خبيث
★الحلقة الثالثة★
وقبل ما نبدأ الحلقة نوحد الله ونصلي علي خير خلق الله سيدنا محمد. وعلي بركة الله نبدأ
بسم الله توكلت علي الله. وهو رب العرش العظيم
ومن داخل مديرية امن القاهرة تجلس يارا قدام مكتب الظابط نبيل وصلاح ويارا كانت في حضن كاميليا ومنهارة تماما من العياط ورفعت واقف قدام منها وبيقول لها
انا هاتجنن انتي بتقولي انك ما خرجتيش من البيت ليلتها والبواب وصفك بالظبط. وانتي خارجه بتجري من فيلا الدكتورة اللي اسمها دينا يبقي نصدق مين فيكم
كاميليا
نصدق يارا يا رفعت. وبعدين يارا تعرف منين الدكتورة دينا دي
رفعت
ماهي قالت اسمها من طمئن تلت اسامي كتبهم خبيث ليها
فتفتكر كاميليا. كلام يارا وتقول ليارا
رفعت بيتكلم صح انتي ساعتها قولتي دينا. مينا. حلمي. مين دول يا يارا
يارا وهي بتعيط وبتبص لكاميليا
ماعرفش حد بالاسم دة
رفعت بشي من العصبية
في حد بيقول اسامي ناس ما بيعرفهاش طيب ازاي يعني
يارا بانهيار شديد
ماعرفهمش والله. وصدقني بقي. حرام عليك انا تعبانه
وهنا تحس بوجع شديد وتحط ايدها علي دماغها من وراء فتلاقي دماغها بتجيب دم فتستغرب وتبص لايدها وتقول
انا فيه حاجة غريبة
كاميليا
حاسة باية طمنيني
يارا
دماغي مكان الخبطة اللي خبطهالي اسلام. كل ما الدم يقف ترجع تجيب دم تاني
رفعت
وريني كدة
ولسة هايحط رفعت ايدة علي دماغ يارا يسمع صوت الظابط نبيل جاي من وراء بيقول
دكتور رفعت. ممكن تجيب يارا والمدام وتدخل
فيبص له رفعت. ويبعد ايدة عن دماغ يارا،،،،،،،،،
ومن داخل مكتب الظابط نبيل يقف البواب ويبص ليارا بتركيز شديد ويقول
لا. يا بية مش دي اللي كانت في فيلا دكتورة دينا
نبيل
انت متاكد
البواب
ايوة يا بية التانية صحيح شبهها في الجسم بس لكن وشها كان اصغر من وش المدام وكانت بتجري بطهرها
رفعت باستغراب شديد ونبيل بيقول للبواب
يعني اية بتجري بطهرها. انت بتشرب اي مكيفات
البواب
والله ابدا يا بية هي الشيشة وبس. بس انا فاكر ليليتها كانت الست اللي خرجت من فيلا الدكتورة لابسة بلطو طويل وجونتي في ايديها وماسكة حاجة معدن في ايديها وبتلمع و بصالي وبتجري
فيفضل نبيل يسال البواب بعض الاسئلة الروتينية ورفعت كان بيفتكر الكلام اللي شافة في عيون يارا وهو ان الجسد دة ملكي. وفضلت الجملة تتكرر قدام منه الجسد دة ملكي الجسد دة ملكي. لغاية ما قال لنفسه
معقولة يكون جن. بس لو جن لية بياكل فصوص معينة في المخ. ولية اصلا يقتل بايدة. وازاي البواب يشوفه واشمعني جسم يارا
وماخرجش رفعت من دايرة الاسئلة دي كلها الا صوت نبيل اللي كان بيقول للبواب
خلاص روح ومتسافرش ولا تروح في اي مكان الا لما تبلغني علشان ممكن احتاجك تاني
ويخرج البواب من المكتب ونبيل يبص لصلاح ويقول
هو دة الشاهد اللي هايحل لغز القضية. جايب لي شاهد مصتبح وقال اية بتجري بطرها
صلاح لدكتور رفعت
احنا اسفين كمان مرة يا دكتور رفعت تقدر تاخد مدام يارا وتروحو. شهادة البواب. اعفتها من اي مسالة قانونية،،،،،،،
ومن داخل فيلا يارا يجلس رفعت في الريسبشن تحت وكانت كاميليا مع يارا في اوضه يارا ورفعت ماسك ورقة وقلم وبيكتب كل اللي دار وكل المعطيات اللي قدام منه. ويسمع صوت مكتوم وحد زي ما يكون بيطلب النجدة فيقوم من علي الكرسي ويبص في كل انحاء الفيلا بتركيز شديد وجعل حاسة السمع تشتغل اضعاف مضعفة بالنسبة لسنة الكبير واقترب من احدي حوائط الفيلا وحط ودانه علي الحيطة وهنا يسمع انين واستغاثة مكتومة فيبص للحائط باستغراب شديد ولسة هايحط ايدة علي الحائط لقي ايد بتتحط علي كتفة فبص بفزع لقي كاميليا قدام منه بتقول له
في اية.
