الهام واللي كان الحلقة الاخيرة

 ولاد السلايف 

                        ★الحلقة الثامنة★

                            ‏ والاخيرة 

من تاليفي، ، 
محمد منصور. ** منص **

وقبل ما نبدأ نوحد الله ونصلي علي خير خلق الله سيدنا محمد. وعلي بركة الله نبدأ 

                        ‏

بسم الله توكلت علي الله. وهو رب العرش العظيم

من جوة شقة ايهاب يقف ايهاب قدام الهام ويقول

سامي مات

الهام وهي مصدومة من الخبر

 

مات. انت جيبت الكلام دة منين

ايهاب

من البلد ومات من اسبوع كمان

الهام

كدة من غير ما حد يعرف

ايهاب

ماهو دة اللي هايجنني ازاي يموت وماحدش في العيلة يعرف

الهام

اكيد ما ستحملش اللي حصل وطلب من فضل ومودة انهم يدفنو من غير مايعرفو حد 

ايهاب

ممكن وشكلة كدة مات تاني يوم جوازة عيالك

الهام بصوت حزين

الله يرحمه

ايهاب

الله يحرقة. عارفة انا كل اللي مزعلني انه مات بسرعه قبل ما اشوف نظرة القهر في عيونه

الهام

خلاص بقي اهو راح للي خلقة وما يجوزش عليه الا الرحمه

ايهاب

طيب يا اختي ما تنسيش بقي تعرفي عيالك باللي حصل،،،

وفي نفس الوقت ومن جوة شقة سمير المحروقة كان يقف ظابط ومعه فريق من البحث الجنائي ويقول الظابط لمحمود

واضح جدا ان الحريق اللي حصل دة بفعل فاعل

محمود

ومين بس يعمل كدة

الظابط

اللي عمل كدة حد مش غربب عن البيت لانه دخل من باب البيت بالمفتاح. واكيد دخل شقة سمير بمفتاح برضو وغرق الارض كلها بنزين وولع في الشقة وقفل الباب من برة بالمفتاح. وقدر سمير ينقذ الطفلين لانه كان في الشقة ساعتها وراح بيهم ناحية باب الشقة وحطهم وراء الباب بالظبط المكان الوحيد اللي مافيهوش بنزين. فلو بتشك في حد ياريت تساعدنا نوصل له 

محمود

اشك في مين بس مافيش حد بيكره سمير لدرجة انه يولع له في شقته وهو جوه منها

الظابط

مش لازم يكون سمير هو المقصود ممكن اوي يكون مقصود مراته داليا. وخصوصا ان الجيران شهدوا انها من ساعه ما اتجوزت سمير وكانت ديما في خناق مع اختها كوثر

محمود

تقصد يا حضرة الظابط ان ممكن تكون كوثر هي اللي عملت كدة

الظابط

لازم نحط كل الاحتمالات قدام مننا وخصوصا ان كوثر في ناس شافوها داخلة البيت قبل الحريقة بنص ساعه تقريبا

محمود

تعملها دي شيطانه لدرجة انها مرة كانت هاتسم مراتي التانية

الظابط

كدة انا هابعت اجيبها واحقق معها، ،،،،،

ومن جوة شقة سامي يقف سليم ونور والهام قدام فضل وسليم يقول بعصبية

يعني اية بابا يموت وما نحضرش دفنته

فضل

دي كانت وصية ابوك الاخيرة

نور وهو بيعيط

ازاي دي تبقي وصية بابا. هو احنا علشان شوفنا مستقبلنا يزعل مننا لدرجة انه يحرمنا من اننا نحضر دفنته وعزاء

فضل

انت زعلان من بابا علشان دي كانت وصيته وهو حر فيها زي ما انتم كنتو حرين يوم ما اخترتم تروحو وتترمو في حضن اللي كان سبب في حرمان ابوكم من امكم

الهام

ايهاب ملهوش دعوي باللي حصل بيني وبين سامي

فضل

ازاي بس. واللي انتي شوفتيها الليلة اياها علي سريرنا تبقي ماما يسرا اللي ابنك متجوزها وايهاب زي ما ضحك علي ماما يسرا. لعب كمان علي يسرا وخلها تقع في حبه 

اتصدم الجميع وبصو لبعض لكن فضل قال

مش وقت اندهاش. وعلشان اللي ممكن يكدبني. انا معايا الورق اللي يثبت كلامي

ويروح فضل ناحية اوضتة ويدخل الاوضة لثواني ويخرج ومعه قسيمة جواز ايهاب علي هذة الست اللي اسمها مني ويدي القسيمة لامه وتبص الهام في الصورة وتقول

