ضد الخوف
انا دورا. واللي مايعرفش معني اسم دورا فهو اسم تركي معني القمة. او المنحة والعطية. وزي ما بيقولو لكن واحد مننا نصيب من اسمة فانا طلعت لقيت نفسي بعشق المغامرة والوصول
ل قمة اعلي الجبال في بلدي تركيا او اي بلد جنب مني.
واسست جمعية خاصة للمغامرين وسمتها ضد الخوف وكان بيساعدني في المغامرات دي جوزي كريم. اللي اتعرفت عليه من خلال الجمعية. وبالين صديقة عمري المجنونه والانفلونسر المشهورة وصاحبة اعلي نسبة مشاهدة علي مواقع التواصل الاجتماعي. بعد تصوير ونشر فيديوهات المغامرات بتاعتنا. وفضلنا نطلع مغامرات لاعلي قمم الجبال ونصور المغامرات بتاعتنا لغاية ما جت مغامرتنا الاخيرة اللي فيها حصل اللي كان السبب في ان حياتي تنقلب 360 درجة. ومن بعد ما كنت عايشة حياتي كلها. ضد الخوف. وعمر الخوف ما قدر عليه. بقيت عايشة مستسلمة للخوف. ومستنيا نهاية تليق بجبانه زيي. تعالو احكي لكم اللي حصل
القصة دي اقتباس من احلي الافلام. في اخر القصة هقول لكم اسم الفيلم. يارب يعجبكم
★الحلقة الاولي★
كتابة واقتباس
محمد منصور. منص
وقبل ما نبدأ نوحد الله ونصلي علي خير خلق الله سيدنا محمد.
وبسم الله توكلت علي الله وهو رب العرش العظيم
صوت صراخي وانا في وسط النهار كان اعلي من صوت انذار الحربق. وانا شايفة الحرامية بيسرقوا عربيتي قدام مني وانا مش قادرة اعمل لهم حاجة واعمل اية وانا قاعدة علي سطح اعلي برج اشارة في تركية.برج ارتفاعه 500 متر. ومش قادرة انزل بسبب اللي حصل في البرج وقاعدة مستنية الموت. لا معايا اكل ولا شرب. الموت وبس هو الضيف اللي هايجي في اي وقت. وخصوصا بعد ما النسرين اللي في المنطقة بداوء يشموا ريحة الدم اللي نازل من رجلي وقريب اوي هيهجموا عليه. وصرخت باعلي صوت عندي وقولت
يارب.
ورجعت سكت واستنيت الموت. ،،،،،،،
اية اللي وصلني للمكان دة. هقول لكم. بس لازم احكي من الاول و اللي هاحكي دلوقتي عدي عليه سنة. وقت ما كنت انا وكريم وبالين بنتسلق اعلي جبال تركيا وبالين مسبقانا بكام متر. وبتصور بكاميرتها مغامرتنا دي. ووقت التسلق قرب كريم مني وخدني في حضنه وبدأ يهزر معايا. انتو ما تعرفوش انا بحب كريم قد اية. وفي عز هزار كريم معايا سمعنا صوت بالين بتقول
الكلام دة مش هنا شوف لكم اوضة احضنوا بعض فيها
ضحك كريم وباسني في خدي وقال بهزار
انا احضن وابوس مراتي وقت ما احب.
بالين وهي بتصورنا
وانا هصوركم وانزل علي القناة عندي واكسب متابعين جدد من المراهقين
بصت لها وقولت
لا بالين. بلاش تصوري المشهد دة.
