حور

 وعاشت في احضان الشيطان

                  ★الحلقة الثامنة★

كتابة واقتباس 
محمد منصور. * منص*

 وقبل ما نبدأ الحلقة نوحد الله ونصلي علي خير خلق الله سيدنا محمد. وعلي بركة الله نبدأ 

 ‏

بسم الله توكلت علي الله. وهو رب العرش العظيم

★بدات سلوي تفكر وتفكر وتفكر واحلام قالت

الغبي هو اللي يرفض فرصة ما تتكررش مرتين في حياته. سنة بعيد عن عيالك وترجعي لهم معاكي اللي يكفيهم وزيادة. ولا تعيشي معاهم والفقر محاوطهم من كل اتجاة.

وراحت احلام قربت ناحية ودان سلوي الشمال وقالت

الحرمان وحش وهما اتحرموا كتير. فرحيهم لو تقدري دي فرحتهم بالدنيا واللي فيها. خشي برجلك الشمال تلاقي دنيتي احلي من احلامك خشي اختاري ولو مرة صح

وبدات تفكر سلوي والخناقة بقيت علي اخرها بين قلبها وعقلها. وقررت سلوي انها تدخل. وفعلا دخلت سلوي الفيلا فابتسمت احلام وقالت

عين العقل. 

وقفلت احلام باب الفيلا وراء سلوي، ،،،،،،

وبعدها ب 1/2 س. يقف محسن بعربيته قدام بوابة فيلا احلام. وينزل فايز بصعوبه ويبدأ يمشي علي رجل واحدة ومن بعد فايز تنزل نيرة ويروح فايز وهو بيتنطط. ناحية بوابه الفيلا ومحسن يققل العربية ويروح وهو بيقول

استني بس اساعدك

وبدأ محسن يسند فايز وبمجرد ما وصلو عند البوابة لقوها مفتوحة. فقالت نيرة

طيب انا هستناكم هنا

بص لها فايز وقال

لا. دة انتي دخولك معانا هياكد ل سلوي ان احلام دي كذابة

نيرة

احلام دي اللي قالت لكم اني عملت ل سلوي عمل. زي ما انت حكيت لينا واحنا جائيين في السكة 

محسن

مش وقته يا نيرة خلينا بس نلحق سلوي من ايد الست الخبيثة دي

وفعلا تخطوا البوابة وراحو كلهم ناحية الباب الداخلي للفيلا وبرضو يلاقو باب الفيلا مفتوح بدأ فايز يشك ودخل بمنتهي السرعه سرعه ما تتنسبش مع واحد رجليه مكسورة وكان بينادي

سلوي سلوي.  

لكن ما حدش كان بيرد ندهه تاني وتالت وفضل يقول باعلي صوت عنده

احلام دي هي الشر اللي كان محاوطنا هي اللي عملت دة كله علشان تلجيئ ليها. خلتنا نمشي في طريقها وهي قاصدة شر من وراء الحكاية دي. سلوي انتي فين ردي عليه.  

وبرضو ما حدش بيرد بص محسن ل فايز وقال

تعالي اقعدك علي اي كرسي. وانا هروح ادور عليها في الفيلا كلها

وفعلا كان بدأ فايز يتعب وقعد علي اقرب كرسي وقالت نيرة ل محسن

اجي معاك

بص لها محسن وقال

لا. خليكي انتي مع فايز هنا

وفعلا طلع محسن للدور التاني من الفيلا وهو بينادي علي سلوي وبيفتح باب اوضة اوضة بتقابله وفي الوقت دة كان فايز بيقول ل نيرة

ليكي حق تزعلي مني انا وسلوي لكن اللي احنا شوفنا من وهم كان يخلينا نصدق فعلا ان سلوي معمول لها عمل. بس كان لازم نصدق اكتر الشيخ عجمي اللي كان ديما بيقول لنا انها معلهاش حاجة.

نيرة

حصل خير. وانا ما نكرش اني كنت ما بحبش سلوي رغم انها ماعندهاش نص اللي عندي لكني كنت بغير منها لانها عندها اللي مش عندي. قلبها الابيض اللي مليان حب ليك ولعيالها. ول اي حد عرفته. ديما كانت بتحب الخير للناس كلها ما كنتش عارفة ابقي زيها فكرهتها لكن بعد اللي حصل لها واللي شافته بجد الله يكون في عونها. صعبت عليه اوي. وعايزا اطلب منك طلب 

فايز

قولي 

نيرة

اوعي تلوم علي سلوي في اي تصرف هتعمله اليومين دول هي عامله زي التايهة. اللي عدت بي يقلب كيان اي حد.

