فراق وحرمان
★الحلقة الخامسة★
كتابة واقتباس
محمد منصور. منص
وقبل ما نبدأ نوحد الله ونصلي علي خير خلق الله سيدنا محمد.
وبسم الله توكلت علي الله وهو رب العرش العظيم
المشهد الاول
★شقة شيرين★
اسامة قاعد قدام شيرين وفي ايدة الورقة اللي كان مكتوب فيها
★بطلي تدوري علي بنتك دي ملكنا مش ملكك★
وطبعا الورقة كانت فاضية واسامة بيشم الورقة فقالت شيرين
انا مش عارفة انت سايب كل اللي حكيتة ليك ومركز مع الورقة الفاضية اللي الكلام فيها اختفي
اسامة
شيرين دة شغلي واي تفصيلة ممكن توصلنا لمين حطها في شقتك.
شيرين
سالتني يا اسامة. وقولت ما شوفتش حد كان نازل من العمارة وقت ما دخلتها انا. واللي دخل اصلا هيدخل ازاي والمفتاح معايا وانا قافلة الشقة. انا قلبي حاسس ان الحكاية فيها سحر وجن
اسامة ابتسم وقال
جن اية بس مش للدرجة دي
شيرين
طيب لو مش جن اللي بعتها عرف ازاي عنواني.
اسامة
انتي ناسية ان عربيتك عملت حادثة واتسابت في الطريق الزراعي يوم بحاله قبل ما الونش يرفعها يعني اي حد يعرف موظف في المرور ب 20 ج. يجيب عنوانك
شيرين
طيب الكلام اللي كان مكتوب بالدم. في الورقة واول ما خلصت قريته الكلام اختفي
اسامة
الورقة ما فيهاش ريحة دم. دي ريحتها حبر
شيرين باستغراب
حبر. ازاي حبر وازاي اختفي
اسامة
ما هو دة نوع من الحبر السري لما بينشف بيختفي ودة معني انك قبل ما تدخلي بكام دقيقة الورقة اتكتبت واتسابت لك علشان تقريها وبعد كدة الكلام يختفي. والايد المقطوعة مش ايد بنتك.
شيرين
واية الغرض من دة كله
اسامة
انك تخافي وتفتكري ان الجن خدوا بنتك مثلا. وتبطلي تدوري عليها
شيرين
طيب مين يعمل كدة ويعمل كدة لية
اسامة هز دماغه وقال
ما عرفش. لكن ان شاء الله قريب هنعرف وهنوصل له. انما ممكن اعرف بقي انت اية اللي خلاكي تسيبي فايد وترجعي القاهرة. انا مش قولت لك تفضلي مع اختك
شيرين
ما قدرتش يا اسامة. افضل قاعدة جنب فريدة
وما عرفش فين رحاب
اسامة
فريدة قالت لي دماغك نشفة. بس انتي فاكرة انك لما تنزلي تدوري بنفسك هتلاقيها
شيرين
سيبك مني والنبي وخلينا في رحاب
اسامة
بعد الورقة دي اقدر اطمئنك علي بنتك. انها عايشة
شيرين باستغراب
وعرفت ازاي بقي
اسامة
حد باعت لك وبيقول لك بطلي تدوري علي بنتك دة ملكنا مش ملكك. تفتكري يبعد كلام زي دة علشان واحدة ماتت.
شيرين اقتنعت وقالت
صح. طيب مين دة. دة انا روحت ل طارق السجن وسالته وما طلعش هو
اسامة
بصي بقي حكاية بنتك دي تخلص في كلمتين ان طارق خطفها وبيلعب بينا. او ينتك تكون مع الدكتور صادق عرفات ولسبب ما يعرفهوش الا ربنا هو واخدها عنده
شيرين
هو صادق دة عايش ولا ميت
اسامة
التحريات بتقول مات. لكن اللي انتي وصفتي وبتقولي انه فتح لك باب الفيلا بتقول انه عايش.
