وجريت ناحية البالكونة وجري ورايا والدي وصاحبة عماد ووصل والدي ليا قبل ما امسك سور البالكونة وانط وقدر يمنعني وهو بيمنعني كان بيضرب فيا وبيقول
انت اية اتحننت عايز تموت نفسك. عايز تحرمني منك زي ما اتحرمت من امك واختك
وحاول عماد يمنعه لكن والدي كان متعصب علي الاخر وهايج لدرجة اني ما حستش بنفسي وزقيته بعيد وماكنتش اعرف ان الزقة دي هتخلي توازنه يختل ونص جسمة اللي فوق يخرج برة سور البالكونة و.،،،،،،
★قبل ما كمل لكم اللي حصل واية اللي وصلنا للمشهد دة تعالو اعرفكم ان دي حكاية سلطان. حكاية من جزئين.باذن الله النهاردة جزء وبكرة الجزء الاخير★
من تاليفي.
محمد منصور. منص.
وقبل ما نبدأ نوحد الله ونصلي علي خير خلق الله سيدنا محمد
من جوة فيلا يقعد راجل عجوز في السبعينات من عمره قدام حوض سمك كبير وجميل جدا وبيسمع موسيقي هادية من الحان عمر خورشيد وما خرجهوش من حالة الانسجام دي الا. صوت حفيدة فاروق اللي وقف وراء منه وقال
جدي. عندي ليك خبر بمليون جنية
بص له جده وهو بيضحك وقال
الكتاب اللي في مذكراتي خلص
اتنكد فاروق وقال
مين اللي قالك
الجد
هي في غيرها اختك شيرين
وهنا تظهر شيرين وفي ايديها كتاب مرسوم عليه صورة لجدها وقدام منه جبل. وكورة في ايدة وحوالين منه اعلام لدول كتير. واسم الكتاب سلطان والجبل. وقالت شرين
لا وكمان جبت اول نسخة من الكتاب من قلب المطبعة
فاروق بحدة
كمان خدي اول نسخة دة كدة بقي المطبعة دي لازم اقفلها
فيضحك الجد وهو سلطان ويقول
روق بس ولو هي جابت الكتاب فانا هخليك انت اللي تقراء
فاروق بفرحة
بجد يا جدي
ضحك سلطان وقال
جري اية يلا. انا ههزر معاك ولا اية
شيرين
بس انا اللي كنت عايزا اقرا
سلطان
اقري انتي شوية وهو شوية
فاروق
انا مشتاق اوي اقراء قصة اول مدرب مصري يوصل للعالمية. زي مو صلاح
سلطان
مش بالساهل. انا علشان اوصل للي انا وصلت له دة دفعت الثمن رجلي
وقام سلطان وقف وبدأ يمشي ناحية الركنة وهو بيعرج وبمساعدة من احفادة ويقعد علي الركنة ويبص ل شيرين ويقول
ادي الكتاب ل فاروق خلي يقراء
شيرين
مش هتصل بي بابا. يج،،،،،،،،
اتعصب سلطان وقال
البيت دة متحرم علي ابوكي لغاية ما موت. فاهمه
شيرين
جدي بابا ندم عل،،،،،،،،،
سلطان بعصبية اكتر
يوووووووووو. اسيب لك الفيلا انا وامشي وخلي هو يجي يقعد فيها
ويحاول سلطان انه يقف لكن شيرين تقول له
لا. خلاص يا جدي حقك عليه.
واديت الكتاب ل فاروق وقالت
اقراء يا فاروق
فاروق بصوت واطي في ودان شيرين
لازم سيرة بابا دلوقتي
شيرين بصوت واطي برضو
بابا هنا وواقف وراء الباب ونفسه يدخل يبوس رجل جدي
فاروق اللي اتصدم من المفاجاة
هنا
سلطان لاحظ كلامهم قال
في اية
فاروق فتح الكتاب وهو بيقول
مافيش بتقولي انا اقراء شوية وهي شوية
سلطان
طيب اقراء وسمعني
وبدأ فاروق يقراء. اللي مكتوب، ،،،،،،،،،،،
★انا سلطان عزيز سلطان. اتولد في لبنان لاب مصري وام لبنانية. وعيشت وكبرت قدام جبل من جبال لبنان. اتمنيت كتير اطلع الجبل دة لكن حلمي ما تحققش لان امي واختي ماتو في حادثة عربية. اتقلبت حياتنا بعدها اصلكم ما تعرفوش والدي كان بيحب امي ازاي. وقرر ساعتها والدي انه يصفي كل شغله في لبنان ونرجع مصر ونعيش في شقتنا القديمة في الزمالك قدام النادي الاهلي وفعلا رجعنا وانا عمري 7 س. ورغم ان مصر بلدي والمفروض عليه اني احبها. لكني كنت ديما بلاقي نفسي بحن ل لبنان والجبل اللي ياما حلمت اطلع لاخره. لكني لقيت ان في جبل تاني شكله اكبر من جبل لبنان وهو جبل خوف والدي عليه المبالغ في. خوف والدي خلي الخوف نفسه يستغرب من اللي بيعمله معايا. ياكلني بنفسه لانه خايف اني ازور يشربني بنفسه انزل ينزل معايا ويبص علي الطريق وهو خايف ومرعوب لاخر شئ لي في الدنيا يضيع منه. كانه كان بيقول للدنيا مش هاسيبك تحرميني كمان من دة. قرايبة وصحابه شافو حالته بالشكل دة حاولو كتير يجيبوا لو عروسة لكنه كان ديما لا. لا لية. علشان ما كنش شايف ان في ستات بعد امي يملو عينه. فضل يحبها وانا فضلت كل اللي بعمله في حياتي اروح المدرسة مع والدي وارجع مع والدي. وفي الشقة. اقف في البالكونة اتفرج علي تدريبات لعيبة الكرة في النادي اللاعيبة اللي بشفهم في التيلفزيون قدام عيني علي الحقيقة حبيت الكرة وكان نفسي العبها اوي واتحيلت عليه واترجيته كتير لكنه رفض لانه خاف عليه ليحصل لي حاجة. وكل اللي قدرت اعمله اني ارجع اتفرج من البالكونة علي اللاعيبة وعملت كورة شراب كدة وفضلت العب بيها في اوضي كنت حابب اوي اني اقف جون. كنت اخبط الكورة في الحيطة ترجع لي تاني. اهو كنت بتسلي وخلاص ماهو انا اصلا ما عنديش اصحاب لان والدي كان خايف اصاحب حد يعرفني طريق السجاير. مثلا او اي طريق تاني اموت بسببه. لغاية ما جة اليوم اللي بعديها اتغيرت حياتي نهائي. وبدات احط رجلي علي اول الجبل. واطلع بس تعالو في الاول احكي لكم بالتفصيل بسبب خوف والدي علية انا بقيت عامل ازاي.