دي هي. هي خرابة البيوت. لكن جبت ازاي القسيمة دي

فضل

انا مراقب يسرا من ساعه ما ظهرت فجاة في حياة سليم وعرفت بالعلاقة اللي بين يسرا وايهاب روحت لماما يسرا وحاولت اخليها تقصر علي يسرا تبعد عن اخويا وحكيت لها علي اللي بين ايهاب و بنتها لكنها قالت لي انها عرفت من بدري وماقدرتش تعمل حاجة وفضلت يسرا علي علاقة بايهاب رغم انه كان جوزي وبرضو يسرا ما بعدتش عنه. علشان بتحبة جدا وقالت لي ان دة انتقام ربنا مني بعد ما كنت السبب في اني افرق بين راجل ومراته 

نور

يعني بابا مظلوم واللي حصل دة كله كانت لعبة وسخة من ايهاب 

فضل

وهو انت كان عندك شك في انه مظلوم عيب يعني دة هو اللي رباك

الهام

لعب بيا ايهاب

فضل

اسف يا ماما. بس ايهاب طول عمره بيلعب بيكي. واللي عرفته من بابا عن ايهاب يخليني متاكد انكم الفترة الجاية هاتشوفو الوش الحقيقي لي وقريب اوي ،،،،،،،

وفي نفس اليوم بالليل كان سليم ويسرا ونور ومايسة ومعاهم الهام قاعدين في شقة الهام فدخل عليهم ايهاب وبص لهم وقال لهم 

هو انتم قاعدين لية كدة

الهام

حرام نقعد مع بعض

ايهاب

لا. مش حرام.  

وبص ايهاب لنور وقال له

صحيح يا نور ابقي شوف لك شركة تاني غير بتاعتنا علشان محتاج اخف العدد فاخترتك.

نور

يااااا. دة الوش التاني بان بسرعه و متاخرش كتير 

ايهاب

وياريت انت واخوك تاخدو جوز الحريم دول وتشوفو لكم مكان تاني علشان انا هابيع البيت دة 

سليم باستهزاء 

ويسرا هاتكمل معايا عادي ولا خلاص ترجع لك بقي

ايهاب

لا. خليهالك انا اصلا شبعت منها. 

سليم وهو بيبص ليسرا

يعني كلام فضل كان صح انتي فعلا علي علاقة معه ولعبتي عليه علشان هو طلب منك كدة

يسرا

دة كذاب انا مافيش 

لكن قلم سليم اللي نزل علي وش يسرا كان كفاية علشان يخلي يسرا تسكت وفي اللحظة دي الهام تقول 

ملهوش لزوم نكذب علي بعض احنا متجمعين كلنا دلوقتي علشان نلعب مع بعض علي المكشوف

وتبص الهام لايهاب

مش كدة ولا اية

ايهاب

والله تبقي عملتي الصح. انا اصلا قرفت وجيبت اخري وعايز اصفي كل اشغالي هنا وارجع تاني اكمل حياتي يرة بس المرة دي من غيرك يا الهام

الهام

للدرجة دي

ايهاب

واكتر من كدة. طول سنين عيشتي معاكي وانتي عاملة زي الاتب اللي ناحل ظهري ومخلي شكلي معوق بس لازم استحمله لغاية ما يبقي معايا حق عملية استئصاله. وبقي معايا خلاص حق العملية

فتضحك الهام من الحرقة وتقول

اتب. انت شايفني كدة. شكرا. بس اقول اية انا اللي استاهل كنت عايشة مع اللي شايفني ملكة وسيبته وروحت للي شايفني اتب. واستحملتني كل السنين دي لية 

ايهاب 

علشان فلوسك. وكفاية رغي بقي انا رجعت مصر واستقريت فيها علشان بس اكسر فرحة سامي بعياله لكنه مات فخلاص بقي ملهوش لزوم القعاد هنا فضي البيت انت وعيالك علشان هابيعه 

الهام

ازاي تبيع البيت وهو مش بتاعك

ايهاب بعصبية 

يعني اية مش بتاعي

الهام

يعني مش بتاعك. انت ناسي اني انا صاحبة راس المال واول ما بدنا نتعامل سوي في مجال العقارات والمشاريع التجارية كتبنا بند في العقد اطمئن بي حقي. ويحق لي بالبند دة اتحكم في كل راس المال واسترد اصل راس المال في اي وقت 

فيهجم ايهاب علي الهام ولكن سليم ونور يقفوا قدام منه ويمنعو من الوصول ليها ويقول سليم

هي حصلت كمان هتضرب امنا قدام منا 

لكن ايهاب ما يردش عليه وببص ل الهام وهو بيقول

يعني اية شغلي وتعبي 20 سنة وفلوسك اللي كبرت علي ايدي انا ماليش حق فيها

الهام

ازاي بس ليك طبعا. بس ليك مرتبك عندي زيك زي اي موظف في الشركة وعملت لك شهرية هاتعجبك وجمعت لك شغل ال 20 سنه وخصمت حق العرببات والبدل اللي انت جيبتها وطلع ليك في ذمتي 100 الف ج.

