حور

عاصفة من الذكريات

                  ★الحلقة الخامسة★

كتابة واقتباس 

محمد منصور. **منص**

وقبل ما ابدأ نوحد الله ونصلي علي خير خلق الله سيدنا محمد.

اللهم صل وسلم وبارك علي محمد صلاة تحل بيها العقد وتفك بيها الكرب 

المشهد الاول

                 ★جنينة القصر★

وبعدها بص سيف في اتجاة تاني وكان قاصد يوجه كلامه ل عائشة. وقال

انتي السبب. اكيد طفش من اسلوبك معه

عائشة بصت ل كمال خايفة من رد فعله وقالت

اسكت انت بتقول اية

سيف

اسكت لية. خايفة بابا يعرف اللي كان خايفة''''''''''

وهنا يسكت سيف فجاة لانه سمع صوت زاهر بيقول

واضح اني سببت لكم مشكلة لاني خرجت من غير ما اقول ل حد

بص له كمال وقال

انت كنت فين

زاهر

كنت بقراء الفاتحة ل امي. لاني بعد كدة مش هعرف اروح مشوار الترب دة تاني

سيف بفرحة شديدة

كويس انك جيت. دة انت وقعت قلبي.

وبعدها قال ل ابوها

يلا بابا. نروح المستشفي

كمال كان ساكت وعمال يبص ل زاهر وعائشة وعائشة لحظت نظرات كمال فقررت تروح لغاية عندة وقالت بصوت واطي

مش عايزاك تفهم غلط زاه،،،،،،،،،

قاطعها وقال وهو بيبص لها ب غضب شديد 

بعدين نتكلم 

وراح ناحية العربية وركب وجت عائشة تفتح باب الكرسي اللي جنب منه و تركب بص لها وقال

رايحة فين

عائشة

رايحة معاكم.

كمال بحدة

لا. 

عائشة

اية هو اللي لا. يبقي ابني بيعمل عملية وافضل هنا

كمال بحدة

قولت لا.

عائشة بحدة اكتر

وانا قولت هروح. وبعربيتي مش معاك 

ورزعت باب العربية قفلته وزاهر بص لها وهي رايحة ناحية عربيتها ومتعصبة وفي وقت بصاتة ليها سمع صوت كمال بيقول

يلا يا زاهر واقف عندك لية

زاهر بص ل عائشة بصة اخيرا وهي بتطلع بعربيتها من بوابة القصر وراح ركب جنب كمال واتحرك كمال، ،،،،،،،،،

المشهد الثاني

                ★عربية كمال★

وكان كمال سايق العربية وملامحة تدل علي بركان غضب جوة منه لكنة بركان صامت وزاهر عمال يبص ناحيتة واخر كام كلمة سمعهم اول ما دخل القصر يفسر له سبب النار اللي جوة ضلوع كمال. وفكر زاهر يتكلم لكنه ما قدرش وهيتكلم يقول اية اي كلام دلوقتي هيخلي الدنيا مش حلوة فقرر يسكت. ،،،،،،،،،

المشهد الثالث

                 ★المستشفي★

وكان سيف وزاهر في اوضة العمليات وكمال قاعد في حتة وعائشة قاعدة في حتة وكمال فضل يبص شوية ل عائشة لغاية ما رن موبيلة طلع الموبيل وشاف اللي بيتصل وقام من مكانة وخرج برة شافته عائشة وقالت

حتي النهاردة مكالمات الشغل مش قادر تلغيها

في نفس الوقت كان كمال بيرد قائلا

الو

صوت ست وهي مراته التانية نيفين وكانت بتقول

طمئني يا كمال ابنك عمل اية

كمال

لسة في العمليات

نيفين

مش عايزاك تقلق هيطلع منها كويس وهيرجع يشوف تاني

كمال

ان شاء الله.

نيفين

انما قولي بقي اية حكاية خناقتك بتاعت النهاردة الصبح مع مراتك. واية اللي قاله سيف دة

كمال استغرب وقال

انتي عرفتي ازاي

نيفين

يا حبيبي انت كلمتني قبل ما تخرج علي طول من القصر ونسيت تقفل المكالمة. وسيبت الموبيل مفتوح وانا ما خدش بالي لاني كنت لسة صاحية لغاية ما سمعت صوت عالي وسيف لخبط بالكلام وحاجة كدة تفتح النفس علي الصبح

كمال

هو الخناق بيفتح نفسك

نيفين

طبعا. مش دي عائشة اللي عاملة فيها رابعة العدوية وبتصوم رمضان وبتعمل عمرة كل سنة. وحجت بدل المرة اتنين