وانا عندي ست سنين رسمت في اوضي تلت صور لعيال من سني اول صورة بتاعت صاحبي فادي. ودة رغاي اوي ما بيبطلش كلام نهائي عامل لي صداع. بس بحبة. صاحبي بقي ومش بحبة يبطل كلام. مع انه عمره ما اتكلم. ويتكلم ازاي وهو مجرد صورة علي حيطة وصاحبي التاني معاذ دة بقي الواد الشقي بتاع الشلة بيعمل كل حاجة غلط لدرجة انه في مرة خلاني اشرب سجاير. مرة واحدة ماحدش يقول لبابا. علشان ما يضربنيش مع اني عارف ان معاذ عمره ما اداني سيجارة ولا انا عمري كنت شقي. بس صاحبي. وبدات اعيط وامسح دموعي. مش نكد والله بس انا من حقي يكون ليا اصحاب مش كدة برضو. سيبونا من السيرة دي وتعالو اوريكم صاحبتي التالته ياسمين دي بقي اللي مجننا احنا التلاته بشعرها الناعم الاسود ويا سلام لما تعملو طفاير بس كلام في سركم انا عارف انها بتحبني وما تحبنيش لية انا الوحيد الحقيقي اللي موجود في الاوضة دي. الباقي مجرد خيال. هتقولو مجنون. لا. خالص انا عاقل واعقل من بابا كمان. هو احنا لما نخبي اللي بنحبهم الموت ما يقدرش يوصل لهم. طيب ازاي. اقول اية سجن والسجان ابويا دة كان اصعب جبل واقف قصاد مني ومش قادر اشوف اللي جاي علشان مش قادر اعدي ولا قادر اطلع. بس لكن طريق بداية والجبل هطلعوا يعني هطلعوا وبداية طريقي كانت من اليوم دة. بالتحدي ليلة عيد ميلادي ال 10. لسة فاكرة زي ما يكون امبارح لما والدي نزل واشتري ليا تورته الشيكولاته اللي بعشقها وحط لي شمعه واحدة برقم 10. وفي عز ما انا وهو بس بنحتفل سمعنا صوت خبط علي الباب استغرب والدي اوي وقال
ودة مين اللي جاي دلوقتي
وراح وفتح الباب وانا بتابع باهتمام اوي مين اللي جاي دة احنا ما حدش بيجي يزرنا ولقيت والدي بيترمي في حضن الراجل اللي فتح له الباب وكان بيقول
عماد. انا مش قادر اصدق عينية معقوله اشوفك بعد السنين دي كلها
عماد وهو في حضن والدي
لا. بجد وهو انت لو عاوز تشوفني ترجع مصر من تلت سنين واعرف بالصدفة انك هنا
عزيز
حقك عليه. بس سلطان واخد كل وقتي
عماد باستغراب
سلطان. مين
عزيز
ابني سلطان.
وبص والدي ساعتها ناحيتي ولقيت اللي اسمه عماد دة بيبص لي وهو مش مصدق اني ابن عزيز. ورجع بص ل والدي وهو بيقول
بسم الله ماشاء الله. كبرت يا عزيز وبقي عندك عيل طولك
عزيز
وكان عندي بنت كمان بس،،،،،،،
استغرب عماد وقال
بس اية
عزيز
ماتت هي وامها في حادثة عربية
عماد
لا حول ولا قوة الا بالله. شد حيلك يا صاحبي
عزيز وهو بيتمالك نفسه بالعافية
الله يرحمهم. ليك نصيب تاكل معانا من التورته
عماد
انسي انت عايز مدرب الاحمال البدنية في النادي الاهلي يبقي بكرش
هنا بقي لقيت نفسي بدخل في الحوار ما بينهم وبقول
اية دة انت بتخش النادي الاهلي وبتشوف اللعيبة وكدة
ضحك عماد وقال
مش بدخل وبس دة انا المدرب بتاعهم وكنت في التمرين وماصدقتش عينية لما شوفت ابوك واقف في البالكونة بيشرب سيجارة
سلطان
طيب انا نفسي ادخل النادي الاهلي
ساعتها والدي بص لي وقال بحدة
تاني.
سلطان
يا بابا نفسي العب معاهم.
عزيز بعصبية
اخاف عليك. تروح مني
سلطان
اروح فين بس دة انا هبقي قدام منك
عماد
عزيز طالما ابنك بيحب الكورة خلي يلعب
عزيز بعصبية شديدة
ولو مات وهو بيلعب. انت هتنفعني
عماد
من امتي الكورة بتموت اللي بيلعبها
عزيز
في لعيبة كتير وقعت علي دماغها وبلعو لسانهم وماتو
عماد
اولا هما مش كتير. ولا حاجة ثانيا في اكتر من اللي ماتو بيلعبوا كورة ولسة عايشين
عزيز
قولت لا. مش هيلعب
سلطان
يارب كنت موت مع اللي ماتو. علي الاقل كنت ارتحت
ضربني وقتها والدي بالقلم صعبت عليه نفسي اوي وقولت وانا بعيط
كدة طيب والله لموت نفسي وارتاح من السجن اللي انا عايش في بسبب خوفك عليه دة.،،،،،،،،
هنا فاروق قفل كتاب المذكرات وبص ل جدة سلطان وقال
جدي ازاي طفل زيك عنده 10 س. يفكر في الانتحار وجيبتها منين اصلا الفكرة دي
سلطان اتنهد وقال
من التيلفزيون. كنت ديما اشوف البطل او البطلة كل ما يقعوا في مشكلة جوة الفيلم يا ما تموت نفسها او يشربوا خمره. ماحدش مرة فكر انه يقوم يتضوء ويصلي ركعتين او يقراء في المصحف. يمكن المشكلة تتحل من عند ربنا
شيرين
بس الانتحار دة فكرة غلط يا جدي.
