مشوار هاجر
★الحلقة الثانية عشر★
والاخيرة
وقبل ما نبدأ الحلقة نوحد الله ونصلي علي خير خلق الله سيدنا محمد. وعلي بركة الله نبدأ
بسم الله توكلت علي الله. وهو رب العرش العظيم
ويخرج من الفيلا ويركب عربيتة وينطلق بها وهو زي المجنون ومش عارف يروح فين. وفجاة وهو ماشي علي كوبري اكتوبر القريب من بيته شاف تلت لوح اعلانية وكل لوحة مكتوب عليها.
( فين حق الشيخ صالح )
وصورة بالحجم الطبيعي للشيخ صالح اللي هو صورها بالموبيل الخاص به فيصدم رياض. ويدوس فرامل وقلبه بيدق بمنتهي السرعه وينزل من العربية ويبص للصور وفجاة تختفي الصور وتظهر علي اول لوحة جمله بالحجم الكبير وهي
( اتقتل لية )
ويكتب علي اللوحة الثانية. جملة
( مين قتله )
ويكتب علي اللوحة الثالثة. جملة
( حق الطيب فين يا رياض يا حوفي )
ثم تعرض علي الثلاث لوح في وقت واحد صورة لرياض الحوفي بالحجم الكبير فيصدم رياض الحوفي ويرجع للوراء. خطوتين ثلاثة علشان يلاقي ناس كتير واقفة علي الكوبري وبتبص للثلاث لوح بفضول شديد فيركب رياض عربيتة مسرعا وينطلق بها وسط الزحام ويخرج الموبيل بتاعه ويتصل بالخواجة ويقول له
الحقني انا في مصيبة
الخواجة
في اية رياض
فحكي له رياض كل حكاية هاجر معه فيضحك الخواجة باستهزاء ويقول له
وانت عايزني اعمل لك اية رياض
رياض مصدوما
تعملي اية. تكلم الكيان يلحقني
الخواجة
انت مجنون رياض. الكيان لما يعرف انك بقيت كارت محروق هايخلص منك حبيبي.
رياض
يعني اية
الخواجة
يعني دي مشكلتك ولازم تحلها
وينهي الخواجة الاتصال ورياض يرمي الموبيل علي الكرسي بجانبة ويقول بعصبية لنفسه
يعني اية خلاص هاتروح في داهية يا رياض يا حوفي. بس لا. مستحيل هاجر دي تكون لوحديها اكيد وراها حد بيساعدها ولازم اعرف مين معها ضدي مين اللي عايز يهد رياض الحوفي
ويرجع الي الفيلا علشان يلاقي هاجر قاعدة علي المرجحية اللي في حديقة الفيلا وبتبص له وهو رايح ناحيتها بمنتهي العصبية وبيقول لها
مين اللي معاكي يا بت
ويضربها بالقلم فتنزف هاجر من بوقها وتبص له وتضحك فيقول بغيظ شديد
انتي بتضحكي لية
هاجر بثقة
علشان عارفة انك بتضربني و قلبك بيتقطع علية
رياض
انا عندي استعداد اقتلك
هاجر وهي بتبص في عيونه اللي كانت كلها لهفة وضعف قدام حب هاجر وتقول
لو تقدر اقتلني
رياض
كدة. غالي والطلب رخيص
ويخرج رياض الطبنجة الميري بتاعته ويصوبها ناحية هاجر وهو يقول
هاقتلك لو ما قولتيش مين وراكي.
هاجر
قبل ما تقتلني مش هاتقولي اية رايك في الاعلانات اللي عملتها ليك علي الكوبري
رياض بحرقة شديدة
كنت عارف انك انتي اللي وراء الاعلانات دي.
هاجر
قعد افكر كتير في فضيحة تليق بيك ما لقتش احلي من دي فضيحة. وانا عارفة انك رايح جاي علي كوبري اكتوبر علشان كدة حجزت لك اكبر تلت لوحات هناك. باسمي وهاتفضل الاعلانات دي شغاله كدة لمدة شهر وطبعا لو قتلتني هايتعرف انك عملت فيه كدة علشان انا اللي اجرت لوح الاعلانات وفضحتك. وساعتها التهمة هاتلبسك. مع اني عارفة ومتاكدة ان مش دة اللي هايمنعك من انك تقتلني
وتقوم هاجر من فوق المرجحية وتقول له وهي بتحط صباعها علي قلبه
هو دة اللي هايخليك ما تقتلنيش
رياض
انتي غلطانة انا هاقتلك ولو عمري وحياتي فيكي انتي
هاجر وهي تقترب منه اكتر واكتر
اقتلني زي ما قتلت الشيخ صالح.
