دموع تحت اقدام عشق
★الحلقة الحادية عشر★
والاخيرة
من تاليفي، ،
محمد منصور. ** منص **
وقبل ما نبدأ الحلقة نوحد الله ونصلي علي خير خلق الله سيدنا محمد. وعلي بركة الله نبدأ
بسم الله توكلت علي الله. وهو رب العرش العظيم
وتعدي الليلة وفي الصباح ومن داخل المستشفي اللي كان محجوز فيها مالك يقف الدكتور بداخل اوضة مالك وفي ايدة اشعة مالك وكان يقول بعصبية لاحدي الممرضات
يعني اية مريض يخرج من المستشفي من غير اذني.
الممرضة
والله يا دكتور كان هنا وانا عديت عليه بنفسي
الدكتور. بعصبية
المريض دة عنده تجلطات في خلايا المخ ولو ملحقناش نعالجه في خلال 24 ساعه هايموت
الممرضة
يبقي مافيش يا دكتور غير اننا نتصل بعيلتة يمكن يعرفو هو فين
الدكتور
صح. روحي بسرعة علي مكتبي هتلاقي الموبيل بتاعي هاتي،،،،،،،،
ومن داخل شقة عماد تجلس صباح ومعها رامي وفاطمة علي السفرة وقدام منهم طعام الافطار وصباح وفاطمة ياكلون ورامي يبص للاكل وبس فتلاحظ صباح فتقول
رامي ما بتاكلش لية
رامي
ماليش نفس يا ماما.
صباح
لا. انت لازم تاكل علشان مافيش اكل تاني طول النهار. احنا نازلين انا واختك
رامي
رايحين فين
فاطمة
انت نسيت ان مالك عامل حادثة ومحجوز في المستشفي
رامي
لا. مش ناسي بس دفنه عمي وعزاء خلوني مش مركز
صباح
الله يكون في عونك. انت الراجل اللي حليتنا دلوقتي وعارفة ان الحمل تقيل عليك
رامي
انا شايل الحمل من زمان المهم هو وانتم في المستشفي امبارح الدكتور قالكم اية
فاطمة
مش هاتصدق
رامي
لية يعني
فاطمة
علشان مالك جه له نفس المرض تقريبا اللي عند عشق
رامي باستغراب
مش فاهم
فاطمة
ناسي كل حاجة ومش فاكر الا عشق
رامي باستغراب اكتر
اية دة بق،،،،،
وهنا يرن رقم الخط الارضي فيقوم رامي علشان يرد ويرفع السماعه ويقول
الو
صوت الدكتور
انا الدكتور المعالج لمالك ممكن اعرف انت مين
رامي
انا رامي اخو مالك الكبير
صوت الدكتور
استاذ رامي. اخوك مالك خرج من المستشفي قبل ما يتم علاجه وهو عنده جلطات في خلايا المخ والجلطات دي لو ما تمش علاجها هايموت في خلال يوم ممكن تساعدني وتعرف لي ازاي خرج. وخرج مع مين
رامي بعصبية
يعني اية يخرج من المستشفي من غير ما تعرف يا دكتور
فتنتبه صباح للكلام فتقف مفزوعا ومن وراها فاطمة وتقول صباح
في اية يا رامي مالك حصل له حاجة
رامي للدكتور
طيب يا دكتور انا جاي لك حالا
ويحط رامي السماعه ويبص لصباح فتقول صباح مرة تانية
في اية يا رامي رد علية
رامي
مالك خرج من المستشفي من غير مايعرف الدكتور
فتتخض صباح وتقول
خرج ازاي بس وخرج راح فين دة مش فاكر اية حاجة ،،،،،
ومن داخل شقة مفروشة تجلس شروق جنب مالك وتبص له بحب شديد فيقول مالك لها
هو احنا نعرف بعض من امتي
شروق
احنا من قبل ما نتولد واحنا متقدرين لبعض انا ليك وانت ليا. وحبينا بعض واتجوزنا من سنتين تقريبا
مالك
يا للدرجة دي
ثم يمسك مالك دماغه ويتالم بعض الشي فتقترب منه شروق وتاخده في حضنها وتقول
لسة دماغك بتوجعك
مالك
يعني كل شوية كدة احس بوجع
شروق
معلش كل دة بس من الخبطة انما مع الراحة باذن الله هاتبقي كويس.