سلطان
عارف. بس كل اللي اعرفه في دنيتي وقتها كان التيلفزيون ما هو كان الشئ الوحيد اللي كان ديما قدامي وبيصبرني علي اللي السجن اللي انكتب عليه اعيش في بفرمان من والدي. الغلط مش علي العيل ابو 10 س. الغلط علي الاب اللي دفن ابنه بالحياة. بعد موت امه واخته. بس ارجع واقول الله يرحمه
وبص سلطان ل فاروق وقال
كمل ،،،،
ورجع فاروق يقراء وقال، ،،،،،
وجريت ناحية البالكونة وجري ورايا والدي وصاحبة عماد ووصل والدي ليا قبل ما امسك سور البالكونة وانط وقدر يمنعني وهو بيمنعني كان بيضرب فيا وبيقول
انت اية اتحننت عايز تموت نفسك. عايز تحرمني منك زي ما اتحرمت من امك واختك
وحاول عماد يمنعه لكن والدي كان متعصب علي الاخر وهايج لدرجة اني ما حستش بنفسي وزقيته بعيد وماكنتش اعرف ان الزقة دي هتخلي توازنه يختل ونص جسمة اللي فوق يخرج برة سور البالكونة ولكن عماد صاحبة طار بمعني الكلمة. ومسك ايد والدي اللي كان بيبص لعماد بصة معنها اوعي تسيب ايدي. وعماد بدأ يسحب والدي لفوق وهو بيقول
ساعدني واطلع معايا
وبدأ والدي يمد ايدة التانية ويمسك في السور وقدر يطلع ويبقي جوة البالكونة وبص لي وكنت مستني يضربني لكني لقيته بياخدني في حضنة وبيقول لي
كدة برضو يا سلطان كنت عايز تموتني
عيط وانا حضنه وكنت بترعش من الخضة عليه وقولت
والله ما قصد انا بس كنت، ،،،،،،،،،،
ولقيته فجاة شالني ورماني برة البالكونة وبقي جسمي كله متعلق في الهواء وماسكني بايدة وعماد بيقول
انت اتجننت يا عزيز. عايز ترمي ابنك من البالكونة
بص له والدي وقال
لازم اخلي يشوف الموت بعيونه زي ما انا شوفته. ويعرف ان الموت رعب. وانا بحمي منه
قولت وانا عمال ابص للشارع ومرعوب
حقك علية يا بابا. مش هعمل كدة تاني
عماد وهو عمال يحاول يسحب ذراع والدي اللي ماسكني بي
عزيز حرام عليك ابنك. الواد ما كتش يقصد يوقعك من البالكونة
عزيز بجنون
زقني بايدية الاثنين وماكنش يقصد. كان عايز يخلص مني علشان انا خايف عليه
عماد
خلاص طلعه وهو مش هيعمل كدة تاني
بص لي والدي. في عيوني زي اي شيطان. قلبه مخلوق من جهنم. وقال
تحب تموت ولا تعيش معايا زي ما انا عايز
سلطان اللي عمل حمام علي نفسه من الخوف
اعيش معاك زي ما انت عايز. بس طلعني
وبدأ يسحبني لفوق لغاية ما دخلني جوة البالكونة وانا مش مصدق نفسي اني لسة عايش ولا مصدق ان دة ممكن يكون اب. بص علي البنطلون المبلول وقال
علي الحمام. وانت مش صغير وعارف المفروض تعمل اية
مشيت من قدامه ودخلت اوضي اجيب هدوم غير اللي اتبلت عينية جت في عيون اصحابي فادي ومعاذ اللي انا رسمتهم بايدية علي الحيطة وسمعتهم بيضحكوا. وبيقولو
ابو شخة اهو. اهو.
الوحيدة اللي كانت زعلانه عليه ياسمين وكانت بتعيط علي اللي حصل لي. وماكنتش قادر ابص في عيونه خد هدومي النظيفة وجريت علي الحمام. وهنا سمعت صوت والدي كان بيزعق ل صاحبة عماد وبيقول له
دة ابني وانا حر في تربيته.
عماد بعصبية
اللي بتعملو دة غلط. وهيخلي الواد يكرهك. اوعي تفتكر انك باللي بتعمله دة. ابنك هعيش. والموت مش هيقدر يطوله. الموت ما حدش يقدر يدخل معه في تحدي.
عزيز اللي بدا يهدا شوية
انا مش بتحدي الموت ولو قولت او فكرت في كدة ابقي كافر. واعوذ بالله من الكفر انا بس خايف عليه. الموت خطف مني مراتي وبنتي. ودة خلاني ما بقتش عزيز اللي الناس كلها تعرفه بقيت عزيز تاني. مش قادر افهمه
وبدات اسمع صوت والدي بيعيط. لكن مع صوت عياط والدي سمعت صوت تاني بيعيط بس صوت قريب مني قريب لدرجة انه معايا في الحمام بصيت حوالين مني ولقيت ياسمين صاحبتي. بس برة الصورة اللي انا رسمها لقيت ياسمين قدامي بشحمها ولحمها اتصدمت واتفزعت وخرجت اجري من الحمام، ،،،،،
هنا يقفل فاروق كتاب المذكرات بتاعت جدة ويتوقف عن القراءة فتقول له شيرين.
قفلت الكتاب وبطلت قراية لية
لكن فاروق كان بيبص لجدة سلطان اللي كان عمال يضحك وبيقول
مش عارفة يعني يا شيرين. فاروق بيخاف من القصص الرعب
فاروق بصوت الجد
جدي اللي انا قريته دلوقتي دة حصل لك فعلا وانت صغير
سلطان وهو لسة بيضحك
اومال يعني بضحك علي الناس. دي مذكرات مش قصة من تاليفي
فاروق
يعني انت طلع لك جنية في الحمام. وكملت حياتك عادي
سلطان
ومين بس قال انها جنية
فاروق
اومال هتكون اية
سلطان
انا ماعرفش هي اية. بس لو كملت قراية ممكن نعرف هي اية
فاروق
لا. انا مش هكمل لغاية هنا وحلو اوي. حتي الحمام مش هدخله تاني
ضحكوا كلهم وهنا شيرين مدت ايدها وخدت الكتاب من فاروق وقالت
لو خايف روح انت وانا هكمل قراية مع جدي
قام فعلا فاروق وهو بيقول
ايوة هقوم.
وراح فاروق لغاية الباب لكنه وقف مرة واحدة وبص ناحيتهم فقال سلطان وهو لسة بيضحك
بلاش تروشنا. انت مش هتقدر تروح من غير ما تعرف حكاياتي كاملة تعالي اقعد
رجع فاروق وقعد وبصت له شيرين وقالت
لازم يعني تخرجنا من المود
وفتحت شيرين المذكرات وبدات هي اللي تقراء.
بعد ما شوفت ياسمين جوة الحمام خرجت جري من الحمام وانا عريان وجريت ناحية والدي ووقفت قدام منه والمية بتنزل من علي جسمي كله وعماد صاحبة بيبص لي مستغرب وقولت
ياسمين طلعت لي في الحمام
بصوا الاثنين لبعض. باستغراب وقال والدي بعد مارجع يبص لي
ياسمين مين بس اللي تخليك تخرج من الحمام كدة وانت جسمك كله مبلول. مش خايف تبرد
قولت وانا بترعش
والله في الحمام انا شوفتها بعنية. مش عايز تصدقني لية
عماد
تعالي يا عزيز نروح الحمام نشوف مين ياسمين دي
ومشيوا هما الاثنين ناحية الحمام وطبعا هيفتحوا الحمام مش هيلاقوا حد. متوقع وحصلت كتير في افلام. وابقي انا المجنون اللي بيشوف حاجات مش حقيقية لكن والله العظيم انا شوفتها معايا في الحمام. مهما اقول ماكنتش هتصدق وقال والدي
البس هدومك وادخل ارتاح في اوضك شوية
عماد
لا. ما ينفعش يقعد لوحدة. ادخل البس واطلع اقعد معانا علشان نكمل عيد ميلادك
بصيت لوالدي مستني اخر قرار اقعد في اوضي ولا اطلع
لقيت والدي بيقول
اطلع علشان نكمل عيد ميلادك
وخدني في حضنه. وباس دماغي وقال
ما تزعلش مني. انا بحبك وخايف عليك
حضنته اوي ودخلت اوضي وبصيت لصورة ياسمين اللي علي الحيطة وبصراحة بقيت خايف منها اوي روحت جايب مية وبدات امسح الصورة وانا بقول
انا زعلان منك علشان كدة بمسحك.