شيرين
اية بقي اللخبطة دي
اسامة
اللخبطة اللي بجد ان الفيلا ما طلعتش باسم صادق وبقت بتاعت لواء شرطة كان السبب في اني موقوف دلوقتي عن العمل وبيتحقق معايا
شيرين
موقوف
اسامة
دي حكاية انا قادر اخلصها. خلينا نركز في رحاب ونركز اكتر في اجابة سؤال ما خدناش كلنا بالنا منه. البنت اللي جثتها في التابوت الازاز تبقي مين
شيرين
هو انت لسة ما عرفتش هي مين
اسامة
تمت المعاينة والجثة اتنقلت للطب الشرعي لكن لسة التقرير النهائي ما طلعش.
ورجع بص تاني للورقة وشمها وقال
الورقة دي جزء منها ريحتة صدأ
شيرين
ودة معني اية
اسامة قام وقف وراح ناحية الحمام وفتح باب الحمام ودخله وراح ناحية شباك كبير في الحمام وبص للشباك اللي ما كنش مقفول ووقف فوق حرف البانيو وبدأ يبص علي المواسير اللي في المنور واللي الصدأ اتملك منها. وبص ل فوق وبعدها بص ل تحت وهنا دخلت شيرين وراء منه وقالت
في اية
اسامة
اللي اعرفه عنك انك مستحيل تسيبي شباك الحمام مفتوح علشان بتخافي جدا من الفيران والصراصير
شيرين
فعلا
اسامة
طيب اية ريك بقي ان الشباك كان مفتوح
شيرين
تقصد اية
اسامة
في حد دخل من شباك الحمام. حط الورقة وخرج تاني من الشباك وطبعا هو يعرف يفتح من برة لكن صعب يقفلة بعد ما يخرج
شيرين اترعبت وبصت للشباك قفل اسامة الشباك وقال
مش عايزك تخافي. ومن فضلك ارجعي فايد. وخليكي مع فريدة
شيرين
سيبني براحتي. الله يخليك كفاية علية نار الفراق والحرمان اللي بتكوي بيهم كل ساعة وبنتي بعيد عن حضني
اسامة
ماشي يا شيرين خليكي برحتك.،،،،،،،،
المشهد الثاني
★مكتب ابو المجد ★
وكان ابو المجد واقف قدام منه سعد وصبحي وبيقول لهم بمنتهي العصبية
انتو الاثنين جوز اغبياء. اهه طلعت عايشة هي وبنتها وانتم قولتو انها ماتت.
سعد
يا باشا انت لو شوفت العربية وهي بتلف حوالين نفسها تقول مستحيل اللي فيها يطلعوا عايشين
صبحي
سؤال ولاموخذة يا متر هيفرق اية معاك انهم لسة عايشين ولا ماتو
ابو المجد
البت اتخطفت والبوليس بيدور وممكن يوصل لها ساعتها لما ترجع رحاب ل شيرين طارق هيعرف وساعتها يدفع ازاي فلوس في بت هو هيبقي متاكد انها مش بنته. انما لو ميته هنبيع واحنا متاكدين اننا مش هنتكشف. فهمت يا بغل
سعد
طيب ما هو كان ممكن يعرف لما يخرج من السجن ان البت ماتت هي وامها وساعتها برضو مش هيدفع
ابو المجد
ما كنتش هخلي يعرف. الموت نقدر نخبي انما اللي عايشة ومش تحت ايدينا نخبيها ازاي
سعد
يعني اية باظت
ابو المجد
لازم نوصل ل رحاب قبل طارق ما يخرج علشان نطلع كلنا كسابنين
سعد
والبت اللي احنا خطفنها
ابو المجد
خليها يمكن يبقي ليها عوزة. ونركبها المركب مع طارق بدل رحاب. بس المهم دلوقتي نعرف رحاب فين، ،،،،،،
المشهد الثالث
★السجن★
وكانت شيرين قاعدة مع طارق وبتقول
طلبت من المامور اني اجي لك علشان خاطر موضوع مهم
طارق
بنتنا مش مع اللي بعتهم يخطفوها
شيرين
انت متاكد
طارق
كلامي مع الراجل اللي كلفته بالعملية دي خلاني اتاكد من ارتباكة وكلامة اللي عكس بعضة انه ما يعرفش فين بنتي.