وتخرج رزمة فلوس من شنطتها وترميهم في وش ايهاب وتقول

دة حقك 

ايهاب بعصبية شديدة

لا. انتي اغبي من انك تعملي كدة مين وراكي 

ويحاول ايهاب ابعاد سليم ونور من طريقة لكن الاثنين يهجموا عليه بمنتهي القوة ويضربة سليم بعنف شديد لدرجة ان ايهاب وقع علي الارض وتقريبا كان فاقد الوعي وهنا يقعد سليم فوق ايهاب ويخنقة بمنتهي العنف ونور يقول له وهو بيحاول ايعاد ايد سليم عنه 

لا يا سليم ما ضيعش نفسك

سليم وهو يخنقة بمنتهي الغضب 

سيبني اخلص الناس من شرة. دة هو السبب في موت بابا وهو غضبان علينا وجوزني للشمال اللي كان مرفقها 

وفي الوقت دة يقف سامي وراء سليم. بعد ما خرج من اوضة من اوض الشقة. ويشدة سليم من ذراعه ويقول له

لو في يوم اتخنقت مع خنزير اوعي تخلي ياخدك وينزل بيك للطين والا ساعتها انت هاتبقي قرقان من نفسك وهو هايكون في منتهي السعادة 

فيبص سليم ونور باستغراب شديد ممزوج بالفرحة وياخد سليم ونور ابوهم في حضنهم وهما بيعيطوا وبيقول سليم

حقك علية والله انت ما تعرفش انا عرفت قيمتك قد اية بعد ما اتحرمت منك

نور وهو بيبوس ايد ابوه سامي ورجله 

اوعي تسيبنا يا بابا. أحنا من غيرك توهنا. اسبوع بس انت مش معانا في حسينا ان الدنيا كلها علينا. احنا كنا مستخبين وراءك من الدنيا والشر اللي فيها 

فيبص سامي لايهاب ويقول له

عارف ان المشهد دة مخليك دلوقتي مقهور ومغلول من جوة بس انا ما اكلتش حرام علشان في يوم ولادي يقسوا عليه. ممكن الدنيا تاخدنا من بعض لكن يفضلو ولادي وانا ابوهم

ايهاب بصعوبة

انت موت ازاي عايش

سامي

انا اللي اتعمد اعمل نفسي ميت علشان يشوفوك علي حقيقتك. وحطيت ايدي في ايد الهام علشان نحمي ولادنا منك. ودلوقتي اسيبك تعيش اللي فاضل من حياتك وانت شايف ولادي حوالين مني

ويخرج فضل ومعه مودة من نفس الاوضة ويقفوا كلهم في ظهر ابوهم فيضحك ايهاب بجنون ويقول

حوالين منك وانا مافيش حد حوالين مني. انا مافيش حتي فلوس ما فيش

ويفضل يضحك ويضحك والجنان اتحكم منه واترمي ايهاب في مستشفي المجانين وطلق سليم. يسرا. وحاول يرجع لخلود لكن خلود كانت اتخطبت واتقبض علي كوثر واعترفت انها ولعت في الشقة علشان تحرم داليا من عيالها واتجمعت عيلة سامي تاني. ووقفت الهام في يوم قدام سامي وقالت له

خلي نور ومايسة في الشقة زي ما هما بلاش تحرمهم مني ولا منك

فيبص سامي لالهام ويقول

مهما حصل انتي امهم وانا مستحيل احرمهم منك

وفرح نور اوي وخد ابوة بالحضن. وقال سليم 

وماما هتفضل بعيد عنك لغاية امتي 

سامي

امكم عايشة ليكم انتم وبس. انما بالنسبة لي. ماتت يوم ما سابتني وراحت لغيري

الهام وهي بتعيط بحرقة

كنت غبية

سامي ودموعه محبوسه في عيونه. راح ناحية اوضة ولسة هايخش قالت الهام

اسمعني

سامي

الميتين مالهمش صوت نسمعه. لكن ليهم ذكري حلوة نعيش عليها وانتي ذكري بكل الحلو والمر اللي فيها وعمرك ما هاتكوني في يوم اكتر من كدة

ودخل سامي اوضة وقفل الباب وراء منه وساب الهام برة وهي بتعيط بحرقة وسط عيالها، ،،،،،،

وعديت فترة وقرب محمود من مودة وحبيته وبقي جوازهم رسمي وحملت مودة وخلفت عيل زي القمر. ودي كانت نهاية قصتنا وفي الاخر احب اقول في بيوت العيلة الكلمة الصغيرة قدام ولادنا ممكن تكون سبب حرب وكره بين ولادنا وولاد السلايف خلي بالكم بلاش نجيب سيرة كل العيوب اللي عند غيرنا قدام والدنا. لا الصغير بيكير واللي اتقال قدام منه بيكبر معه. وربنا يكفينا ويكفيكم شر كل وحش

                              النهاية 

اللي عجبته القصة ما يحرمنيش من اللايك والكومنت