والغريبة اني وانا بمسح الصورة لقيتها بتعيط لكني قولت انا بيتهئ لي. وخلصت مسح الصورة وبصيت للصورتين التانين. بتاعت فادي ومعاذ وقولت لهم
وانتم اللي هايزعلني منكم همسحوا فاهمين ولا. لا.
وهو انا هستني لما تزعلوني كفاية انكم ضحكتوا عليه وقولتو ابو شخة اهو
وبدأت امسح الصور وانا بقول
زي ما رسمتكم هرسم غيركم.
ونظفت الاوضة بتاعتي ورجعت الحيطة زي ما كانت لكن فضل مكان صورة ياسمين بيجيب مية ومهما امسح في المية ما كانتش بتتمسح وفضلت ابص للحيطة وانا مستغرب لكني سمعت صوت والدي بيقول
يلا يا سلطان
وخرجت من الاوضة وانا مش قادر اشيل عيوني عن الحيطة. ووقفت تاني قدام التورتة واتعاد عيد ميلاد وماتعرفوش انا كنت فرحان قد اية. وبدات والدي يقطع التورتة وغصب علي عماد انه ياكل ولو حتة صغيرة وفعلا كلها وبص عماد لوالدي
بمناسبة ان النهاردة عيد ميلاد سلطان. احنا هننزل النهاردة ونقضي بقيت اليوم في النادي واخلي سلطان يتصور علي كل لاعبية النادي الاهلي
فرحت اوي ولقيت نفسي بقول
بجد.
وراحت فرحتي لما بصيت لوالدي لقيته ساكت وملامح وشة بتقول لا. لكنه نطق وقال
وماله نقضي بقيت اليوم في النادي.
جريت وانا فرحان وخد والدي بالحضن وقولت وانا ببوسة
انا بحبك اوي يا بابا. ،،،،،،
ولبست احلي ترنج عندي ونزلت مع عماد ووالدي ودخلت النادي الاهلي وكنت مبهور جدا ومش مصدق ان النادي اللي بفضل ابص عليه من فوق من شباك اوضي او بالكونة الشقة اكون جوة منه في يوم من الايام. واتصورت مع كل اللاعيبة والمدرب الاجنبي كمان اللي انا مش فاكر اسمه. وقعدنا في كافتريا النادي وطلب لنا عماد عصائر فريش وفي وقت ما كنت بشرب العصير بتاعي اشوف فادي ومعاذ وياسمين. ببلعبوا في الملاهي اللي جنب الكافتريا برقت واتصدمت. هنا بقي قفلت شيرين المذكرات وبصت لجدها سلطان فقال سلطان
نعم. انتي كمان. ماهو كل سطرين لازم نقف
شيرين
هو انت مش عايزاني اقف ازاي. لما تقول انك شوفت التلاته اللي انت رسمهم بايدك قدام منك في الحقيقة هي الصور لابسها جن ولا اية.
ضحك سلطان اوي. وهنا فاروق قال
لا يا جدي مش وقت ضحك خالص. قول بجد ازاي دة حصل
سلطان ل فاروق
خلي اختك تكمل قراية وانت هتعرف ازاي دة حصل
بص فاروق ل شيرين وقال
كملي قراية خلينا نفهم
فتحت شيرين المذكرات تاني وبدات تقراء. ،،،
شوفت التلاته وكنت هتجنن وقومت من مكاني فقالي والدي
سلطان انت رايح فين
وقفت وبصيت له وقولت
رايح العب شوية في الملاهي دي
وشاورت علي الملاهي فقال له عماد
خلي يروح يلعب يا عزيز
عزيز
اخاف عليه يقع ويتعور
ضحك عماد وقال
عزيز. سيب سلطان يلعب
بص لي والدي وقال
روح بس اوعدني تخلي بالك من نفسك
وعده وخد بعضي ومشيت ودخلت الملاهي ورغم كل الالعاب اللي فيها الا انا ما كنتش شايف غير التلاته فادي ومعاذ وياسمين قربت منهم وبصيت لهم اوي وهما بيلعبوا مع بعض ومديت ايدي المس فادي علشان اتاكد انه حقيقي وقبل ما المسهم لقيت واحدة ست باين عليها المربية بتاعتهم قالت لهم
خالد. هات اخواتك ويلا علشان ماماتكم عايزاكم
بص ناحيتها معاذ اللي هو خالد وقال
قولي ل مامي هنلعب 5 دقايق تاني بس
الست دي قالت
مش هينفع.
وخرجوا من الملاهي وهما زعلانين لكن الوحيدة اللي كانت بتضحك ياسمين. اللي بصت لي وهي ماشية بس يا تري اسمها ياسمين فعلا. ولا هي كمان ليها اسم تاني. قولت اخرج وراهم عايز اتاكد هما بجد ولا. خيال لسة هخرج من الملاهي وراهم لقيت والدي واقف قدام مني بالظبط بيبص لي وبيقول
عمال اندهه لك وانت خارج من الملاهي ومش بترد عليه. ممكن اعرف رايح فين
بصيت لوالدي وقولت
مش رايح. انا كنت بلعب
عزيز
سلطان انت برة الملاهي
هنا قال عماد
ابنك باين عليه عجبته رضوي
بصيت له وقتها وقولت
رضوي مين
عماد
رضوي البنت اللي كانت بتضحك لك وهي خارجة من الملاهي وانت كنت ماشي وراها
سلطان
هي اسمها رضوي
عزيز بحدة وضيق
وانت هيفرق معاك اسمها في اية. اظن لغاية هنا وحلو كدة يلا علشان نمشي
عماد
نمشي فين انت لسة جاي النادي سيب سلطان يلعب شوية وتعالي احنا نرغي زي زمان
عزيز وهو بيمسك ايد سلطان
خليها مرة تاني. علشان حاسس اني مصدع
وفعلا وقتها خدني والدي وخرج بيا من النادي وانا ما بقتش عارف طيب انا غلط في اية علشان يخليني اروح بدري كدة قبل ما انبسط واكمل اليوم في النادي ودخلت اوضي وقفلت الباب عليه وبصيت للحيطة اللي كان عليه صحابي التلاته ورجعت ارسمهم تاني وبصيت ل فادي وقولت انت خالد. وانا سلطان. والصورة اللي في النص لاخوهم الوسطاني اللي مالحقتش اعرف اسمه ففضلت اندهه له ب معاذ. وبصيت لصورة ياسمين وابتسمت وقولت
رضوي. انا سلطان
ومديت ايدي ناحيتها قال يعني بسلم عليها وهنا حسيت ان لمست حد بجد. لمست ايد انسان طيب ازاي زاي. بعد عن الحيطة شوية وانا خايف وببص للصورة من بعيد وهي بتبص لي. قولت اقوم من قدمها وروحت بعيد شوية كدة ولقيت نفسي بقوم من مكاني وبروح اسلم تاني علي الحيطة لقيت ان بحط ايدي علي حيطة ماحستش بنفس اللي حسيته اول مرة. هنا بقي اتاكد ان الوحدة تقريبا كدة خليتني مريض نفسي مسكت الموبيل بتاعي وقولت اخش علي الفيس ولا اتفرج علي اي فيديو يوتيوب هنا لقيت رساله في ماسنجر من حد ماعرفهوش فتحت الرساله لقيت مكتوب فيها
★رغم اني اول مرة اشوفك لكني حاسة اني اعرفك من زمان. انا رضوي★،،،،،،
هنا شيرين قفلت المذكرات تاني وبصت لجدها سلطان وقالت
انت عايز تجننا صح
ضحك سلطان وقال
بت انتي نسيتي اني جدك
شيرين
لا ما نستش بس. ازاي رضوي دي عرفت توصل لك من غير ما تتكلموا مع بعض كلمه واحدة
فاروق ل شيرين
انتي كل دة لسة ما فهمتيش
شيرين باستهزاء
يعني انت اللي فهمت اوي
فاروق
طبعا يا بنتي.
