الهام واللي كان الحلقة الاخيرة

 سلطان و الجبل

                         

           ★الحلقة الحادية عشر ★

                       والاخيرة 

من تاليفي.
محمد منصور. منص 

وقبل ما نبدأ الحلقة نوحد الله ونصلي علي خير خلق الله سيدنا محمد. وعلي بركة الله نبدأ 

بسم الله توكلت علي الله. وهو رب العرش العظيم

★لكني ما رحمتش وفضلت باصص لي لغاية ما رجع التابوت والتابوت اتقفل عليه واختفي تماما. وهنا شوفت رضوي بتضحك وبتبص لي وتقول

دفعت الثمن يا ابن عزيز. برافو عليك

ما بقتش فاهم أية معني دة والمفاجاة كانت هتصبني بالشلل. هنا لقيت شيرين قفلت كتاب المذكرات وقالت

رضوي لية عملت فيك كدة. مش هي المفروض بتحبك

سلطان

رضوي ملكة من ملوك الجن. حضرها والدي علشان يخلي امي اللبنانية تعشقة 

شيرين

واحدة واحدة علينا يا جدي واحكي بالتفاصيل علشان عايزا افهم

سلطان

هحكي لك اللي عرفته من رضوي علي لسانها. من سنين كتير قرر والدي يسيب القاهرة ويسافر لبنان يجرب حظة في مصنع خاله. وفعلا سافر وهناك قابل والدتي. انجي المهندسة زميلته في المصنع.،،،،،

احنا دلوقتي جوة مصنع وعزيز واقف قدام انجي وبيقول 

انا لو اعرف اني كنت هقابل في لبنان قمر زيك كنت جيت من زمان

انجي بحزم

مهندس عزيز اتمني ان كلامك معايا يكون في حدود الشغل ومن غير اي تلميحات تتفهم بكذا معني والا اسفة هضر ابلغ خالك عبد الرحمن وهو بقي يتصرف. لان كدة كتير

عزيز

انتي بتعملي معايا لية كدة. دة انا بحبك

انجي

وانا بحب جوزي وبنتي. ياريت تفهم اني ست متجوزة

وسابته ومشيت لكن عزيز فضل يطاردها في كل مكان ما كنش بيزهق لغاية ما قرر يلجا للسحر وراح ل ساحر في اعلي جبال لبنان اسمه نذير وقعد قدام منه وقال

سمعت عنك كتير وانك تقدر علي اي شئ مستحيل

بص له نذير وقال

هات اللي عندك يا مصري

مد عزيز ايدة في جيب بدلته وطلع منديل في عرق انجي وقال

عايزها تحبني زي ما انا بحبها وهاديك اللي انت عايزه بس هي تقول اة

مسك نذير المنديل وبدأ يشمة وقال

بس دي متجوزة وعندها بنت

عزيز

عارف

نذير

كدة الحساب هيبقي ضعف

عزيز

معاك لغاية 100 الف ج.  

نذير

مش لدرجة المبلغ دة كله

لكن عزيز طلع دفتر الشيكات وحط امضته علي بياض وقطع الشيك وحطه قدام نذير وقال

حط الرقم اللي انت عايزه

نذير

للدرجة دي بتحبها

عزيز

ما عرفتش الحب الا لما شوفتها

نذير بضحكة خبيثة

روح دلوقتي وبكرة تيجي قبل الفجر بساعه وتكون لابس جلبية سوادء علي اللحم ومستحمي بمية نجسة

عزيز باستغراب

مية نجسة

نذير

اة. مية نجسة مالك مستغرب ليه انت جاي تعمل عمل سفلي خبيث هتيجي متوضي

عزيز

واجيب منين المية النجسة دي

نذير

مية بكون شرب منها كلب تاخدها وتغرق بيها جسمك كله من فوق ل تحت وتتاكد ان المية وصلت لكل حتة في جسمك

عزيز

حاضر

ومشي عزيز. وهنا مارس نذير بعض الطقوس وقال طلاسم مخيفة خاصة بتحضير الجن. وبعديها علي طول ظهرت امراة قبيحة جدا. وهي ملكة العشيرة العاشرة من الجن الازرق وتدعي العنقماء. بص لها نذير وقال

مستعدة يبقي ليكي ولد انسي. بدل اللي مات

قالت العنقماء بصوت ما يختلفش كتير عن شكلها

هات اللي عندك يا نذير

اداها المنديل اللي خده من عزيز وقربت المنديل من وشها وهنا اتحولت ل انجي بالظبط فقالت