بالين بهزار
يبقي خلي جوزك يبعد عنك ويركز في اللي احنا هنا علشانه دة احنا متشعلقين في الهواء وعلي ارتفاع 2500 متر. تقرييا
بعد كريم عني وهو بيقول
خلاص هبعد. وشوفي عندك علي الجهاز فاضل لنا قد اية ونوصل لقمة الجبل
بالين
لسة فاضل نفس المسافة اللي قطعنها
كريم طلع حبل بخطاف ولسة هيحطة بين صخور الحبل علشان يساعدنا في التسلق يخرج خفاش بين الصخور بتفزع كريم ويختل توازنه وايدة تسيب الصخرة اللي كان ماسكها صرخت لما شوفته بيقع والحبل اللي كان ماسكة مع ثقل كريم والسقوط المفاجي الحبل
اسحبيني
مسكت الحبل وحاولت اسحبة لكني ما اقدرتش وانقطع الحبل ووقع كريم من الارتفاع المرعب دة. وانا ببص له ودماغه بتخبط في كل معظم صخور الجبل. وبصيت ل
بالين اللي كانت بتصرخ بحرقة، ،،،،،،،،
وزي ما طلعنا نزلنا وتمت دفنه كريم وسط اصابع الاتهام واللوم من امه واخواته وكان بيقولو انتي السبب. انا فعلا السبب انا اللي قتلته لاني ما قذرتش امسك الحبل واسحبة يمكن ساعتها ما كانش مات. ومن وقتها وانا بخاف من الموت بخاف من المرتفعات بخاف حتي من اني اشوف كريم في احلامي علشان ما شفش في. عيونه نظرة معنها انتي السبب، ،،،،،،
وعيشت بعد كريم 12 شهر. سنة كاملة انا مش انا اتغيرت فيا كل حاجة حلوة. اعيش ازاي بس من غير كريم سبب فرحتي ودنيتي. وبقيت مدمنة الخمرة. مابقتش احب افوق ولا. بحب حد يشوفني ولا بحب حتي اشوف حد خايفة وخايفة وخايفة وبس. ما بقتش اعرف اي حاجة غير اني اخاف.
وفي ليلة وانا راجعه من محل الخمر اللي بشتري منه ازازيز الخمر لقيت بابا. كاظم واقف قدام بيتي وساند علي عربيته و كان بيبص لي وهو مضايق من اللي وصلت له. ومد ايده ومسك ازازة الخمرة مني وقال
مش كفاية زفت بقي
خد منه الازازة تاني وقولت
عايز مني اية
كاظم
عايزك بخير.
دورا
انا بخير.
وسبته ومشيت رايحة ناحية باب البيت مسك ذراعي وقال
لا. مش بخير
وخد الازازة مني وكسرها علي الارض قدام مني وقال بعصبية
طول ما الخمرة وراء منك مش هتكوني بخير
بصيت للازازة المكسورة وقولت
انسانة مكسورة بتبص علي ازازة مكسورة. شايف ازاي احنا شبة بعض
مسكني من ذراعتي الاثنين وقال
ل حد امتي هتفضلي كدة. هو مات وارتاح وانتي اللي تعبانة. تفتكري لو انتي اللي كنتي موتي كان هو عاش حزين زي ما انتي عايشة كدة
دورا
كان هيعمل اكتر من كدة
كاظم
انتي غلطانة
دورا بعصبية
انت اللي ما بتحبوش من زمان وانت مش ضايقة من اول ما جه يطلب ايدي
كاظم
لانه ما كانش بيغلط. والبني ادم اللي ما بيغلطش خالص دة. يبقي فاجر. وكنت خايف عليكي منه
دورا
اهو مات وساب لك الدنيا كلها بلاش بقي تغلط في
كاظم
هو فعلا مات. وخلاص عرفنا هو راح فين لكن الخوف عليكي انتي اللي انا مش عارف ولا انتي عارفة انتي رايحة علي فين
دورا
رايحة له. بس مش عارفة ازاي نفسي اموت واشوفه
كاظم
حرام اللي بتعملي في نفسك دة والله حرام
دورا
الحرام فعلا اني اعيش دنيا هو مش فيها.
كاظم
طيب تعالي عيشي معايا وانا هقدر انسيكي كريم
دورا
بابا انا ما بحبش مراتك وانت عارف وجودي هناك معني مشاكل ملهاش اخر انا وانت في غني عنها
كاظم
ريحي قلبي يا دورا وتعالي معايا
دورا
ريحني يا بابا. وامشي
وسبته ودخلت البيت وقفلت الباب وراء مني في وشة وقعد وراء الباب وفضلت اعيط وافتكر كريم وفي حالتي دي لا بحس بالوقت ولا بتعب من الدموع لكني ونمت مكاني من السكر والعياط. علي الارض وراء الباب و صحيت علي صوت خبط علي باب البيت وجرس الموبيل جنب مني بيرن فتحت عيوني بصعوبه ولقيت اللي بتتصل بيا. بالين صديقتي رديت عليها وسمعت صوتها من قدام الباب بتقول
افتحي الباب يا دورا
استغربت وقولت لنفسي
بالين دي بقالها سنة من بعد الحادثة. ما بتسالش عليه الا في الموبيل وكل فين وفين. وقومت فتحت لها وخدتني في حضنها وكان باين اوي اني وحشها فقولت لها
ولما انا وحشاكي كدة. ازاي تقدري تبعدي عني سنة كاملة
بالين وهي بتدخل البيت ومعها شنطة سفرها وبترمي جسمها علي الركنة. قالت
انا كنت في امريكا
قفلت الباب وانا مستغربه. وروحت قعد قدام منها
امريكا. وانا ما عرفش
بالين
ما كنش ينفع اقول. لك انتي بالذات لانك كنتي هتعترضي.