سلطان
وفهمت اية بقي
فاروق
التلت صور اللي انت رسمتهم. الجن دخل فيهم وياسمين دي ولا رضوي هي جنية صعبت عليها وحبتك.
ضحك سلطان اوي وقال
ازاي بس جنية وهي تبقي جدتك
اتصدمو الاثنين وقال في صوت واحد
هو انت بتتكلم علي تيتة رضوي
سلطان
وهو انا عرفت رضوي غيرها.
شيرين وهي بتخبط ايدها في دماغها
لا بقي. كدة دماغي هتهنج منك. لما هي انسية عرفت توصل لك ازاي
سلطان
ما انتو لو تصبروا وتقري وانتي ساكتة هتفهمي. انما لازم كل شوية نقفل الكتاب ونسال
شيرين بكسوف
جدي مش ملاحظ انك بتكسفني
سلطان
لا ملاحظ وقاصد.
ضحك فاروق اوي. بص له سلطان وقال
بتضحك علي اية. ما اسخم من سيدي الا سته. ما انت سخام زيها. قال جنية صعبت عليها وحبتني
ضحكت شيرين وقالت ل فاروق
منور يا سخام
فاروق وهو مكشر
طالعه منك عفشة. اقري يا بت واخلصي
ورجعت شيرين تقراء ،،،،،،،،
بصيت للرساله وانا مش مستوعب وكتبت
★انتي عرفتي ازاي توصل لي ★
كتبت
★شوفت واقف مع الكابتن عماد سالته عليك وعرفت اسمك وكان سهل اوصل ل حسابك علي الفيس لان والدك من اصدقاء كابتن عماد ومن حساب والدك وصلت لك. قولي بقي احنا ماتقبالناش قبل كدة ★
كتبت
★لو قولت لك احنا اتقابلنا فين قبل كدة هتقولي عليه مجنون ★
بعتت الايموشن دة 😂😂😂 وكتبت
★لا قول ووعد مش هقول عليك مجنون ★
كتبت
★انا رسمك في اوضي انتي واخواتك خالد والتاني اسمه اية صحيح ★
كتبت
★وائل★
استغربت الاسم و كتبت
★وائل★
ماعرفش هي فهمت ازاي اني استغربت وكتبت
★مالك مستغرب لية. ولا مش عاجبك اسم وائل★
كتبت
★اصل انا كنت مسمي معاذ. اسم احلي من وائل ★
بعتت الايموشن دة 😂😂😂 وكتبت
★خلاص لما تبقي تيجي النادي تاني وتلعب معانا اقول يا معاذ. ★
ضحكت وكنت اول مرة اضحك من قلبي وهنا لقيت الباب بيتفتح ووالدي بيخش ماعرفش ليه حطيت الموبيل تحت المخدة لكني خوفت منه. وهو لاحظ اللي حصل فقرب مني وقال
شوفت النور لسة منور قولت اسالك لو تحب تتعشي معايا
بس باين عليك كنت بتعمل حاجة ومش عايزاني اعرفها
ووقف قدام مني بالظبط فقولت
لا. خالص والله انا بس،،،،،،،
بحزم شديد وبصوت ما ينفعش بعدي تقول لا. قال
طلع الموبيل
مديت ايدي تحت المخدة وطلعت الموبيل ومديت ايدي بالموبيل ناحية والدي بص في الموبيل وقال
بتخبي الموبيل لية. طالما بتتفرج علي الفيس بس
استغربت وسالت نفسي هو مش شايف المحادثة اللي بيني وبين رضوي واداني الموبيل تاني وقال
قوم يلا علشان تتعشي معايا
بصيت في الموبيل لقيت المحادثة شغاله طيب لية والدي معلقش معقوله مشفهاش ولا شافها وسكت ولا وسكت شوية مش قادر اقولها لكن لازم اقولها وقولت لنفسي ولا مافيش محادثة اصلا وانا بقيت مجنون.،،،،،،،
هنا بقي سمع سلطان صوت حركة وراء باب الاوضة بص لشيرين وفاروق وقال بعصبية
مين معاكم هنا
ارتبكا الاخين وقال سلطان بعصبية شديدة
مين اللي سمح لابوكم بانه يدخل الفيلا
هنا ظهر رجل.في اواخر الاربعينات من عمره وهو منير ابن سلطان الوحيد بص ل سلطان وقال
لحد امتي هتفضل غضبان عليه
سلطان بعصبية شديدة
لغاية ما تدفع ثمن اللي عملته
شيرين
يا جدي علش،،،،،،،،،،،
سلطان بنفس العصبية والحدة
انتو ما تعرفوش دة عمل فيا اية. يبقي ما تطلبيش مني اني اسامحه.
وشاور بصباعه من فوق ل تحت وهو بيقول
في اخر المذكرات عيالك والدنيا كلها هيعرفوا انت عملت في ابوك اية. ومن النهاردة. بدل ما ضيع وقتك في انك تطلب مني اني ارحمك. روح اتضوء وصلي يمكن اللي خلقك يرحمك
منير وهو بيعيط
باب،،،،،،،،
سلطان. بنفس الحدة وهو مش عايز يهده خالص
اطلع برة. وفكر هتقول اية لعيالك لما يعرفو حقيقتك. واوعي تفكر انه هيخيل عليه فكرة انك جاي وقال اية ندمان وانا عارف انك بتعمل دة كله علشان اشيل سيرتك من المذكرات بتاعتي. لا يا منير الفضيحة مكتوب لك
منير بصوت الشر
طالما عايز تفضحني. ومش حابب الستر ينكتب لي ف انا كمان هفضحك وهعرف احفادك حقيقتك وانك علشان تتجوز رضوي كنت عايز تقتل ابوك
بصوا الاحفاد ل سلطان وهما مصدومين لكن ضحكة سلطان خلت الصدمة تتحول لاستغراب شديد وقال سلطان
هو انت فاكر ان مشهد زي دة هلغي من مذكراتي. انا كاتب بالتفصيل كل اللي حصل. خلاص كدة ولا لسة عندك حاجة تاني تهددني بيها
منير
انا جيت لغاية عندك بدل المرة تلاته. وبعد كدة مش انا اللي هاجي انت عارف وانا عارف مين نفسه يعرف طريقك
اتسند سلطان علي العجاز بتاعه وقام وقف. وضرب سمير بالقلم وقال
وصل له دة لغاية ما شوفو بنفسي وادي له بالجذمة
مسك سمير خده واتصدم من المفاجاة ما كنش متوقع ان يضربه بالقلم وقدام عياله. قامت شيرين. ومن بعديها فاروق علشان يراضو ابوهم لكن سمير بص لهم وقال
انا كويس. ما تقلقوش عليه. واللي بيني وبين جدكم انتم ملكوش دعوي بي.
