الهام واللي كان الحلقة الاخيرة

موسي والفرعون

                         ★الحلقة الاولي★
                            ‏
لعشاق قصص الاثارة والغموض. 

تابعو حكاية اغرب اكتشاف في عالم الفراعنه. والبردية اللي هتغير التاريخ كله ومن غير مقدمات سؤال وعايز لي اجابة الفراعنه بنوا الاهرمات بايديهم ولا زي ما موسي بيقول دي هندسة خاصة با اهل الجن. بتقولو مين موسي دة هعرفكم. بس

في الاول وقبل ما ابدأ نوحد الله ونصلي علي خير خلق الله سيدنا محمد. وعلي بركة الله نبدأ 

بسم الله توكلت علي الله. وهو رب العرش العظيم

ومن تاليفي.  

محمد منصور. *منص* 

بدات حكايتنا من جوة شقة تمليك باسم موسي عبد الرحمن الشواف من عيلة الشواف عيلة كبيرة في الفيوم موسي دة عالم وباحث في علم الاثار والتاريخ دكتور وباحث الكل يشهد له بعبقريته وكمان جنونه لانه اثار الجدل وبدأ كل اللي يعرفوا واللي ما كانوش يعرفوا يتهموا رسمي بالجنان بعت البحث اللي اعلن عنه وهو ان الجن عندهم مهندسين واطباء ومهندسين الجن هما اللي بنوا الاهرمات واطباء الجن هما اللي حنطوا جثث الملوك والملكات وحتي اشهر تماثيل الفراعنه من نحت وتصميم اهل الجن. وساعه ما كان موسي قاعد بيتفرج علي الشاشة بتاعته وبيتابع ردود افعال برامج التوك شو علي كلامه دة قعدت جنب منه مراته داليا وقالت له

عجبك كدة. اللي رايح واللي جاي بيتكلم عنك ازاي 

بص لها موسي وخلع نظارته النظر ومسحها. بقماشة خاصة ببها وقال

احساس جميل برضو احساس الشهرة

داليا وهي بتمسك الريموت وبتطفي الشاشة وبتبص له وبتقول له

موسي انت عالم اثار الناس كلها كانت بتحترمك وتقدرك لكن بعد البحث بتاعك الاخير كله بقي شايفك مجنون

موسي بثبات انفعالي وثقة في النفس

وانتي شايفة اية

داليا

انا متاكدة انك عبقري والاول في المجال دة رغم صغر سنك. بس مش كل اللي تعرفه لازم تقوله الناس في مصر عندها ثوابت واللي بيقرب من الثوابت دي بيبقي مربض او مختل

موسي 

والثوابت دي بتقول ان الاهرامات اتبنت بايد المصرين القدماء. وان التحطنيت هما بس اللي عارفين سره وماحدش يعرفو غيرهم وثوابت كتير صعب عقلي يقبلها ومسيري هاثبت لكل اللي قالو عليه مجنون اني اعقل واحد فيهم كلهم. وهاحقق اعظم مشروع هتعرفة البشرية وهبني الهرم الرابع. والتحطنيت كل الناس هتعرف سرة 

داليا

ازاي بس وانت بتقول في البحث بتاعك ان البردية اللي تثبت كلامك موجودة في قلب مقبرة لملك اسمه

 اسمرتن تاغ. اللي ماحدش سمع عنه خالص

موسي

دي مشكلتهم هما مش مشكلتي انا.   

ويقف موسي فتبص له داليا باستغراب شديد وتقول

هتروح فين دلوقتي 

موسي

مسافر الفيوم

داليا

رايح للعمده كمال الفرعون 

موسي

أة.

ويسيبها موسي ويروح ناحية اوضة علشان يلبس هدومة فتروح داليا وراء منه وتدخل وراء الاوضة وتقف قدامه وتقول له

عايزا اعرف اية اللي بينك وبين كمال الفرعون

موسي وهو بيطلع بدله من الدولاب وبيبدا يلبس فيها

شغل

داليا

الراجل دة سيرته بطاله في البلد كلها وفي ناس بتقول انه بيتاجر في الاثار 

موسي

انا مالي ومال سيرته هو انا رايح اتجوز بنته. الفرعون راجل شغال في ارضي وبيزرعها وانا محتاجة علشان بيفهم في الفلاحة

داليا

انت بقيت تحير ماطول عمرها الارض موجودة وانت ما بتفكرش فيها خالص اشمعني اليومين دول بدات تهتم بالارض. وزراعه اية دي اللي تسافر لها بعد نص الليل 

موسي وهو تقريبا بينتهي من لبس هدومة كان بيقول

داليا يا حبيبتي انتي كان نفسك تشتغلي في المباحث.

