الهام واللي كان الحلقة الاخيرة

 انكسار امراة

                الحلقة الثامنة عشر 

من تأليفي 

محمد منصور **منص**

وقبل ما نبدأ نوحد الله ونصلي علي خير خلق الله سيدنا محمد.

اللهم صل وسلم علي محمد صلاة تحل بيها العقد وتفك بيها الكرب

ومن جوة شقة ضحي تقعد ضحي قصاد بناتها فاتن وليلي. وفاتن كانت بتقول

ايوة ومين بقي العريس

ضحي

ايهاب مدير المطعم

فاتن ضحكت بسخرية وقالت وهي بتبص ل ليلي

انا مش قولت لك انها هتتجوزه هو. يا بنتي عيب. انا عارفة ان طول السنين اللي فاتت وهي كانت علي علاقة بي ولما لقي الشقة فضيت عليها قال جه الوقت بقي يكوش علي الشقة والمطعم وفوق منهم ماما اللي شعرها ابيض وقلبها ابيض. زي العيال الصغيرة 

ضحي بعصبية

اخرسي قطع لسانك

ليلي

فاتن ما ينفعش اللي انتي بتقولي دة 

فاتن

اومال اية اللي ينفع اروح واقول لجوزي ان ماما هتتجوز وياريت حد عدل لا دي هتتجوز واحد شغال عندها في المطعم.  

ضحي بنفس العصبية 

انا اللي هاعيش معه مش انتي واياكي اسمعك تتكلمي عليه بالطريقة دي تاني انتي فاهمة

فاتن

انا من رايي انك تقومي تضريبني علشان اتعلم الادب واعرف ازاي اتكلم عنه

وقفت ضحي وضربت فاتن بالقلم وهي بتقول

انتي فاكرة نفسك كبرتي علي الضرب ولا اية

ليلي بصت ل فاتن اللي كانت ماسكة خدها وقالت

ماما لية كدة

ضحي

انتي مش شايفة هي بتتكلم ازاي

فاتن قامت وراحت ناحية الباب وفتحت باب الشقة وهي بتقول

ورحمة ابويا اللي ما عرفش هو مات ازاي وفين. لاعرف حبيب القلب دة مقامة

وخرجت من الشقة وضحي بتقول

ابقي فكري تقربي منه وانا وقتها اربيكي من اول وجديد.

ليلي

ماما اهدي مش كدة

ضحي

انتي ماسمعتيش َ قالت اية وبتكلمني ازاي 

وعيطت ضحي وقالت

بعد كل اللي عملته علشانها وعلشانك بعد ما عشت ليكم الام والاب. ووصلتكم ل بر الامان وجوزتكم لرجاله تتشرفوا بيهم. يجي الوقت ل بنتي الكبيرة تقف قصاد فرحتي لية كل واحدة مكتوب لها تبات ليلتها في حضن جوزها وانا انام لوحدي في سريري.  

وعيطت اكتر واكتر وقالت

واشحت منكم سؤالكم عليه. ولو قولت تعالو اقعدوا معايا لسانكم ما يقولش الا حجج وكله كلام فارغ. بتضحكوا بي علي نفسكم قبل ما تضحكوا بي عليه. انا ست اتكسرت بدل المرة ميت مرة واحدة غيري بعد كل اللي شافته كانت ماتت من القهر والحزن لكني قاومت وعيشت وهفضل عايشة وهعيش 

وما حدش يقولي اعيش اللي فاضل من عمري ازاي ومع مين. انتم ملكوش حكم عليه

ليلي

احنا بناتك ومن حقنا، ،،،،،،،

قاطعتها ضحي وقالت بمنتهي العصبية

ما حدش من حقة يختار لي اعيش ازاي سامعة.  

ليلي بصت في ساعة ايدها وقالت

طيب يا ماما انا هسيبك دلوقتي علشان مدحت جوزي زمانه راجع من الشغل 

وهو ما بيحبش يرجع يلاقيني برة. همشي دلوقتي وهبقي اكلمك في الموبيل اطمئن عليكي

وقامت ليلي وخرجت من الشقة وضحي قالت

اللهم لا اعتراض كل اللي ضحيت علشانهم وقدمت لهم كل اللي اقدر عليه من حب واهتمام ديما سبب كسرتي واللي ما قدمتش لي اي حاجة هو سبب فرحتي.

وعيطت اوي وبحرقه، ،،،،،،،،

ومن جوة شقة فاتن اللي كانت قاعدة قدام جوزها تامر اللي كان بيقول

مش قولت لك انا كان قلبي حاسس ان المطعم اللي حيلتكم والشقة هيروحو عليكم. قال تتجوز قال هي النسوان تكبر وتعقل ولا تكبر وتخرف

فاتن

هي فعلا كبرت وخرفت عديت ال 50 ولسة فاكرة نفسها عيلة عايزا تتجوز

تامر

طيب واية هتسكتي

فاتن

اعمل اية طيب. 