وخرج من الاوضة. ورزع الباب وراء منه بعصبية شديدة. كل دة بيحصل وشيرين وفاروق متابعين للمشهد ومستغربين اوي فرجع سلطان يقعد وبص لشيربن وقال بابتسامه خفيفة
ما تعملي نسكافية بلاك. من ايدك الحلوة دي
بصت شيرين لجدها باستغراب شديد ومختلفش عنها فاروق وما بقتش عارفة ترد تقول اية. فقال الجد متابعا لها
طالما مش عايزا تقومي اقوم انا
بصت له شيرين وقالت
لا خليك يا جدي انا هقوم
وقامت شيرين وخرجت تعمل النسكافية وفضل السكوت مسيطر علي المكان لدقيقتين بالظبط وهنا قال فاروق
جدي هو اللي بينك وبين بابا
بص له سلطان وقال
ولا اي حاجة. كل الحكاية ان خطف مني البت اللي كنت بحبها واتجوزها هو
وضحك سلطان لكن القهر كان باين في عيونه لكنه فتح ذراعته ل فاروق وقال
ما تيجي في خصني.
قام فاروق واترمي في حضن سلطان وسلطان اتنهد اوي وقال لنفسه
فيك من ريحة ابوك اللي نفسي اخده في حضني كدة. لكن اللي عمله خلي بيني وبينه جبل عالي يا عالم هعرف اعدي زي اللي قبله ولا مش هقدر
واستمر الحضن ل دقيقة كاملة وهنا دخلت شيرين بتلت مجات نسكافية وشافت فاروق في حضن سلطان فقالت
طيب اشمعني فاروق بقي. وربنا انا كدة ازعل
زق سلطان فاروق بعيد عنه بهزار وقال
وهو انا اقدر علي زعلك يا قمر انت
وخد سلطان شيرين في حضنه وهو بيقول بهزار
برضو حضن البنات يرد الروح.
وبص بطرف عينه ل فاروق
مش زي حضنك يا سخام
قالت شيرين وهي في حضن جدها
منور يا سخام
ما علقش فاروق وخرجت شيرين من حضن جدها وراحت تدي لكل واحد المج بتاعه فبصلها سلطان وبص للتلت مجات وقال
اراك توزع من مال امك
شيرين
لية بس كدة
سلطان
اصلك عملتي تلت مجات. هي زياتكم ليا علي طول كدة بخراب بيتي
شيرين وهي بتضحك
نعيش ونخرب
ضحك سلطان وقال وهو بياخد شفطة من مج النسكافية
طيب. مش هتقري بقي ولا اية.
شيرين
خلي فاروق. اصلي ما بعرفش اعمل اي حاجة وانا بشرب نسكافية
خد فاروق منها الكتاب وهو بيقول
احنا وقفنا فين
سلطان
عند رسائل الماسنجر بيني وبين رضوي واللي مشفهاش والدي
فتح فاروق الكتاب وقال
افتكرت.
وبدأ يقراء،،،،،،،،،،
فضلت ليلة بحالها مش عارف انام وبفكر لية انا بكلم رضوي ولا ما كنتش بكلمها وفتحت النت تاني وكتبت لها رساله
★لو صاحية ابعتي رساله عايز ادردش معاكي★
ومافيش اي رد لغاية ما عينية راحت في النوم وتاني يوم صحيت في ميعاد المدرسة عادي ولبست هدومي ولقيت والدي جاهز يوصلني قولت له
والدي انا كبرت وبقي عندي 10 س. عايز اروح المدرسة لوحدي
بص لي باستغراب قوي وقرب مني وبص في عينيه وقال
طول ما انا عايش مش هتروح في حتة من غيري
بلعت ريقي خايف اقول لا. لكني وماعرفش ازاي قولت
انت لية كدة. لية ديما عايز تخلي العيال يشوفوني ويضحكوا عليه. ويقولو العيل اللي ابوه بيجيبوا ويرجع ياخده اهو.
عزيز
مش عارف لية حاسس انك المرة دي صوتك علي عليه
ومسكني من ايدي وراح بيا ناحية البالكونة وانا بحاول اسحب ايدي من ايدة وهو عمال يقول
طالما مش عجبك اللي انا بعمله يبقي الموت احسن ليا وليك
ودخل بيا البالكونة وانا عيط اوي اوي وكل اللي عليه عمال اقول
معلش والنبي والله ما اقصد حقك عليه.
وقف بعد ما كان بيسحبني وبص لي وقال
قول اسف يا بابا وعمري ما هقول كدة تاني
كنت بترعش من الخوف والرعب لكني قولت
اسف يا بابا وعمري
والعياط خلاني اقطع الجملة مش قادر اتكلم لكنه طبطب عليه ما بقتش قادر اميز الطبطة دي حنية ولا تهديد لكنه قال مع الطبطة
عمري ماهقول كدة تاني
قولت
عمري ما هقول كدة تاني
وروحت المدرسة ومابقتش عارف اية بيتقال واية بيتشرح كل اللي عليه باصص للسباورة وخلاص وجت الفسحة وفضلت قاعد في الفصل ماليش نفس العب وفي عز منا قاعد اشوف اخر حد كنت ممكن اشوفه في المدرسة رضوي ايوة رضوي ازاي طيب وانا في المدرسة بقالي تلت سنين من يوم ما رجعنا مصر هي ما شافتنيش علشان كانت ماشية مع راجل طويل عرفت بعد كدة انه باباها قومت وخرجت من الفصل وقربت منهم لقيت باباها دة واقف مع ابلة انشراح. وكانت انشراح بتقول
مش عايزاك تقلق علي رضوي اوراق نقلها هتخلص النهاردة وبكرة بالكتير تيجي من اول اليوم عادي وانا وصيت عليها وهتبقي في احسن فصل عندنا. خامسة. تالت
فرحت اوي دة الفصل بتاعي يعني رضوي هتبقي زمبلتي في الفصل واشوفها كل يوم. هنا بقي شافتني رضوي فرحت هي كمان وقالت
بابا. تعالي اعرفك علي صديق ليا.
واستغربت لما لقيتها بتقرب مني هي وباباها وبتقول
دة بقي سلطان. عضو جديد معانا في النادي الاهلي بذمتك يا بابا مش تحس انك تعرفوا من زمان
بص لي باباها اوي وقال
فعلا انا حاسس اني شوفتك قبل كدة. انت ابن مين
سلطان
انا ابن المهندس عزيز سلطان.