عاشق. والعشق هيقتله

نذير

طلبتي انسي يبقي من نسلك علشان شبابك يرجع. وحصل

ضحكت العنقماء وقالت

انت خادم مطيع يا نذير احلم وهيتحقق حلمك

نذير

شفاعة قبيلتك والعفو عني. بعد ما كنت السبب في حرق خادم القبيلة الاول. وبالغلط 

العنقماء 

حصل ونولت الشفاعه. يا نذير

وبدات العنقماء وهي في صورة انجي تبص في المرايا وتضحك. ,,,,

وبعدها بساعه بالظبط كان عزيز بيملي طبق مية وحطة في الشارع واستني لغاية الكلب ما شرب منه وخد الطبق ومشي وروح بيتة وتاني يوم دخل الحمام واستحمي بالمية دي ولبس جلبية علي اللحم وخرج من البيت وركب عربيته وراح ل نذير في الميعاد المحدد واول ما شافة نذير قال

ميعادك مظبوط.

عزيز

الحب يعمل اكتر من كدة

بص له عزيز وقال

جاهز لبداية الطقوس

عزيز باصرار شديد

جاهز

نذير بدأ يتحرك وهو بيقول

تعالي ورايا

وبدأ عزيز يمشي وراء نذير لغاية ماوصلو عند مقبرة مفتوحة وقف عزيز وقلبه اتقبض من غير ما يبص له نذير قال

كمل واوعي تقف

اتردد عزيز للحظات لكنه بدا يتحرك ونزل المقبرة وراء نذير وداخل المقبرة بدات الطقوس وانتهت وخرج عزيز من المقبرة جري ونذير وراء منه وبيضحك وبيقول

قلبك ضعيف اوي 

عزيز اللي كان مرعوب

عايزني ادخل مقبرة واشوف خيالات سوداء بتتحرك ورمل بيترفع ل فوق وما خفش 

نذير

العشيرة بتزفك علي عروستك انجي

عزيز

دي زفة اية دي اللي توقف القلب

نذير

خلاص الجزء الصعب خلص ومن بكرة انجي اول ما هتشوفك هتترمي تحت رجلك

عزيز

بجد. دة انت يبقي ليك ضعف اللي تطلبه

نذير

الفلوس عندي مش كل شئ المهم انك هتكون مبسوط

ومشي عزيز وتاني يوم راح المصنع وشاف العنقماء في صورة انجي وطبعا حب اية وغرام اية. الطقوس اللي عملها عزيز خلته هو اللي يتعلق ويحب العنقماء علي انها انجي ولو شاف انجي الحقيقة في المصنع يتخيل لي انها واحدة تانية واتجوز العنقماء وعاش معها اسبوع بحاله لكنه لاحظ انه طول ما هو معها ما كنش بيسمع الاذان استغرب اوي وبدأ يسال نفسه كتير لية وهو معه ما بيسمعش الاذان وهنا رجع ل نذير وقال

انت الوحيد اللي تقدر تقولي اية معني اللي بيحصل دة

نذير

اسمع يا عزيز انت طلبت تتجوز انجي وانا جوزتهالك اكتر من كدة ماقدرش اعمل لك حاجة

عزيز

اومال لية ما بسمعش الاذان.  

نذير

ما عرفش وما عنديش تفسير

هنا ظهرت العنقماء في صورة انجي وقالت وهي بتبص ل عزيز

اشهد لك انك اذكي رجل اتعملت معه. رغم وقوعك تحت تاثير السحر الا انك قدرت تلاحظ ان الاذان متحرم عليك تسمعه علشان ببساطة. انت بقيت منبوذ

عزيز

انتي مش انجي

اتحولت العنقماء من صورة انجي ل صورتها الحقيقة وقالت

انا مراتك من الجن الملكة العنقماء. وام ابنك سلطان 

عزيز. وهو مصدوم

لا. مستحيل تكون دي الحقيقة.

العنقماء 

هي الحقيقة وكلها كام شهر وسلطان يجي ومعه استعيد شبابي اللي ضاع مني بموت ابني الاول

عزيز

انا ابني بكون من الجن 

العنقماء 

الجنس الافضل.   

عزيز

اسكتي انا احرقك قبل ما تفكري تولدي عيل ملعون زي دة

العنقماء 

هولده وبايده هيخلص عليك. وانت بلا حيلة وهدفعك ثمن انك تقول لا. للعنقماء

وبدات العنقماء تدخل عزيز جوة تابوت وقفلت التابوت علية وهي بتقول

هخلي سلطان يكرهك علشان موتك يبقي سهل.

وفضلت العنقماء تضحك. ونرجع تاني ل سلطان مع احفادة وكان بيقول

وبقيت رضوي اللي حبيتها وهي مخلوقة من جهنم.