رفعت
حط ودنك علي الحيطة كدة
كاميليا باستغراب
لية
رفعت
حطي بس ودانك.
فتحط كاميليا ودانها علي الحيطة وما تسمعش حاجة لان فعلا الصوت اختفي فتقول
مافيش حاجة
رفعت
كان في صوت حد زي ما يكون متكتف وبيحاول يطلب المساعدة
فتضحك كاميليا باستهزاء وتقول
هنا جوة الحيط
رفعت بعصبية
اة جوة الحيطة. هو انتي فكراني كبرت وخرفت
كاميليا اللي حست انها غلطت
انا اسفة ماقصدش والله. بس دي حيطة يا رفعت. ازاي حد جوة منها
رفعت
هو دة بس اللي انتي مستغربة في فيلا اختك المرعبة دي
كاميليا وهي بتاخد رفعت في حضنها
رفعت يا حبيبي انا عارفة اني دخلتك في موضوع اختي الغريب. وشكلك كدة اعصابت تعبت. بس دي اختي الوحيدة ومستحيل اتخلي عنها في محنتها
رفعت
وانا ما طلبتش منك تتخلي عنها وعارف ومتاكد انك لازم تفضلي جنب منها وانا مش هاسيبك توجهي المجهول لوحدك. انا قطعت رحلتي في امريكا ورجعت او من جوثام ذكر اسمك في اوراق التاروت. بس اللي بيحصل دة لازم يكون لي تفسير يقبلة عقلي.
كاميليا
رفعت يا حبيبي انت كل مغامراتك اللي فاتت ما تدخل عقل
فيضحك رفعت ويقول
طيب اعمل اية. انكتب علية اكون ديما في مغامرات ما وراء الطبيعة
وهنا يسمعوا صرخة يارا تاتي من اوضتها فيجروا الاثنين باقصي سرعة ناحية الاوضة ويفتحوا الاوضة ويدخلا علشان يلاقو يارا علي سريرها بتنهج وتقول وهي مفزوعه
مينا رمسيس اتقتل بنفس الطريقة اللي ماتت بيها دكتورة دينا
فيبص رفعت لكاميليا وهو هايتجنن فتقول كاميليا
انا سيباكي نايمة اي حلمت تاني
يارا
اة. وشوفت في الحلم صورة لمينا وهو ببلطو ابيض واسمة في شهادة تكريم متعلقة في مكتبة
رفعت
وماشوفتيش اي حاجة تاني
يارا
من شباك مكتبة لقيت يافطة كبيرة لمطعم اكلة هنية
رفعت
اكلة هنية. ملهوش الا فرع واحد بس في اسكندرية.
