★الحلقة الحادية عشر★
من تاليفي، ،
محمد منصور. * منص *
وقبل ما نبدأ نوحد الله ونصلي علي خير خلق الله سيدنا محمد.
وبسم الله توكلت علي الله وهو رب العرش العظيم
المشهد الاول
★شقة شعبان★
وفضلت الخناقة النفسية دايرة لغاية ما صرخت خوخا صرخة ووقعت من طولها علي الارض والكل كان بيتابع الموقف لكنها وقفت ومسكت السكينة من شبية حاتم وبعدها الدم بدأ. يجري علي الارض لانها غرزت السكينة في ايد شاكر اللي قدر يحطها قدام صدر خوخا قبل ما تخترق السكينة قلبها. وشعبان بسرعه راح ناحية خوخا وقدر ياخد منها السكينة وهي بتصرخ وبتقول
انت فاكر انك هتقدر تعالجها انت بتحلم. فاهم انت بتحلم. دة انا اقتلها ولا انك تلحقها
وهنا صرخت خوخا باعلي صوتها ومسكت شعرها وقالت.
اخرسي. واخرجي من دماغي. انا لا عايزاكي ولا عايزا حاتم
خوخا التانية
انتي بتحبي وهتفضلي تحبي
خوخا
انا ما بحبش حد. ابعدي عني. ابعدي عني
ووقعت مغمي عليها. بص شعبان ل شاكر وقال
روح منك لله عملت فيها.
شاكر بص لكل الموجودين وقال
كان لازم تتعالج بالصدمة. صدقوني كل اللي حصل دة دة في مصلحتها
شعبان
غور من وشي بدل ما اخلص عليك
وبدأ شعبان يطمئن علي خوخا وانعام وخدها في حضنها وغنيم قلع كرفته وبدأ يلفها حوالين ايد شاكر وهو بيقول
واضح اني كنت غلطان يوم ما صدقت انك تقدر تعالجها
شاكر
انا،،،،،،،،
غنيم قاطعه بحدة وقال
انت تنزل معايا دلوقتي نروح ل اقرب مستشفي يخطو لك الجرح اللي في ايدك وبعدين هيبقي ليا معاك تصرف تاني
شاكر وهو بيبص ل خوخا الفاقدة للوعي
انزل ازاي من غير اطمئن عليها
غنيم
انت لسة مصمم تفضل هنا بعد اللي وصلتها لي.
شاكر
يا فندم اللي حص،،،،،،،،،،
غنيم بحدة
قولت انزل قدامي
بص لها شاكر بصة اخيرة وخرج من الشقة وراء منه شبية حاتم وغنيم بص ل شعبان وهو لسة بيحاول يفوق خوخا وقال
انا اسف بس صدقني انا كنت بحاول اساعدك واساعدها علي انها تعدي الازمة دي
شعبان
جايب لي عامل في مطعم وتقولي بساعدك. يفهم اية دة علشان اخلي يعالج بنتي
سمع شاكر الجملة وقلبه اتقطع. ونزلت دموعه. سكاكين بتقطع في لحمة. وهتصدقوني لو قولت وجع الكلمة في اوقات كتير بيبقي اشد من وجع الجرح، ،،،،
المشهد الثاني
★اوضة شاكر★
شاكر بيفتح باب الاوضة وبيدخل علشان تشوفه امه وتركز مع ايدة المربوطة صرخت وقامت جري ووقفت قدام منه وقالت
اية اللي حصل
شاكر بصوت حزين
مافيش يا اما
حميدة بقلق
هو اية اللي ما فيش راجع لي متاخر ايدك متربطة وتقولي مافيش. مين اللي عمل فيك كدة
شاكر
دة انا اتعورت في الشغل
حميدة
مش تخلي بالك يا شاكر
ما ردتش شاكر وراح قعد علي الارض وفضل يعيط ويقول ل امه
هو اللي زينا يا اما حرام يبقي ليهم لزمة
حميدة قعدت علي سريرها وبصت له وقالت
لية يا ابني بتقول كدة. دة انت احسن الناس لولا الظروف
شاكر
حاسس يا اما. اني ولا حاجة.