فكر شوية الاب وفضل بكرر الاسم يمكن يفتكر حاجة وقال
عزيز سلطان بتاع لبنان. يا علي الدنيا. انت ابنه سلطان كبرت يا واد
مفهمتش حاجة وبصيت ل رضوي اللي كانت برضو مش فاهمه حاجة فقال الاب
انا كنت جاركم في لبنان وكنا بنروح وبنيجي عندكم وانت عندك تلت او اربع سنين. وكنت ديما بتلعب مع خالد ورضوي ووائل.في جنينة الفيلا لغاية ما حصلت خناقة كبيرة بين والدك وولدتك خناقة كانت هتوصل للقتل. وادخلت وحاولت افهم في اية واصلح ما بينهم لكنكم عزلتوا وسيبتهم الحي اللي كنا في. وعرفت بعدها بكام سنه ان والدتك واختك ماتوا في حادثة. الله يرحمهم.
هنا بقي فهمت انا ما رسمتش الثلت اخوات من خيالي. التلت اخوات انا كنت اعرفهم فعلا. بس اية حكاية ان والدي اتخانق مع امي خناقة كانت هتوصل للقتل غرببة دي. وهنا انضمت لينا المدرسة وقالت
واضح انكم تعرفوا سلطان
ضحك الاب وقال
سلطان يا ستي ابن صديق غالي عليه. وكنا جيران في لبنان و في نفس الوقت يبقي عضو في النادي الاهلي ورضوي تبقي صديقته
المدرسة
اية الصدفة الغريبة دي. انت تعرف ان سلطان يبقي طالب في خمسة تالت. الفصل اللي هتكون في بنتك. ومش بس كدة دة من اشطر الطلاب عندنا.
رضوي بفرحة برئية
بجد يعني هشوفك كل يوم
قولت
ان شاء الله
الاب
انت كدة قصرت مسافة طويلة علي رضوي وهتخليها تحب تيجي المدرسة. ما تنساش بقي تسلم علي والدك قول بس الدكتور احمد بحر بيسلم عليك. بس يارب يطلع اصيل ويفتكرني
وضحك فضحكنا كلنا وكنت فرحان اوي. وجة ميعاد خروجي من المدرسة وكالعادة والدي واقف بالعربية بتاعته قدام المدرسة مستنيني مع ان المدرسة ليها باص لكن انتم عرافين بقي. ركبت العربية وهو ابتسم وقال
يومك كان عامل اية النهاردة
بصيت له وقولت
زي كل يوم ما فيش جديد غير اني قبلت صديق ليك. من ايام لبنان
داس فرامل بمنتهي العصبية لدرجة ان العربية اللي كانت ماشية ورانا خبطت فينا وبان عليه التوتر وقال
مين دة
اتخضيت من اللي حصل لدرجة ان دماغي اتخبطت في التابلو وبصيت له وهو كرر السؤال رغم ان سواق العربية اللي وراء عمال يشتمه لكنه قال
قولت مين دة
رديت
دكتور احمد بحر
قال
ودة شوفته فين
سلطان
في المدرسة.
داس بنزين واتحركت العربية وهو ولع سيجارة وقال
عرفني بقي بالراحة كدة. قال لك اية وانت قولت له اية
وحكيت له وخلصت وهو ما قالش حاجة ووصلنا البيت عادي وماتكلمش في الموضوع دة تاني ابدا. وانا كمان بقيت مركز مع رضوي وفضلت كل يوم اكلمها علي الفيس ساعه ساعتين. لغاية ما نعتب ونام بس كان وقتنا في المدرسة بس مش كفاية كانت ديما تتحايل عليه انزل العب معاهم في النادي في الاجازات وكنت كل ما اطلب من والدي يرفض وصلت لحساب عماد صاحب والدي وطلبت منه يجي ويخلي والدي يسيبني انزل العب في النادي وفعلا جه وبالعافية وافق اننا ننزل كلنا نقضي يوم الجمعه ونزلنا وعرفت رضوي وفرحت اوي واتقابلنا وعماد قدر يلهي والدي علي قد ما قدر ولعبت مع رضوي واخوتها ولسبب ما عرفهوش حسيت ان خالد مش حاببني مع اني ما عملتهوش حاجة لكن ممكن علشان اخته قربت مني زيادة عن اللزوم ماعرفش وما حبتش اعرف وهنا تظهر في الملاهي بنت زي القمر صاحبة رضوي اوي واول ما وقفت معانا قالت وهي بتبص لي. من فوق ل تحت
رضوي مصداعنه بيك. وانت بصراحة تستاهل الصداع
بقيت ابص لهم كلهم وانا مكسوف ورضوي قالت
اسما. سلطان ما بيحبش الهزار.
اسما
انا ما بهزرش. وانتي عارفة اني جاية النادي النهاردة مخصوص علشان اشوف سلطان
هنا خالد داس علي رجلي وهو بيقول
يلا نلعب ولا هنفضل واقفين كدة
بصيت له وتقريبا فهمت. هو ما بيحبنيش لية. حبيت اقول له. انا ماعرفهاش ولا عمري شوفتها علشان يبقي دة رد فعلك من ناحيتي. المفروض دة يبقي رد فعله من ناحيتها هي. وفضلنا ننلعب ولتاني مرة احس بالفرحة اللي من القلب لكن الفرحة بالنسبة لي عامله زي الضيف لان ازاز الكافتريا اللي جنب الملاهي عكس لي صورة رضوي واللي شوفته كان فعلا صدمه لاني شوفت رضوي. مش موجودة في الازاز. شوفت فستان فاضي مافيهوش اي حد، ،،،،،
بطل فاروق قرايا وبص لجدة وشيرين وقال
قولت لكم من الاول رضوي دي جنية
شيرين
لا. لا. دي شبح
فاروق
لا جنية لان الجن ما بيظهرش في مرايات.
شيرين
الشبح برضو ما بيظهرش في مرايات
فاروق وهو بيقفل المذكرات وببديها ل شيرين قال
تطلع جنية تطلع شبحية. انا مش مكمل قرايا. كملي انتي
كل دة بيحصل وسلطان عمال يضحك وشيرين بصت له وقالت
ما تقولنا يا جدي بقي رضوي دي اصلها اية.