داليا

لية بتقول كدة انا غلطانه اني خايفة عليك

موسي

انا مش صغير وعارف كويس انا بعمل اية. دة انا موسي اللي عقله يوزن كل عقول البلد دي 

وسابها وخرج من الاوضة وهي عماله تبص له وقالت

اخرة الغرور وحشة يا موسي دة انت ممكن تتجنن بجد. او انك بقيت مجنون فعلا. بس انا مش هسيبك تروح مني 

وفي الوقت دة يدخل عليها ابنها يونس صاحب ال 10 سنين. ويقول لها

ماما هو بابا خارج رايح فين 

داليا بزهق

سايبني دلوقتي يا يونس. وروح اوضك وكمل نومك

ويخرج يونس من الاوضة. وتروح داليا بسرعه ناحية الموبيل بتاعها وتتصل برقم اخوها زاهر دكتور امراض نفسية وعصبية واول ما يرد يقول بقلق

داليا انتي كويسة.

داليا

انا بخير يا زاهر ما تقلقش

زاهر

اومال غريبة يعني اول مرة تكلميني في ميعاد زي دة

داليا

بكلمك علشان موسي

فيتنهد زاهر ويقول

قولي كدة بقي. عمل اية تاني المختل دة

داليا بعصبية

زاهر ما تنساش انه جوزي وما ينفعش تقول عليه مختل

زاهر

داليا يا حبيبتي مصر كلها وبرة مصر كمان بيقولو انه مختل. وانتي بقيتي شاكة في كدة لدرجة انك اتصلتي بيا واكيد بتتصلي علشان اكشف عليه

داليا

انا بتصل بيك فعلا علشان محتاجة مساعدتك. بس مش لدرجة انك تكشف علي موسي 

زاهر

واقدر اساعدك ازاي. طالما مش هكشف عليه 

داليا

احكي لك علي اللي بيعمله وانت تقدر توصف المرض اللي عنده وتساعده. بانك تقولي اعمل اية او حتي تكتب له علاج.

زاهر

والعلاج دة بقي هياخدة ازاي

داليا 

هابقي احطه في الاكل

فيضحك زاهر اوي ويضحك فتقول داليا 

في اية. قولت اية أنا يضحك كدة

زاهر

هو انتي فاكرة العلاج النفسي برشام وخلاص. يا داليا لازم اقعد واتكلم مع جوزك لكن دة مش هيحصل لان جوزك ما بيحبنيش 

داليا

يعني افضل اتفرج عليه وهو بيضيع مني. دي تصرفاته كلها بقت غريبة 

زاهر

جوزك ربنا مسخر عليه دماغه وربنا يكفيكي شر اللي ربنا يسلط عليه دماغه. لانه قبل ما بياذي غبره بياذي نفسه. وحطي علي كدة كمان ان جوزك عنده جنون العظمة وهو انه شايف ان ما فيش حد عنده نفس العلم اللي عنده

داليا

ودة اللي مخليني خايفة عليه اوي

زاهر

عموما الفكرة اللي انتي قولتيها حلوة ابقي احكي ديما علي اللي بيعمله وانا هحاول اساعده من ناحيتي،،،،،،،،،

ومن الفيوم وبالتحديد قدام بيت قديم يقعد العمدة كمال الفرعون وقدام منه شيشة من الذهب الخالص تدل قد اية الراجل دة غني وكانت جنب الراجل دة بنته امريكية الجنسية مريم اللي كانت بتبص علي خريطة خاصة بالبيت اللي هما قدام منه فيقول لها كمال

مش كفاية بقي بص في الخريطة اللي قدامك دي

مريم

حاسة ان موسي دة مجنون فعلا زي ما الناس بتقول عنه وهنفضل نحفر ولا هنلاقي كنز ولا مقبرة الملك اسمرتن تاغ اللي ما حدش يسمع عنه غيره هو