وقام وقف شاكر وقال بعصبية وسخط علي حاله اللي وصل لي
سنتين بس وابقي دكتور وليا قيمة وسط الناس وقتها كنت اللي هقوله هيتسمع ويتصدق لكن ربنا ياخد ابويا
دون كل اللي عايشيين ياخد اللي كان هيخليني ليا قيمة وسط الناس. لية طيب. هو احنا منسالتش
وبدأ يعيط اوي ورجع قعد تاني علي الارض وبص للسماء وقال
استغفر الله العظيم. سامحني يارب. انا ما قصدش اعترض لكني موجوع اوي وحاسس اني ولا حاجة.
خدته حميدة في حضنها وقالت
اية بس اللي بتقولو وبتعملو في نفسك دة. فهمني مالك يا ابني
شاكر ابتسم وقال وهو بيمسح دموعه وبيبوس ايد امه
لحظة ضعف وهتروح وهرجع اقوي من الاول. انا صح في اللي عملته علشان هي تخف. حتي لو هما شافوني غلط. لكني صح وعلاج خوخا باذن الله علي ايدية
حميدة
علاج اية ومين خوخا دي. انت سبت المطعم يا ابني واشتغلت في عيادة
شاكر
لا ياما. لسة ما سبتش المطعم بس قريب هسيبة
حميدة
وهتشتغل اية بس
شاكر
ما عرفش لسة. بس مش هفضل عامل في مطعم. ولازم اكبر والقيمة وسط الناس واللي كنت مستني ابويا يعملهالي. انا هعملها ل نفسي. ،،،،،،
المشهد الثالث
★اوضة شعبان★
بالليل بعد الساعة واحدة. كان شعبان قاعد علي سريرة وعمال يفتكر منظر شاكر وهو بيحط ايدة قصاد السكينة قبل ما تدخل صدر بنته وقال بصوت عالي
الواد دة مش عايز يعالجها وبس دة شكله طمعان في اللي اكتر من كدة
ما خدش باله ان انعام دخلت الاوضة وسمعته وهو بيقرل الكلام دة. فقالت
تقصد شاكر صح
شعبان
هو
انعام
انت مالك مش طايق الواد دة لية. مع انه شكله ابن حلال
شعبان
دة عامل في مطعم. عايز يبقي دكتور بالعافية ويعالج بنتي
انعام
انا دي الصراحة مش فهماها. ماله هو ومال العلاج
شعبان بسخرية
اصله كان في كلية طب وخرج منها قبل ما يبقي دكتور وجاي بقي لملطشة الشارع يجرب في.
وبعدها قال بجد
سيبك منه وطمئنيني علي خوخا. حصل لها اي حاله هياج تاني بعد ما خدت العلاج
انعام وهي بترمي جسمها علي السرير
نامت. و بودي قاعد قصاد منها
شعبان
طيب نامي انتي كمان علشان انتي بقالك كام يوم نومك مش متظبط
ونامت انعام وشعبان باس راسها وقال
تعبتك معايا.
انعام
والله. دة علي اساس ان خوخا دي مش زي سحر دة انا امها.
شعبان خدها في حضنه وقال
ربنا ما يحرمنا منك
انعام
ولا يحرمني منكم، ،،،،،،،،،،
المشهد الرابع
★اوضة خوخا★
تاني يوم الصبح خوخا بتفتح عيونها وبتقوم من فوق السرير وتروح تفتح شباك اوضتها علشان الشمس تدخل يقلق بودي علي صوت الشباك اللي اتفتح فتح عيونه شاف خوخا عند الشباك قام جري ومسكها بصت له خوخا وقالت
في اية يا ابني قايم تمسك حرامي
بودي وهو بيسحبها بعيد عن الشباك
تعالي بعيد عن الشباك
خوخا مشيت معه وقالت
مالك ماسكني كدة.
