وعاشت في احضان الشيطان
★الحلقة السابعة★
كتابة واقتباس
محمد منصور. * منص*
وقبل ما نبدأ الحلقة نوحد الله ونصلي علي خير خلق الله سيدنا محمد. وعلي بركة الله نبدأ
بسم الله توكلت علي الله. وهو رب العرش العظيم
★سلوي
ايوة فرحانه وهفضل فرحانه. طول ما هكون السبب في فرحة عيالي. وهروح اشتغل معها كمان وكمان طالما في خير جاي من وراها
فايز
الخير ما بيجيش من الشر
سلوي
ما فيش شر اكتر من الفقر. ربنا فتح لينا طاقة القدر نقفلها بايدينا دة حتي يبقي حرام
فايز
يبقي كدة يا بنت الناس طريقك ما بقاش طريقي
سلوي وهي مصدومة
يعني اية
فايز
يعني هتبقي طالق
اتصدمت سلوي وقالت
اهون عليك يا فايز
فايز
اشمعني انا وعيالك هونا عليكي
سلوي
انا يا فايز. لوعايزا اعمل كدة هعمل كدة علشانا كلنا
فايز
اسمعي يا بنت الناس. انا وعيالك في كوم والست دي والفلوس بتاعتها في كوم تاني. واحب اسمع دلوقتي لو حبيتي تختاري هتختاري مين
سلوي
ودة سؤال انت طبعا يا فايز
فايز
يبقي فلوس الست دي ترجع
سلوي
انا صرفت منها 5 الف
فايز بعصبية
اية.
سلوي
جبت بيهم هدوم وفاكهه وخضار. احنا محرومين من حاجات كتير اوي يا فايز
فايز
واحنا علشان محرومين تصرفي كل الفلوس دي في يوم
سلوي
غصب عني العيال ناقصهم حاجات كتير انت نفسك اخر مرة جبت فيها هدوم ليك كانت من 7 سنين. انا كل فرح باخد هدوم اختي او بنت خالتي. لما يبقي معايا فلوس
ما جبش اللي نفسنا في لية.
وبدات تعيط سلوي وهي بتقول
بتلوم عليه لية. لوم علي الدنيا اللي جت علينا اوي. وخليتنا نتمني اي خرم ابرة نعدي منه للدنيا المحرومين منها
خدها فايز في حضنه وقال
طيب بطلي عياط
بصت سلوي ل فايز وقالت
بالله عليك سيبني شغاله مع الست دي هنخسر اية يعني
فايز
مش مرتاح يا سلوي وخايف
سلوي
والله ما في اي حاجة بتحصل في الفيلا تخليك تخاف
وهنا اتفتح الباب ودخل ولادهم الاربعه وكل واحد منهم لابس الهدوم الجديدة ومش قادر اوصف لكم قد اية هما كانو فرحانين بالهدوم وسلوي بصت ل فايز وقالت
بذمتك مش فرحه عيالنا تستاهل اننا نيجي علي نفسنا شوية
بص فايز لعياله ومبقاش عارف يقول اة. ولا يقول لا. لكن الحرمان وحش وفرحة عياله كانت مفرحاه. ،،،،،،،،،،
ويجي الليل وسلوي جنب فايز في السرير وفايز بيبص لها وسلوي بتقول له
هتفضل ساكت كدة
فايز
عايزاني اقول اية بس
سلوي
قول انك موافق اشتغل مع احلام
فايز
مش مرتاح وحاسس ان الست دي هي الشر نفسه
سلوي بعصبية
هو انت لية كدة. منشف دماغك و مش عايز تفهم
فايز بحدة
هو انتي بتزعقي لية زعلانه اني خايف عليكي و علي اللي ممكن يحصلنا بسبب سكة ملهاش ملامح
سلوي
هيحصل لينا اية اكتر من اللي احنا في
فايز
سلوي الكلام بالطريقة دي ملهوش لزوم. تصبحي علي خير
ونام فايز وادي ظهرة ل سلوي اللي قالت
هو دة اللي انت شاطر في. دي ما بقتش عيشة
ونامت سلوي وفايز قال في سرة وبدات خناقة بين قلبه وعقلة