دورا
واعترضت لية
بالين
علشان كنت مسافرة مع صديق ليا.
دورا
صديق يا بالين. يعني برضو عايزا تعيشي حياة الغرب وتقدليهم في اسوء ما فيهم
بالين
من حقي اعيش الحرية في احلي صورها
دورا
انتي ازاي بتقولي كدة وانتي مسلمة عربية.
بالين
الحرية ملهاش علاقة بالدين
دورا
الحرية اللي ضد الدين ماتبقاش حرية. تبقي فجور
بالين بصت ل ازايز الخمرة اللي علي الارض ومسكت واحدة منهم وقالت
مش شايفه انك ما ينفعش تتكلمي علي الدين ودة حالك
سكتت دورا وما بقتش عارفة ترد. لكن بالين ابتسمت وقالت وهي بتاخدني في حضنها
زعلتي. اتا مش جاية بعد طول غياب علشان ازعلك انا جاي لك في مغامرة جديدة. مغامرة هترجع دورا للقمة.
دورا
انا من بعد كريم ما بقتش اقدر اعمل اي شئ الا الشرب
بالين
موت كريم مش معني موتك
دورا
بالين انا ما بقتش دورا اللي تعرفيها
بالين
دورا منظمة جمعية ضد الخوف. هي اللي بتقول كدة
دورا
اة انا اللي بقول كدة.
بالين
بس انا بقي. مش هطلع المغامرة دي الا بيكي. انتي ما تعرفيش المتابعين بيسالو عليكي ازاي
دورا
بالين علشان خاطري. خ،،،،،،،،،
حطت بالين ايديها علي بوق دورا وقالت
مش هسمع اي كلام منك. وانا دلوقتي محتاجة اكل وانام وبكرة الفجر هنسافر
دورا
هنسافر
بالين
للحدود التركيا مع بلغاريا .واطول برج اشارة في العالم طولة 500 متر. مهجور من 20 سنة. وسط الصحراء وما حدش من المغامرين قام بمغامرة زي دي للبرج دة
دورا
انتي مجنونه صح
بالين
برج الاشارة دة كان هو وسيلة الاتصال الوحيدة بين اول قمر صناعي تركي و مبني التيلفزيون التركي
دورا
انا مش عايزا اعرف عن البرج دة حاجة
بالين وهي بتخرج التاب من شنطتها وبتجيب صورة من علي النت للبرج دة وبتحط الصور قدام دورا وبتقول
شايفة ارتفاعه. تفتكر لما احنا نكون اول اثنين نطلع لاخر نقطة في البرج دة. مش نطمئن ملايين المشاهدات
دورا وهي بتبعد التاب قالت
قولت لك انا مابقتش انا ومش هسافر
بالين
لا. هتسافري وغصب عنك. وانا مش هروح المغامرة دي من غيرك ولو عايزا تفضلي كدة. يبقي الاحسن نفتح قبر كريم ونرلك تعيشي معه جوة القبر
دورا بعصبية
انتي بقالك سنة بعيد رجعتي لية
بالين
راجعه اكمل مشواري معاكي في ضد الخوف
دورا
طيب سيبيني افكر
بالين وهي بتقوم من فوق الركنة وبتقومها
ما فيش تفكير. و هتقومي دلوقتي تعملي لقمة اكلها وكوبية قهوة وتجهزي معايا ادوات المغامرة،،،،،
وفعلا قومت ورغم رفضي للسفر للبرج دة. الا ان بالين قدرت تخليني اسلم ليها وارضي.وما كنتش اعرف اني دي بداية النهاية اللي اتمنتها. والموت يبان بعيد لكنه اقرب من النفس اللي بيدخل جسمنا. ودة اللي هحكي لكم بكرة باذن الله. استنوني، ،،،،،،،،،
تحفه جدا جدا جدا
ردحذفاخيرا نزلت بروايه جديده
ردحذف