في الوقت دة تظهر العنقماء وتقف وراء سلطان اللي كان بيبص للحيطة اللي عليها رسمة ل فاروق ورسمة ل شيرين ورسمة ل عماد ورسمة ل عزيز الحيطة عليها كل الشخصيات اللي قابلها سلطان فتقعد العنقماء قدام منه وتقول 

كل ما اسال عليك يقولو انك هنا وقاعد مع شخصيات من خيالك

بص لها سلطان

حتي الخيال متحرم عليه في ايام خروجي من التابوت اللي انتي حبساني في

العنقماء

نفذ اللي بطلبة منك وانت تبقي حر

سلطان

عايزا تستخدميني في سحرك الاسود 

العنقماء 

عايزاك تتجوز انسية علشان شبابك يرجع.  

سلطان

وانا مش عايز

العنقماء 

بطل عند بقي. انا امك والملكة بتاعتك وعايزا مصلحتك

سلطان

وانا مش هعمل زي ما انتي عملتي في والدي وخلتيني اقتله علشان تعيشي انتي

العنقماء

غبي. وهتفضل غبي. عديت سنين عمرك وانت مسجون في تابوت الجبل تحت سابع ارض ومش عايز تتحرر وكل اللي بتعمله في ايام الخروج من التابوت تحكي لشوية رسومات علي اللي كنت نفسك تحققه.

سلطان

ولية ما تقوليش اني بفكرك ديما باللي انتي عملتي فيا. 

صرخت العنقماء في سلطان وقالت

سجين تابوت الجبل

وبدأ يتلاشي جسم سلطان لكنه رمي ازازة جوها ورقة في نهر رسمة علي الحائط والنهر بدأ يتحرك ويتحرك وابتلع الازازة.   

وفي نفس الوقت كان سلطان يدخل جوة تابوت واخر شئ بيشوفة قبل قفل التابوت هو جبل الجن اللي موجود تحت سابع أرض. ويقفل التابوت علي سلطان وتصبح الظلمة هي كل ما تبقي ل سلطان. وللسنة ال 75. يفضل سلطان سجين التابوت، ،،،،،،،،،

وبعدها بيومين ووسط النيل تظهر الازازة اللي رماها سلطان فتعدي مركب جنب الازازة ويمد شخص علي المركب ايدة ويمسك الازازة ويفتحها ويطلع الورقة ويبص فيها ويقول

جبل الجن.  

ويرمي الازازة باللي فيها،،،،،،،،،،

تفاصيل اكتر لفهم اخر حلقة 

سلطان ابن العنقماء وفي عالم الجن في حالة ان تم زواج بين جنية وانسي وحصل حمل الجنية تاخد المولود لعالمها. والعنقماء زي ما قولت هي من قببلة بتعجز وتكبر في السن وعلشان ترجع شباب تاني لازم الزواج من انسي والحمل منه والولد يقتل والدة. يعني علشان العنقماء ترجع شباب من تاني كان لازم سلطان يقتل عزيز وكمان تنتقم العنقماء من عزيز اللي رفض حبها وكان ناوي ليها علي الخلاص منها. واتولد سلطان وكل اللي شافة من موت امه واخته وظلم ابوة لية وحبة ل رضوي اللي تجسدت العنقماء في صورتها كان مجرد خيال. عيشته في العنقماء علشان نوصل للمشهد اللي في بيختار في رضوي ويقتل سلطان عزيز وقت ما شاف عزيز في شقة والد رضوي جوة تابوته. اما بقي كتاب المذكرات والاحفاد وابنه منير وكابتن عماد. دة كله خيال من تاليف سلطان الانسي. سلطان مسجون في التابوت من ساعه موت عزيز ومن اول ما رفض ان امه العنقماء تسنخدمه في السحر وفضل سلطان عايش بخياله في عالم الانس انه مدرب كبير وان لي احفاد بيحكي لهم اللي حصل وانه لي ابن عدو لي وان يعرف حد اسمه عماد. سلطان خلق لنفسه قصة يعيشها جوة التابوت ولما يطلع من التابوت يرسم علي الحيطة. الشخصيات اللي خلقها هو من خياله ويفضل يكلمهم ولولا الشخصيات دي ما كنش قدر يعيش مسجون تحت سابع ارض في تابوت قدام منه جبل الجن. وبالنسبة للازازة اللي رمها في نهر مرسوم علي الحيطة. فهي رساله بيطلب فيها المساعدة من اي حد يلاقيها وانه بقاله 75 سنه. كل ما يطلع من التابوت يرمي ازازة زي دي يمكن حد يلاقيها من عالم الانس ويقرر يساعده. سلطان ضحية ابوة اللي قرر يستخدم السحر علشان يتجوز واحدة متجوزة. واهو عزيز دفع الثمن وسلطان لسة بيدفع الثمن 

ولغاية هنا تخلص حكاية سلطان والجبل اللي يارب تكون عجبتكم ومستني راي كل اللي شرفني بقراء القصة. ،،،،،،،،،،،