رياض. بعصبية وانهيار
انا ماقتلتش حد
هاجر
اومال الهكر اللي هكر موبيلك وخد من عليه الصورة اللي شوفتها علي الكوبري تقول عليها اية
رياض
الصورة دي اتصورت بعد ما الشيخ صالح مات موته طبيعية
هاجر باستغراب
يعني ماحدش قتله
رياض
لا. دخلنا علية لقينا ميت وهو ساجد بيصلي
هاجر فرحا
الله اكبر الله اكبر. ربنا كتب له يموت قبل ما انتم تغدروا بي ربنا اسمه الحق والعدل وماخلاش اعدائه يتمنكو منه
رياض بصوت حزين
ودلوقتي بعد ما عرفتي كل حاجة واكيد الناس هاتعرف حقيقتي كان المفروض اقتلك واخلص من اللي فضحتني لكني مش هاقدر علشان بحبك وبحبك جدا. لكن اللي اقدر اعمله اني اموت انا قبل ما اشوف فضحيتي في عيون الناس
وبدون اي تردد يضرب رياض نفسه بالنار في منتصف راسه ويسقط علي الارض جثة هامدة فتصرخ هاجر من المنظر ويخرج امين من داخل الفيلا ومعه سمر وتبص سمر لهاجر وتاخدها في حضنها ويبتعدوا عن منظر رياض والدم ينزف من دماغه فيبص امين لرياض وهو يقول
كان نفسي تعيش لغاية ما تشوف اعترافك بعينك بعد ماصورتك صوت وصورة لكن الخاين بيعيش جبان وبيموت كافر وكانها النهاية اللي يستحقها كل خاين جبان
وياخذ امين سمر وهاجر ويخرج بيهم من الفيلا ويركبو عربيتهم ويبص امين لهاجر المنهارة من المنظر ويقول لها
عارف ان المنظر صعب بس انتي عملتي دورك بمنتهي الاتقان. مين يصدق ان هاجر بنت فلسطين يطلع منها كل الجبروت دة في التمثيل
هاجر
انا نفسي ماكنتش عارفة انا بتكلم ازاي كدة بقلب جامد ومش خايفة وبمثل اني قوية مع اني كنت مرعوبة. وبصراحة قتل الشيخ صالح خلاني اطلع من جويا بنت فلسطين اللي اتولدت وكبرت وسط الرصاص والدم وصوت الانفجارات هايبقي عيب لو يوم مخاف اخاف من رياض
سمر
بس انتي جيبتي منين حكاية الهكر دة.
هاجر ضاحكا
من الفيلم اللي كنا بنتفرج علية امبارح فدخلت علي النت وعرفت يعني اية هكر قولت اقولها لي اخلي ينهار اكتر واكتر ويعرف انه اتكشف
امين
مع ان رياض دة لو فكر للحظات هايعرف ان دي الصورة اللي انتشرت علي مواقع التواصل الاجتماعي.
ثم يضحك امين بشدة فتستغرب سمر وتقول
بتضحك لية كدة يا عمي
امين
اصل صاحبتك دي مبروكة. اتجوزت مرتين ولسة بنت
فتضحك سمر وهاجر وتقول سمر
لا ووشها الحلو علي كل اللي بتتجوزهم بيموتو
فتضحك هاجر
علشان قلبي مش راضي عنهم
سمر
يخوفي في الجوازة التلتة،،،،،،
هاجر وهي بتحط ايدها علي بوق سمر
بعد الشر. الجوازة التلتة قلبي راضي عنها وهايعيش معايا في حب وهناء عمره ما شافه راجل قبل منه
امين
يا بختك يا مصطفي
فتضحك هاجر وسمر ويقول امين
المفروض مصطفي بعد ما يتجوزك ما يفكرش يزعلك ابدأ. والا هايحصل اللي قبل منه
وتستمر الضحكات اللي اتولدت من رحم العذاب، ،،،،،،،،
ومن داخل شقة في بيت قديم كان مستخبي في طارق اللي قتل كريم. يفتح باب الشقة وتدخل قوة من الشرطة وتقبض علي طارق قبل ما يفكر يهرب وطارق يقول
عايزين مني اية بتقبضة علية لية
فيقول الظابط
انت عارف لية.
