الهام واللي كان الحلقة الاخيرة

  كيان و الشيطان 2 
دم برئ

                           ★الحلقة الثالثة عشر★

                          الاخيرة من الموسم الثاني 

من تاليفي، ، 

محمد منصور. ** منص **

وقبل ما نبدأ نوحد الله ونصلي علي خير خلق الله سيدنا محمد. وعلي بركة الله نبدأ 

بسم الله توكلت علي الله. وهو رب العرش العظيم

وتلبس البروكة مرة تانية وتبص للمرايا وتحط مكياج. وهي بتضحك. وتقول بشر 

كل ما ابتدي انساكي لازم الحقنة علشان تفضلي في عقلي وقلبي. 

وتسمع الياب بيتفتح فتبص للباب وتقول

كل دة هفضل مستنياك كتير

ويدخل للاوضة خالد العفريت بصت له عفاف فقال

انتي كنتي عارفة بقي اني جاي

عفاف

اومال عادي انام واسيب باب شقتي مفتوح 

وقربت عفاف منه وهي بتقول

هو انت فاكر انك تهكر موبيلي وتفتح كاميرتي وانا ماعرفش. طيب ازاي بس دة انا بابا الشغلانه دي

خالد 

طيب ما تكشفي ورقك وتعرفيني انتي عرفتي ازاي

عفاف

من الكاميرات اللي مزروعه وسط اجهزة الكمبيوتر اللي عندك واللي بيها اقدر اشوفك طول ما انت موجود في المقر اللي انا عماله بايدية. اديني كشفت ورقي. اكشف انت بقي ورقك. لو عندك ورق اصلا يتكشف

خالد

عندي ورق كتير واخطر ورقة معايا ورقة كيان ياتري هتعمل اية لما تعرف انك انتي العراف وانك انتي اللي عذبتيها طول الفترة اللي فاتت

عفاف

والله انا شايفة ان دي مشاكل عائلية ما تخصكش. واحدة بتربي بنت اختها انت مالك. انما اللي فعلا هيعمل مشكلة كبيرة. هو ان اسلام يعرف مكان خالد العفريت اللي سرق فلوس كيان مراته وانت عارف بقي اسلام وقتها ممكن يعمل فيك أية 

خاف خالد وكملت عفاف

انا اشهد لك انك شاطر اوي في اي حاجة بتتعمل في الظهر زيك زي اي حرامي. لكن عبيط وغبي وجبان لما تقابل عدوك وشك في وشه

ومرة واحدة زعقت عفاف وقالت باعلي صوتها

صح

خاف خالد حرفيا وهي كملت وقالت

خالد انا مختارك بايدية من 12 سنة. من اول يوم لانشاء موقع العراف. وعارفة انا مختار مين كويس من كل الهكر اللي في مصر. واديك دلوقتي عرفت اني انا العراف يفرق اية معاك في كدة مش فلوسك بتتنقل لك في ميعادها وبزيادة هتعوز اية تاني 

خالد باستهزاء

حاسس اني مجئيتي لغاية هنا ملهاش اي لزمة وانا اللي كنت فاكر اني هقدر اساومك علي امتلاك 50% من ارباح موقع العراف 

ضحكت عفاف وقالت 

مستعده اديك النسبة اللي انت عايزا بس تعمل اللي انا بعمله

خالد

انتي ما بتعمليش اي حاجة. انا اللي بعمل كل حاجة انتي نسيا مين بيهكر اجهزة المتابعين لينا

عفاف

وانت ناسي مين اللي بيجيب لك حكايات تتنفع تتصور وتخلي المتابعين يتابعوها للاخر. احنا يا خالد عاملين زي بتوع السيما في السيما بيعرضو حكايات وكلها تمثيل لكن احنا بنعرض حكايات حقيقة علشان كدة احنا نكسب

خالد

انتي اللي تكسبي مش احنا. انا يدوبك بيدخل لي واحد من مية من ارباحك.

عفاف

انت شايف ان الرقم دة قليل عليك. مع اني انا شايفة ان الرقم دة كتير علي واحد زيك

خالد

للدرجة دي شايفاني واحد ماليش لزمة 

وفي الوقت دة تتفتح شاشة اللاب الخاصة ب عفاف ويظهر اسلام في فيديو بث مباشر علي موقع العراف وكان بيبص للاثنين وبيقول

اسف اني دخلت عليكم في وقت ملوش لزمة.