تامر

انتي ما تعمليش انا هعمل

فاتن

هتعمل اية

تامر

هقعد مع ايهاب دة قعدت راجل ل راجل واشوف دماغه فيها اية، ،،،

من جوة مكتب ايهاب في المطعم يقعد تامر وكان في ايده فنجان قهوة وخد اخر رشفة من القهوة اللي جوة الفنجان وحط الفنجان فاضي في الطبق بتاعه وقال

زي ما بقول لك كدة بناتها مش موافقين. ونصيحة من واحد في سن ابنك تبعد احسن لك. ولو محتاج قرشين يساعدوك تبعد انا مستعد اديك اللي انت عايزه 

ايهاب

خلصت قهوتك صح

تامر

ايوة

ايهاب

تقدر توفر النصيحة وفلوسك اللي جاي تشريني بيهم لنفسك والباب اللي دخلت منه اخرج منه

ابتسم تامر وقال

كدة. انت زعلت مني 

ايهاب

ما تعودش ازعل من حد غريب. انما انا خايف ل اقول كلام يزعلك انت مني 

تامر وقف وقال

وعليه بلاش تزعلني. بس ما تزعلش لما تزعل

وابتسم تامر ابتسامة صفراء وخرج من المكتب. وايهاب مسك موبيلة واتصل ب ضحي. واول ما ردت قال لها

ما عرفتنيش لية ان بناتك مش موافقين علي الجواز

ضحي سكتت شوية وبعدها قالت

عادي يا. ايهاب ودة الطبيعي والايام بتتعاد تاني كل ما اختار اللي يكون شريك حياتي يقف في طريقي اللي انا منه

وحس بصوتها المخنوق صوت الموت وربنا يكفيكم شر اللي هيموت وهو عايش لكن ايهاب قال

وانتي رايك اية نفضل نحب بعض من بعيد ل بعيد ولا نلحق نركب قطر الايام اللي بيجري بينا بسرعة

ضحي

جوازي منك معني ان قطعت بناتي الاثنين. وانا مش عايزها تبقي كدة

ايهاب

وانا كمان مش عايزها تبقي كدة وما يرضنيش تخلص كدة. لكن برضو مش عايز اتحرم منك اكتر من كدة. العمر ما بقاش في قد اللي راح

ضحي 

سايبي احلها بطريقتي. ويارب يكون ليها حل، ،،،،،،

وكلمت ضحي الهام اللي راحت ل فاتن الشقة وكانت ليلي عندها وقالت الهام

انا مش صاحبة مامتكم وبس انا اختها وافتكر ان ليا عندكم معزة خاصة بحكم العشرة وبحكم انكم كبرتو علي ايدية

فاتن

بعتاكي تتحيالي علينا علشان نوافق صح

الهام

بعتاني اتكلم معاكم بالعقل. امكم محتاجة تفرح بلاش تقفوا في وش فرحتها زي ما جدكم عمل من سنين وكان السبب في موت ابوكم مجنون 

فاتن وليلي اتصدمو لانهم اول مرة يعرفو الكلام دة وفاتن

بابا مات مجنون

الهام

دي الحقيقة اللي خبتها امكم عنكم طول السنين اللي فاتو ما كنتش عايزا تعرفكم ان باباكم كان مدمن مخدرات والمخدرات سببت له الجنان. والسبب في كل دة جدكم صابر اللي طردته قبل فرحو علي بنته بايام

ليلي

لية ماما تخبي علينا الكلام دة 

الهام

دة برضو ابوها. اللي ظلم وابوكم اللي ظلم واتظلم وفي كل الحكاية دي ضحية واحدة اسمها ضحي. وانتم جائيين تكملو علي اللي فاضل منها لية بس حرام عليكم

فاتن

طنط الهام. ايهاب دة ما ينفعش ماما دة شغال عندها وطمعان فيها

ليلي

وماما كبرت علي الجواز اقول ل جوزي اية دة انا لغاية دلوقتي مكسوفة احكي له

الهام

هو شرع ربنا في كسوف. يعني اني احسن انها تعيش معه في الحرام ولا في الحلال.

وبعدها وجهت الهام كلامها ل فاتن

وحتة بقي ان ايهاب شغال عندها. ف ايهاب شغال معها. مش عندها. لاني بكره اوي الجملة دي وبحس فيها بكمية عنصرية مش حلوة. ومامتك حرة تختار اللي تكمل معه حياتها

فاتن بسخرية

حياة اية بس دي بدل ما تروح تحج تعمل ل اخرتها

الهام اتعصبت من رد فاتن وحست انها قاعدة قصاد رؤوف وقت ما بقي وحش لكنها مسكت نفسها وقالت

مامتك لسة في اول الخمسينات والحمد لله واقفة علي رجليها ولسة مهتمة بنفسيها ما حدش بيشليها يدخلها الحمام مثلا ولا هي عندها زهايمر ومش عارفة مين اللي بيكلمها.

