الهام واللي كان الحلقة الاخيرة

 دموع تحت اقدام عشق

                 ‏★الحلقة الثامنة★

من تاليفي، ، 
محمد منصور. ** منص **

وقبل ما نبدأ الحلقة نوحد الله ونصلي علي خير خلق الله سيدنا محمد. وعلي بركة الله نبدأ 

بسم الله توكلت علي الله. وهو رب العرش العظيم

                          ‏

رامي وهو بيحط ايدة علي كتف مالك يقول

اخويا مالك بيتكلم صح لازم شروق تتجوز الاول وعلشان كدة انا جاي اطلب ايد شروق منك. 

فيبرق مالك من شدة الصدمة وعبير وشروق يبصو له ووائل يقول

هو اية اللي بيحصل هنا بالظبط

رامي

اية يا عمي. انت زعلان اني جيت اخطب شروق

وائل

اوعو تكونو فاكرين ان عبيط او اهبل علشان اصدق ان اللي بيحصل دة طبيعي. لا والله في حاجة انتو مخبينها عني. وقلبي بيقول ان مالك ماسك ذلة علي شروق

رامي بانكار

ازاي بس يا عمي تفكر كدة. يعني لو في حاجة بين شروق ومالك انا برضو هاجي اتجوزها. مستحيل طبعا

وائل

ماهي شروق قدامك بقالها سنين اشمعني دلوقتي طلبت ايدها وخصوصا بعد ما اخوك حط العقدة في المنشار وقال اية مش عايز يتجوز عشق الا لما شروق تتجوز

فيبتسم مالك ويبص لشروق من تحت لتحت فيقول رامي

انا اللي طلبت منه يقول كدة علشان انت توافق علي جوازي من شروق وما ترفضش

فيستغرب مالك بشدة ويبص لرامي ووائل يقول

ولية هارفضك

رامي

خوفت تفتكر اني بطلب ايد شروق علشان طمعان فيها اكمنها يعني مدرسة وحالتها المادية احسن مني

خديجة

اخص عليك يا رامي ازاي تفكر كدة

فتبتسم عبير وتبص لمالك اللي كان شايط من الغيظ فيقول رامي

انا من زمان وانا بحب شروق لكن مستواها المادي مخليني اقدم خطوة وارجع خطوة في طلب ايدها خايف لترفضني يا عمي

وائل

يا رامي. انت ابني وشروق بنتي وانا مش هلاقي ليها عريس احسن منك

رامي 

يعني موافق يا عمي

وائل

طبعا موافق ربنا يتملكم علي خير

خديجة

يبقي كدة خلاص نعمل الفرحين مع بعض

وائل

وانا ماعنديش مانع.

عبير

كدة بقي احنا عايزين زغروطة 

وتزغرط عبير باعلي صوت عندها وهي بتبص لمالك بطرف عينها، ،،،،،،،،،،،،

ونرجع بالاحداث لساعتين بالظبط قبل المشهد دة وعبير واقفة مع شروق قدام باب المسجد وبتبص عبير علي مالك اللي بيركب تاكسي وتقول

ازاي مالك اللي متربي وسطينا يطلع واطي اوي كدة

شروق

كان بيمثل علينا كلنا دور الشاب الشهم المتربي

فتبص عبير لشروق وتقول بحدة

وانتي ازاي تقولي دة انا بحبك. اية لسة قلبك بيعشقة بعد كل اللي عمله فيكي

شروق بانيهار

مش بمزاجي يا عبير. دة اول كلمة حلوة سمعتها كانت منه واول راجل لمسني برضو هو. غصب عني بحبة. ومش بالساهل حبه يطلع من قلبي دة مش حب مراهقة دة حب بجد 

وتعيط بحرقة ثم تقول

وبعدين ما ابوكي هو السبب لولا اللي عمله مع خالتي صباح ماكنش غدر بيا هو قال كدة. واكيد هو بس مضايق من اللي حصل واول ما هايروق هايرجع لحضني تاني

عبير وهي بتضرب كف بكف

انتي ازاي غبية كدة. وازاي لسة مصدقة انه بيحبك. اللي زي مالك دة مايعرفش يحب. ولازم تنسي وتصدقيني انتي في ورطة ومالك مش هايرحمك وناوي فعلا يفضحك ولازم نشوف حل بسرعة للمصيبة دي اللي لو عرفها بابا ممكن يروح فيها

شروق

طيب احنا ممكن نعمل اية

فتسكت عبير للحظات وتفكر ثم تقكر ثم تقول

 

احنا لازم نجوزك وبسرعة 

شروق باستغراب

انتي بتقولي اية. اتجوز ازاي وانا مش بنت بنوت وكمان لسه في شهور العدة 

عبير

ما احنا هانجوزك كدة وكدة ومالك كمان يتجوز عشق كدة كدة يعني كل دة يحصل قدام بابا بس. علشان علاج عشق وعلشان نحميكي من الفضيحة 

شروق

يا سلام ومين بقي اللي يرضي يتجوزني كدة وكدة. ومالك نفسه هايرضي بالحل دة ازاي.

