الهام واللي كان الحلقة الاخيرة

 دموع تحت اقدام عشق

                        ‏★الحلقة التاسعة★

من تاليفي، ، 
محمد منصور. ** منص **

وقبل ما نبدأ الحلقة نوحد الله ونصلي علي خير خلق الله سيدنا محمد. وعلي بركة الله نبدأ 

بسم الله توكلت علي الله. وهو رب العرش العظيم

                        ‏

فيضربة رامي بالقلم كمان مرة ومالك لسة باصص لعمه اللي كان بيبص لشروق بغضب شديد ومالك بيقول

علي فكرة يا ابلة شروق انا رجعتك تاني لعصمتي وبقيتي مراتي ومن جديد هنتقابل في شقتنا فاكرة العنوان طبعا 

ويضحك مالك ورامي بيضرب في بمنتهي القوة وفي هذة اللحظة الدم يطير في الهواء وصراخ خديجة لا يتوقف لان وائل بدأ ينزف دم من بوقة ومن ودانه وكانها اشارة لارتفاع في ضغط الدم ادي الي نزيف خارجي. فتجمع حوالين منه كل الموجودين في الشقة لاطمئنان علية ورامي شاله وجري بي مسرعا وبصيت فاطمة وصباح لمالك اللي كان واقف مطرحة بجحود غريب وقالت صباح بعصبية 

كويس اللي انت عملته ده. انت جايب القسوة دي كلها منين 

مالك

ماما. انا عملت كدة علشان اجيب لك حقك

صباح وهي بتضربة بالقلم تقول

حق اية. هي حرب كلمتين عمك قالهم ليا ساعه ضيقة وانا زعلت شوية وخلاص صفيت تقلبها انت تار ولازم تاخده. نسيت الراجل اللي هايموت بسببك دة. عمل علشانك اية من بعد موت ابوك. دة كان بيقسم رزقة اللي جاي لي ولعياله بينا وبينه وعمره ماخلانا محتاجين لحد وسترنا نقوم احنا نفضحه يا خسيس 

مالك بحزن شديد

هو دة جازتي اني كنت برد لك كرمتك

صباح

كرامتي. هي فين كرامتي دة انا زعلت من عمك اول مرة يوم ماقال عليكم تربية نسوان. لكن دلوقتي ماليش حق ازعل انا فعلا ماعرفتش اربي ماعرفتش اطلع راجل اتشرف بي قدام الناس.

مالك

انا راج،،،،،،،

فتضربه صباح كمان مرة بالقلم وتقول مقاطعه له 

انت واطي وخسيس. ملعون ابوة البطن اللي شالتك. امشي اطلع برة من النهاردة لا انت ابني ولا انا امك. هاموت يا مالك وانا غضبانه عليك

فاطمة

يا ماما هايروح فين بس

 

صباح بعصبية

يروح في ستين داهية.

مالك بعصبية 

كدة يا ماما ماشي

وخرج مالك من الشقة وهو متعصب جدا. ،،،،،،،،

ومن الشارع يمشي مالك وهو مخنوق جدا وبيفكر في كل اللي حصل ووقف تحت الشجرة اللي مكتوب عليها. رساله رامي لعشق. ( عيد ميلاد قلبي ال 20 بحبك وخايف تكسفيني ) وقال لنفسه

جملة من كام كلمة كانت السبب في خراب كنا عايشين ومرتاحين لازم يا رامي تكتبها اهه قلبت غم. بص يالا بقي بجمله الفضايح

ومسك مسمار كان علي الارض وزود في الجملة عشق علشان تبقي.  

(عيد ميلاد عشق. قلبي ال20 بحبك وخايف تكسفيني) 

وفضل يبص للجملة بغضب شديد وعمال يضحك بسخرية وبيقول

كدة كل اللي يقراء الجملة يعرف ان المقصود بيها عشق بنت وائل علشان مافيش حد غيرها اسمه عشق في المنطقة 

 ورجع لوراء وهو مش شايف الطريق وعمال يبص للجمله وفرحان انه كمان شهر ببنت عمه. وهنا يحدث اصطدام رهيب عربية ملاكي تخبط مالك بمنتهي العنف ويقع مالك علي دماغه، ،،،،،،،،،،

وبعدها بكام ساعه ومن داخل احدي المستشفيات وفي الحجرة اللي بيتعالج فيها وائل يقف وائل علي رجله بصعوبة ويقول لخديجة

انا عايز اروح

خديجة 

تروح فين بس. مش لما نطئمن عليك

وائل 

انا كويس مشيني من هنا.  

