحت منه دم اسود ببمشي زي الحشرات برقت وسمعت صوت طفل بيقول 

ماما. بلاش تحكمي عليه بالموت. انا مدفون تحت سريرك من سنين. افتحي لي وخليني اخرج  

مفيدة اترعبت اوي لكنها لقت الواح الباركي بتتحرك بشكل مرعب مع صوت صفارة عالية صرخت وحطت ايدها علي ودانها اللي بدات تجيب دم قامت بسرعة وخرجت من اوضتها وقفلت الباب وراء منها وجريت وكل ركن في فيلتها بيخرج منه صوت طفل رضيع بيعيط وبعدها بيقول 

ماما ما تحاوليش تخلصي مني والا هاعيش انا وتموتي انتي  

تترعب مفيدة وتفتح باب الفيلا لكنها تلاقي قدام منها قطط سوداء كتير وكلهم عيونهم حمراء لون الدم والقطط بيعملو صوت غريب مش صوت نونوه لا صوت عذاب اهل جهنم ومفيدة صرخت من المنظز وال اغرب ان القطط بدات تدخل في بعض لغاية ما اتجمع كيان اسود كبير من لحم القطط وجلودها والكيان قال بصوت مخيف 

ما تحوليش الهرب من مصيرك انتي اللي اخترتي علاقة محرمة ما ترجعيش تندمي لان معانا ما ينفعش الندم  

واتقفل الباب في وشها من الخضة ورزعت الباب وقعت مفيدة علي الارض وبصت حوالين منها بخوف شديد ورعب وقامت تاني تحاول تفتح الباب لكن الباب ما كنش بيتفتح حاولت وحاولت لكن ما فيش فايدة ضربت الباب بكل قوتها وصرخت لغاية مالقت حوائط الفيلا بيضمو عليها وكانها جوة قبر وبيضيق بصت للي بيحصل وهي مرعوبه وعايزا تهرب لكنها مش قادرة والحوائط الاربعة بداو يقربو اوي حطت ايدها اليمين علي حيطة والايد التانية علي حيطة وكانها بتمنع ضمت الحوائط لكنها ما قدرتش وفضلت علي الحال دة لغاية ما الاربع حوائط وقفوا علي بعد 1/2 متر بالظبط فضلت مفيدة تبص للي بيحصل وهي مش مصدقة ان الحوائط ما كسروش عضمها وهنا تسمع صوت ماهيا في ودانها وهي بتقول 

دة ممكن يكون سجنك ل يوم ولادك طول ما انتي رافضة ابنك اللي في بطنك 

مفيدة 

دة مش ابني دة شيطان زيك 

ضحكت ماهيا وقالت 

هو فعلا شيطان بس ابنك ف احسن لك اقبلي لغاية ما تولدي وبعدها هو عارف طريقة وهيبعد عنك او نشفي دماغك وخليكي كدة وبرضو هتولدي 

مفيدة 

مستحيل اقبل باني اكون ام ل شيطان ما عرفش وجودة في الدنيا هيكون وراء خراب قد اية وهحرقة بالقران 

ماهيا ضحكت اوي وقالت بمنتهي الشر 

اللي في بطنك ما بيتحرقش بالقران وانتي اللي اخترتي عداوتي استحملي 

وبدات الحوائط الاربعة تضيق تاني لغاية ما بقت علي بعد 20 سم من مفيدة ومفيدة بتصرخ وبتقول باعلي صوتها 