يبص لها كمال الفرعون والشيشة في بوقة وبيقول

تبقي ما تعرفيش موسي. دة يعدي فوق الارض بس ويشاور عليها بصباعه ويقول هنا في مقبرة نحفر نلاقي مقبرة مليانه من خيرات الله

مريم

احنا بقالنا اسبوع بنحفر لما البلد كلها بدات تشم خبر عن اللي بنعمله

فيضحك كمال الفرعون ويقول

اللي يعرف ويقدر يقول اللي عرفه. الفرعون هيبكي اهله عليه. متخافيش ابوكي بيتعمل له الف حساب

مريم

والحكومة

يضحك كمال كمان مرة وبصوت اعلي ويقول

والحوار دة كمان خلصان. ما حبش قلبك يبقي خفيف كدة

مريم وهي بتبص في الخريطة تاني

مش مرتاحة.

وفي اللحظة دي يسمعوا صوت عربية بتقرب منهم فيبص كمال للعربية ويبص في ساعه ايده الذهب ويقول

مواعيده يتظبط عليها الساعه.

فتبص مريم بطرف عينيها للعربية وهي بتقرب منهم وتقول

اة. المغرور وصل

فيضحك كمال

وربنا انتي ظالما. 

وتقف العربية قدام منهم وينزل موسي ويبص لكمال وبنته ويقول

في جديد

كمال

طيب قول السلامو عليكم

موسي

لو قولتها هبقي ضيعت وقت علي الفاضي وانا الوقت مش معايا. دة ضدتي 

فتبص له مريم بضيق وكان وقتها كمال بيقول

الرجاله شغاله اهه وعلي الله يبقي في جديد

موسي بعصبية

ازاي بس ماوصلناش لاي شئ. هما حفروا علي عمق كام متر

كمال

وصلو. ل20 متر

موسي

يبقي لازم نكون وصلنا لبوابة المقبرة

مريم

المقبرة اللي ما حدش يعرف بيها الا انت. مش كدة

موسي

علشان انا اعلم اهل الارض. واعرف اللي ما حدش يعرفو

مريم

مش شايف انك بتبالغ شوية

موسي بتحدي 

انا عارف انا بقول اية. وبعمل اية. وقدامكم كتير اوي عقبال ماتوصله للي انا وصلت له من علم 

مريم

زي ما بتقولو في مصر ما يشكرش في نفسه الا ابليس

فيبتسم موسي ابتسامه صفراء ويقول

حتي ابليس ما يعرفش اللي انا اعرفه. وزي ما بيقولو عندكم في امريكا.  

وقال بالانجليزي 

صوت الاعمال اقوي من صوت الكلام

وهنا يتدخل كمال ويقول

احنا مع بعض مش ضد بعض. نهدئة بقي ونركن النفسنه علي جنب خلو ربنا يبارك لنا

مريم بعصبية

انت مش سامع بيقول اي،،،،،،،،،

وقبل ما تكمل كان بيخرج احدي عمال الحفر وبيقول لكمال

وصلنا لبوابة المقبرة

بص موسي لمريم بتعالي شديد. وقال كمال

هو دة الكلام ينصر دينك، ،،.،،،،

ومن قدام بوابة المقبرة اللي كانت من النحاس الخالص نحاس لاول مرة كانو يشوفو زية وقف كمال ومريم وموسي وزاد عليهم راجل في الخمسينات اسمه عربي وكان عربي واقف قدام بوابة المقبرة وكمال كان بيقول له

ابدأ يا شيخ عربي

لكن موسي قال

لو دجال بلاش 

بص عربي لموسي

بتقول اية

موسي 

الملك اسمترن تاغ. ما ببحبش اللي زيك

عربي. لكمال

هو في ابة يا عم الحج. انا جاي هنا اتهزق ولا اية 

كمال

حقك علية انا يا شيخ عربي. موسي ما يقصدش

وبص كمال لموسي وقاله

الشيخ عربي اشهر واحد في الشغلانه دي. ومش اول مرة يكون معايا واحنا بنفتح مقبرة

كمال. لعربي 

ابدأ يا عم الشيخ 

وبدأ الشيخ عربي يمارس بعض الطقوس الخاصة بفتح المقابر والتخلص من حارس المقبرة اللي غالبة بيكون من ملوك الجن وبمجرد ما بدأ الشيخ عربي الطقوس يخرج من الباب سيخ من جهنم. النار جعلت لون السيخ احمر ناري ودخل السيخ في رقبه الشيخ عربي وتصرخ مريم ويصاب كل الموجودين بالرعب الا موسي اللي قال لعمال الحفر

