الجزء الثاني والاخير
كتابة واقتباس
محمد منصور. **منص**
وقبل ما ابدأ نوحد الله ونصلي علي خير خلق الله سيدنا محمد.
اللهم صلي وسلم وبارك علي محمد صلاة تحل بيها العقد وتفك بيها الكرب
من داخل بيت كوثر ينام رفعت علي السرير وهو باصص ناحية الترعة الشرقية ومسهم ومش عايز ياكل ورئيفة تقعد جنب منه وكوثر بتفتح بوقة وبتحط له الاكل بالعافية وهي بتقول
اخوكي رفعت ها يروح مننا
رئيفة
انا مش عارفة لية النداهة بتصطاد رجالة عيلتنا بس
كوثر
دي عين وصابتنا
رئيفة
طيب والعمل يا ما
كوثر
العمل عمل ربنا
وفي هذة اللحظة يسمعوا صوت طفل في الحادية عشر يقول
يا خالة ام صابر. يا خالة ام صابر
فتبص كوثر لرئيفة وتقول
قومي شوفي مين اللي بينادي
فتقوم رئيفة وتروح ناحية الباب وتفتح الباب لتجد هذا الطفل ويدعي مسعود فتقول له
عايز اية يا واد يا مسعود
مسعود
عمي العمدة بيقول لكم تيلفون لعمي رفعت
رئيفة
طيب ماشي انا جاية معاك
وتقول رئيفة بصوت عالي لكي تسمع امها كوثر.
انا رايحة اشوف مين علي التيلفون وعايز رفعت
كوثر
طيب روحي بس متتاخريش،،،،،
ومن القاهرة تجلس كاميليا في شقتها وتقول في التيلفون بخصة
انتي بتقولي اية. يا رئيفة يعني اية النداهة ندهتة
صوت رئيفة
اهو دة اللي حصل زي ما ندهت صابر وحسان
كاميليا
طيب ورفعت فين دلوقتي
رئيفة
في البيت عند امي. ومسهم ومبلم وبياكل بالعافية
كاميليا بقلق
طيب اقفلي يا رئيفة وانا جاية في السكة حالا
رئيفة
تيجي فين بس والدنيا ليل كدة
كاميليا
مش مهم اي حاجة المهم اطمئن علي جوزي
وتضع كاميليا السماعة وهي مصممة علي الذهاب للبلد،،،،،،،
ومن داخل شقة اخو كاميليا ويدعي محمود تقف كاميليا قدام محمود وتقول له
يا محمود علشان خاطري اديني العربية بتاعتك وخليك انت مع مراتك
محمود
انتي اتجننتي مستحيل اسيبك تسافري لوحدك في ميعاد زي دة. استني هنا وانا هاغير هدومي وهاجي معاكي،،،، ،،
وبعدها بكام ساعة تصل كاميليا الي بيت كوثر وتدخل الي البيت مسرعا ومعها اخوها محمود وتسلم علي كل الموجودين وهي تقول بلهفة
فبن رفعت
كوثر
راقد جوة في اوضتة
فتروح كاميليا مسرعا الي اوضة رفعت وتفتح الباب وتدخل الي الاوضة لتجد رفعت نام علي السرير وباصص ناحية الترعة الشرقية فترتمي في حضنة وتبص لمنظرة وهي بتقول
رفعت حبيبي. رد علية انا كاميليا
ولكن لا حياة لمن تنادي فيقف الجميع وراء منها وتبص كاميليا لكوثر ورئيفة وتقول
هو اية هايفضل كدة
رئيفة
مش هايتكلم ولا هايرد عليكي هايبقي عامل زي الميت مع انه بيتنفس وهايفضل كدة لغاية النداهة ما تنادي علية الندهة التانية وساعتها هايموت
فتحضن كاميليا رفعت وهي خائفة علية وتقول من قلبها
بعد الشر علية يا ريت النداهة دي تاخدني انا وتسيبة هو
وتعيط كاميليا فيطبط عليها محمود ويقول لها
اهدئي يا كاميليا مش كدة
كاميليا وهي بتبص لمحمود تقول
محمود. ساعدني نشيل رفعت ونخرج بي من هنا ونرجع بي علي مصر وهناك هادخلة احسن مستشفي
محمود
حاضر