اتغيرتي يا سلوي لما مسكتي الفلوس عرفت الست دي تخليكي قاسية اوي عليه
لكن قلب فايز قال
هي معذورة برضو شافت كتير معاك واستحملت اللي ما يستحملهوش اي حد
عقل فايز
الستات هما الستات بيحسبوها بقلبهم وبس. لكنها لو حكمت عقلها ل ثانية هتعرف ان الست دي وراء منها سر اخطر بكتير من العمل اللي اتعمل لها
قلب فايز
طيب هتسيبها تنام زعلانه كدة. دي برضو ام ولادك فهمها بالراحة ما تبقاش انت والدنيا عليها
عقل فايز
ما فيش بالراحة لازم تعرف انها غلط والسكة اللي عايزا تمشي فيها اخرتها مش حلوة
قلب فايز
رضيها متخليهاش تنام زعلانه منك. دي بقالها اسبوع بعيد عنك
كسب قلب فايز ولف وشه ناحية سلوي ولسة بيقرب منها لقي شعر اسود كثيف بيطلع من جسمها وبيدخل في بوقه شعر اسود بيمشي وكانه حشرة ودخل الشعر جوة بوق فايز وبدأ فايز يتخنق والشعر بيمشي جوة حنجرته وبيبص ل سلوي وبيحاول انه يستنجد بيها وفعلا قدر يلمس جسمها بايدة لفت وشها ناحيته وشاف طاروش مخلوق الدم صاحب الوجه المشوهه اتفزع فايز وصرخ علشان يصحي يلاقي نفسه علي السرير وجنب منه سلوي في صورتها الطبيعية وبتقول
فايز مالك
بص فايز حوالين منه في الاوضة كلها وقال
اعوذ بالله كابوس.
واستغرب اوي وقال
بس ازاي كابوس وانا كنت صاحي
سلوي
صاحي ازاي بس وانا شوفتك وانت نايم. حتي زعلت منك علشان سيبتني انام زعلانه
فايز وهو هايتجنن
ما حصلش. والله ما حصل. انا متاكد اني كنت صاحي
سلوي بشك
فايز. انت عاوز تخوفني وخلاص صح وتثبت لي انك صح وان احلام وراء منها شر
استغرب فايز اوي وقال
يعني اية انا كذاب
سلوي
لا. ما قصدش بس احنا عشرة عمر وانت لما بتمسك في رايك عندك استعداد تعمل اي حاجة بس يفضل رايك صح.
فايز
لا. والله. واية كمان
سلوي
فايز احنا في مركب واحدة. ولازم تاخد برأيي طالما في المصلحة. مش تعمل انك بتحلم بكوابيس وكدة عيب عليك
ضربها فايز بالقلم وقال
انا مش كذاب انتي اللي باين انك راجعه من عند الست دي مش طايقة عيشتنا. وهي كلمه وملهاش تاني دي عيشتنا عايزا تعيشي العيشة دي اهلا وسهلا مش عايزا انتي حرة
كل الكلام دة بيتقال وسلوي بتبص ل فايز وهي حاطة ايدها علي خدها مش مصدقة انه ضربها فقامت من جنبه وخرجت من الاوضة وراحت تنام في اوضة العيال وفايز عمال يبص للباب وزعلان ان الامور وصلت بينه وبين سلوي للوضع دة، ،،،،،،،،،،،،،،،
وتاني يوم الصبح يدخل شادي علي فايز الاوضة وكان معه كام سندوتش علي صنية وكوبية شاي ويحطهم قدام فايز وقال
ماما عملت لك الفطار دة
فايز
وهي فين
سلوي
مشيت
فايز في سرة
برضو عملتها. بتتحديني يا سلوي وعايزا تمشي اللي في دماغك
وهنا يرن جرس الباب فيقول فايز ل شادي
روح افتح بسرعه اكيد دي امك وما هنش عليها تمشي وتسيبنا
يخرج شادي من الاوضة ولا يمر سوي كام ثانية ويسمع فايز صوت اخوه محسن وشادي بيقول
ازيك يا عمي محسن عامل اية.
محسن
انا بخير المهم فين ابوك والف سلامه عليه.