عبير

مافيش غير رامي هو اللي يخلي مالك يرضي غصب عنه وهايكسر شوكة مالك ويبعدة عنك

شروق

انت عايزا تحكي لرامي علي اللي كان بيني وبين مالك

عبير

لازم يكون معانا راجل نقدر نحمي بي نفسينا ضد مالك واظن مافيش غير رامي نعتمد علية

شروق

وافرضي رامي ما وفقش

عبير

رامي ها يوافق لو مش علشانك انتي فاهيبقي علشان عشق تخف. ورامي راجل مش زي مالك وانا متاكدة انه هايقدر يحمينا منه ،،،،،،،،،

ومن امام الورشة اللي شغال فيها رامي تقف عبير مع شروق وعبير كانت بتقول لرامي

هي دي الحكاية من الاول للاخر. واحنا عايزينك تحمينا من مالك لو مش علشان شروق يبقي علشان عمك واللي ممكن يحصل له. وعلشان علاج عشق 

فيغضب رامي بشدة ويقول بعصبية لشروق

ازاي يا متعملة يا مدرسة عيل كان بياخد عندك درس من سنتين فاتو يضحك عليكي ويخليكي تعملي مصيبة زي دي

شروق وهي بتبص في الارض وبتعيط تقول

يا رامي وحياة اغلي حاجة عندك انا مش مستحملة اي كلام 

عبير

رامي. انت اخونا الكبير وجائنا ليك وانا عندي امل في ربنا انك تساعدنا واي كلام هاتقوله انا قولته ليها لكن خلاص المصيبة وحصلت المهم نلحق اللي جاي وانا مالك يساعد عشق في انها تخف ويبعد عن شروق ويسيبها تعيش

فيبص رامي لعبير وشروق وهو بيفكر ومضايق من مالك جدا وقال

معاكي حق يا عبير لازم نلحق اللي جاي. ،،،،،،،،،،

ونرجع تاني لشقة وائل وعبير بتزغرط فيبص لها مالك ولايرد ويخرج من الشقة والكل يبصو له باستغراب فتقول خديجة 

هو ماله مش فرحان لية

رامي

ازاي بس دة فرحان جدا. بس تلاقي فرحتة ناقصة انه هايتجوز عشق وهو في الحاله دي. اصل انت ما تعرفش يا عمي هو بيحبها قد اية

فيبص وائل لرامي ولا يرد وهو يقول لنفسه

نفسي اصدقكم بس كلكم بتكدبو عليه دة اللي مربيكم ومهما طال وقت الكدب يفضل عمره قصير، ،،،،،،،،

ومن داخل اوضة مالك يقف رامي قدام مالك ويبص له بغضب شديد ثم يضربه رامي بالقلم. فيبص مالك لرامي بضيق شديد ويمسك خده ويقول مالك

انا مش هاقدر ارد لك القلم دة علشان انت اخويا الكبير. 

رامي

لا بجد متربي اوي وتفهم في الاصول. تعرف ان لي حق عمي لما قال علينا تربية نسوان. ازاي تضحك علي بنت عمك وتتجوزها في السر يا ناقص 

مالك

دي كذابة هي اللي ضحكت علية وخلتني اتعلق بيها. وبعدين انت زعلان لية اوي كدة مازي ما انا غلط انت كمان غلط يا كبير يا عاقل. ولا نسيت الرسالة 

رامي

صح. ونسيت تقول انك انت اللي شيلت غلطي وانا دلوقتي بشيل عنك غلطتك . بس غلطة عن غلطة تفرق

مالك

الغلط واحد انت لفيت من وراء عمك وانا لفيت من وراء عمي انت اخترت الصغيرة وانا اخترت الكبيرة

فيمسكه رامي من لايقة القميص ويقول بعصبية لكن بصوت واطي علشان ماحدش يسمعه

لكن ما تجوزتهاش في السر من وراء عمي 

مالك ببرود 

بمزاجها وكان علي قلبها زي العسل واسالها تحكي لك هي كانت مبسوطة ازاي

فيضغط رامي علي رقبة مالك وهو يقول

اسكت انت اية ابن حرام مش عارف ان عمك لو عرف بحاجة زي دي ممكن يحصل له اية

مالك

وامك التعبانة جوة ومش قادرة تنسي الاهانة بتاعتها انت مش عارف من قهرتها ممكن يحصل لها اية. دة حتي عمك ماجاش لغاية دلوقتي يطيب خاطرها