وبمجرد ما يقترب محمود ويحط ايدة علي جسم رفعت يبص له رفعت بغضب شديد ويمسك ايد محمود ويحاول ان ياكلها بسنانة ولكن محمود يبتعد عن رفعت مسرعا وهو خائف فيبص رفعت لكاميليا ويصرخ في وشها فتفزع كاميليا وتبتعد عنه خائفة وهنا يهدا رفعت من جديد ويبص ناحية الترعة الشرقية فتقول كاميليا باستغراب
معني اية اللي حصل دة
محمود
في روح شيطانية متمكنة منه ومش عايزا يخرج من هنا
كاميليا
يعني اية. مش هانقدر نخرج بي من هنا
كوثر
طالما النداهة ندهتة هو بقي ملكها
وتعيط كوثر بحرقة وتقول
ابني التاني هايضيع مني. اللهم لا اعتراض. يارتني ما اتصلت بي ولو جيبتة لغاية هنا
رئيفة
يا ما. دة نصيب ومقدر ومكتوب
محمود
بس احنا لازم نتصرف ونشوف هانقدر نعمل اية
كاميليا
مافيش اي حاجة نقدر عليها غير ان رفعت يخرج من هنا
محمود
انا معاكي بس نخرج بي ازاي والروح المتمكنة منه مسيطرة علية
كاميليا
ماعرفش بس لازم نتصرف يا محمود انا مش هاقف اتفرج علي رفعت وهو بيضيع مني
وهنا يسمعوا جمعيا صوت خبط علي باب البيت فتذهب رئيفة ناحية الباب وتفتحة فتلاقي قدام منها خضرة ومعها زهرة الممرضة فتقول رئيفة
خضرة ازيك
فتقول خضرة
انا بخير. قلبي عندك لسة عارفة حالا باللي حصل لجوزك ومن بعدي اخوكي رفعت
رئيفة
انتي عرفتي اني النداهة ندهتة
خضرة
عرفت وجبت معايا زهرة الممرضة علشان تعالج رفعت
رئيفة
وهي اللي بتنادي النداهة بيبقي لي علاج
خضرة
زهرة هتعالجة بالسحر
وهنا تدخل زهرة للبيت وهي تقول
روح النداهة جوة بيتكم ومسيطرة علي رفعت ولو ضيعتم وقت كتير في التفكير رفعت هايروح منكم
فتبص رئيفة لخضرة باستغراب وقالت
هي شيخة ولا اية
خضرة وهي بتدخل البيت وبتقفل الباب وراء منها تقول
اعتبريها كدة. ودلوقتي من مصلحة رفعت اننا نصدقها لغاية ما تنقذة. الا هو فين صحيح
رئيفة
راقد جوة في اوضتة
وتتقدم رئيفة قدام منهم وهي تقول لهم
تعالو اتفضلو
وتدخل رئيفة الاوضة ومن وراء منها خضرة وزهرة فيبصو لها كل اللي في الاوضة بما فيهم رفعت اللي بص لزهرة وابتسم وفرح جدا وزهرة تبص في عيونة فاستغربت كاميليا وقالت لرئيفة بصوت واطي في ودانها
مين اللي رفعت بص لها اول ما دخلت دي وفرح انه شافها
زهرة وهي بتتقدم ناحية رفعت قالت
ماتخافيش علي جوزك انا هنا علشان اساعدة انه يخف.
وبطرف عينيها بصت زهرة لخضرة وقالت
عايزا الاوضة تفضي. لو عايزين مصلحة رفعت
كوثر لخضرة
خضرة هو في اية ومين دي
خضرة
رئيفة هاتقول لك. ودلوقتي ياريت كله يطلع برة
كاميليا
انا مش هاطلع. دة جوزي وع،،،،،،،،،
تصرخ زهرة بلهجة مخيفة وتقول
قولت برة
فتسكت كاميليا من الرعب فتبص لها زهرة وتبتسم ابتسامة سوداء. وتقول
اسفة. بس انتي مش هاتستحملي اللي هايحصل في الاوضة دلوقتي. ياريت تطلعي برة
محمود بعصبية
هو اية اللي بيحصل دة ومين دي اصلا علشان تشخط كدة
زهرة
انا اللي هاطلع جوز اختك من اللي هو في.
كاميليا لمحمود
خلاص يا محمود تعالي نطلع برة ونسيبها يمكن يكون خلاص رفعت علي ايدها
محمود
هو علاج رفعت هايكون بالسحر والدجل دة
كاميليا
مافيش قدامي غير اننا نصدقها
ويخرجوا جمعيا من الاوضة وتقفل خضرة الباب وراء منهم وتبص زهرة لرفعت وتقول
انت لو تعرف أنا ناوية علي اية هاتتمني الموت ولا انك تسيب لي نفسك.