ووجهت كلامها ليهم هما الاثنين وقالت

وبعدين انتو مالكم قاسين علي اللي ربتكم وشالت همكم وسهرت وقت تعبكم. ودورت لكم علي المدرسين والدروس وقت مذاكرتكم وفرحت ل فرحكم وكان بتنجرح لو دبوس شككم وكانه شكها هي. دي اخرتها

فاتن

اي ام بتعمل كدة. ماما ما عملتش حاجة زيادة يعني. بس هي انانية ما بتفكرش الا في نفسها 

الهام باستهزاء

ضحي انانية. 

واتنهدت وقالت بصوت الجد 

لا يا فاتن امك مش انانية ومش اي ام بتعمل كدة مع عيالها ياما امهات كتير سابت عيالها يضيعوا علشان تتجوز بعد جوزها اللي مات اللي طلقها. ومش مهم هما كبروا ازاي لكن المهم هي تكون مبسوطة. اوعي تفتكروا ان مامتكم وقت ما كانت صغيرة و رؤوف باباكم مش موجود هي ما كنتش تقدر تطلق منه وتتجوز غيرة واللي حاولو معها كتير من زمايلها اللي في المستشفي او من زبائن المطعم لكنها رفضت وعاشت ليكم انتو وبس. يكون ردكم علي كل اللي عملته ليكم ما ينفعش تعيش 

ليلي بصت في ساعتها كالعادة وقامت وقفت وقالت

انا لازم اروح علشان جوزي زمانه جاي من الشغل وهو ما بيحبش يجي يلاقيني برة

وفعلا سابتهم ليلي ومشيت والهام بتبص لها. وهي زعلانه عليها ورجعت تبص ل فاتن وقالت

اية جوزك ما قربش يرجع من الشغل هو كمان علشان تخليني امشي 

هنا اتفتح باب اوضة وخرج تامر وراح قعد قصاد الهام وقال

انا موجود هنا من بدري

الهام

يعني سامعنا واحنا ينتكلم

تامر

سمعتكم

الهام

واية رايك

تامر

والله انا شايف ان لو ماما ضحي مذنوقة اوي في الجوازة دي. تكتب لبناتها المطعم والشقة وتروح تتجوز ايهاب بس انا اراهنك ساعتها انها مش هتلاقي

الهام

يا ريت ما كنت سالت علي رايك 

وبصت ل فاتن وقالت

تقبلي ان امك تكتب لكم كل اللي حيلتها علشان تخلوها تعيش

فاتن

انا رايي من راي جوزي وهو صح. ووقتها لو اختارت كدة يبقي هي عايزا هو اكتر ما عايزنا احنا حلال عليها 

قامت وقفت الهام وقالت

لولا عارفة ان ضحي تعبت وشقيت في كل جنية ربتكم بي كنت قولت انها مربايكم بفلوس حرام. حسبي الله ونعمة الوكيل فيكم

ضحكوا الاثنين. والهام بتخرج من الشقة وبترزع الباب وراء منها، ،،،،،،

ورجعت الهام ل ضحي وكانت نتيجة المقابلة باينة علي وشها فهمت ضحي وقالت

قولت لك بلاش تروحي لهم

الهام

انتي متاكدة ان طول بناتك

ضحي بابتسامة المر

متاكدة. رفضوا برضو صح

الهام

رفضوا لغاية ما طلع الزفت تامر جوز بنتك الكبيرة وقال اية هيوافقو علي الجوازة بس انتي تكتبي لهم المطعم والشقة اللي حيلتك

اتصدمت ضحي والهام بتكمل وبتقول

وبيراهنك ان بمجرد ما ايهاب هيعرف انك ملحتكيش حاجة هيسيبك

ضحي

وانا موافقة اراهنه لاني المرة دي انا اخترت صح

الهام

ضحي انتي بتقولي اية

ضحي

هكتب لهم المطعم والشقة،،،،،

وبعدها ب تلت ايام ضحي وبعد ما ضحي باعت لبناتها كل اللي حيلتها راحت ل ايهاب شقته ملقتهوش سالت الجيران عرفت ان ايهاب ساب الشقة وخد اخته ومشي. وبطل يروح المطعم. الله هو في اية بقي واية اللي حصل وراح فين ايهاب وطلع خاين ولا لا. كله دي احداث في الحلقة الاخيرة بكرة باذن الله من انكسار امراة. ومستني توقعاتكم واللي هتتوقع صح ليها عندي هدية كبيرة اوي.