كاميليا
يبقي حالا نروح للعنوان دة ونشوف
رفعت
نشوف اية بس هانروح نسال في حد اتقتل هنا ولا لا
يارا
عارفة انك شايفني مجنونة. وبتقول لنفسك امتي تخلص مني علشان تعيش حياتك انت وكاميليا بهدوء
رفعت
ازاي بس يا يارا تقولي كدة انتي زي اختي الصغيرة. بس اللي بيحصل لك دة غريب جدا وشي ملهوش تفسير علمي
يارا
عارفة. بس لازم تصدقني انا مش مجنونة وانا حلمت بالاتنين اللي اتقتلو قبل كدة ودة التالت لازم تصدقني.
كاميليا
رفعت انا مصدقة يارا وانت كمان لازم تصدقها
رفعت
اصدق ازاي ان في واحد اتقتل دلوقتي وفي عز الظهر
كاميليا
ماهي حلمت باسلام وهو بيتقل وبالدكتورة دينا وفعلا كلامها طلع صح
رفعت
طيب ها نفترض انها صح لية الناس دي بتموت ولية هي بتشوفهم وهما بيموتو
كاميليا
نروح الاول لعنوان الدكتور مينا دي وهناك ممكن نلاقي حل للغز اللي احنا عايشنة دة
فيبص لها رفعت ويسكت، ،،،،،،،
ومن قدام مطعم اكلة هنية يقف رفعت ومعه كاميليا ويارا ويبصو للمطعم. ثم يبص لتلت عمارات في وش اليافطة بالظبط ويقول رفعت
قدام اليفطة تلت عمارات تقدري تحددي اني عمارة بالظبط
يارا وهي بتبص للتلت عمارات وتتذكر الحلم بكل ما تقدر من قوة ولكن الذاكرة بتاعتها كانت مشوشة بشكل غريب والصورة عمال تروح وتيجي وتصدع يارا وتتالم وتقول
مش قادرة افتكر مش قادرة
رفعت
طيب خلاص انا هاتصرف
ويروح ناحية اول عمارة ويسال فرد الامن اللي فيها عن شقة دكتور مينا ولكنة يقول
ماحدش في العمارة دي دكتور واسمة مينا
رفعت
طيب شكرا
ويروح لتاني عمارة وتالت عمارة والكل كانت اجابتة واحدة ماحدش هنا بالاسم دة فيرجع لكاميليا ويارا ويقول لهم
ماحدش في التلت عمارات دول اسمة مينا
يارا
انا متاكدة اني شوفت اليافطة بتاعت المطعم من شباك المكتب والخيال بيقتل مينا
فيبص رفعت لتلت عمارات مرة تانية ويركز انظارة علي الدور الثالث والرابع من كل عمارة ويقول
لو انتي صح. مينا هايطلع ساكن في الدور التالت او الرابع لان هما دول الدورين بس اللي تقدري تشوفي منهم اليافطة بتاعت المطعم
كاميليا
خلاص يا رفعت ندور في الدورين دول بتاعت التلت عمارات
ويخشوا اول عمارة. وتاني عمارة وفي تالت عمارة وهما في الدور التالت يلاقو باب شقة مفتوح ونقط دم علي اول الباب فتفزع كاميليا ويارا تبص للباب بثبات غريب وتقول
اول ما هاتخش من باب الشقة هتلاقي النيش المذهب علي يمينك
فيبص رفعت ليارا ويقول
انتي جيتي هنا قبل كدة
يارا وهي بتدخل الشقة
اول مرة. بس دة اللي شوفته في الحلم
ويدخلو الشقة وراء منها وفعلا النيش المذهب موجود فتقول يارا
هايقبلك علي الشمال انترية مذهب قديم
فيبصو علي الشمال يلاقو الانترية فعلا. فتشاور بايديها وهي بتترعش وتقول بصوت مهزوز