وبص اسلام ل خالد وقال

زيك كدة مثلا.  

ورجع بص ل عفاف وقال

بس بجد انتي لازم تفتحي مراكز تقوية للشياطين اللي لسة براعم. ونختار للمركز اسم زي. ام الابالسة. زي ام المصرين وكدة.

عفاف بعصبية

انت ازاي قدرت تخترق سيرفر البث المباشر الخاص بيا ووصلت لغاية عندنا.

رجع اسلام بص ل خالد وقال

عن طريق الحمار اللي قدامك دة. اللي قبل اضافتي للموقع وعن طريق الزحف الالكتروني مع بعض من الفولدرات الخبيثة قدرت اوصل لكل شئ يخص الموقع وحابب اعرفك ان اخر فيديو هيبثة الموقع هو الفيديو دة

عفاف بتهديد صريح 

اياك تقرب من الموقع بتاعي والا هحرمك من كل اللي بتحبهم

اسلام

طيب ما تيجي نجرب. 

وانتهي البث. المباشر وبدأ يظهر علي الموقع عداد بيعد عد تنازلي بدأ من 10. 9. 8. 7.  

وعفاف بتجري علي اللاب وتحاول انها تمنع اللي بيحصل لكنها ما كنتش قادرة فبصت ل خالد اللي كان يتابع وهو مصدوم من اللي بيحصل وقالت

انت هتقف تتفرج علية كدة. اتصرف واعمل حاجة

عقبال ما وصل خالد للاب كان العداد كتب صفر. وبدأت كل اللي علي الموقع يتمسح بسرعه رهيبة ومخيفة. انتهي موقع العراف بشكل نهائي صرخت عفاف بمنتهي الغضب ومسكت اللاب بتاعها ورمته في الحيطة اتكسر ميت حتة وبصت ل خالد بغضب شديد وقالت

غبي. عيل زي دة يبوظ كل اللي عملته في سنين. وبسببك انت

وقربت منه ولفت ايديها حوالين رقبه خالد وخنقته بقوة غشيمة برق لها خالد وقال بصعوبه

القوة دي مش قوة انسا،،،،،،،

وقبل ما يكمل كانت عفاف كسرت رقبته نهائي. وقع علي الارض جثة. بصت له وخرج من الاوضة وهي ناوية علي الشر، ،،،،،،،،،

ومن سوهاج كان اسلام بيسال وبيوصف للناس ملامح وشكل كيان لغاية ما راجل دله علي مكانها وعرفه انها في المستشفي مع سحر راح لها بسرعه، ،،،،،،،

ومن جوة الاوضة المحجوزة فيها سحر تقعد سحر علي سريرها وقدام منها كيان وكانت كيان بتقول 

انا استنيت كتير لغاية ما فوقتي وبقيتي كويسة. علشان عندي سؤال ونفسي اعرف اجابته

سحر بصوت تعبان

خير يا بنتي

خرجت كيان موبيلها وورتها صورة عفاف وقالت كيان

تعرفي منين الست دي 

تبص سحر في الصورة بتركيز شديد وتقول

دي الست مديحة الهي يعمر بيتها كانت ديما تيجي ووتقعد معايا في نصبة الشاي لاني صعبت عليه وعرفت حكاياتي وكانت كل يوم والتاني تيجي تديني قرشين اهو مساعدة منها وعطف علي كريم

كيان

واخر مرة شوفتيها امتي

سحر

قبل مايظهر لي سلامه تاني ويجي عند النصبه علي اساس انه رجب.

كيان

بكام يوم تقريبا

سحر 

مش فاكرة. يمكن عشرة ايام. اسبوع يعني. بس هو في اية عماله يعني تسالي عليها وكانك تعرفيها

كيان

اعرفه. الا اعرفه دي تبقي خالتي واسمها عفاف وماتت من كام سنه. 

سحر باستغراب شديد

ماتت ازاي وانا بقول لك انها كانت معايا من فترة صغيرة

كيان

ماهي دي الفزورة اللي تحير. بس لو ربطنا كل الاحداث ببعضيها في خالتي عفاف هي وراء كل اللي حصلك وحصلي 

سحر

انا مش فاهمه يعني اية الكلام دة.  