كمال

نيفين. اهدي دي برضو مراتي ام ابني. وانا لسة ما عرفش اية حكاية زاهر معها

نيفين

يا برودك يا اخي. انت ازاي قادر تستحمل لغاية دلوقتي انك ما تعرفش الحكاية اصلها اية وازاي تجيب عشيقها لغاية عندك

كمال بعصبية لكن بصوت واطي

حاسبي علي كلامك يا نيفين. وانتي عارفة وانا عارف ان الظفر اللي بيطير من صباع رجل عائشة يساوي كام واحدة ز،،،

وسكت فقالت نيفين

زيك. قولها سكت لية

كمال

انتي اللي عصبتيني بكلامك عنها

نيفين

ولما انت شايفني كدة اتجوزتني لية

كمال

انتي عارفة لية

نيفين

اة. علشان اللي فات واللي حصل بينا من عشر سنين. وجوزي اللي، ،،،،،،،،،

كمال قطعها وقال بحدة 

اسكتي بلاش تنبشي في قبر الذكريات

نيفين بمنتهي العصبية

لا يا بابا هنبش وهفكرك انك انت خاين وزي ما خونت راجل. مراتك كانت بتخونك مع راجل. ومش بعيد يكون ابوة سيف ما هو اللي بيعمله دة ما يعملهوش الا اب مع ابنه. هو في واحد يعيش اعمي الا لو ابنه اللي محتاج العملية. الخيانة اصلها كاس وداير اشرب اللي انت شربت منه جوزي 

كمال بحدة اكتر واكتر

كفاية قولت

نيفين

وكفاية لية. انت ما كنتش بتخلف وبعد خمس سنين جواز جبته سيف. وانا وانت اهو متجوزين بقالنا 10 س. ما حملتش منك لية الا لو انت لسة مالكش في الخلفة 

وضحكت نيفين بمنتهي الاستفزاز. ف انهي كمال المكالمة وحط الموبيل جنب منه ورجع براسة لوراء سندها علي الحيطة وكانها كانت مكالمة مع الشيطان. مع ان الشيطان نفسه ما وسوس ل كمال بالشكل دة. وبدأ كمال يفتكر اللي كان، ،،،،،،،،

المشهد الرابع

                 ★مكتب كمال★

هنرجع ل 11س. وراء وكمال في مكتبه بيمضي اوراق ودخلت عليه نيفين وكان اول مرة يشوفها جميلة جدا وجذابة قعدت قدام منه. وانفتن بيها. وبعد ما رحب بيها قالت

نيفين محروس صاحبة شركة توكيلات لعربيات الشحن شركة محروس ابو فارس

افتكر انك سمعت عنها 

كمال

سمعت طبعا 

نيفين

طيب كويس كدة انت وفرت عليه كتير. وانا النهاردة جاية لغاية عندك محتاجة دعم شركتك. يعني بالمختصر المفيد نكون شركة واحدة

كمال

سامحيني انا راس مال شركتي 100 مليون. وشركتكم ،،،،،،

كملت نيفين وقالت

20 مليون. بالنسبة ل شركتك ماتعتبرش حاجة 

كمال 

طيب يبقي اية المصلحة اللي هتعود عليه لما ندمج الشركتين

نيفين

انا

كمال باستغراب

انتي اية

نيفين بمنتهي البجاحة

هكون ليك

كمال اتصدم من كلامها

اسف مش فاهم

نيفين بصت اوي في عيونه وقالت

بص انا تربية السوق واللي اتربي في السوق يعمل اي حاجة علشان يكسب ما يخسرش. وانا شركتي في النازل وما تعودش استسلم للخسارة عندي استعداد اقدم كل اللي اقدر عليه علشان شركتي ترجع تاني وراس مالها يكبر

كمال

واية اللي وصل وضع شركتك للمستوي دة.

دة انتم كنتو اقوي شركة توكيلات في مصر

نيفين

السبب جوزي ما ضحكش عليك دي شركتي وورثتها عن بابا. وقولت اسيب ادارتها ل جوزي نسيم. خربها. فقررت ارجع انا بنفسي وادير الشركة واول خطوة لازم اعملها ان شركتي تندمج مع شركة اقوي. وانت دلوقتي اقوي شركة موجودة في السوق المحلي والعربي. فقولت اجي لك والعرض بتاعي انا قولته واتمني اعرف ردك

كمال

بصراحة العرض غريب. وعمري ما اتحطيت في موقف زي دة.