شادي
بابا في اوضة النوم
محسن
معه حد
شادي
لا. لوحدة
ويدخل محسن ومعه مراته نيرة اتصدم فايز لما شاف نيرة ومحسن كان بيقول
الف حمد لله علي سلامتك يا فايز انا والله ما عرفتش باللي حصل الا النهاردة. انت عارف اني كنت مسافر وبصيف يعني وجيت من المصيف عليك
كل دة بيتقال وفايز بيبص ل نيرة اللي عيونها سليمة وهو هايتجنن ولاحظ محسن نظرات فايز ل نيرة فقال باستغراب
فايز انت مالك متنح ل نيرة كدة
نيرة
شكلة زي اللي مش مصدق اني ممكن ازورة وهو تعبان. بس الواجب ما فيش حد يقدر ما يعملهوش
كل دة برضو ببتقال وفايز باصص ل نيرة وافتكر وهي علي الارض وعيونها سوداء تماما ما فيهمش نني ابيض وعماله تقول
دة ذنبها دة ذنبها
محسن
فايز هو في اية. انت اول مرة تشوف نيرة مراتي
فايز
انت مش كنت معايا ساعه ما دخلنا علي نيرة وكانت عيونها سودا مافيهمش نني ابيض
محسن باستغراب
اية يا عم انت الكلام الغريب دة.
نيرة اللي اتفزعت قالت
يا ساتر يارب للدرجة دي مش طايقني عايزني اتحرم من عينية
فايز
ابوس رجلك وايدك افتكر. ساعه ما كنت. في مطروح وقبلتك علي قهوة وكنت عايز منك مفتاح الجبانة بتاعتك
استغرب محسن اكتر واكتر وقال
ما حصلش انا ما شوفتكش الا صدفة في المطعم ساعه ماكنت زعلان مني غير كدة ما حصلش انت اكيد كنت بتحلم
فايز
يعني اية. كل دة كان وهم وكذب ومافيش عمل من الاساس
محسن بص لنيرة وقال باستغراب
عمل اية
فايز اللي حاول ينزل من فوق السرير. لكن محسن منعه وهو بيقول
رايح فين بس
فايز
لازم الحقها
محسن
هي مين
فايز
سلوي
محسن
هي فين سلوي
فايز وهو بيمشي علي رجلة السليمة بس
رايحة للشر برجليها
محسن
انا مش فاهم حاجة
فايز
هفهمك واحنا في السكة. ،،،،،،،،،،،،،،،،،،،،
ومن قدام باب الفيلا تقف سلوي وترن جرس الباب فتفتح لها احلام وتبص لها وتقول
كنت عارفة انك هترجعي تاني
سلوي
ضربني وكان عايز يطلقني علشان بس هشتغل معاكي
احلام
سيبك منه. معايا انا وفي الدنيا بتاعتي. مش هتحتاجي ل حد غيري
سلوي
وعيالي
احلام
هي سنة هنسافر سوي نخلص شغل كتير وتاخدي مليون ج. وترجعي ل عيالك وتعيشي وسطيهم وتجيب لهم كل اللي اتحرموا منه
سلوي
سنة بحالها
احلام
دة شرطي الوحيد علشان تدخلي لو عايزا
سلوي
كتير اوي
احلام
ما هو برضو مليون ج. رقم مش قليل. ويستاهل انك تضحي شوية علشان خاطرهم
بدات سلوي تفكر وتفكر وتفكر واحلام قالت
الغبي هو اللي يرفض فرصة ما تتكررش مرتين في حياته. سنة بعيد عن عيالك وترجعي لهم معاكي اللي يكفيهم وزيادة. ولا تعيشي معاهم والفقر محاوطهم من كل اتجاة.
وراحت احلام قربت ناحية ودان سلوي الشمال وقالت
الحرمان وحش وهما اتحرموا كتير. فرحيهم لو تقدري دي فرحتهم بالدنيا واللي فيها. خشي برجلك الشمال تلاقي دنيتي احلي من احلامك خشي اختاري ولو مرة صح
وبدات تفكر سلوي والخناقة بقيت علي اخرها بين قلبها وعقلها. وقررت سلوي انها،،،،،،،،،،،،،،،،،
انها اية بقي. مستني توقاعتكم. سلام
تم
ردحذفجميلة ومخيفه
ردحذف