طارق بحزن شديد
عارف وندمان. خسرت كل حاجة علشان مشيت في الطريق الشمال، ،،،،،،
وينشر امين اعتراف رياض بان الشيخ صالح ما ماتش مقتول علي كل مواقع التواصل الاجتماعي وسط فرحة من كل من استقبل الخبر من محبي الخير وذل وقهر الكيان اللي اتعرفت كذبتهم ،،،،،،،،،،
ومن داخل شقة مصطفي واثناء ما كان مصطفي يقرأ في المصحف يرن جرس الباب فيقوم ويفتح الباب علشان يلاقي هاجر قدام منه فيرتبك وهو مش مصدق عينيه ويقول بصوت العاشق
جاية لية تاني
هاجر
جاية اقول لك ان الشيخ صالح ما حدش قتله. وانه مات موته طبيعية
فيستغرب مصطفي ويقول
وانتي جيبت الكلام دة منين
هاجر
من رياض قبل ما يقتل نفسه. اومال انا كنت بتجوزو لية
مصطفي
انا مش فاهم حاجة
هاجر
كان لازم تفهم اني انا مراتك انت غصب عنك مش بمزاجك وجوازي من رياض كان الغرض منها ان اجيب حق الشيخ صالح. ابويا التاني
مصطفي
يعني أية
هاجر
انا ما حبتش حد غيرك ولا في يوم هاحب حد غيرك مع اني زعلانه منك
مصطفي
حقك عليه. انا مش عارف انا قولت كدة ازاي بس صدقيني انا لومت نفسي كتير لان في المرتين كنتي قدامي وضيعتك
هاجر
عارف لو كنت كتبت كتابي بايدك علي حد غيرك كنت عرفت اني انا فعلا مش فارقه معاك
مصطفي
اوعي تقولي كدة. انما انتي بقيتي تتكلمي معايا عادي وما بتجريش اول ما تشوفيني. اية مش مكسوفة مني
هاجر ضاحكا
عايز واحدة اتجوزت اتنين وتفضل بتتكسف
فيضحك مصطفي بشدة ويمسك ايد هاجر. وهاجر تقول له
كنت عايزا اسالك سؤال في الدين
مصطفي
تاني يا هاجر
هاجر
لا والله المرة دي بجد.
مصطفي
اسالي
هاجر
هي اللي جوزها يموت قبل ما يخش عليها ليها عدة
مصطفي بحزن
ليها عدة. يا هاجر
هاجر
كنت خايفة من كدة. علشان كدة اديت للماذون البطاقة بتاعتي اللي زورنها علشان يشوفها رياض
مصطفي
زورتي اية. انا مش فاهم حاجة
هاجر
هاحكي لك كل حاجة بالتفصيل
مصطفي
احكي وبعد ما تحكي هاطلب منك طلب وهاخدك معايا مشوار بس يارب توافقي علية
هاجر باستغراب
اطلب يا مصطفي. بس بعد ما احكي لك، ،،،،،،،،
ومن داخل شقة اجلال كانت سماح بتصلي العصر جنب امها اجلال فيسمعا الاثنين صوت خبط علي الباب فينتهو من الصلاة وتستعد اجلال علشان تروح تفتح الباب فتمسك سماح ايدها وتقول لها
خليكي انتي. انا هافتح
وتفتح سماح الباب بعد ما تتاكد ان الحجاب مظبوط وشعرها مش باين. وتلاقي علي الباب مصطفي ومعه هاجر
فتقول له سماح
ازيك يا مصطفي. ازيك يا هاجر اتفضلو
فيدخلا الاثنين بعد الترحيب المتبادل ويبص مصطفي لعمته ويقول لها
عامله اية النهاردة يا عمتي
اجلال
انا بخير والحمد لله.
ثم تبص اجلال لهاجر وتقول
لسة زي القمر يا هاجر.
هاجر
ربنا يخليكي يا ست اجلال
اجلال وهي تفتح ذراعتها لهاحر وتقول
تعالي في حضني يا هاجر
هاجر وهي بتحضن اجلال تقول لها اجلال
اوعي تكوني لسة زعلانه مني
هاجر
مش زعلانه يا ست اجلال. وخصوصا بعد اللي قاله عنك مصطفي ورعايتك للبنات اللي في السكن والتغير اللي اتغيرتي
سماح
بلاش نتكلم في اللي فات. تحبو تشربو اية
مصطفي
هانشرب شربات بس بعد ما توفقي علي اللي جائيين لك في
سماح باستغراب وهي بتبص لاجلال
خير يا مصطفي
مصطفي لعمته اجلال
عمتي انا جاي اطلب ايد سماح
فتستغرب اجلال بشدة وتدمع عيونها وسماح تبص له مستغربة اللي سمعتة وقالت
انت بتقول اية. انت عايز تتجوزني بعد كل اللي عرفتة عني
مصطفي
انتي عرضي وانا اولي بيكي من الغريب.