شيرين
يعني كدة دكتور صادق عرفات هو اللي خطف البت
طارق
دة صاحب الفيلا
شيرين
هو.
طارق
انتي اتاكدي انه عايش
شيرين
لغاية دلوقتي لسة. لكني هعرف هو عايش ولا ميت
طارق
ناوية تعملي اية
شيرين
هعرف اكتر مين هو صادق عرفات
مسك طارق ايد شيرين وبص لها في عيونها وقال
خلي بالك من نفسك. وما تعرفيش انا بتوجع ازاي اني كنت السبب في ضياع بنتا
شيربن سحبت ايدها من ايد طارق وقامت وقفت وقالت
انا لازم امشي علشان اكسب وقت
وفعلا مشيت شيرين، ،،،،،،،،،،
المشهد الرابع
★نقابة الاطباء★
شيرين جوة النقابة بتجيب عنوان الدكتور صادق عرفات وفعلا جابت العنوان. ،،،،
المشهد الخامس
★فيلا صادق★
والفيلا دي في حلوان وشيرين قاعدة في الريسبجين بتاع الفيلا مستنية مرات الدكتور صادق الدكتورة الفت وفعلا جت وقعدت قدام منها وبعد الترحيب قالت الفت
اقدر اساعدك ازاي
حكيت لها شيرين كل اللي حصل ضحكت الفت اوي ف استغربت شيرين جدا وقالت بحدة
اظن ان اللي حكيتة وحرماني من بنتي ما فيهوش شئ يضحك
الفت اتوقفت عن الضحك وقالت
انا اسفة. بس تخيلي نفسك كدة مكاني وواحدة جاية تقولك جوزك اللي انتي دفنتي من 10 س. عايش. وفتح لها باب الفيلا اللي جنب فايد وكمان عمل عملية
الضحك وقتها هيكون اقل رد فعل منك. مش كدة
شيرين
الضحك دة لو انا بهزر
الفت بوش حازم
اومال اللي انتي قولتي دة جد
شيرين
مدام الفت ممكن اعرف دكتور صالح مات ازاي
الفت
مات في حادثة عربية وكل الجرايد كتبت عنها وقتها
شيرين
طيب انا شوفت في الفيلا تابوت ازاز جوة منه بنت عندها 10 س. تقريبا ممكن اعرف مين دي
الفت ارتبكت وقالت
بتقولي جثة بنت
شيرين
تعرفيها صح
الفت بعصبية
ما عرفهاش و من فضلك كفاية كدة
وقامت وقفت الفت وقفت شيرين هي كمان وقررت تحرج من الفيلا وهي عند الباب قالت الفت
نصيحة واتمني انك تكوني تستهليها. البنت اللي لقتوها دي. ادفنوها والا. هتفتح عليكم ابواب كلها شر والا قريب بنتك هتكون مكانها
شيرين برقت واتصدمت وقالت
تقصدي اية
الفت
الزيارة انتهت
وندهت الفت علي الخدامة وجت الخدامة قالت لها ألفت
اقفلي الباب وراء منها
وخرجت شيرين والرعب اتملك منها وما بقتش عارفة اخرة الكابوس دة اية، ،،،،،،،،
المشهد السادس
★مكان مظلم★
وحد بيحاول يخرج منه وصوت من برة المكان دة بيقول
قريب هتخرجي. بس لما هي تبطل تدور عليكي. متخافيش. انتي مع جدك. يا سمر
وبدات العياط والدبدبة تزيد عياط طفلة مربوطة. متكمم بوقها. عياط رحاب، ،،،،،،،،،،،،،،،،
اوعي اللي بيحصل في رحاب يخليك تنسي التعليق
★حن عليكم التعليق الله يخليكم ★
خلصت حلقة النهاردة اللي يارب تكون عجبتكم. سلام
تحفه
ردحذفبجد تحفه يسلم دماغك
ردحذف