فتبص زهرة لخضرة وتقول
خضرة طلعي العروسة
فتخرج خضرة العروسة السوداء وتبص زهرة للعروسة وتقول
خلينا نبدأ
وبمجرد ما تحط خضرة صباعها في دماغ العروسة يتالم رفعت بشدة ويمسك دماغة ويصرخ صرخة مكتومة وهنا تظهر ليلي بنت العسال وتبص لخضرة وزهرة نظرات غاضبة فتقول زهرة
هو انتي.
فتقترب ليلي من زهرة فتقوم زهرة وهي خائفة ومرعوبة وتخرج من الاوضة جري ومن خلفها تخرج خضرة ومن شدة الفزع تقع العروسة من ايد خضرة فتبص ليلي للعروسة فتحترق العروسة حتي تتحول الي رماد وتذهب ليلي ناحية رفعت وتبص في عيونة بتركيز شديد ثم تتحول الي تراب ابيض يستنشقة رفعت وتدخل ليلي الي عقل رفعت الباطن وتقول
رفعت. لازم تفتكر انت شوفت اية عند الترعة علشان تقدر تعيش وتفلت من لعنة النداهة
صوت رفعت
انتي مين
ليلي
انا ليلي بنت العسال اللي اتقتلت غدر وظلم ولغاية دلوقتي اللي قاتلني عايش حر. في البلد ولسة ما خدش جزائة
صوت رفعت
مين اللي قتلك
ليلي
الروح المسجونة اللي زيي واللي مش عارفة تلاقي جسمها ما تقدرش تقول اسامي لكنك طاهر وقلبك ابيض ولازم تساعدني زي ما ساعدك وتجيب لي حقي من اللي عمل كدة انا ساعدك كتير من يوم ما جيت البلد وحاولت احذرك لكنك كملت في طريق النداهة والنداهة عايزاك علشان تكمل رحلة انتقام اللي حضرها
صوت رفعت
ومين اللي حضرها
ليلي
انا ما قدرش اقول اسامي ماقدرش. وخايفة ماقدرش اساعدك تاني لازم توصل للحقيقة والحقيقة من اول بيت العسال
رفعت
وازاي اقدر اتحرر من لعنة النداهة. انا عايش علشان مستني اشوفها تاني
ليلي
ركز يا رفعت واتخلص من سحرها وافتكر انت شوفت اية افتكر يا رفعت قبل ما تنادي عليك الندهة التانية
وهنا يهتز جسم رفعت بشدة ويسمع صوت كاميليا تقول
رفعت رد علية بقي رفعت رفعت
وهنا تتبخر ليلي ونرجع للاوضة وكاميليا بتهز جسم رفعت بمنتهي الخوف علية وتقول
كلمني وطمني عليك. رفعت رد علية رد
محمود لكاميليا
كاميليا اهدي. مش كدة
كاميليا وهي بتعيط بحرقة
مش قادرة اعصابي باظت اول مرة اشوف رفعت كدة. رفعت بيروح مني. يا محمود
وتترمي في حضن رفعت وهي بتعيط وتقول
رد علية يا رفعت. انا كاميليا حبيبتك. انا اموت من بعدك. رفعت. رد علية بالله عليك.
وتنزل دموع كاميليا علي وش رفعت وتخترق الدموع جسم رفعت بشكل غريب وهنا ينتفض جسم رفعت بشدة وينتفض وكانه يتعرض لتيار كهربائي شديد فيبص له كل الحاضرين متعجبين ورفعت يرتعش قدام منهم بشكل مخيف ثم يتوقف جسم رفعت عن الحركة تماما فتصرخ كاميليا وتقول
رفعت.
وتقترب منه مرة اخري وتحط ودانها علي قلبة فتلاقي النبض وقف فتبص لمحمود قائلا
محمود الحق قلبة واقف
فتصرخ رئيفة وتقول
اخويا
وتترمي كاميليا في حضن رفعت مرة تانية وهنا يفتح رفعت عيونة ويبص لكاميليا وهو يقول
كاميليا
فتبص له كاميليا بفرحة شديدة وتحضنة وهي بتضرب في من شدة حبها وخوفها علية وتقول
انت عايش صح عايش
رفعت وهو بيمسك ايدها يقول
اة عايش. في اية بقي انتي بتضربيني لية
فتحضنة كاميليا ومحمود يقول
قلقتنا عليك يا ابو نسب
رئيفة وهي بتبوس ايد اخوها وبتقول
رعبتنا عليك.