شيلو وطلعوا بعيد عن المقبرة بسرعه قبل ما الملك اسمترن تاغ يغضب علينا كلنا

لكن عمال الحفر كانو لسة مصدومين فصرخ فيهم كامل وقال

انتو واقفين تتفرجوا. اعملو اللي بيقولكم عليه

وفعلا شالو وخرجوا بي بسرعه وبصت مريم لموسي وقالت

انت عرفت ازاي باللي هيحصل له دة

موسي 

انا ما كنتش اعرف ان دة هيحصل. انا كل اللي عرفه ان الملك دة حرق كل الكهنه اللي كانو في زمنة علشان كانو كهنه بلا دين

كمال

طيب احنا دلوقتي نفتح المقبرة دي ازاي بعد اللي حصل للشيخ عربي

موسي

انا هتصرف

وراح موسي ناحية البوابة وحط ايده علي البوابة وبمجرد ما حط ايدة بتدات تظهر رموز فرعونية وبدات الرموز دي تتنقل علي ايد موسي وموسي بيبص للي بيحصل بتركيز شديد وكأن الرموز بتفحص كل خلايا موسي وبعد ما انتهي ذلك الفحص رجعت الرموز للبوابة ولقي موسي ايده رايحة ناحية مفتاح سري في ركن من اركان الحوائط اللي جنب الباب ومسك موسي بالمفتاح وفتح البوابة علشان يبان ليهم مقبرة فرعونية تشبه سفينه الفضاء منظر غريب وعجيب دخلو للمقبرة اللي كلنت مليانه ذهب وجواهر من اغلي الجواهر بص كمال للمقبرة بفرحة شديدة وضحك كمال وهو بيمسك الذهب بايدة وبيبص لمريم وبيقول

صدقتي لما قولت لك ان موسي دة ما فيش زية

لكن موسي كان ماشي جوة المقبرة وكانه شافها قبل كدة وراح ناحية التابوت المتحنط في الملك اسمترن تاغ وشال الغطاء اللي فوق التابوت وبانت مومياء الملك اسمترن تاغ وكان في ايدة بردية مد موسي ايدة وسحب البردية من ايد المومياء وبص لها بفرحة شديدة وبدأ يمشي ايدة فوق منها ويفك الرموز اللي فيها وفي الوقت دة وقفت قدام منه مريم وقالت

فيها اية البردية دي خلاك تفرح اوي كدة

بص لها موسي وقال

فيها اللي ما يخصكيش

كمال

لا. كل اللي في المقبرة هنا يخصني.

موسي 

اسمعني كويس اللي في البردية ما يخصش اي حد الا انا

كمال

للدرجة دي.  

موسي

واكتر 

مريم

طيب خليني اشوف مكتوب فيها اية

موسي

قولت ما تخصش حد غيري 

كامل

انت كدة هتخسر نصيبك من الذهب اللي موجود هنا

موسي وهو بيبص للبردية

انا معايا اللي اغلي من الذهب 

ولسة هيمشي من المقبرة سمع صوت في ودانه بيقول

انت الموعود واللي يدور علينا نلاقي

بص حوالين منه باستغراب شديد وقال لكمال ومريم

سمعتوا اللي انا سمعتوا

مريم

ما حدش اتكلم

لكن موسي رجع يسمع تاني

اخرج وما تبصش وراك وسيب كمال وبنته لمصيرهم

استغرب موسي اوي وقال

برضو ما سمعتوش حد بيتكلم

كمال

موسي انت في اية مالك. هتخليني اصدق انك مجنون

وسمعوا كلهم صوت سرينه البوليس بصو كلهم لبعض وما بقوش عارفين يعملو اية، ،،،،،،،،،،،

ولغاية هنا. خلصت حلقتنا اللي يارب تكون عحبتكم ولو في العمر بقية هاكمل لكم الحكاية دية. سلام 

الحلقة الثانية