وهنا يقف قدام منهم محسن ويقول

ماحدش في الفيلا

غضب فايز اوي وقال

راحت فين، ،،،،،،،،،،،،

ومن جوة عربية احلام تسوق احلام وجنب منها تقعد سلوي اللي كانت بتبص للطريق وهي سرحانه في عيالها وجوزها وبتسأل نفسها يا تري اللي عملته دة صح ولا غلط. وهنا تحس بانفاس سخنة قريبة منها جدا اتفزعت وبصت حوالين منها فبصت لها احلام وقالت

مالك

سلوي وهي لسة بتبص حوالين منها

حاسة زي ما يكون في حد قريب مني اوي

ابتسمت احلام وقالت

حد زي مين يعني. دي تهيؤات. الجن اللي كان مكلف باذيتك وخلاص خلصنا منه. ارتاحي علشان لسة الطريق طويل

سلوي 

هو احنا مسافرين الصعيد 

احلام

لية بتقولي كدة

سلوي

لمحت يفطي مكتوب عليها بني سويف بعد 100 ك.

احلام

احنا رايحين ناحية الصعيد بس مش الصعيد نفسها

سلوي

فين يعني

احلام

هتعرفي في وقتها ما تبقيش مستعجلة كدة

سلوي

اصل انتي قولتي هنسافر فانا جه في عقلي اننا هنسافر برة مصر يعني بلاد برة

ضحكت احلام وقالت

ما دة اللي هيحصل احنا هنسافر برة الدنيا كلها

استغربت سلوي وقالت

يعني اية

احلام

هنروح للقصر بتاعي في الصحراء. مالك خوفتي لية كدة

هو انا يعني هأذيكي

سلوي

لا. دة انتي كنتي السبب في علاجي 

احلام

يبقي خلاص سيب لي نفسك 

سكتت سلوي ورجعت تاني تبص للطريق، ،.،،،،  

وبعد كام ساعه سواقة ومن مكان ما في الصحراء يوجد قصر كله من ازاز احمر ازاز مش من عالمنا ولا من زمنا وكان قاعد في القصر دة طاروش في صورته المخيفة وبيبص علي الطريق في انتظار وصول احلام وسلوي وبمجرد ما تبدأ العربية تظهر وسط الصحراء. يقف طاروش ويبتسم وتظهر اسنانه المخيفة في مرايا من ازاز احمر ويتحول طاروش من صورته المخيفة لصورة شاب جميل جدا في نفس سن سلوي وكان لابس بدله خادم. وبيبص للعربية وهو بيبتسم وخرج من الاوضة اللي كان فيها وراح ناحية باب القصر وفتحة وخرج في نفس لحظة وصول عربية احلام وراح فتح باب العربية من ناحية سلوي بصت له سلوي باستغراب شديد وقالت ل احلام

مين دة

احلام

دة فريد. حارس القصر والطباخ والسواق. الخصوصي ليا هو كل حاجة هنا

سلوي وهي بتنزل من العربية وراحت جري وراء احلام اللي سبقتها بكام خطوة

ودة هيقعد معانا هنا لوحدينا

قالت احلام وهي ماشية قدام سلوي

خايفة منه ولا اية

سلوي وهي بتحاول تلاحق خطوات احلام السريعة

لا. بس ازاي نبقي اتنين ستات لوحدينا في منطقة مقطوعه زي دي ومعانا شاب

احلام

متخافيش فريد مستحيل ياذيني

سلوي

برضو يقعد ازاي معانا لو حدينا انا لو اعرف ان في حد هنا كنت رفضت اجي

هنا وقفت احلام وبصت ب غضب شديد ل سلوي وقالت

اية هتفضلي ترغي كتير قولت لك متخافيش دة خدام وما يعرفش ياذي يعرف بس يكون في خدمتنا. 

اتفزعت سلوي من طريقة احلام لكن احلام ابتسمت ولفت ايدها حوالين جسم سلوي وقالت

لية بس تخليني افقد اعصابي. بلاش تعملي اللي يخليني ازعل منك.

وهنا ظهر فريد وبدأ يهمس في ودان احلام همس مخيف. فبدات تتوجع احلام وجريت من قدام سلوي وراحت دخلت اوضة من اوض القصر وفتحت بوقها قدام مرايا علشان تمد ايدها في بوقها وتطلع حشرة سوداء باسنان كتير كانت بتاكل في لسان احلام والدم الاسود بدأ ينزل من بوقها وهي واقفة قدام المرايا وبتقول

سامحني يا مولاي طاروش. بس كلامها كتير ومزعج 

ظهر طاروش في المرايا وقال

دة انذار بسيط لو فكرتي تاني ان صوتك يعلي علي سلوي هيكون الموت امنية بتتمني تحقيقها

احلام وهي بتتوجع

امرك امرك. اوقف عذابك ليا

وانتهي عقاب طاروش ل احلام ومديت احلام ايدها ومسكت بمنديل وبدات تضغط علي لسانها اللي اتقطع منه حتة وبتحاول ايقاف الدم وهنا سمعت سلوي بتقول من وراء الباب 

احلام مين معاكي جوة

بصت احلام للباب وقالت

دة انا كنت بكلم فريد

سلوي

فريد قدامي برة.  