ثم تقف شروق وتقول له
بص انا لازم اسيبك دلوقتي علشان انا من امبارح وانا معاك هاروح الشغل وارجع لك علي بالليل كدة. وهابقي اتصل بيك علي الموبيل بتاعي انا سيبا ليك جوة
مالك
طيب وانا هاعمل اية طول الفترة دي
شروق
اتفرج علي التيلفزيون خش ارتاح شوية ولما تجوع الاكل عندك في الثلاجة. اي اكل بتحبة هتلاقي في التلاجة
وتبوسه شروق وهي تقول
مش هاتاخر عليك
وتخرج من الشقة ومالك يتوجع كمان مرة،،،،،،،،
وبعدها بساعة ومن داخل شقة وائل تفتح شروق باب الشقة وتدخل الي الشقة فتبص لها عبير بحدة وتقول لها
كنتي فين
شروق بارتباك شديد
واحدة صاحبتي كانت بتعمل عملية وانا عرفت ماما امبارح اني هابات معها
عبير
تسيبي عزا ابوكي علشان واحدة صاحبتك بتعمل عملية. دي العيلة كلها سالت عليكي امبارح وكان شكلنا وحش
شروق
عبير انا خلاص بعد اللي العيلة عرفته عني مابقاش يفرق معايا شكلي قدام منهم عامل ازاي
عبير
علشان كدة بمجرد الناس ما بدات تيجي خرجتي انتي
شروق
بالظبط كدة وكل يوم هاخرج وهابات مع صاحبتي لغاية ماتخف وتبقي كويسة
عبير بشك
والله. طيب مش تعرفيني بقي مين صاحبتك دي علشان ابقي اجي معاكي واعمل الواجب
شروق بارتباك
تيجي فين. لا طبعا
عبير
ولية لا طبعا
شروق بحيرة مش عارفة تقول اية
علشان. علشان.
عبير
علشان انتي كدابة
فتغضب شروق وتقول بعصبية
انا كدابة وماحدش لي دعوي بيا.
وتسيبها شروق وتدخل اوضتها وعبير بتبص لها وهي مش مرتاحه لها، ،،،،،،،،،
ومن داخل المستشفي يقف رامي مع مجموعه من الممرضين ومعه صورة لمالك ويقول لهم
يعني ازاي ماحدش فيكم شاف الشاب دة خارج من المستشفي
احدي الممرضين يقول
انا شوفته امبارح كان خارج مع ممرض اسمه سعيد
رامي بلهفة
وهو فين سعيد دة
الممرض
بيجي بالليل
رامي
وهو انا لسة هاستني لي بالليل ماتعرفش عنوان بيته
الممرض
يا استاذ سعيد دة ما بيروحش بيتهم علشان هو مش هنا دة شغال شغلتين واحدة الصبح والتانية بالليل هنا في المستشفي
رامي
وبينام امتي بقي
الممرض
بيخطف له ساعتين ولا حاجة هنا وفي الشغل التاني
رامي
وماتعرفش الشغل التاني دة فين
الممرض
لا والله ما عرف
رامي وهو بيبص للممرضين الاخرين
طيب ماحدش فيكم يعرف
كله رد بالنفي فياس رامي وقال لنفسه
كدة مافيش غير اني استني لي بالليل،،،،،،،
ومن داخل شقة وائل يفتح باب اوضة عشق من الداخل فتبص للباب باستغراب خديجة وعبير وشروق لان عشق ما بتقومش من علي السرير وتخرج عشق من الاوضة فتفرح خديجة بشدة وعبير لا تختلف عنها ويجروا الاثنين ناحية عشق اللي بصت لهم وقالت
انتو لابسين اسود لية
فقشعر جسم خديجة من الفرحة وقالت لعشق
عشق انتي عارفة احنا مين
عشق
طبعا انتي ماما
وتبص عشق لعبير وتقول
ودي عبير
وتبص لشروق
ودي اختي شروق اللي انا زعلانه منها بسبب انها راحت قالت لبابا
فتاخدها شروق في حضنها وهي فرحانه وتقول
حقك علية يا عشق انا من ساعتها وانا مش مسامحه نفسي
ثم ياخدوها الاتنين بالحضن وتقول خديجة
خلاص بقي. مش وقته والحمد لله الحمد لله. بيقطع من حته ويوصل من حته تانية
عشق باستغراب
هو في اية.