وتبص رئيفة وراء منها وهي تقول
اما. رفعت خف
لكن رئيفة ما لقتش امها وراء منها فقالت باستغراب
امي كانت واقفة هنا راحت فين
فبص كل اللي في الاوضة لبعض، ،،،،،
ومن داخل مكان غريب صابر وحسان محطوطين في قفص من حديد وحارس بيرمي ليهم اكل في القفص زي الحيونات فيقول صابر للحارس
احنا هانفضل هنا كتير. ما تقتولنا ارحم من كدة
فيبص له الحارس ولا يرد ويسيبة ويمشي ويخرج من باب هذا المكان واللي كان وسط المية فيقول حسان لصابر
اية زهقت خلاص وعايز تموت
صابر
الموت ارحم من اللي احنا في دة.
حسان
اللي احنا في دة كله بسببك انت.
صابر باستغراب
انا
حسان
اة. انت يوم ما خلفت عيل بالسحر بدات اللعنة ويوم ما قتلتة ظهرت النداهة
صابر
اسكت
حسان
اسكت لية كلامي وجعك. كل اللي احنا في دة بسببك يا صابر. يارتني ما كنت سمعت كلامك وغرقنا الواد دة في الترعة
صابر بحرقة
كان لازم يموت. دة شيطان في صورة عيل صغير.
حسان باستهزاء
وانت عايز عيل جاي بالسحر الاسود يبقي اية غير شيطان خبيث
فيهتز القفص الحديد بمنتهي العنف وتخرج المية من بوقهم هما الاثنين بشكل مخيف ويحاولو أنهم ياخدوا نفسهم لكنهم ما يقدروش ويرتفعوا لفوق وكانهم وسط المية ويبص صابر لحسان وكانه بيقول له الحقني. لكن لو في ايد حسان حاجة كان لحق بيها نفسه واستمروا كدة لكام ثانية حتي اقترب الموت منهم وفجاة ينتهي كل شي ويرجع صابر وحسان كما كانو ويسقطوا في منتصف القفص الحديد وياخذوا انفاسهم وهما بيبصوا لبعض مش مصدقين انهم لسة عايشين، ،،،،،،
وبعدها بساعة يرجع رفعت ومحمود لبيت كوثر ويقفا الاثنين قدام رئيفة وكاميليا وتقول رئيفة
برضو مالقتهواش
رفعت
ملهاش اي اثر في البلد
رئيفة
يعني اية. امي كمان راحت
وتبدأ رئيفة في العياط فيصرخ فيها رفعت قائلا
بس.
فتبص له رئيفة وتسكت فتاخذها كاميليا في حضنها وهي بتقول لرفعت
مالكش حق يا رفعت. دي برضو امها
فيمسك رفعت دماغة ويعصرها بشدة وهنا يتذكر الترعة الشرقية والنداهة، ،،،،،،،
ونرجع بالاحداث لليلة ما كان رفعت واقف قدام الترعة الشرقية وبيبص للنداهة اللي كانت في صورة ست يعرفها اوي يعرفها جدا واسترجع البوم صور امه كوثر وهي صغيرة وصورها بفستان الفرح مع ابوه واتصدم النداهة هي أمة كوثر بس ازاي ازاي وصوت صراخ رئيفة في ودانة بيرن ودموع عيونة نازلة علي وش حد ميت ومقابر وجبانة بتستقبل ميت جديد وهنا،،،،،،،،
صوت كاميليا يخترق ودان رفعت وهي تقول
رئيفة اختك بتعيط لازم ترضيها
فبص رفعت لرئيفة وقال
رئيفة بطلي عياط. امك عمرنا ماهنلاقيها
رئيفة
لية بتقول كدة يا رفعت
رفعت
علشان امنا ماتت من خمس سنين
فاتصدم الجميع، وقالت رئيفة
بعد الشر علي امي يا رفعت امي لسة عايشة
رفعت
رئيفة. انا مش عارف هافهمك ازاي بس احنا في لعنة
لعنة النداهة. انا في اللي دلني علي طريق الخلاص من اللعنة وهي اني افتكر اللي شوفتة عند الترعة وحصل وشوفت. اللي ظهرت لي عند الترعة الشرقية امنا كوثر
كاميليا
ازاي يا رفعت ماتت وهي كانت لسة معانا واتكلمنا معها وشوفنها
رفعت باصرار
ماتت. ودفنها من خمس سنين. بس العيلة دي كلها جوة لعنة النداهة وماحدش وصل للحقيقة الا انا
محمود
واهل البلد كمان جوة اللعنة. احنا مسبناش بيت في البلد الا لما سالنا عن الحجة كوثر وماحدش قال لنا دي ماتت من خمس سنين زي ما انت بتقول
رفعت
واضح ان البلد كلها في لعنة
محمود باستهزاء
وانت الوحيد اللي برة اللعنة
رفعت
علشان انا الوحيد اللي افتكرت اللي شوفتة عند الترعة. افتكرت شكل النداهة. ودة خلاني برة اللعنة مش جوة منها
لكن انتم لسة جوة اللعنة.
