خوخا وقطر السنين
★الحلقة العاشرة★
من تاليفي، ،
محمد منصور. * منص *
وقبل ما نبدأ نوحد الله ونصلي علي خير خلق الله سيدنا محمد.
وبسم الله توكلت علي الله وهو رب العرش العظيم
المشهد الاول
★شقة شعبان★
وبعدها بيومين بالظبط يخبط باب شقة شعبان ويقوم شعبان يفتح. علشان يشوف حاتم واقف قدام منه بشحمة ولحمة اتصدم شعبان وقبل ما يتكلم كان حاتم كتم نفس شعبان و دخل الشقة وقفل الباب وراء منه،،،،،،،،،
المشهد الثاني
★اوضة شاكر ★
هنرجع بالاحداث ليوم ما شاكر طلب من شعبان انه يسيبه يعالج خوخا وشعبان رفض. وفي اليوم دة بالليل شاكر كان قاعد جنب امه حميدة بعد ما اداها العلاج وحست امه ان شاكر مش في حالته وبقاله فترة سرحان وبيفكر كتير فقالت له
مالك يا ابني.
شاكر
مافيش يا امي. انا كويس
حميدة
لا. مش كويس انت بقالك اسبوع واكتر علي الحالة دي
شاكر
في موضوع شغلني
حميدة
موضوع شغلك ولا في حد مضايقك في المطعم
شاكر
انا بطلت اضايق من المطعم واللي بيجري في
حميدة
طيب اية اللي شاغل بالك
شاكر
ما فيش يا اما. ما فيش
وحط شاكر جسمة علي الفرشة اللي بينام عليها وغمض عيونه وبدأ يقول لنفسه
زعلان لية منه وعايزا ازاي يسيبك تعالج بنته وانت حتة عامل في مطعم.
ونزلت دمعة من عيونه وفضلت تجري علي خدة. وكمل وقال
هيضيعها بعندة لازم يعالجها قبل ما الحالة تزيد عندها وتوصل للجنون الرسمي. بس ازاي اخلي يسيبني انفذ اللي بي اقدر اشفيها.
واتنهد وبدأ يفكر اكتر واكتر ودماغه شغاله بسرعه زي عقرب الثواني. لغاية ما فتح عينه وقال
ما فيش غيرة. مفتش المباحث غنيم شكله ابن حلال ويقدر يساعدني. اول ما يطلع النهار لازم اروح له، ،،،،
المشهد الثالث
★مكتب غنيم★
وقت ما كان غنيم قاعد في مكتبه بيراجع بعض الاوراق دخل علية العسكري وقال
واحد برة اسمة شاكر وعايز حضرتك
غنيم ردد الاسم مع نفسه وبعدها قال
خلي يدخل
خرج العسكري وبعدها بلحظات دخل شاكر بص له غنيم وقال
انت اللي شغال في المطعم
شاكر
ايوة يا فندم انا.
غنيم
عرفت مكتبي ازاي
شاكر
انا سالت علي حضرتك في مديرية امن القاهرة وهناك في امين شرطة سالني علي عنوان قاعة الافراح اللي حصلت فيها الحادثة وقالي انها تبع مديرية امن الجيزة جيت هنا وسالت دلوني علي مكتب حضرتك وانا بحمد ربنا ان لقيت حضرتك في المكتب
غنيم بقلق
للدرجة دي. طالما انت بدور علبه كدة يبقي في حاجة حصلت ل خوخا وجاي تبلغ عنها
شاكر
هيحصل يا باشا لو ما قدرتش اساعدها
غنيم
طيب اقعد وفهمني في اية
قعد شاكر وحكي ل غنيم كل اللي دار بينه وبين شعبان وقال غنيم
ما تزعلش مني. بس اللي شعبان عمله دة حقة انا ازاي اصدقك انت واكذب دكتور كبير انت بتقول انه استاذك
شاكر
احيانا يا فندم الدكاترة الكبار ما بيقبلوش الحالات النادرة والصعبة والمركبة زي حاله خوخا لانها بتاخد وقت في العلاج ممكن العمر كله وهو مش هيبقي فاضل لها لان عنده مرضي تانيين حالتهم ممكن تبقي احسن من جلسة والتانية
غنيم
تقصد تقول زي المحامي اللي بيقبل القضايا الناجحة وبس
شاكر
بالظبط حضرتك
غنيم
طيب انا في حالة زي دي اقدر اساعدك ازاي
شاكر
تلاقي حاتم