يارب ،،،،،،،،،،

من جوة شقة احمد. اللي كان في الشغل كانت سلوي قاعدة مع عائشة وبتقول لها

انا جاية من وراء احمد علشان عايزا اتكلم معاكي لوحدينا

عائشة وهي بتناولها كوباية شاي قالت

خير ان شاء الله

سلوي وهي بتاخد منها كوباية الشاي وبتحطها جنب منها. قالت

بصي يا بنتي هو سؤال واحب اسمع اجابته منك. وبصراحة

عائشة وهي منتبهة. سلوي كملت وقالت

بتحب احمد ولا. لا

عائشة

بحبه طبعا دة هو كل الدنيا بالنسبة لي

سلوي 

يبقي ساعديني في انه يكون اب

عائشة

ما احنا كل كام شهر نروح نكشف عند دكتور جديد وبرضو مافيش فايدة

سلوي

وهو لازم علشان يكون اب. يكون منك انتي

عائشة اتصدمت وقالت

تقصدي اية

سلوي مسكت كوباية الشاي وشربت وقالت

يتجوز واحدة تانية

عائشة فضلت باصة وساكتة ل كام ثانية قبل ما سلوي تكمل وتقول

بصي يا بنتي انتي مش مننا وما تعرفيش التقاليد بتاعتنا احنا هنا في مصر الراجل بيتجوز علشان يكون اب ولما بيتحرم من الخلفة بسبب مراته ف الشرع محلل له انه يتجوز تاني لو الجواز هو الحل ل مشكلته. وانتي فعلا لو بتحبي احمد ساعدي في انه يكون اب ولو حتي من واحدة غيرك. وهتفضلي انتي بالنسبة ل احمد الاصل

رغرغت عيون عائشة بالدموع سلوي قامت من مكانها وراحت خدتها في حضنها وهي بتقول

هو انا كنت بقول لك كدة علشان تعيطي.  

عائشة

عايزاني اعمل اية طيب وانتي بتطلبي من امراة انها تسيب جوزها وحبيبها ل امراة تانية

سلوي

وفيها اية طالما دة في مصلحة حبيبك زي ما انتي بتقولي

عائشة

انا صحيح مش من بلدكم بس انا امراة وصعب علي اي امراة في الكون انها تسيب جوزها وباختيارها يعيش في احضان امراة تانية. انتي تقدري تعملي كدة مع جوزك 

سلوي

لو ما كنتش بخلف اة كنت هرضي وهاجي علي نفسي علشان خاطر جوزي اللي بحبه ولا هو الحب كلام وبس.

وقامت سلوي وقفت وبصت ل عائشة وقالت

فكري كويس وما تبقيش انانية احمد نفسه يبقي اب بلاش تكوني السبب في حرمانة من العيال. انا ماشية ومستنيا منك مكالمة تقولي فيها انك موافقة وبلاش تحكي ل احمد اللي حصل ما بينا دلوقتي لانه هيكذب عليكي ويقول انه مش عايز عيال وانه سعيد معاكي لكن الحقيقية عكس كدة 

وراحت سلوي ناحية الباب وفتحتة وخرجت وسابت عائشة ل احزانها، ،،،،،

ومن علي الشاطي تقعد ماهيا وقدام منها الظل الاسود وكان بيقول

انتي فعلا ناوية توسعي دايرة العلاج وهتبعتي دعوات لي اي واحدة مش بتخلف.

ماهيا

انا مش ناوية وبس انا فعلا بدات اعمل كدة. وعندي كذا صفحة وجروبات كتير هتعمل دعاية ل مشروعي الكبير العلاج بالارواح. واللي هو في الحقيقية غير كدة. علاج عندي بالجن والطب اللي احنا متقدمين في عن بني الانس 

واترسم الشر علي ملامحها وهي بتكمل وبتقول

لازم يكون لي في كل بيت طفل منك يحمل صفات الجن والبشر يقدر يعيش وسطيهم وما يقدروش عليه. لكنه هو يقدر عليهم وبدل ما اكون ملكة في ممالك الجن وبس. هكون ملكة في ممالك الانس كمان. و الخدام هما اطفالي. واهاليهم هما حراس خدامي 

وضحكت اوي وقالت

جهز نفسك علشان اللي جاي. ما جاش زية. زي ما بيقولها اهل مصر المحروسة

وضحكت بسخرية اوي وقالت

قال محروسة قال.