ارتبكت احلام وقالت

ازاي بس وهو معايا في الاوضة

وهنا ظهر فريد جوة الاوضة عند احلام وراحت احلام وفتحت باب الاوضة وقالت

اومال مين دة

اتصدمت سلوي وبصت وراء منها لقيت فريد اختفي فقالت

بس فريد كان هنا من ثواني

احلام

تاني التهيؤات انا كدة هبتدي اقلق عليكي

سلوي

انا عايزا امشي من هنا

وراحت سلوي ناحية باب الفيلا لكن الباب اتقفل بمنتهي السرعه واتخضت سلوي وبصت ل احلام

معني اية اللي حصل دة

احلام

الجن الخادم حضر عليكي تاني واظاهر انه ناوي ينتقم منك

جريت سلوي ناحية احلام واستخبت فيها وقالت وهي بتترعش من الخوف

هو احنا مش كنا خلصنا منه

احلام

خلصنا بس قدر يهرب من الرصد اللي سلطة عليه ورجع لنا

بصت سلوي حوالين منها برعب شديد ودقات قلبها بتزيد وقالت

والعمل

احلام

ما تفكريش تخرجي من هنا مهما حصل والا العقاب هيكون شديد. انا خايفة عليكي

سلوي

حاضر حاضر. بس احميني منه

احلام

تعالي نطلع اوضتي فوق. وفي الاوضة عندي مش هيقدر يقرب منك

سلوي

ماشي

وطلعوا الاثنين للاوضة، ،،،،،،،،،،

ومن جوة شقة فايز يقعد فايز قدام محسن ونيرة وهو عمال يتصل برقم احلام اللي في الكارت اللي خدوا منها وبرضو الرقم بيدي غير موجود بالخدمة. فقال محسن

كدة ما فيش قدام مننا غير اننا نبلغ البوليس ونديهم صورة لمراتك ووصف اللي اسمها احلام دي يمكن هما يقدروا يوصلو لها

فايز

صح. دة اللي لازم يحصل هو البوليس ،،،،،،

وفي نفس اليوم بالليل ومن جوة اوضة احلام. تنام سلوي جنب احلام. ويفتح باب الاوضة ويبدأ خيال طاروش يمشي علي الارض ويتجة ناحية السرير ويمشي الخيال علي الحائط ويصبح بطول الحائط تقريبا ثم يقترب من سلوي ويبدأ يمشي ايدة علي شعرها وينزل بايدة شئ ف شيئا. وهنا تصحي سلوي مفزوعه وتقعد علي السرير نص قعدة وتبص يمين وشمال وتلاقي الاوضة فاضية فتبص ناحية احلام تلاقيها نايمة. فتقول ل نفسها

الله اومال مين اللي كان بيمشي ايدة علي جسمي. لا. بقي انا لازم ارقي نفسي لان باين كدة ان الجن دة مش هيسيبني في حالي

وقامت من علي السرير ودخلت الحمام وبدات تتوضئ وخرجت من الحمام علشان تلاقي فريد واقف قدام منها وبيقول بصوت اجش 

انتي ناوية تعملي اية

سلوي باستغراب

وانت مالك

فريد

علشان اقول لك ينفع ولا ما ينفعش

سلوي

هو اية اللي ينفع ولا ما ينفعش. انا عايزا اصلي.

فريد

ما ينفعش. 

سلوي

هو اية اللي ما ينفعش.  

فريد بعصبية

الصلاة.

اتفزعت سلوي ومع خوفها بدأت ازاز القصر يصدر صوت ناس بتتعذب في الجحيم. بصت سلوي للازاز. ورجعت لوراء خطوتين وهنا ظهرت احلام ووقفت قدام منهم وقالت

اية في اية

سلوي اللي كانت مرعوبه من فريد وبصاته المخيفة ومن الاصوات اللي سمعتها 

قايمة علشان اصلي دة بيقولي ما ينفعش.  

بصت احلام ل فريد ورجعت بصت للنص التحتاني من سلوي وقالت

هو بيتكلم صح. علشان في دم بينزل منك

بصت سلوي لتحت واتفزعت من شكل الدم ودخلت بسرعه علي الحمام وهي بتقول

ازاي دة حصل

وراحت احلام ل فريد وقالت

بتأمرني باني ما تعصبش عليها وانت اللي بتتعصب

صوت طاروش خارج من جسم فريد

انتي عارفة يعني اية صلاة هنا. انتي اصلا عارفة يعني طهارة في مملكتي

احلام

بالعقل وهتنسي دنيتها بكل اللي فيها وهتحب دنيتنا. بس ما ينفعش تخاف منك.