مسك سلطان الكتاب وفتحوا وشاور عليه با شارة معنها اقري وانتي تفهمي. فقالت شيرين
ماشي ياجدي هقرأ لما اشوف اخرتها، ،،،،،،
★طبعا كنت هتجنن ازاي دة وزي زي اي عيل صغير جريت علي والدي وبسرعه وكنت بنهج من الخوف وقولت
انا عايز اروح
استغرب عماد قبل والدي وقال عماد
عايز تروح دة احنا لسة جائيين
كنت ببص ناحية رضوي واخواتها وانا مرعوب وعمال اقول
عايز اروح يا والدي
ومارتحتش الا لما قام والدي وروحنا وعيون رضوي واخوتها عليه. ورجعت البيت وقعد في اوضي وبصيت للصور ومسحتها تاني وقعد علي السرير وانا خايف. وصل بيا الحال اني اكلم حد مش موجود اكلم شبح. كان لازم من الاول افهم ان الحبسة اللي حبسهالي والدي هتكون السبب في جناني بس ازاي هي شبح وابوها يعرفني ويعرف والدي ومعايا في المدرسة والكل بيتعامل معها وشايفنها في حاجة مش مفهومة. ولازم افهمها. وهنا سمعت صوت نغمه الرسايل مسكت موبيلي وكانت رساله من رضوي بتقول فيها
★مشيت لية بسرعه كدة ★
كتبت
★ممكن اطلب منك طلب بس بلاش تفهميني غلط★
رضوي كتبت
★طلب اية ★
كتبت
★افتحي الكاميرا واقفي قدام اي مرايا عندك★
رضوي
★اية الطلب الغريب دة★
كتبت
★معلش اعملي بس كدة. وهفهمك بعدين انا لية طلبت كدة ★
غابت شوية بس مش كتير وفتحت الكاميرا وكانت جوة حمام النادي وشوفت انعكاس صورتها في مرايا الحمام عادي. بقيت هتجنن يعني رضوي مش شبح اومال اية اللي شوفته في ازازة الكافتريا دة وقالت رضوي
ممكن افهم بقي في اية
قولت
وانا بلعب معاكي شوفتك في ازاز الكا،،،،،،،،
وسكت لان والدي دخل عليه الاوضة وبص لي وهو واقف عند باب الاوضة وقال بس باسلوب مش مفهوم
افتكر انك جوعت
وسمع وقتها صوت رضوي اللي خارج من الفيديو وهي بتقول
شوفت اية في ازاز الكافتريا
قفلت النت ووالدي قال
الاكل هيبرد
قومت من علي السرير ومشيت وراء والدي ورحنا ناكل وقعدنا علي السفرة وبص لي والدي من تحت ل تحت وقال وهو بيقلب في طبق الرز اللي قدامه
عرفت الحقيقة.
استغربت وبصيت له وانا مش فاهم هو يقصد اية. لكنة كمل وقال
هي مش شبح ولا جنية. رضوي حقيقية
استغربت اكتر واكتر وقولت
بابا، ،،،،،،،،
بص لي وقال
انا خليت ساحر معرفة يقف وراء ازاز الكافتريا ويوهمك انك شايف هدوم رضوي من غير جسم وكانها شبح
كنت هتجنن من المفاجاة لكنه قال وكمل
ويوم ما مسكت منك الموبيل وشوفت الرسائل اللي بينك وبينها ووقتها عملت نفسي ما شوفتهاش. كل دة عملته وانا قاصد. لكني سمعتك دلوقتي وانت بتقول لها تقف قدام مرايا في مكالمة فيديو ودة ما كنتش عامل حسابه واكيد دة كان كفاية اوي يخليك تفكر كتير في كل اللي حصل والتفكير مرض ممكن يخليك تعجز قبل اوانك وانا مش عايز كدة.
قولت
ولية عملت دة كدة
قال والدي. وهو بيبص لي اوي
علشان الحب ضعف وانا مش عايزك ضعيف
حب كلمة كبيرة اوي علي عيل في سني وعيلة في سن رضوي فقولت له
يعني اية حب. رضوي زميلتي في المدرسة وبس
عزيز
حكايتك انت ورضوي هي نفس حكايتي انا وامك. من اولي ابتدائي سوي لغاية ما اتخرجنا من الكلية برضو سوي وفي الاخر. خانتني
ومسك السكينة اللي كانت قدامه وغرزها في السفرة. خوفت ورجعت لوراء في قلب الكرسي وهو كان بيقول
تعرف خانتني مع مين. خانتني مع ابوك. علشان كدة كانت لازم تموت هي وبنتها
ومسك السكينة تاني وطلعها من السفرة. وغرز السكينة تاني في السفرة وسمعت صرخة واحدة ست بصيت حوالين مني لقيته بيقول
ما تخفش دة انا بسمعك صوتها اللي عملته وهي بطلع في الروح بعد ما شفتني وانا بذبح اختك
قومت من علي السفرة مسكني من ايدي وقال
رايح فين. الاكل مش عاجبك ولا الحدوتة مش عجباك
قولت له وانا بترعش من الخوف
لا. انا بس كنت عايز اعمل حمام
برق وقال
بعد الاكل. وعيب لما اكون بحكي لك حكاية وتسبني وتمشي في نصها.
قعد تاني وفضلت باصص للشخص دة اللي بعد كلامه دة حسيت اني اول مرة اشوفه وبقيت مرعوب نفسي افتح الباب واهرب حسيت انه عرف انا بفكر في اية فقال
ليك حق تخاف مني. بس لما تكبر وحبيبتك تخونك هتعرف ان دة اقل رد فعل ممكن تعمله ولو ينفع تقتلها تاني هتقتلها. وعارف انك عايز تقول من حقك تقتل اللي خانتك. لكن تقتل اختي لية. هقول لك قتلتها علشان مش بنتي. هتقول انا كمان مش ابنك لية خلتني عايش هقولك علشان بحبك. وحتي بعد ما عرفت انك مش من دمي فضلت احبك
وملي معلقة رز وراح بيها ناحية بوقي وهو بيقول
كل وما تخلنيش ازعل منك واندم اني حكيت لك
مش قادر اتحرك. حرفيا جسمي كله مثلج ومرعوب شخط فيه وقال
كل
لقيت نفسي بعيط ومع العياط قرب اكتر بالمعلقة وحطها في بوقي بالعافية ما قدرتش ابلع وشرقت وفضلت اكح لغاية ما جبت كل اللي في بطني بص لي وقال
باين ان الاكل مش عجبك. تحب اعمل عصير
هزيت دماغي باشارة معنها لا. وقولت له
انا عايز اخش اوضي.
قال
من غير ما تاكل
سلطان
مش عايز اكل
عزيز
انت حر
وقومت من علي السفرة و جريت ناحية باب الشقة وحاولت افتح الباب لكن الباب كان متكهرب صرخت ووقعت علي الارض وما حستس باي حاجة بعد كدة،،،،،
وبعدها ما عرفش بقد اية اصحي من النوم الاقي والدي او عزيز واقف قدام مني وبيبص لي وبيقول بابتسامه
صباح الخير. يلا علشان اتوبيس المدرسة. واقف مستنيك
استغربت اوي واتعدلت وقولت
هو انت هتسيبني اروح المدرسة النهاردة في الاتوبيس
عزيز
اة. مش دة اللي انت كنت عايزه
سلطان
يعني هقدر انزل من الشقة
ضحك وقال
ما انت كل يوم بتنزل من الشقة اية الجديد
وسمعوا كلكس الاتوبيس فقال عزيز
يلا قوم بقي الاتوبيس بيستعجلك
وقومت من علي السرير علشان الاقي نفسي بهدوم المدرسة استغربت اكتر وقولت
هو انا لبست الهدوم دي امتي
عزيز
انت نايم بيها امباراح
افتكرت امباراح واللي حصل في وكانت اخر حاجة فاكرها اني اتكهربت ووقعت اية دة هو عاوز يجنني ولا اية وسمعنا كلكس الاتوبيس تاني وهنا ما كنش في وقت لاي استغراب قولت اخرج وبعديها اتصرف وجيت اخرج من الاوضة الاقي والدي قاعد قدام الباب بالظبط وبيبص لي وفي ايدة قطر. وقدام منه.
وصلنا لنهاية الجزء الاول بكرة باذن الله الجزء الاخير
رووووعه
ردحذف