دي اوضة المكتب اللي اتقتل فيها مينا
فيروح رفعت ناحية باب الاوضة ويفتحها ويلاقي. فعلا دكتور مينا ميت مقتول بنفس الطريقة الوحشية ومتاكل منه نفس الفصوص فتنصدم كاميليا من المنظر ويارا تفزع ودكتور رفعت يروح ناحية الجثة ويغطيها بالاوراق اللي كانت علي مكتبة ويبص في المكتب بكل تركيز يمكن يوصل لخيط يوصله لحل اللغز. وهنا تري كاميليا صورة لدكتورة دينا ودكتور مينا ودكتور حلمي وهما في سن الشباب وقدام منهم صورة لطفلة عندها خمس سنين فتشوف كاميليا الصورة وتبص ليارا وتقول لها
دي صورتك يا يارا وانتي صغيرة
فتبص يارا للصورة وتقول بصوت خبيث
دي صورتي انا قبل ما اموت
فبص رفعت بسرعة ناحية يارا علشان يشوف يارا وهي بتخبط دماغها من قدام في عمود ديكور كان موجود في المكتب فتروح لها كاميليا وتحاول السيطرة عليها ولكن يارا تبعدها بايديها بمنتهي القوة وهي تقول بصوت خبيث
لازم تموت علشان انا اعيش. واللي بيني وبينها ماحدش يحاول يمنعه
وتصرخ يارا صرخة مخيفة لدرجة ان رفعت بص لها وبدا يقرأ عليها كل أيات اللي حفظها لحرق الجن ولكن يارا لا تتوقف وتظل تخبط راسها في العمود بنفس الشكل المخيف لكن الغريب ان رسها من قدام ما بتجبش دم لا. الدم بينزل من موخرة راسها لدرجة ان لون شعرها اتحول من الاسود للاحمر. فراح لها رفعت وحط ايدة علي دماغها من وراء وكتم الدم بايدة ويارا فضلت تصرخ وتصرخ لغاية ما رجعت لطببعتها فبص رفعت لكاميليا بسرعة وقال
هاتي حاجة اربط بيها دماغها بسرعه
فخرجت كاميليا من الاوضة تدور علي اي حاجة تنفع يتربط بيها دماغ يارا. وفي نفس الوقت يارا بتحاول تبص لرفعت وتقول
رفعت انت ما سكني لية كدة
رفعت
مش وقت اي اسئلة
ورجعت كاميليا وهي معها شاش ولف رفعت الشاش حوالين راس يارا بمنتهي السرعة واتوقف نزيف الدم وكاميليا بصت ليارا وقالت
انتي ازاي خبطي نفسك كل الخبط دة في العمود ودماغك ما جبتش دم
يارا باستغراب
انا خبط نفسي. محصلش
رفعت وهو بيبص لدماغ يارا قال
مش هاتفتكر هي عملت اية.
كاميليا
لية.
فيبص رفعت لكاميليا
علشان مش هي اللي عملت كدة
فاستغربت كاميليا ويارا بتبص لهم مش فاهمه اية اللي حصل، ،،،،،،،،،،
ومن قدام العمارة اللي ساكن فيها رفعت يقف رفعت بعربيتة ويبص لكاميليا اللي كانت قاعدة في الكنبة اللي وراء جنب يارا
خديها واطلعو انتو
يارا
بس انا عايزا ارجع الفيلا
رفعت
لمصلحتك انسي الفيلا دي خالص لغاية ما اوصل لأجاية للي انا شوفته
يارا وهي تمسك الشاش اللي علي دماغها
وهافضل رابطة دي كدة
رفعت
اة. لاني لو اللي بفكر في طلع صح. احنا هانبقي قصاد مصيبة سوداء
كاميليا بقلق
رفعت في اية
رفعت
مش وقت اي كلام اتاكد الاول وبعد كدة احكي لكم. يالا خدي اختك وانزلي بقي.