كاميليا
رفعت واضح ان اعصابك تعبانة تعالي نرجع لبلدنا وناخد معانا رئيفة ونعيش حياتنا
رفعت
واهرب واسيب اخويا صابر وحسان
رئيفة
صابر وحسان ماتو خلاص وامي اختفت اول ما انت خفيت من اللي كنت في
كاميليا
صح يا رئيفة. دة رفعت قلبة وقف ساعتها ورجع تاني يدق وساعتها فعلا. ماما كوثر اختفت
فانتبة رفعت للكلام بتاع رئيفة وكاميليا وقال بنبرة حزم
عايزكم تحكو لي كل اللي حصل بالتفصيل الممل من اول ما رجعت من عند الترعة لغاية ما فوقت ولقيتكم قدامي
فتبص رئيفة لكاميليا وتقول كاميليا
هو انت مش فاكر اية اللي حصل
رفعت
انا محتاج اسمع منكم اللي حصل بالظبط
فتحكي رئيفة كل اللي حصل ومن بعدها تحكي كاميليا وعندما ينتهي الاثنين يقف رفعت ويقول
الشر كله بيبتدي من عند خضرة والممرضة زهرة ولازم النهاية تكون عندهم، ،،،،،،،،
ومن داخل المستشفي العام يقف رفعت مع غانم صديقة ويقول له بعصبية
يعني اية الكلام دة
غانم
زي ما بقول لك كدة انا ما عنديش ممرضة اسمها زهرة
رفعت بحدة
ازاي بس. انت نديت عليها قدامي بالاسم دة واديتها عينة الدم الخاصة بحسان وطلبت منها انها تحللها
غانم
انا. رفعت انا دي تاني مرة اشوفك فيها بعد ما اتقبلنا صدفة في البلد
رفعت
لا. انت عايز تجنني صح
غانم
وهاجننك لية بس
رفعت
علشان انا جيت لك هنا مرة ودي كدة تالت مرة اشوفك فيها
غانم
وانا بقول لك دي تاني مرة
رفعت
كدة طيب شكرا
ويخرج رفعت من المستشفي وغانم بيبص علية،،،،،،،،
ومن داخل بيت خضرة تجلس خضرة في منتصف البيت وهي مشغلة قران ولابسة اسود فتسمع صوت خبط عنيف علي باب البيت فتقوم مسرعا وتفتح الباب فتلاقي رفعت في وشها فتقول له
رفعت. عرفت اللي حصل لصابر
فينصدم رفعت ويسمع صوت القران فيقول باستغراب
انتي مشغلة قران. طيب ازاي
خضرة
اية هو اللي ازاي. جوزي النداهة نداهتة واكيد مات ومش عايزني اشغل علية قران
رفعت
انتي زعلانة علية بقي
خضرة باستغراب
الا زعلانة دة جوزي. هو انت في اية قعدتك في مصر خليتك تنسي ان الواحدة مننا،،،،،،،
فيقاطعها رفعت بحدة
دي اول مرة تشوفيني فيها صح
خضرة
اة اول مرة. هو انت في البلد من بدري
رفعت
النداهة ندهت صابر امتي
خضرة
امبارح. هو انت مالك
رفعت
مافيش يا خضرة مافيش
ويسيبها ويمشي وخضرة بتبص علية باستغراب شديد، ،،،،،
ومن داخل عربية رفعت يجلس رفعت ويفكر في كل اللي حصل ويقول لنفسه
معني اية دة انا كبرت وخرفت ولا النداهة بتلعب بعقلي.