رامي

هو عمك فايق كفاية عشق واللي هي في بسبب اللي عمله فيها

مالك بمنتهي العصبية

انا ماليش دعوي بعشق وزفت انا عايز حق امي

رامي وهو بيضغط علي رقبه مالك بكل قوته يقول

عشق مش زفت. فاهم. عشق دي

فيسكت رامي عندما يري مالك يختنق وابتعد رامي عن مالك اللي بمجرد ما خد نفسه فضل يضحك بطريقة مستفزة وبيقول

لما انت بتحبها اوي كدة. ليه ها تسيبهم يجوزني ليها

رامي وهو بيضرب ايدة في ازاز المرايا قال 

علشان انت العلاج بتاعها. انت اللي في ايدك تخليها ترجع تاني تعيش حياتها

ويبكي رامي بحرقة ويبص لمالك ويقول

انا اللي عملت كدة انا الجبان اللي ساب حب عمره في ايد حيوان زيك. فاكر المرجله بانه يفضح بنت عمه. 

مالك باستفزاز 

وهو الراجل اية. غير انه يخلي مراته مبسوطة وزي ما شروق بتحلف بالليالي بتاعتي هاخلي عشق كمان تحلف

فيمسك رامي حتة ازاز من المرايا المكسورة ويروح بيها ناحية مالك ويقول وهو بيحط حتة الازاز علي رقبة مالك وبيقول بتهديد مخيف 

عارف لو قربت من عشق هاذبحك. فاهم.

فيبص مالك للازازه المكسورة اللي في ايد رامي ويقول ببرود

يعني تبقي مراتي وماقربش منها

رامي 

انت عارف ومتاكد ان جوازك من عشق ما ينفعش الا بعد شهور عدة شروق ما تخلص وانا ماينفعش اتجوز شروق احنا هانمثل اننا اتجوزنا والماذون اللي هايجي هيكون ماذون مزيف انا اتفقت معه علي كل حاجة. والقسيمة بتاعتك وبتاعتي هاتكون مزيفة وكل المطلوب منك عشق تخف وتبعد عن شروق

مالك

وانسي حق امك زي ما انت نسيتة

رامي

حق امك هايرجع بالطريقة الصح وهاخلي عمك يتاسف لها وترجع كل حاجة لطبيعتها

مالك بخبث

وماله يا اخويا اللي انت شايفة، ،،،،،،،،،

وبعدها بيوم ومن داخل شقة عماد يجلس الماذون اللي متفق معه رامي وسط حضور من العائلة بوجود العائلتين وسط زغاريط وفرحة كبيرة وقبل ما تبدأ مراسم كتب الكتاب المزيف يقف مالك قدام عمه وائل ويقول له

قبل ما حط ايدي في ايدك لازم تراضي امي وتقول لها حقك علية.

فيبصو له كل الحضور فيقول رامي

انت بتقول اية

صباح

مالك انا خلاص اترضيت من اختي خديجة والكلام دة مايصحش عمك برضو كبير العيلة

مالك

دة شرطي الاخير علشان الجوازة دي تتم

فيبص وائل لصباح ويقول لها

حقك علية يا صباح

مالك

وتقوم تبوس راسها

رامي بعصبية 

لا بقي كدة كتير اوي

وائل بكسرة نفس 

لا. خالص دة حقها. كله يهون علشان خاطر عشق 

ويقوم وائل وهو مقهور ويروح ناحية صباح فتقول صباح

والله ما تقرب تاني انا مرضية

وائل. وهو يقترب منها

لا. هاقرب وهابوس علي راسك قدام العيلة كلها. انا برضو غلط فيكي ودة حقك 

ويبوس وائل علي راس صباح اللي خديجة كانت مخنوقة من اللي بيحصل ووائل بيبص لمالك اللي كان بيقول

حاجة تاني يا مالك

مالك بجحود 

اة. خد بناتك وامشي من هنا وماشوفش وشك تاني. واوعي تكون صدقت اني ممكن اتجوز المجنونة اللي عندك فوق دي

رامي وهو رايح ناحية مالك بمنتهي الغضب يقول

انت قليل الادب ولازم تتربي

ويضرب رامي مالك بالقلم ومالك لا يبص لرامي وبيبص لعمه بغل شديد ويقول

صباح خلفت رجاله. وتربية النسوان ما بطلعش الا رجاله. واسال شروق بنتك هي جربت وممكن تحكي لك

فيضربة رامي بالقلم كمان مرة ومالك لسة باصص لعمه اللي كان بيبص لشروق بغضب شديد ومالك بيقول

علي فكرة يا ابلة شروق انا رجعتك تاني لعصمتي وبقيتي مراتي ومن جديد هنتقابل في شقتنا فاكرة العنوان طبعا 

ويضحك مالك ورامي بيضرب في بمنتهي القوة وفي هذة اللحظة الدم يطير في الهواء وصراخ خديجة لا يتوقف، ،،،،،،،،،،،،،،

يارب تكون الحلقة عجبتكم. مستني رايكم.