في الوقت دة يسمعوا صوت العسكري اللي حطة شعبان حراسة علي اوضة سحر بيقول

قولت لازم اذن حضرة الظابط علشان تدخل للمتهمة

بصت سحر ل كيان وقالت باستغراب

متهمة

كيان

انتي نسيتي انك اعترفتي علي نفسك بانك انتي اللي قتلتي سلامه. ولولا اني مستاذنه من الظابط ما كنتش عرفت ادخل لك 

افتكرت سحر وهنا سمعت كيان صوت اسلام بيقول للعسكري 

انا مش عايز سحر انا عايز اللي معها كيان

فرحت اوي كيان وقالت

دة اسلام جوزي

وجريت ناحية باب الاوضة وفتحته واول ما شافت اسلام قالت

اسلام

واترمت في حضنه وهي بتعيط من الفرحة وهو قال وهو بيحضنها

كيان.  

بدات تعيط اكتر وتقول بحرقة 

اخيرا رجعت.  

اسلام وهو بيمسح دموعها 

غصب عني شيطاني لعب بيا وخلاني اشوفك غلط. واللي فرقوا بيني وبينك انا انتقمت منهم

كيان

تقصد اية

اسلام

عفاف خالتك لسة عايشة وهي العراف. 

كيان

عرفت قبل منك. وماكنتش متاكدة

اسلام 

انا بقي اتاكد وخليت موقع العراف ملهوش اي اثر.

كيان

وخالتي عفاف

اسلام

تلاقيها ماتت بحسرتها

كيان

طيب ازاي حسن قال لنا انها ماتت وهي لسة عايشة. انا هاتجنن 

اسلام

في لغز كبير في حكاية موت خالتك. ويا اما حسن يعرف حل اللغز دة. او اما حسن مخدوع زينا

كيان

تفتكر حسن مع خالتي

اسلام بعد تفكير للحظات.

صعب بس كل شئ وارد. احنا

وبص اسلام للعسكري وقال

انما ما قولت ليش اية حكاية سحر ولية مقبوض عليها

كيان بصوت ما يسمعهوش غير. اسلام

سيف قتل سلامه ف سحر صعب عليها مستقبل سيف يروح اعترفت انها اللي عملت كدة

اسلام

دة كدة فيها اعدام

كيان

هي عارفة وراضية

اسلام

وكريم

في الوقت دة يقف الظابط شعبان قدام العسكري وقال له

خش هات المتهمة اللي جوة وونزلها البوكس 

راحت كيان ل شعبان 

بوكس ازاي بس. وهي تعبانه كدة

شعبان

انا سالت الدكتور وقال ان حالتها استقرت ونقدر نكمل محضرنا في القسم عادي

وخرج العسكري ب سحر وهو ملبسها الكلبشات اول ما شافها كريم وسيف جريوا ناحيتها واترموا الاثنين في حضنها وقال كريم

سحر هو واخدك رايح بيكي فين

سحر وهي بتعيط

مشوار وراجعه لك تاني

كريم

انتي بتكدبي علية. انا بشوفهم في التيلفزيون بتاع القهوة اللي حاطين الحديد كدة في ايدة بيروح السجن وما بيرجعش تاني 

سحر

دة في التمثيل انما في الحقيقة ما فيش الكلام دة.

وتبص ل سيف اللي قال

انا السبب

سحر

خلي بالك من اخوك

لكن سيف جري خطوتين ناحية شعبان وقال

الست دي ما قتلتش سلامه

سحر بصوت عالي

سيف اسكت 

لكن سيف يكمل ويقول

انا اللي قتلته دي برئية 

بص شعبان ل سحر فقالت سحر

كذاب انا اللي قتلت سلامه. هو بس انا صعبانه عليه 

سيف

والله انا اللي قتلته. هي برئية

سحر بعصبية وهي بتضرب سيف بالقلم

قولت اسكت وخد اخوك وامشي من قدامي

عيط كريم ولف ايدة اوي حوالين وسط سحر وقال

كريم بيحبك

سحر

ويعلم ربنا اني كمان بحب كريم.  

وبصت ل سيف وقالت

امشي خد اخوك وامشي

وبصت ل كيان واسلام وقالت

خلو يمشي من قدامي

وخرج العسكري ب سحر وركبها البوكس،،،،،،،،،،،

وكلمت كيان طارق وطمنته عليها وكلمت امها جميلة والدنيا هديت وطلب اسلام من كيان انهم بقي يرجعوا القاهرة فقالت كيان

اطمئن علي سحر الاول

اسلام

سيف قال هيقوم لها احسن محامي في سوهاج.