ويسكت للحظات للتفكير ثم يقول
لكن لا انا متاكد ان امي ماتت. وليلي بنت العسال قالت لي لو افتكرت اللي شوفتة عند الترعة هافلت من لعنة النداهة. والنداهة كانت في صورة امي وهي صغيرة وامي اخر مرة شوفتها فيها وانا بحطها بايدي في القبر ودموع عينية نزلت علي وشها وانا رجعت لعقلي وفوقت من سحر النداهة لما كاميليا دموع عيونها نزلت علي وشي. اية بقي عايز اربط الاحداث ببعضيها مش لاقي رابط غير اني دموع كاميليا علي وشي ودموعي علي وش امي. ودموع عبارة عن مية والترعة فيها مية وليلي غرقت في مية واللي غرقها لسة عايش. لازم ادخل قصر العسال يمكن هناك اوصل لخيط يقربني من حل اللغز دة، ،،،،،،
ومن عند سور قصر العسال الكبير يقف رفعت جنب السور ويبص يمين وشمال فلايجد اي اثر لحارس القصر فيقفز بكل قوتة ويمسك اول السور بيدة ويصعد السور ويدخل الي حديقة القصر ويمشي في الحديقة بحذر شديد الا انا يجد باب مطبخ صغير فيحاول فتح الباب ولكن الباب كان مقفول باحكام شديد فيلف حوالين القصر لغاية ما يصل عند باب تاني ويقترب ناحية الباب فيجد الباب وقد انفتح بشكل غريب وكانه انفتح من الداخل فبص للباب باستغراب شديد وبص في داخل القصر يشوف حد موجود ولا لا. ولكنة لا يجد احد فيدخل من الباب وبمجرد ما يدخل القصر يتقفل الباب فيبص للباب باستغراب شديد ويخرج من جيب بدلتة كشاف صغير ويتمشي في القصر بحذر شديد ويقف قصاد البهو الخاص بالقصر وهنا يسمع صوت صابر يقول
انا تعبت يا سيدنا الشيخ دة انا مخلف شيطان.
فيقف رفعت ويسمع صوت هذا الشيخ يقول
الحل في ايدك. لازم الواد دة يموت ويموت في المكان اللي اتولد في.
صوت حسان
تقصد عند الترعة الشرقية
صوت الشيخ
هو عند الترعة الشرقية ويندفن تحت المية.
ثم يسكت الشيخ للحظات ويقول
وانت يا عسال. البت اللي عندك دي لازم تخلص منها
صوت العسال
ليلي بنتي. لا.
صوت الشيخ
ليلي اتسحرت بباهر. وباهر جاي من بطن خبيثة بطن النجمة السابعة جنية المية السودا
صوت العسال
بس دي بنتي. وحرام تموت
صوت الشيخ
بس حبت باهر اللي سحرها وخلاها تشوفة شاب مع انه لسة عيل. وحبها لي هايحمي من الموت
صوت العسال بحسرة
هو يموت في ستين داهية انما بنتي حرام تموت
صوت الشيخ
باهر مش هايموت الا بموت ليلي والاثنين لازم يموتو ويدفنوا في الترعة الشرقية
وهنا تظهر قدام رفعت ليلي وتقول له
عرفت بقي انا موت لية
فيفزع رفعت ويقول
يعني انتي دلوقتي مدفونة في الترعة الشرقية
ليلي
مدفونة هناك انا وباهر حبيبي. واللي نجاك من النداهة هو حب كاميليا ليك ودموعها اللي جريت علي خدك زي ما حصل معايا ودموع باهر جريت علي خدي لاني انا اللي موت الاول
رفعت
وازاي دفنوكم تحت في الترعة
ليلي
بسحر اسود من الشيخ
رفعت
ومين الشيخ دة
ليلي
دة اللي حكم علية بالموت انا وباهر. وقتلنا بايدة وهو اللي اتحكم في خضرة وزهرة وخلاهم خدام عندة وخلي خضرة تخون صابر. مع انها عمرها ما حبت غيرة
رفعت
انتي بتقولي اية
ليلي
دة الحقيقة. الشيخ دة من ساعة ما حط رجله في البلد وانت تروح له مرة وتخرج من عندة زي المسحور ويتحكم فيك وفي حياتك كلها. لان النجمة السابعة جنية المية السودا تبقي مراتة ومخلف منها
رفعت
مين الشيخ دة
ليلي
الشيخ دة يبقي، ،،،،،،،،
وهنا يفتح باب القصر ويدخل الحارس ومعه ذلك الشيخ ويقول للحارس
صدقتني لما قولت لك ان في حرامي في القصر