فتنادي خديجة علي رامي اللي كان واقف برة مع شروق وعبير والدكتور فيدخل رامي مسرعا ومعه الاختين ويبص رامي لوائل فيقول له

بلاش تقف دلوقتي علي رجلك انت لسة تعبان يا عمي

وائل

انا هابقي كويس بس روحوني 

رامي

طيب اسال الدكتور الاول لو ينفع هاخدك ونروح

ويخرج رامي من الاوضة ويسال الدكتور ويرجع لعمه مرة اخري ويقول

الدكتور بيقول ان الحمد لله حالتك استقرت. لو عايز تمشي امشي بس لازم نكمل العلاج

وائل

اكمله لو في عمر، ،،،،،،،،،،

ومن امام شقة وائل يفتح رامي باب الشقة وهو ساند وائل ويدخلو الي الشقة جمعيا ويقول رامي

هاسيبك انا بقي ترتاح يا عمي. ولو عوزت اي حاجة اديني

حس

فيبص رامي لوائل ويقول

لا استني علشان عايزك. بس في الاول قعدني علي اي كرسي

عبير

ما تخش الاوضة بتاعتك يا بابا علشان ترتاح

وائل

انا مش هارتاح الا بعد ماراضي عشق. بس قبل مارضيها عايزكم تعرفو ان من بعدي رامي هو راجل البيت

خديجة وهي بتعيط علي حال جوزها

حسك في الدنيا يا وائل.

شروق

ربنا يخليك لينا يا بابا

فيبص وائل لشروق ولا يرد فتعيط شروق وتقول

ليك حق تزعل مني. انا السبب في كل اللي حصل لك دة انا مش هسامح نفسي

وائل بصعوبة 

وهازعل منك لية انا المفروض ازعل من نفسي اني ماعرفتش اربي. وزعلت من نفسي اكتر لما قولت لصباح ان تربية النسوان ما بطلعش رجاله. وهي ربت وطلعت راجل يتشرف بي اي حد. 

ويبص لرامي. ويكمل قائلا

ولاد عمك في رقبتك من بعدي دي وصيتي الاولي والاخيرة

رامي

يا عمي ماتقولش كدة. ربنا يخليك لينا ويبارك في عمرك

وائل

الدعوي دي انا مش محتاجها دلوقتي الدعوي اللي محتاجها فعلا ربنا يستر عرض بناتي ويكفيهم شر فضيحة تانية

ويقف وائل ويبص لشروق ويقول لها بحنية 

تعالي يا شروق

فتخاف شروق من رد فعل والدها ولا تتحرك وتبص لكل اللي حواليها فيقول بصوت حنون اكتر

تعالي متخافيش

فتقترب شروق من وائل وتبص له بحذر فيقول لها

انتي الكبيرة وانا ياما ضربتك وكنت فاكر اني لما اكسر لك ضلع يطلع لك 24 غيره. لكن كنت غلط انا لو كنت خدتك مرة واحدة في حضني كنتي خوفتي علي زعلي وماكنتيش عملتي اللي عملتي. علشان كدة

فياخد وائل شروق في حضنه وسط استغراب الجميع كرد فعل غير متوقع ويبكي بشدة ويقول

الحضن دة متاخر سنين كتير وحرمتك منه في اوقات نجاحك انا عارف انك علشان كدة دورتي علية برة وكويس انك انتي ماوصلتيش لي في الحرام. الوقت دة مش وقت عتاب ولا لوم انا عايز اموت وانتي فاكرة اني في يوم خدك في حضني يمكن لما اموت تخافي علي زعلي

فتحضنة شروق بشدة ودموعها تنزل علي هدومة وتقول

بعد الشر عليك يا بابا

وائل وهو بيبص لها يقول 

اخواتك امانه في رقبتك. وبالذات عشق

خديجة وهي منهارة من العياط

يا وائل بالله عليك كفاية بقي انت هاتعيش وهاتبقي زي الفل

وائل وهو بيبص لخديجة ودموعه في عيونه

لو زعلتك مني مرة. فافتكري اني عمري ما كنت غير ليكي. ممكن اكون مش رومانسي ولا لية في كلام الحب بس والله بحبك ومهما كبر سني انتي هاتفضلي حبيبتي ومراتي واللي عاشت معايا علي المرة قبل الحلوة وانا كمان عمري ما بصيت لغيرك. علشان كدة ابقي افتكريني بالخير

فتعيط خديجة وتاخده في حضنها وهي تقول

بس بقي بالله عليك مش قادرة استحمل 

فيبص لعبير ويقول لها

انتي بقي الحنية كلها والعاقلة وانا مش خايف عليكي. ونفسي تتجوزي راجل جدع زي رامي

عبير وهي بتعيط وبتاخد وائل بالحضن تقول

ما حدش هايجوزني غيرك.