وفضلت تتضحك بشر مخيف. لدرجة ان امواج البحر اللي قدام منها بدات. تعلي لفوق وتخبط في بعض ،،،،،،،،

وبالليل ومن جوة اوضة نوم. تقعد عائشة علي السرير وقت ما كان احمد قدام منها بيصلي ركعتين سنة. وفضلت باصة له وفي ودانها كل الكلام اللي قالته ليها سلوي وخلص احمد صلاة. وراح قعد جنب منها وبص لها وحس انها متغيرة فقال

مالك

عائشة

مامتك كانت هنا النهاردة. وقت ما كنت في شغلك. واتكلمت معايا في موضوع كدة ورغم انها طلبت مني انا ما قولكش لكني مش حابة اخبي عليك اللي حصل لاني مش متعودة اخبي عليك اي حاجة

احمد بص لها بتركيز شديد وقال

امي قالت لك اية

بدات عائشة تحكي والدموع في عيونها واخر حاجة قالتها

احلفك بالله اوعي تكتب عليه ولو عايز تتجوز انا موافقة بس دة علشان انت تكون اب. لكن اللي هتتجوزها دي اوعي تحبها اكتر مني

ابتسم احمد وقال

انا عمري ما هتجوز غيرك وهيفضل عندي امل في ربنا اني هكون اب ل طفل منك مش من غيرك

وخدها في حضنه وهي فضلت تعيط ودموعها بلت هدوم احمد، ،،،،،،،

وتعدي الايام قولو شهور. و في يوم باب شقة احمد يخبط راح يفتح الباب وفتح لقي مافيش حد علي الباب لكنه شاف ورقة وطي جاب الورقة وفتحها لقي مكتوب فيها

**سمعت ان مراتك عندها مشاكل في الخلفة. علاجها عندي. عندك استعداد تقبل دعوتي.. انا يسرا صاحبة قرية يسرا في الساحل الشمالي**

قفل الباب ودخل ورمي الورقة علي التربيزة وهنا تقف قدام منه عائشة وتقول

مين كان بيخبط يا عم الدنيا

بص لها احمد وقال

دعوي للعلاج. من الست اللي انتي بعت لها علي النت 

عائشة بدات تفتكر للحظات وبعدها قالت 

تقصد يسرا اللي بتعالج الحالات اللي زيي في القرية بتاعتها 

احمد 

هي  

عائشة 

اخيرا ردت عليه 

احمد

حسك متحمسة اوي للست دي 

عائشة 

كل اللي راحو عندها ما بيخلفوش بيقسموا انهم بقو حامل 

احمد 

ولو قولت اني مش مصدق كل اللي بيتقال وحاسس انها مجرد دعاية ليها وللقرية بتاعتها وخلاص 

عائشة 

هقول لك علشان خاطري نروح ونجرب والعلاج عندها مجاني يعني مش هنخسر اي جنية 

احمد 

اهو انا مبخافش الا من العلاج المجاني دة لان ماحدش بيعمل حاجة ببلاش في الزمن دة 

عائشة 

احنا جربنا كتير وروحنا ل دكاترة كتير مش هنخسر اي حاجة لما نروحها يمكن تكون دكتورة شاطرة وربنا يجعل علي ايدها الشفا 

بص لها احمد وفضل ساكت وهي مسكت ايدة وقالت 

علشان خاطري وافق وخلينا نروح 

احمد 

ماشئ يا عائشة هنروح 

وهنا يسمع احمد صوت هبد في اوضة النوم وكان في حاجة وقعت اتفزعت عائشة واستخبت وراء احمد وهي بتقول 

اية الصوت دة دة مافيش حد غيرنا في الشقة 

بص لها احمد وقام وراح ناحية باب الاوضة واول ما مسك مقبض الباب سمع صوت عائشة جاي من جوة الاوضة وهي بتقول 

برضو يا كريم وقعت طرفة الدولاب 

بص ل عائشة اللي كان باين انها مش سامعة اللي بيتقال فخاف يقلقها ومسك مقبض الباب وفتح الباب علشان يشوف ،،،،،،،،،،،،،،

ما حلو كدة النهاردة سلالالالالالالالالالام  

اللي عجبته الحلقة يكتب تعليق ويدوس اعجبني علشان القصة توصل ل غيرك بلاش بخل