فتختفي ليلي فيتجة الحارس ناحية رفعت وهو يقول
انا يا جدع انت مش طاردتك قبل كدة. رجعت ليه تاني وعايز اية من القصر
رفعت وهو يبتعد
اسمعني كويس الشيخ دة نصاب واتسبب في موت ليلي بنت العسال ظلم وانا هنا علشان اجيب حق ليلي
فيضحك الشيخ ويقول
اما حرامي بجح صحيح
الحارس وهو يقترب من رفعت يقول
بقي سيدنا الشيخ الراجل البركة يقتل. كل البلد عارفة ان ليلي اتقتلت علي ايد ابوها العسال بعد ما شافها مع باهر
رفعت وهو لا يزال يبتعد عن الحارس الغاضب. بيقول
دة كذب. اللي اقتل ليلي دة
ويهجم رفعت علي الشيخ ويمسكة من لايقة الجلباب اللي لابسة وهو يقول
ليلي بنت العسال حكيت لي علي كل حاجة. اظهر وبان علي حقيقتك يا دجال
ويشم رفعت رائحة احدي العقاقير المميزة ولكن الشيخ يزقة بعيد عنه ويمسك الحارس رفعت من ذراعة وهو يقول
هي حصلت كمان تتهجم علي سيدنا الشيخ
فيبص رفعت للحارس وهو يقول
سيدك انت
ويزق رفعت الحارس بعيد عنه ويخرج من باب القصر وهو يقول
ليلي اقفلي كل ابواب القصر
وبالفعل تقفل ليلي كل ابواب القصر ورفعت يقف برة القصر وهو بيبص للباب اللي الحارس كان هايكسرة من كتر الخبط علية فتقف ليلي قدام رفعت وتقول
لازم تخلص علي الشيخ دة علشان حقي يرجع لي
رفعت
انا مش قتال قتلة انا هاسلمة للبوليس وهما يحاكمو.
ليلي
وانت فاكر انه هايفضل محبوس في القصر مستنيك تجيب له البوليس وتيجي
رفعت
عارف ان النجمة السابعة هتساعدة يهرب. وانا عايزة يهرب
ليلي
طيب لية
رفعت
بعدين تعرفي
ليلي
طيب مش عايز تعرف مين هو الشيخ
رفعت
خلاص عرفت
ويبتسم رفعت وهو بيبص لباب القصر ويقول لليلي
عايز بس اعرف أية دور النجمة السابعة في موت ابنها باهر
ليلي
النجمة السابعة كل اللي تعرفوا ان صابر وحسان هما اللي قتلو عيالها
فيضحك رفعت ويضحك ويضحك ويقول
انا غبي غبي. كان لازم افهم من الاول ان دة مش انتقام بشر دة انتقام جن. لكن ملحوقة واحنا لسة في اللعبة، ،،،،،
ومن داخل شقة غانم في البلد يجلس رفعت في مكتب غانم ويقرأ بعض الاوراق فيسمع صوت غانم يفتح باب الشقة ويدخل الي الشقة فيمسك بورقة من الاوراق المكتوبة علي المكتب ويخرج من اوضة المكتب فيفزع غانم عندما يراة ويقول
انت بتعمل اية هنا
رفعت
جاي اطمئن عليك. اية بلاش
غانم
ودخلت ازاي
رفعت
زي ما انت خرجت من القصر.
فيصدم غانم ودقات قلبة تبتدأ تتعالي ورفعت بيقعد علي احدي الكراسي وبيبص لغانم وبيكمل قائلا
بالسحر. عارف السحر طبعا
غانم بعصبية
انا ماعرفش انت بتتكلم عن اية. وياريت تفهمني
رفعت
بس كدة
ويبص رفعت في الورقة اللي في ايدة وهو يقول
اسم صابر وحسان بيعملو عندك اية في الورقة دي. وبتاريخ اول يوم ظهرت في النداهة
غانم بعصبية شديدة وهو بيخطف الورقة من ايد رفعت بيقول
انت ازاي تسمح لنفسك تفتش في اوراقي
رفعت
انت متوعد لما حد يسالك سؤال ترد بسؤال
ويقف رفعت ويقول بعصبية
صابر وحسان فين
غانم
انا ما عرفش عنهم حاجة
رفعت
لا لا لا. الكذب حرام يا عم الشيخ
فيصدم غانم كمان مرة ويرجع للوراء ورفعت بيقول
مالك استغربت اوي اني عرفت. ريحة بنج العمليات فضحك يوم ما كنت في القصر ومعاك الحارس
غانم
اة. يبقي كدة اللعب هايبقي علي المكشوف
رفعت
بالظبط. لية بقي عملت كل دة
غانم
علشان ارجع تاني دكتور غانم صاحب اكبر عيادة في الزمالك. مش مجرد دكتور مرمي في الارياف وسط الناموس والجهل وريحة البهايم