وتنزل كاميليا ويارا من العربية،،،،،،،،
ومن داخل شقة ماما كاميليا وتدعي زهرة يجلس رفعت قدام منها وبيشرب فنجان قهوة وبيبص لها وساكت فتبص له زهرة وهي قاعدة علي الكرسي بعجل بتاعها وتقول
مش ناوي بقي تقولي جاي لية
رفعت
جاي اطمئن عليكي
زهرة
بلاش تكدب انت خلاص كبرت علي كدة
رفعت ضاحكا
فعلا انا بكذب
زهرة
طيب قول بقي متخانق مع كاميليا لية
رفعت
لا. خالص
زهرة
يا رفعت انت ما بتجيش عمرك لوحدك الا وانت متخانق معها وبتيجي تشهدني عليه. وانا ديما باجي في صفك
رفعت
بس المرة دي. انا جاي علشان يارا
زهرة ياستغراب
مالها يارا
رفعت
بدون مقدمات. يارا مش بنتك صح
انصدمت زهرة والصدمة كانت كفيلة بانها تجيب لها شلل تاني وقالت
انت عرفت ازاي
رفعت
يارا قالت انا لقيطة
زهرة بحزن
ويارا عرفت منين انها لقيطة. دة في ست نازلتها من عربية ورمتها قدام بيتي وهي بنت خمس سنين. يعني من 30.سنة. تقريبا.
رفعت
يعني صح هي لقيطة
زهرة
مين اللي قال ليارا . كاميليا. دة انا محلفها وهي طول عمرها بتعامل يارا علي انها اختها الصغيرة وعمرها ما حسستها انها مش اختها
رفعت
كاميليا ما قالتش حاجة يارا عرفت من حد تاني
زهرة
مين دة
رفعت
لسة ماعرفش بس بدات اجمع خيوط حل اللغز.
زهرة
لغز اية
رفعت
بعدين هاحكي لك. المهم انتي ما حاولتيش تعرفي مين الست اللي نزلتها من العربية ونزلتها لية
زهرة
عرفتها طبعا ما انا خد نمرة العربية وجوزي الله يرحمة جاب لي عنونها من المرور وروحت لها وقعد معها وقالت لي ،،،،،،
ونرجع بالاحداث لسنين كتير فاتت وزهرة قاعدة مع هذة المراة وتدعي فريدة وفريدة تقول
البت دي عشقها جن
زهرة باستغراب
جن اية بس اللي هايعشق عيلة صغيرة
فريدة
انا عارفة بقي بس هي مش طبيعية. من ساعة ما خدها من امها وهي بتعمل حاجات غريبة
زهرة
هي مش بنتك
فريدة
لا. دي بنت المبروكة
زهرة
المبروكة
فريدة
ايوة اصل كنت في البلد من كام سنة انا وجوزي وماكنتش بخلف وكان نفسي في بنت اوي عرفت من داية قريبتي ان في بنت عندها 16 سنه ماحدش يعرف اصلها وفصلها بت عبيطة وهبلة اهل البلد سموها المبروكة لكن رغم انها عبيطة كانت حلوة اوي ورغم ان ماحدش لمسها. علي كلام المبروكة. لكنها حملت وراحت لقريبتي دي علشان تسقطها لكن كان الحمل ثبت وفضلت قريبتي تخدمها وترعيها لوجه الله. لغاية ما خلفت وجابت بت الداية قالت لي تاخديها قولت لها اخدها وسمينها حنان وكتبتها باسمي انا وجوزي وربينها وكبرت وسطينا لغاية ما بقي عندها سنتين لقيناها بتتكلم زينا بالظبط.
زهرة باستغراب شديد
سنتين وبتتكلم زيكم
فريدة
ايوة. مش مصدقاني استني اوريكي شريط عيد ميلادها الثاني.
وتقوم فريدة ناحية مكتبة للفيديو وتبحث وسط شرايط الفيديو الموجودة في المكتبة وهي تقول
اصل انا كنت متوعدة ديما اصورها فيديو في عيد ميلادها
ووصلت فريدة للشريط وحطيتة وظهرت يارا وهي بنت سنتين ووسط العائلة وبتقول معاهم اغنية عيد ميلادها زي ما هما بيقولو بالظبط والكل كان مستغرب لكنهم فرحانين انها بتتكلم.