غنيم
حاتم مين
شاكر
خطيبها اللي مات
غنيم
شاكر ازاي مات وازاي عايزني الاقي
شاكر
مش قصدي هو. لكن اي حد يكون شبه او ينفع يكون شبه لمدة ساعة بالظبط
غنيم
سامحني انا مش فاهم انت عايز تعمل اية واي كان اللي عايز تعمله انا ماليش دخل بي. لانه مش شغلي
شاكر
عارف انه مش شغل حضرتك. بس دي حاله انسانية وانسانه طيبة جدا كل اللي يعرفها يحبها. ممكن تضيع بسبب دكتور ما اتقاش الله وحكم علبها تعيش مجنونه
غنيم بدأ يتاثر وشاكر كمل وقال
حضرتك قبل ما تكون مفتش مباحث. ف انت بني ادم واللي شوفته من كلامي مع حضرتك يقول انك تقدر تساعد بعيد عن شغلك في المباحث
غنيم
مش عارف اقول لك اية. بس انا حكاية خوخا دي كلها وموت جوزها في يوم فرحهم حكاية تقطع القلب وانها فعلا طيبة دة خلاتي اتعاطف معها ومع ابوها بس فعلا مش عارف اقول لك اية
شاكر
تقول انك هتساعدني في خطتي المجنونة اللي بيها اقدر انقذ خوخا باذن الله
غنيم بدا يفكر ل دقائق مش كتير وبعدها قال
سيبني اكلم شعبان واخلي يديك فرصة تعالجها
شاكر
الكلام مش هيجيب واستاذ شعبان مستحيل يقتنع بفكرة ان علاج خوخا عندي. لازم الصدمة ودة علاج خوخا الوحيد
غنيم
والصدمة دي في اننا نوجد حاتم
شاكر
تمام كدة
غنيم
وبعدين
شاكر
بظهور حاتم وتهديدة بقتل كل اللي بتحبهم خوخا هيتولد صراع داخلي بين خوخا اللي بتحب حاتم ودي سبب المشاكل كلها وبين خوخا اللي عايزا تنسي حاتم وبعد الصدمة الاقوي فيهم هتخلص علي التانية
غنيم
انت كدة مش بتعرض خوخا للخطر
شاكر
انا كدة بوصل الصراع النفسي بين الاثنين ل خط النهاية واللي هتعيش فيهم هي اللي هتكمل والتانية هتختفي
غنيم
نهائي
شاكر
مش بسرعة كدة. لازم يكون في وقت مرض الفصام ممكن علاجة يستمر لاخر العمر زي ما قولت ل حضرتك
غنبم
طيب افرض ان خوخا اللي بتحب حاتم اختارت حاتم ووقفت ضد خوخا وقدرت تكسب الحرب دي
شاكر
اتمني ان الخير اللي جوة خوخا هو اللي يكسب وتقدر تعدي المرحلة الصعبة دي
غنيم
تعرف شكل حاتم دة
شاكر
كنت بشوفة لما كان بيجي المنطقة عند الانسة خوخا
غنيم
مش هينفع الوصف وبس لازم نوصل ل صورة. علشان اقدر اتحرك انا
شاكر
ودي بس نوصل لها ازاي
غنيم سكت شوية وبعدها قال
انا عرفت نوصل لها ازاي،،،،،،
المشهد الرابع
★شقة كريمة★
وكانت كريمة بتحط صور خطوبة خوخا علي حاتم قدام غنيم وشاكر وبتقول
دي كل الصور اللي عندي اللي فيها حاتم
غنيم بص للصور وشاكر قال ل كريمة
من فضلك يا انسة كريمة مش عايز اي حد يعرف اننا جينا هنا وسالنا عن صور ل حاتم
كريمة
حاضر يا حضرة الظابط
شاكر ابتسم وهو بيقول
انا مش ظابط. انا شاكر جار الانسة خوخا في المنطقة
كريمة
معلش انا ما عرفكش بس اعرف حضرة الظابط غنيم لانه خد مننا البطايق كلها وقت التحقيق في موت عاطف. وسالنا ف افتكرت انك ظابط. بس هو انتم بتسالو عن صور حاتم لية
شاكر
دة لمصلحة خوخا
غنيم وهو بيمسك صورة ل حاتم باين فيها جسمة كله و قال
انا هاخد الصورة دي
كريمة
ماشي
وقام غنيم وبعدي شاكر واستأذنو ومشيو. وكريمة كانت مستغربه ومش فاهمة اية اللي بيحصل. فخرجت امها مني وقالت