فيبص وائل ناحية الاوضة بتاعت عشق ويروح ناحية الاوضة وهو يقول

مش فاضل غير عشق. اللي مش عارف دموعي اللي هاتكون تحت رجليها هاتقبلها مني وتسامحني ولا. هاموت وهي زعلانة مني

فيفتح باب الاوضة ويقول لهم

تعالو خشو معايا. علشان لازم اتاسف لعشق قدام منكم

ويدوغ وائل فيجري ناحيتة رامي مسرعا ويسنده فيقول وائل. بصعوبة 

انا كويس ما تقلقش

ويروح ناحية عشق اللي كانت نايمة بسبب العلاج ويبص لها بحنان شديد ويقول وهو بيعيط وبيبوس راس عشق 

يعلم ربنا انك انتي اقرب واحدة لقلبي في اخواتك. ولما عملت فيكي كدة كنت خايف عليكي وزعلان منك البنت الحلوة بتبقي خطر علي نفسيها لما تفرح بجمالها وماتعرفش ان الجمال زي ما هو نعمة فهو برضو ساعات بيبقي نقمه. كان لازم تخافي علي نفسك وماتفرحيش بنفسك لمجرد كلمتين اتكتبه في رساله لازم ترفضي اي حد يفكر يرتبط بيكي بالطريقة الغلط والسكة اللي كلها لف ودوران

فيتالم رامي ويقول بحرقة 

يا عمي اللي بعت الرساله دي ما كنش قصدة لف ودوران هو فعلا بيحب عشق وعايزاها في الحلال بس كان عايز يتاكد انها بتحبه ولا لا. وتقبل تكون مراته 

فيبص وائل لرامي ويقول

ومالك بتتكلم بحرقة لية كدة. 

رامي

علشان انا اللي بعت الرساله دي. مش مالك 

فتستغرب خديجة بشدة فيضحك وائل بصعوبة ويقول

انت يا رامي. طيب لية ما طلبتش ايدها مني لية تلف اللفة دي كلها 

 

رامي

علشان جبان. انا من صغري وانا شايل هم عيلة بحالها لكن في الحب كنت جبان. وخايف لعشق ترفضني ترفض حبي

ويبكي رامي بحرقة ويقول

دموعك اللي تحت رجل عشق ممكن تشفع لك لكن دموعي انا عمرها ما تشفع لي لاني السبب في كل اللي حصل انا اللي خربت الدنيا بين العيلتين انا السبب في المرض اللي عند عشق انا الجبان اللي ما يستهلش اي عطف او شفقة من حد. عمي انا اسف. اني ما طلعتش راجل زي ما كنت فاكر

وائل وهو دايغ جدا يقول بصعوبة

لا. راجل وراجل جدع كمان وكلنا بنغلط لما عشق تخف عرفوها اني بحبها وكن،،،،،،،،،

وفي هذة اللحظة يقع وائل علي الارض فتصرخ خديجة وبناتها ويهز رامي في عمه بكل قوة ولكنه قد مات ، ،،،،،،

ومن داخل اوضة في مستشفي يفوق مالك مما اصابة يلاقي دماغه مربوطة و مصدعة وعنده زغلله وقدام منه يجلس دكتور يقول له

حمد لله علي السلامه

مالك بصعوبة

الله يسلمك

الدكتور

مالك فاكر شكل اللي خبطك علشان المحضر اللي بيتعمل 

مالك باستغراب

مالك مين

الدكتور

انت اسمك مالك. دة الاسم اللي في البطاقة اللي لاقينها معاك

مالك

انا ماعرفش اسمي

الدكتور

ولا تعرف عنوانك

مالك وهو بيتذكر بصعوبة 

انا ماعرفش اي حاجة غير. الشجرة وعيد ميلاد عشق قلبي. ال 20 بحبك وخايف تكسفيني

الدكتور باستغراب

مالك انت بتقول اية

مالك وهو يكرر الجملة بتركيز 

عشق والشجرة. بحبك وخايف تكسفيني

الدكتور

ومش فاكر اي حاجة تاني

مالك

مش فاكر. اي حاجة. وكل اللي حاسس بي عشق وكاني ماعرفش غيرها وقلبي مشتاق ليها 

فيبص له الدكتور باستغراب شديد ،،،،،،،،،،،

وفي نفس اللحظة كانت عشق تصرخ وبتنادي علي مالك قائلا 

مالك،،،،،،،،،،،،،،،

يارب تكون الحلقة عجبتكم. مستني رايكم.