بودي
خايف عليكي
خوخا
ما تخفش انا ما كنتش هرمي نفسي انا بفتح الشباك يدخل هواء نظيف
بودي
معلش برضو خليكي بعيد عنه
خوخا ضحكت وقالت
حاضر يا ابية بودي. اديني بعيد عنه
وفضلت باصة له وهو واقف قدام منها وقالت
هتفضل واقف قدام مني كتير زي بتوع الحرسات الخاصة
بودي حس انه زودها فقعد جنب منها وقال
اعمل اية بس. مش عايزك تتاذي
خوخا
ما تقلقش انا حاسة اني النهاردة صاحية احسن من الاول
بودي
بجد
خوخا
والله بجد
بودي
يعني اللي كنتي بتشوفيها وتسمعيها مش موجودة دلوقتي
خوخا
ما فيش حد موجود الا انا وانت ودي
وبصت وراء بودي اللي بص بسرعه مكان ما بصت خوخا وخوخا ضربته علي قفاة. بهزار رجع بص لها بودي تاني وقال
اية دة
خوخا
دة قفا من اللي عليك ليا. ولا انت ناسي مين كان ديما بيضربني بالحركة دي علي قفايا
بودي
عارفة لولا انك تعبانه انا كنت عجنتك في بعضك وعملت منك فطيرة بالسجق.
خوخا
ولد انا اختك الكبيرة
بودي ما قدرش يمسك نفسه وخد خوخا بالحضن وهو بيقول
ما تضربيني كمان قفاة وحياة امك
خوخا باست كف ايدها وقالت
بس كدة غالي والطلب رخيص
وهوبت نزلت بالقفاة التاني. لكن لسوع. بودي اتعصب وقال
انت لية غبية كدة
خوخا
انت اللي قولت
بودي
حظك اني اليومين دول مش لابس لبس المشاكل
خوخا
احبك يا بتاع المشاكل،،،،،،،،،،،،
المشهد الخامس
★شقة شعبان★
شعبان كان بياخد خوخا في حضنة وكمان انعام الكل فرحان. وجت سحر وجوزها فراج. والفرحة دخلت البيت بعد ايام العذاب. ومالت انعام علي شعبان وقالت
عملها اللي اسمه شاكر وقدر يرجع لنا خوخا
شعبان بص لها وسكت فقالت انعام
اية مش عايز تعترف بغلطك وان شاكر دة يستاهل منك كلمة شكرا
شعبان
بعدين يا انعام بعدين
انعام
مش فهماك والله كان ممكن يموت مكان بنتك وعمل اللي خلي خوخا تفوق من اللي كانت في. وانا حاسة انك مش طايقة
شعبان
انعام خلينا نفرح ب خوخا وبعدين نبقي نتكلم في حوار شاكر دة، ،،،،،،،،،،،
المشهد السادس
★المطعم★
وكان شاكر واقف قدام صاحب المطعم وبيقول له
هما كل اللي عايزهم 5000 ج. سلف افتح بيهم مطعم تيك اواي. مكان محل المكوجي اللي قفل
صاحب المطعم
يا شاكر انت تعز عليه صحيح بس 5000 كتير يا ابني
شاكر
هكتب وصل امانه. وباذن الله يا حج. شهرين تلاته بالكتير وهرد لك المبلغ ولو عايزة بالفوايد
صاحب المطعم
استغفر الله. فوائد اية بس. ربنا يكفينا شر الحرام.