عبير
دي حكاية طويلة المهم انك بخير
عشق
انا بخير. اومال فين بابا
فيبصو الثلاثة لبعض ويسكتوا، ،،،،،،،،،
ومن المقابر تقف عشق. ومعها عببر قدام جبانه وائل وتعيط عشق وتقول
بابا انا حبيت افرحك واعرفك اني خفيت
وتعيط بحرقة وتكمل قائلا
بس زعلانه منك علشان سيبتني تعبانه ومشيت من غير حتي ما تطمئن عليه. انا ماما حكيت لي علي اللي انت قولته ليا وانا تعبانه. وصدقني يا بابا انا كمان بحبك اوي. وهتوحشني والله
وتعيط اكتر واكتر وتقول
قوم اضربني تاني. قوم كسر عضمي طالما غلطانة بس ما تمشيش وتسابنا كدة. دة احنا من غيرك ولا حاجة. لكن انا عارفة انك كنت بتحبني وكنت الدلوعة بتاعتك علشان كدة جايه لغاية عندك واقول لك هتوحشني يا بابا. وربنا يرحمك، ،،،،،،
وترفع ايدها لفوق وتبدأ في قراءة الفاتحة، ،،،،،،،،
ومع حلول الليل ومن امام المستشفي يجلس رامي في انتظار المدعو سعيد ولكن يخرج من داخل المستشفي ممرض ويقول لرامي
يا استاذ. سعيد لما عرف انك من اهل الشاب الفاقد للذاكرة اللي كان معه امبارح خاف يجي وخد اجازة
رامي بحدة
ومين بس اللي عرفه
الممرض
ماعرفش والله انا عرفت من واحد زميلي وهو اللي طلب مني اني اعرفك بدل قعدتك كدة
رامي
وسعيد دة يخاف يجي ليه هو انا اخويا اتخطف ولا اية.
الممرض
مافيش غير انك تبلغ البوليس وهما يتصرفو،،،،،،،،،،
وبعدها بساعه تجلس خديجة مع صباح وبجانبهم عبير وفاطمة وشروق وصباح وكان القران شغال فيرن موبيل صباح فترد قائلا
اية يا رامي عملت اية
صوت رامي
انا في القسم اهو وببلغ البوليس عن اللي اسمه سعيد
صباح
انا عايزا اعرف الممرض دة خرج ابني من المستشفي ودا فين بس
وهنا تبص عبير لشروق اللي ارتبكت بشدة وقالت لخديجة
ماما انا هانزل بقي علشان اروح لصاحبتي المستشفي
وتقوم تقف شروق ولكن عبير تمسكها من ايدها وتدخل بيها احدي الاوض فتقول شروق
اية سحباني من ايدي لية كدة
عبير
انتي اللي وراء اللي بيحصل دة. صح
شروق
اية هو اللي بيحصل
عبير
خرجتي مالك من المستشفي
شروق
وانا بس هاعمل لية كدة
عبير
انا اللي عايزا اعرف هاتعملي لية كدة. ماهي تبقي مصيبة لو لسه بتحبي بعد كل اللي حصل منه
شروق
انا ماعرفش حاجة عن مالك
عبير
شروق انتي اختفيتي امبارح بعد ماجه خبر ان مالك عمل حادثة وكمان امبارح بيتي برة وحوار انك بايتة مع صاحبتك دة مايخشش علي عيل صغير انا اختك وحفظاكي كويس.
وتبص عبير في عيون شروق بمنتهي الحدة وهي تمسك ذراعتها الاثنين وتقول
روحتي واترميتي في حضن اللي كان السبب في موت ابوكي. وفضيحتك روحتي واترميتي في حضن اللي قال علي اختك مجنونه. انت اية دة ابوكي لسة نار فراقة ما بردتش
شروق وهي تبعد ايد عبير عنها
ابوكي هو السبب انا كنت عايشة انا ومالك في منتهي السعادة وجه ابوكي وشتم امه خلي مالك ما يعرفش هو بيعمل اية لكن مالك بيحبني انا متاكدة وعارفة انه بيحبني وانا بحبه وبحبكم انتم كمان بس من غير مالك مش هاقدر اعيش،
عبير
وعلشان كدة هربتي من المستشفي
شروق
اة هربته وهاخدة واعيش انا وهو بعيد عنكم خالص
عبير بحسرة
وبابا اللي مات بسببه
شروق
مع الايام هاننسي لكن مالك ما يتنسيش.