والله عال وصل بينا الحال للحكومة كمان تخش بيتنا
ولا كاننا تجار حشيش. وكل دة بسبب المحروسة صاحبتك
كريمة
امي الموضوع مش مستاهل جم خدوا صورة ومشيوا
مني
لا. بقي انا مش هسكت والبت دي. احسن لك تقطعي علاقتك بيها
كريمة
هو انا بشوفها ولا اعرف عنها حاجة من يوم اللي حصل ابوها مانع عنها الزيارات
مني
بركة يا اختي. دي بومة والبعد عنها غنيمة، ،،،،،،،،
المشهد الخامس
★مكتب غنيم★
بعدها بيوم بالظبط كان شاكر قاعد في المكتب وغنيم وراء مكتبه وقدام منهم واحد طبق الاصل من حاتم
ما كنتش شاكر مصدق عينية وقال غنيم
حاتم جاهز
شاكر
بالسرعه دي قدرت حضرتك توجد حاتم
غنيم
دة شغلنا وبتوع المكياج في الدخلية عندنا ما بيهزروش. انا كدة عملت كل اللي اقدر عليه اتمني خطتك تنجح والا انا مش هسامح نفسي مع اني بساعدك لله. بس برضو مش هقبل ان انسانه برئية حالتها تسوء بسببي
شاكر
باذن الله خير
غنيم
فهم حاتم بقي المطلوب منه. علشان خوخا تقدر علي خوخا. اول مرة اشوف واحدة تبقي خطر علي نفسها
شاكر
هو دة مريض الانفصام بيحارب نفسه ودي اخطر انواع الحرب. الحرب النفسية.،،،،،،،،
المشهد السادس
★شقة شعبان★
نرجع ل شعبان اللي. شبية حاتم بيقرب منه وشعبان كان بيقول
انت مت قدام عنية ازاي اشوفك تاني
طلع شبية حاتم سكينة من هدومة ومسك شعبان بقوة وكتم نفسه وقال
خوخا انا حاتم. وجاي اخد روح كل اللي بتحبيهم
شعبان بص له بطرف عينه وعرف من الصوت ان دة مش حاتم وسال نفسه مين دة. وازاي شبه حاتم كدة وخرجت انعام من اوضة خوخا علي الصوت ولسة هتصرخ قال شبية حاتم
فكري تصرخي وانا احيب لك خبره. اندهي علي خوخا
خوخا خرجت من الاوضة بعد انعام وبصت للي بيحصل وقالت
حاتم
لكن بدأ الصراع النفسي يدور اول ما شافت السكينة علي رقبه ايوها وفضلت تصرخ وخوخا التانية بتقول
اقتله
وترد خوخا
لا. لا اوعي تقرب منه
خوخا التانية بمنتهي الشر
بقول لك اقتله. اقتله وتعالي نبدأ حياتنا اللي حرمونا منها
خوخا
لا. بقول ابعد عنه.
وبدأت خوخا تخربش نفسها وهي بتقول
انتي تخرسي خالص. مش عايزا اسمع نفسك
لكن خوخا تبعد ايدها عنها وتقول
انتي اللي تخرسي واياك اشوفك تاني. ابعدي عني بقي
لسة هتروح انعام تدخل قال شبية حاتم
نصيحة سيبها تخلص منها. دة علاجها الوحيد
وشال شبية حاتم السكينة من فوق رقبة شعبان وقال
دي تعليمات الدكتور ما حدش يدخل
وراح شبية حاتم وفتح باب الشقة ودخل شاكر وغنيم
واستغرب شعبان وانعام بتبص ل خوخا واللي بتعمله في نفسها و صراخها لا يتوقف وقالت. انعام
هنفضل كدة واقفين نتفرج عليها
شاكر
لو ادخلنا دلوقتي كل شئ هيبوظ
وفضلت الخناقة النفسية دايرة لغاية ما صرخت خوخا صرخة ووقعت من طولها علي الارض والكل كان بيتابع الموقف لكنها وقفت ومسكت السكينة من شبية حاتم وبعدها الدم بدأ. يجري علي الارض لانها غرزت السكينة في، ،،،،،،،،،،،،،،،
اوعي اللي حصل ل خوخا يخليك تنسي التعليق. خلصت حلقة النهاردة اللي يارب تكون عجبتكم. واشوفكم باذن الله يوم السبت والحلقة الجديدة. ،،
رووووعه يا اديبنا الكبير تحياتي
ردحذفحلوة جدا
ردحذفاوعا تقول خوخا الثانيه الا كسبت
ردحذف