كيان

يومين بس يا حسن نطمئن عليها ونمشي،،،،،،،

وبعدها بيومين بالظبط ومن جوة مكتب شعبان تقف سحر وتبص للظابط وهو بيقول

مبروك يا سحر. خدي براءة

اتخضت سحر وقالت

اوعو تكونو صدقتوا سيف دة عيل وما يعرفش هو بيقول اية. صدقوني انا اللي قتلته

ضحك شعبان وقال

مافيش اصلا جريمة قتل حصلت

بصت سحر للظابط باستغراب شديد وقالت

يعني اية. دة سلامه وقع من طوله سايح في دمه

شعبان

تقرير الطب الشرعي جه. واثبت ان في صدفة ما حصلتش قبل كدة وافتكر انها مستحيل تحصل تاني. سلامه قبل ما يضرب بالسيخ الحديد علي دماغه جت له ازمة قلبية مات بسببها مش بسبب ضربة السيخ

ما بقتش سحر مصدقة لكنها افتكرت لحظتها ساعه ما سلامه مسك قلبه وبعدها بثانية ضربه سيف بالسيخ ففرحت وقال

الحمد لله الحمد لله. يعني اقدر امشي 

شعبان

بعد ما نخلص شوية اجرءات طبعا تقدري تخرجي بعد ما قضيتك اتصنفت ضمن اغرب القضايا. ،،،،،،،،،

وخرجت سحر وراحت ل سيف البيت وخدها كريم في حضنه وسيف ما اختلفش حاله عن حال كريم فرحة ما بعدها فرحة. وكانت فرحانه علي فرحتها كيان واسلام. وصمم سيف ان سحر تعيش معه في البلد وفعلا وافقت. واهو بالمرة ترتاح من الشقي وبص اسلام ل كيان وقال

اظن بقي كدة خلصتنا حكايتنا لغاية هنا. يلا بقي نرجع القاهرة

كيان ضاحكا

انت مستعجل ليه علي نرجع القاهرة دي

اسلام وهو بيبص في عيونها اوي

وحشتيني

كيان ببصة الكسوف

انت كمان وحشتني ،،،،،،،،،،،،

ومن القاهرة ومن قدام شقة اسلام يقف اسلام وجنب منه كيان وكان بيفتح باب الشقة وهو بيقول

دش دافي بقي واكله تمام

كيان

وبعد الاكلة التمام

اسلام

احلي بيكي بقي

وفتح الباب ودخلو الاثنين ويولع نور الصاله يلاقي عفاف قاعدة علي كرسي الانترية وقدام منها سيف وكريم وسحر الثلاثة متكتفين وعلي ركبهم واتقفل الباب بايد رجاله عفاف وعفاف قالت وهي بتبص ل كيان

ازيك يا اوطي خلق الله

كيان

تربيتك

ابتسمت عفاف. وماردتش وبصت ل اسلام وقالت 

انا حذرتك قبل ما تنهي علي الموقع بتاعي وتحرمني منه اني هحرمك من كل حاجة بتحبها واهو انا جاية النهاردة ابتدي من الاخر. واحرمك من اللي زعلنا من بعض

وحطت ايديها اليمين دماغ كريم اعلي الخد اليمين وايديها الشمال بنفس الشكل الناحية التانية فقال اسلام

انتي ناوية تعملي اية.

عفاف

هوريك جوز الهند بيتكسر ازاي

وضغط بقوة علي دماغ كريم بايديها الاثنين فانفجرت دماغ كريم بشكل مخيف والدم غرق الشقة اتصدموا كل الموجودين وصرخت سحر صرخة مكتومة وهي شايفة كريم قدام منها جثة ما بتتحركش اسلام باستغراب

انتي ازاي قدرتي تعملي كدة. القوة دي قوة اله مش قوة بشر

فتقف عفاف وتقرب منهم ببطئ مخيف وتقول

صح. انا مش عفاف اللي انتم تعرفوها.

وتقف قدام منهم بالظبط ولف دماغها لفة كاملة وتقول

أنا عفاف اللي هي تعرفكم

ودخلت ايديها في الحيطة كسرتها بصت كيان وما ختلفش عنها اسلام للي بيحصل وهما هايتجننوا، ،،،،،،،،،،،

لسة للحكاية بقية. لو في عمر استنوني والموسم الثالث من كيان والشيطان بعنوان.  

                         كيان والشيطان 3. 

                              اله الشر 

                              ‏

يارب يكون الموسم دة عجبكم. مستني راي كل اللي شرفني بقراءة القصة