عبير
ولا بابا هايتنسي ولو انتي عايزا تكملي مع مالك روحي له بس ساعتها انا مش هاكون اختك واظن ان ماما وعشق مش هايحبوا يعرفوكي
شروق
عبير ما تصعبهاش علية انا ماقدرش اعيش من غيركم ولا اقدر اعيش من غيرة
عبير
اختاري. عايزا تخرجي من الباب دة وتروحي له ما ترجعيش هنا تاني والا هاعرفهم كلهم ان مالك معاكي عايزا تفضلي وسطينا انسي مالك واختارينا احنا
فتبص لها شروق ولسة هاتتكلم سابتها عبير وخرجت وفضلت شروق في الاوضة تفكر وتعيط بحرقة وتقول
مش هاقدر اعيش من غيره
وقامت ومسحت دموعها وفتحت باب الاوضة وخرجت من الاوضة ومنها الي باب الشقة ووقفت عند باب الشقة وهي بتبص لعبير وعبير بتبص لها وقلبها بيتقطع وفضلو الاختين باصين لبعض للحظات لكن اللحظات عدوا كانهم عمر وخطت شروق خطوة برة باب الشقة وهنا افتكرت ابوها وائل لما خدها في حضنه وقال لها
يمكن لما اخدك في حضني دلوقتي تخافي علي زعلي لما اموت
وفضل الصوت يتكرر. وشمت ريحة وائل في المكان وسمعت صوته بيقول
انتي الكبيرة واخواتك امانه في رقبتك
فرجعت تاني لداخل الشقة وبصت لعبير وعيطت وعبير عيطت من الفرحة ان اختها رجعت لها وقالت شروق لخالتها صباح
خالتي ماتخفيش علي مالك انا عارفة هو فين، ،،،،،،،،،
ومن داخل الشقة المفروشة ينام مالك علي السرير في الاوضة وهو راسم علي ذراعة الشجرة واسم عشق فدخل الي الشقة شروق ومعها رامي وصباح وراح رامي ناحية مالك علشان يطمئن علية لكنه لقي مالك قاطع النفس ففضل يهز في لكن بلا اي فائدة فقد مات مالك فصرخت صباح بشدة وانهارت والشجرة واسم عشق علي ذراعة وجريت علية شروق واترميت في حضنة وبصيت لة وقالت
انا اللي قتلتك. خدك علشان اخبيك من الناس كلها وتبقي ليا وماكنتش اعرف اني بكدة هاخليك تموت
وتصرخ وتنهار وتنادي علي مالك وقلبها هايقف من الصدمة ،،،،،
ومرت الايام والشهور والسنين وظهرت نتيجة عشق ونجحت في اخر سنه وراحت عند الورشة اللي شغال فيها رامي وقبلت رامي اللي استغرب زيارتها وقال
عشق بتعملي اية هنا. في حد في البيت عندنا حصل له حاجة
عشق فرحا
نجحت وحبيت انت اول واحد تعرف وجيت اعرفك اني اتخرجت اهو مش هاتيجي بقي تكلم ماما
رامي باستغراب ممزوج بالفرحة
انتي بتقولي اية
عشق
يا رامي انجز. عبير حكت لي علي كل حاجة وعرفتني يوم ما دخلت علية وانا تعبانه وقولت اية.
رامي باستغراب
هي عرفت ازاي
عشق
كانت بترقبك. وباين كدة ان الكلام بتاعك لما طلع من قلبك وصل لقلبي وكنت السبب في اني اخف ومن ساعتها وانا قلبي بيدق باسمك يا اجدع رامي انا شوفته في حياتي
رامي فرحا
يعني انتي ممكن تتجوزي واحد زيي وريحتة، ،،،،،
فتحط عشق ايدها علي بوق رامي وتقول
كنت غبية يوم ما قولت ريحتك وحشة ريحتك دي ريحة كل راجل جدع وانا بحبك يا رامي
فتدمع عيوان رامي ويقول
عشق. بتحب رامي
عشق بدلع
زي ما رامي بيعشق عشق،،،،،،،،،،،
وعدينا بفترة الخطوبة واتجوز رامي من عشق. وبعديها ربنا عوض علي شروق بمدرس زميلها واتجوزت بعد ما عرف قصتها مع مالك
. وخلصت قصتنا ويارب تكون القصة عجبتكم والخلاصة ياما بيحصل بين العائلات مش المفروض ان كلمة اتقالت في ساعه عصبية تكون السبب في ان العيلتين يخسروا بعض. للنهاية احنا في الاخر اهل وعيلة واحدة
النهاية
مستني راي كل اللي شرفني بقراءة. القصة
حلوه قريبه من الواقع والمشاكل الا بتحصل فيه
ردحذفقصه روعه ماشاءالله وكلش قريبه لواقعنا ومشكلاتنا
ردحذف