نيفين قامت وقفت وقربت منه وقالت

افتكر ان مراتك اسمها عائشة. هي حلوة بصراحة بس ناقصها حاجات كتير علشان تقدر تدلع راجل زيك. اللي مش موجود عندها. موجود عندي انا

كمال كان باصص في عيونها. وجوة منه اكتر من احساس الصدمة علي الفتنة وفضل ساكت. ضحكت نيفين وقالت

هسيبك يوم بحاله تفكر وبعدها هتصل بيك

وخرجت من المكتب وكمال مش مصدق كل اللي حصل، ،،،،،

المشهد الخامس

                  ★اوضة عائشة★

كمال قاعد علي السرير باصص ل عائشة اللي لابسة الخمار وكانت بتصلي وفضل الشيطان يزين لي الحرام رغم جمال الحلال. وخلصت عائشة الصلاة وقعدت تقرا شوية في المصحف وخلصت وكل دة المقارنات بيها وبين نيفين شغاله عائشة لابسة اية ونيفين كانت لابسة اية. عائشة شعرها ملموم زي ما بتقولو علية كحكة ونيفين شعرها سايب وناعم. عائشة ريحتها زي ريحة اي ست بيت رغم انها مهتمة بنفسها لكنها ست بيت. كانت بتحب تقف مع الخدم في المطبخ وقت الطبخ. ودي احلي ريحة يشمها محبي الحلا. لكن نيفين 

ريحتها يتمنها اصحاب الشياطين. الفتنة ريحتها احلي. لكن ريحة مسمومة. وفجاة لقيت عائشة كمال بيقول ب حدة مش مفهومة

اية هفضل قاعد مستنيكي كتير

استغربت عائشة وقفلت المصحف وبصت له وقالت

انت قولت انك عايزني

كمال 

وهو انا لازم اقول. من ساعة ما جيت وانتي قاعدة القاعدة دي. ولابسة الخمار اية في اية.

عائشة قلعت الخمار وقالت

مالك يا كمال مش كنت بصلي

كمال

بتلقحي علية اكمني ما بصليش

عائشة مستغربه الاسلوب والطريقة وقريت منه وقالت

من امتي وانا ليا في شغل التلقيح. 

كمال 

كلامك حسيتة كدة

عائشة

وانا ما قصدش كدة. وربنا يعلم اني مابقولش كلمة ليها معنيين 

كمال

طيب ماشي

وجه يوم مسكت ايدة بمنتهي الحنية وقالت

خلاص بقي ملهوش لزوم تزعل. انا قلعت الخمار اهو وقدام منك. قولي بقي متعصب لية 

كمال فضل باصص لها. شوية وبعدها قال

عيل صغير اهنا وبعيط وامة جاي تاخده علي حجرها علشان يسكت مش كدة

عائشة مستغربه اوي

لا. مش كدة. وقولي في اية متغير عليه لية 

وهنا تخيل نيفين وحلاوتها. وبعد ايدة عن ايدها وخرج من الاوضة. واختار طريق الشيطان، ،،،،،،،،،،

المشهد السادس

                  ★شقة تمليك★

بعدها ب شهرين. كان كمال مع نيفين في اوضة النوم بتاعت الشقة دي . وكمال بيقول ل نيفين

مين يصدق اني اعرفك بقالي شهرين. شهرين عدو علية وكانهم يومين

نيفين

يعني ما زهقتش

كمال

اني حمار يعرفك ويزهق منك.

نيفين ابتسمت وقالت

طيب كفاية بقي كدة يدوبك الحق اروح علشان جوزي ما يشكش في غيابي

كمال

انزل معاكي اوصل لك

نيفين

لا. زي كل مرة انا هنزل الاول وبعدين انت

وفعلا راحت نيفين ناحية باب الشقة وفتحتة علشان تشوف قدام منها جوزها نسيم اتهجم عليها وقال بمنتهي الغضب 

انا كان قلبي حاسس

ومسكها من رقبتها وقال

فين الكلب اللي معاكي 

نيفين بصعوبه

الحقني يا كمال

خرج كمال من الاوضة جري شاف المنظر دة بص له نسيم وقال

دة كمال باشا. شريكك. واضح ان الشركاء دلوقتي لازم يعملو كل حاجة مع بعض. انتي بقي تركني كدة لغاية ما خلص علي حبيب القلب الاول

وزقها بعيد عنه وهجم علي كمال. كمال شاف جنب من تحفة من الكريستال ليها سن حاد مسك يهدد بيها نسيم مع اندفاع نسيم  اتغرزت سن التحفة في رقبة نسيم. وقع نسيم غرقان في دمة. والاثنين وقفوا زي المشلولين ونسيم بيموت قدام منهم، ،،،،،،،،،،

ايوة. ايوة. نركز مع الدم اللي وسخ السجادة وننسي التعليق ما انا عارفكم تعلمو اي حاجة بس تهربوا من التعليق

وعندي ليكم خبر حلو هريحكم مني. بكرة وبعدة. يعني ميعادنا باذن الله يوم السبت والحلقة الجديدة.