فريد

عارف. بس ما قدرتش اتملك غضبي

احلام

طيب امشي دلوقتي وانا هعرف ازاي اتعامل معها، ،،،،،،

وبعدها بكام ساعه. ومن جوة احدي الاقسام يقعد فايز مع محسن قدام الظابط وبعد ما حكوا الحكاية كاملة للظابط قال الظابط

نفس الحكاية اللي سمعنها في اكتر من محضر ونفس موصفات الست اللي اسمها احلام. احنا هنا في مديرية القاهرة والجيزة جت لينا بلاغات كتير بموت عشر ستات في ظروف غامضة وكانو اخر حاجة بيشوفها هي اللي اسمها احلام

فايز

يعني مراتي مش اول ست تقع تحت ايد احلام

الظابط

فعلا. مش اول واحدة

محسن

ولية واحدة زي دي ما يتعملش عنها نشرة في التيلفزيونات والمواقع الاخبارية علي النت علشان الناس تتعرف عليها

الظابط

عملنا كدة وكل مرة الخبر بمجرد ما ينزل يختفي وحتي صورتها اللي قدرنا ناخدها من وصف الشهود ليها برضو تتبخر من علي النت.

محسن

دة كدة بقي يا فندم الحكاية مخيفة

الظابط

بالظبط.

فايز

يعني احنا بنتعامل مع عصابة بتخطف الستات.

الظابط

الوضع اخطر من كدة. الوضع في سحر واعمال سفلية. لدرجة ان كل تحرياتنا بتاكد ان في جن وراء اللي بيحصل

فايز

ولية ما تكنش احلام دي نفسيها هي الجن

الظابط

ممكن لية لا. احنا في زمن العجايب.

فايز

يعني مراتي ممكن تكون نهايتها زي نهاية اللي قبل منها

الظابط

نتمني ان النهاية ما تكنش بموتها.،،،،،،،،،،

ونرجع تاني للقصر وسلوي قاعدة بتشرب شاي وهنا يقعد قدام منها فريد فتبص له وتخاف ولسة هتقوم قال لها

انا اسف. ما كنتش احب اني اتحرم منك بدري يا حبيبتي 

لكن الجملة اتقالت بصوت هي تعرفه كويس صوت اول حبيب ليها صوت ابن عمها نادر. بصت له اوي وقالت

دة صوت نادر ابن عمي

فريد

نادر اللي غرق علشان انتي تعيشي 

وهنا يتعاد شريط الذكريات قدام سلوي ونرجع لمصيف بلطيم وسلوي بنت 17 س. وكانت في البحر مع ابوها وامها وولاد عمها وعمها وكان ابن عمها نادر حب عمرها الاول وبدا الموج يسحب سلوي. وهي لوحديها وابوها وامها وكل اللي معاها كانو برة علي الشاطئ. بياكلو لقمة.

بعدت سلوي ودخلت في الغريق ولقيت نفسيها ما فيش طول تحت رجليها خافت واترعبت وبدات تصرخ والمية بتسحبها ل تحت هنا ظهر نادر مد ايدة ليها لكنه ماقدرش يوصل لها دخل لجوة وهو ما بيعرفش يعوم سحبها ورمها لبعيد داست علي الارض بطراطيف صوابعها عاشت هي وغرق نادر. وكانت اخر كلمة بيقولها.

بحبك.

ونرجع للقصر ودموع سلوي بتجري علي خدها قعد فريد قدام منها وقال

وحشك

بصت له سلوي وقالت

انت اية اللي خلاك تفكرني بي

فريد

وهو انتي كنتي نسيتي

سلوي

انت عرفت الحكاية دي ازاي 

فريد

انا اقدر احضر اي روح. بس نادر مش مجرد روح

سلوي باستغراب

تقصد اية

فريد

نادر لسة عايش

اتصدمت. سلوي لكن فريد كمل عليها وقال

ونفسه يشوفك. بس قبل ما يحصل الكلام دة بيقول لك بتحبي مين اكتر هو. ولا فايز

اتصدمت سلوي اكتر واكتر من صعوبه السؤال وكمل فريد وقال

وبيقول لك لو اخترتي فايز. انسي انك تشوفي نهائي

سلوي

بس انا نفسي اشوفه

فريد

يبقي جاوبي علي السؤال. بتحبي مين اكتر هو ولا فايز

سكتت سلوي ومابقتش عارفة تقول اية. ،،،،،،

وبدات خطوة جديدة من خطوات الشيطان. بس السؤال هنا ممكن سلوي تختار الماضي واحلي ذكري في. ولا هتختار الحاضر والمستقبل. هتختار نادر. ولا فايز 

مستني توقاعتكم.