اجلال
مصطفي احنا من بعد ما الناس ما عرفو حقيقتنا وماحدش
بيتكلم معانا عدل الكل قرفان مننا. زي مانكون جربا و انت عايز تقرب.
مصطفي
انا ماليش دعوي بكلام الناس
اجلال
طيب وهاجر
مصطفي.
هاتجوزها برضو وهي موافقة علي جوازي من سماح
اجلال
بجد يا هاجر
هاجر
طبعا طالما مصطفي شايف ان دة الصح يبقي انا معه في حتي لو الصح دة في وجع ليا
فتنزل اجلال علي الارض وتبوس رجل مصطفي اللي بيبعد رجله عن بوق عمته وبيساعدها علي انها تقف علي رجليها ويقول
ما ينفعش اللي بتعملي دة يا عمتي. انت مقامك عندي كبير اوي
اجلال والدموع تجري علي خدها
يا منت كريم يارب. سترت بنتي. يا ستار الحمد لله. دة انا كنت هاموت من الحسرة علي بنتي اللي فضحتها بنفسي
فتبص سماح لمصطفي مستغربة كل اللي بيحصل ومش عارفه تقول اية. ومصطفي يبص لها ويقول
موافقة يا سماح تكوني مراتي
سماح
هاتتجوزني جبر خاطر
مصطفي
هاتجوزك علشان عايز اتجوزك. وبلاش تحسيبها اي حسبة تانية. بس المهم هاتلبسي الخمار
سماح
طبعا. تبقي اي بت غبية لو رفضت العفة. والطهارة
مصطفي
يبقي مبروك، ،،،،،،،
وينزل مصطفي من عند عمته وهاجر في أيدة وبيقول لها
عارف اني بجوازي من سماح باذيكي
هاجر مبتسمه
انت تفتكر ان هاجر ترفض جوازة فيها سترة لبنت من فضيحة نزلت عليها
مصطفي
يعني مش زعلانه
هاجر
هابقي كذابة لو قولت عادي لما واحدة تانية تشاركني في جوزي حبيبي. بس برضو هابقي قليلة الاصل لو وقفت في وش خير انت عايز تعمله. بس في سؤال محيرني انا غيبت عنك كام شهر لية ما اتجوزتهاش
مصطفي
لاني حلفت اني لو انتي مش مراتي مافيش واحدة تانية هاتكون مراتي.
فتبص له هاجر في عيونه وتضحك بشدة وهي تقول
وانا كمان ربنا اراد اني اتشال ليك وارجع لك زي ما خرجت من هنا. بنت. وماحدش يلمنسي قبل منك
مصطفي
انتي اتخلقتي علشان تكوني نصي التاني
هاجر بصوت حنون
وانا مش عايزا غير اني اكون نصك التاني
وهنا يسمعوا زغروطة اجلال وفرحتها بسترة بنتها بعد الفضيحة. فتستغرب هاجر صوت الزغروطة بتاعت اجلال وتقول لمصطفي
اية صوت السريخ دة
مصطفي
دي زغروطة يا قلب يا مصطفي. بس عمتي بتعملها زي صفارة الانذار
فتعلي اجلال صوت الزغروطة فيمسك مصطفي ايد هاجر وهو يقول لها
يالا نجري علشان باين عليها غارة.
فتضحك هاجر وهي بتجري مع مصطفي في الشارع، ،،،،،،،،
وتفرح هاجر برجوعها لمصطفي بعد مشوار من العذاب والدموع. وفعلا احلي فرحة الفرحة اللي بتتولد من رحم العذاب. ،،،،،،،،،
النهاية
يارب تكون القصة عجبتكم. مستني راي كل اللي شرفني بقراءة القصة.
من تاليفي، ،
محمد منصور. منص
Excellent
ردحذفاحلي قصه جميلة جدا ربنا يفرحك زي مافرحتنا بالنهاية الجميلة دي ربنا يوفقك للأحسن
ردحذفحلوه جدا بارك الله فيك وجزاك الله خيرا
ردحذف