رفعت
ولما انت مش طايق البلد اوي كدة اية اللي جابك هنا
غانم بشر
قرار نقل طلع لي كعقاب لية علشان كنت السبب في موت ابن بواب حقير مات وانا بعمل له عملية. وفيها اية دة ابن بواب يعني لو كان فضل عايش كان هايبقي وزير
رفعت بقرف
وهو ابن البواب دة يفرق اية عن ابن الوزير دة بني ادم ودة بني ادم. مين انت بقي علشان تصنف ان دة يستاهل يعيش ولا عادي لو مات
غانم
انت مثالي اوي يا رفعت وزمنا دة اللي شبهك بيموتو وماحدش بيفتكرهم لكن انا اللي بفضل وهافضل وبالسحر هابقي احسن دكتور في العالم وهاشفي اي بني ادم من اي مرض وهابقي غني ومعايا فلوس تشتري ناس شبهك تخدمني
رفعت
ولما انت عايز تكون اشهر دكتور لية لبست جلابية الدين وشوهتة باعمالك الخبيثة
غانم
علشان المتخالفين اللي هنا ما بيصدقوش الا اللي لابس عمة حتي لو دجال لكنه ييبقي كبير البلد بكام اية بيقولها وكام حديث حافظة وهو في الاصل شيطان
رفعت
ولية. قتلت ليلي بنت العسال
غانم بحرقة
علشان حبيتها وهي لا. اتمنيت اعيش معها اللي فاضل من عمري وهي لا. علشان كدة اول ما ظهر صابر وحكي لي حكايتة مع ابنه باهر قررت انتقم منها باني اخليها تحب باهر وتشوفة شاب من سنها وتتعلق بي واخليهم يصدقو انها لازم تموت معه باهر وحصل وقتلت الاثنين باهر وليلي
رفعت
غريبة والنجمة السابعة جنية المية السودا سايبتك تقتل ابنها كدة عادي
غانم
النجمة السابعة ماتعرفش اني انا قتلتهم لان في حجاب بيني وبينها ما تسمعش ولا تشوف الا اللي انا اعوزه
رفعت
ومين اداك الحجاب دة حب ليلي لباهر
غانم مصدوما
وانت عرفت ازاي
رفعت
من النجمة السابعة او النداهة اللي ندهت علي كل واحد في عيلتنا علشان تسجنة تحت المية وتنتقم مننا كلنا مرة واحدة لانها فاكرة ان صابر وحسان هما اللي قتلو ابنها وطلعت ما تعرفش ان ابنها مدفون تحت المية بسبب الحجاب اللي بينك وبينها لكن خلاص الحجاب راح والنجمة السابعة سمعت وشافت وحالا هتنادي عليك النداهة
غانم وهو مبرق عيونة
هو انت. قدرت تحضرها
وهنا يسمع غانم صوت النداهة تقول
غانم. غانم. غانم
فيصرخ غانم من الوجع ويخرج من شقتة وهو مسحور ويتجة ناحية الترعة الشرقية وعلي وش المية تقف النجمة السابعة وهي غاضبة بشدة وحولت المية الي حمم بركانية ونط غانم في هذة الحمم واحترق جسمة وذابت عظامة من بعد لحمة. وغانم بيصرخ صرخات مرعبة ثم ترجع المية كما كانت ويخرج من المية صابر وحسان ويطفو فوق وش المية جثة باهر وجثة ليلي. ،،،،،،،،
وبعدها بكام دقيقة وبعد دفن باهر وليلي في المدافن يبص رفعت لصابر وهو يقول
ياريت تكون اتعلمت حاجة من الدرس دة واللي كان ممكن يكون تمنة حياتك
صابر
والله اتعلمت يا خويا كتير. وتوبة ان كنت امشي برجلي تاني في سكة الشر
رفعت
طيب تمام. ودلوقتي يادوبك اروح اخد مراتي ونروح علشان انا محتاج ارتاح كام يوم بعد اللي شوفتة بسببك
صابر
حقك عليا يا خويا
رفعت
مش مستاهلة حقك علية. المهم انك بخير ،،،،،،
ومن داخل عربية رفعت اللي راجع بيها القاهرة تبص كاميليا لرفعت وتقول
طلعت صح يا رفعت. وماما كوثر فعلا ماتت
رفعت ضاحكا
واية الجديد. كل مرة بطلع انا صح. طالما الحكاية ماوراء الطبيعة. لازم يكون رفعت اسماعيل صح
فتضحك كاميليا ورفعت بيبص للطريق
النهاية
يارب تكون عجبتكم ومستني راي كل اللي شرفني بقراءة. القصة
إرسال تعليق