شاكر
طيب راضيني يا حج ربنا يراضيك. وما تخرجنيش من عندك مكسور الخاطر
صاحب المطعم فكر للحظات وبعدها قال
خلاص يا شاكر النهاردة اخر النهار الفلوس هتكون عنذك
فرح شاكر اوي وقال صاحب المطعم بهزار
بس اياك تبيع فول وطعمية وتوقف حالي
شاكر
يا معلم انا هشتغل في الكبدة والسجق والكلام دة بعيد عنك خالص
صاحب المطعم بهزار
طالما هتشتغل في لحم الهوهو. يبقي انت حبيبي
ضحك شاكر وقال
عيب يا حج دة انا تربيتك. تفتكر ان ادخل اللحمة اللي زي دي باب رزق بتمني من ربنا انه يكون فتحة خير عليه وعلي امي
صاحب المطعم
انا عارف انك ابن حلال وما تعملش كدة ابدا. ربنا يبارك لك في رزقك اللي جاي، ،،،،،،،،
المشهد السابع
★اوضة شاكر★
في نفس اليوم بالليل متاخر. شاكر قاعد مع امه وبيقول لها
روحت للمكوجي واجرت منه المحل ومن بكرة باذن الله هجيب كام صنيعي نقاشة علي صنيعية سيراميك وهبدأ اجهز في المحل وربنا كريم
حميدة
باذن الله ربنا هيكرمك
وفي الوقت دة يسمعوا صوت خبط علي باب الاوضة استغربوا الاثنين وقالت حميدة
مين جاي لنا دلوقتي
قام شاكر وفتح الباب علشان يشوف خوخا لابس فستان اسود ومسيبة شعرها وواقفة وبتبص له من فوق ل تحت وقبل ما يقول شاكر اي كلمة كانت خوخا قالت
شكرا علي كل حاجة عملتها علشاني
ودخلت الاوضة وبصت. ل حميدة وقالت
دي مامتك
شاكر. عرف انها مش في طبيعتها فقال
اة. هي
حميدة ل شاكر
شاكر مين دي
شاكر
دي خوخا. بس النسخة اللي قريب اوي هنخلص منها
راحت له خوخا وبصت له في عيونه وقالت
ما تخلينا حبايب واللي انت عايزة منها انا اقدر اديهولك
ومسكت ايدة لكن شاكر قال وهو بيبعد ايدة عنها
طالما جيتي لغاية هنا. يبقي الصدمة جابت نتيجة وخوخا قدرت عليكي وانتي كل اللي هتعملي دلوقتي انك تسخدمي جسمها وهي نايمة
خوخا
تعرف انك شاطر اوي. خسارة انك ما بقتش دكتور
شاكر
معلش الظروف بتحكم لكن ملحوقة.
خوخا. وهي بتمسك ايدة تاني
خليك معايا احسن ما تبقي ضدتي ووقتها ممكن تخسر اللي اغلي من حياتك.
وبصت ناحية امة ابتسم شاكر وقال
ارجعي مكان ما جيتي لانك مالكيش مكان هنا
حطت ايدها علي قلبه وقالت
ولا هنا
شاكر
اللي هنا خوخا التانية. مش انتي
ومسكها من ذراعها وسحبها ناحية باب الاوضة وقال
امشي
خوخا شالت ايدة عنها وقالت بشر مخيف
طيب بالراحة علي نفسك.
وبصت ل حميدة وقالت
لو خايفة علي ابنك خلي يبعد عنها حاكم بيحب واحدة اللي بيقرب منها بس بيموت.
حميدة بصت ل شاكر باستغراب وخوخا قالت
اسالي عن حاتم وعاطف
وسابته ومشيت وشاكر قال ل نفسه
لازم ابدأ المرحلة التانية من العلاج وبسرعه ،،،،،،،،،،،،،،،،
اوعو تنشغلو بحكاية خوخا واللي هيحصل بكرة وتنسوا التعليق
خلصت حلقة النهاردة اللي يارب تكون عجبتكم. سلام
حلوه اوى تسلم ايدك يا استاذ
ردحذفحلوة جدا
ردحذف