وشالت فريدة الشريط دة وحطيت شريط تاني وهي بتقول
لكني حملت ببركة ربنا وقولت مش هاسيب حنان ابدا وش الخير علية ودة كان في عيد ميلادها الثالث لكن اللي حصل واحنا بنطفي الشمع خلينا نشك في حنان وفي انها مش طبيعية
زهرة
حصل اية
فريدة
الشريط هايشتغل وتشوفي بنفسك
واشتغل الشريط وكانت يارا قاعدة لوحديها رغم انه عيد ميلادها وبتتكلم مع حد مش موجود وبتقول
ساري مش هاعمل اللي انت بتقول علية.
وسكتت شوية وقالت
مش هاقتل ومش هاديك اللي انت عايزة. هي فرحانة بي ونفسها تشوفه لي عايز تحرمه منها
فريدة ليارا اللي كان اسمها حنان ساعتها
حنان انتي بتكلمي منين يا حبيبة ماما
فبصت لها يارا وقالت
مش بكلم حد ماما
فريدة
لية بتكدبي مش قولنا اللي بيكذب بيروح فين
يارا
مش بكدب انا بكلم ساري. بس انتي مش مصدقاني انه موجود وبيكلمني ديما
فريدة
مافيش حد معاكي. يالا قومي نطفي الشمع. وبطلي تقعدي لوحدك
وبصت فريدة لزهرة وقالت
وجيبنا شيخ واتنين وتلاتة. وميلقوش عليها حاجة لغاية ما
خلفت وبدات هي تلاعب بنتي شيماء وحبتها اوي وبطلت تكلم نفسيها وبقي عندها خمس سنين وفي ليلة دخلت عليها اوضة شيماء لقيتها بتحط عليها بنزين وعايزا تولع فيها. قولت لا بقي لغاية هنا وما ينفعش تعيش في البيت دة تاني
زهرة
غريبة البنت دي بقالها عندي في البيت اسبوع تقريبا وطيبة جدا وحنية الدنيا كلها فيها
فريدة
نصيحة ارميها في الشارع قبل ما تخلص علي اللي بتحبيهم. البنت دي ملعونه بلعنه مش مفهومه
زهرة
بس انا حبيتها وهاربيها لاني حرام ارميها في الشارع، ،،،،،،،،
ونرجع تاني لزهرة وهي مع رفعت وبتقول
وطول ما هي عايشة معايا ما شوفتش منها اي حاجة غريبة غير انها اشتكت من دماغها في عيد ميلادها السادس
رفعت
دماغها من وراء
زهرة باستغراب شديد
انت عرفت ازاي
رفعت بتركيز
مش مهم. وعملتي معها اية لما اشتكت من دماغها
زهرة
عرضتها علي الدكتورة دينا بركات اخصائية مخ واعصاب
فيبرق رفعت ويقول باهتمام
وقالت عندها اية
زهرة
كلام كتير من بتاعكم واللي فهمته انه مرض نادر و ورم خبيث. ومضيت علي تعهد بانها لازم يتعمل لها عملية بتتعمل لاول مرة وممكن يارا تموت فيها بس لو طلعت من العملية سليمة هاتعيش بقيت حياتها طبيعية جدا فطبعا وافقت علي العملية ما انا عايزا الراحة لبنتي
رفعت
وعملت يارا العملية.
زهرة
عملتها وبقيت طبيعية جدا. انما انت عمال تسال هو في اية
رفعت
في ان الورم الخبيث لسة عايش جوة دماغ يارا.
وهنا يرن موبيل فيخرج الموبيل بتاعه ويلاقي رقم كاميليا فيرد مسرعا
ايوة يا كاميليا
كاميليا وهي تستغيز
يارا يا رفعت يارا
رفعت بقلق
مالها
ولكن كاميليا تسكت ورفعت يقول
الو الو الو.،،،،،،،،،،،،،
يارب تكون الحلقة عجبتكم. مستني رايكم.
👍🏻👍🏻👍🏻👍🏻👍🏻👍🏻👍🏻👍🏻
ردحذفجميله جدااا
ردحذفتم
ردحذفتم
ردحذفتم
ردحذف