الهام واللي كان الحلقة الاخيرة

                     ★ توبه ★

   قصة كامله 

اني اسمي توبه عندي 20 سنه. من سيدي عبد الرحمن. بلد جنب مرسي مطروح وانا بحكي لكم حكايتي ايام العدوان الثلاثي علي مصر. دي الفترة اللي انا عيشت فيها وكنت عايشة مع امي اللي اتجوزت بعد ابويا المعلم جريشة ما مات واتجوزت راجل مفتري بصراحة لاحبيتة ولا حبيت اعيش معه وسيبت البيت ومشيت وروحت عيشت مع اخويا. عاشور ومراته نحمده. بس كان مكتوب لي برضو الشقي والحزن والمرة دي من مرات اخويا اللي كانت زيها زي جوز امي لكن نار مرات اخويا اهون بكتير من جنة جوز امي. المهم وانا عند اخويا شوفته وهو خارج من بيته وش الفجر وعرفت انه اسمه رزق. وعرفت انه شغال غطاس بس مش اي غطاس دة غطاس سفنج قد الدنيا. اية دة مش عارفين يعني اية غطاس سفنج طيب تعالو اعرفكم يعني اية غطاس سفنج. علي ايامنا كدة كان السفنج بيطلع من قاع البحر واللي كان بيجيبة مش مكن ومعدات زي دلوقتي لا غطاسين ينزلوهم بحبل ومعهم العدة اللي بيطلعو فيها السفنج وكان بينزل مع الغطاس من دول خرطوم هواء يحمي ويحافظ علية ويخلي يعرف ياخد الاكسجين اللي محتاجة جسمة. المهم ارجع اكملكم حكايتي مع رزق. رزق دة كان وحيد امه الست حلويات ما تضحكوش علي اسامي الناس الطيبين بتوع زمان وكان رزق شغال علي مركب ايطالي ويروح يغطس في قاع البحر رحلة تفضل تلت شهور بعيد عن امه بصراحة حبيت اقرب من الست حلويات وقضي معظم اليوم معه واهو ارتاح شوية من خلقة نحمده مرات اخويا واهو كمان مضحكش عليكم اشم ريحة رزق اللي في البيت كلها وسمعت من امه حلويات كلام وشعر في خليتني احبه اكتر ما انا حبا. وديما تقولي قد هو حنين واللي في ايدة مش ملكه كدة يعني ورغي ستات كتير بلاش اصدعكم بي وجه اليوم اللي كان راجع في رزق من السفر فرحت اوي ولبست احلي فستان عندي وحطيت ريحة من الغالية اللي كانت وقتها بقرشين ساغ. بطلو بقي تضحكو علية انا عارفة ان في منكم كتير ما يسمعش عن الساغ والتعريفة والكلام دة. بس دي ايامنا احنا بقي وكانت احلي ايام. المهم جه رزق وشوفته انا من شباكي وهو داخل البيت بتاعه نزلت وراء منه جري ودخلت البيت وقال يعني ما عرفش انه هو جوة وبصيت لخالتي حلويات بطرف عيني وطرف العين التاني علي رزق وقولت

الله هو في حد عندك يا خاله حلويات. طيب انا هامشي بقي 

حلويات 

خشي يا توبه. دة رزق ابني

بصي لي رزق ورجع بص لامه وقال

مين دي يا امه

حلويات

دي توبه بنت المعلم جريشة واخت عاشور صاحب دكان النحاس

وقالي رزق

يا اهلا ببنت الغالي. دة انتي ابوكي كان رجاله مجدع واخوكي ما يتخريش عنه

بصيت له دة غير انه شاب اسمر وجميل طلع كمان طلع صوته حلو وبيرن في القلب وفضل بقي يتكلم وانا اسمع وارد كلام كدة علي القد وعديت ساعه وان جيتة للحق اتكسفت اوي من نفسي في اية هو انا ماعنديش دم لية كدة دة واحد جاي من السفر ومن حقه يرتاح استاذنت ومشيت وفضل صوته في وداني واقعد افكر كتير ازاي ممكن اشوفه تاني لكن اخويا لو عرف اني بروح عن خالتي حلويات وابنها موجود مش بعيد يكسر رقبتي وبقي كفاية علية ابص علية من الشباك وقت كله اذان وهو رايح يصلي. وعدي سنة علي الحال دة كل اجازة اشوفه بس مرة وبقيت الاجازة ببص علية من وراء شيش شباكي لكن في مرة وانا واقفة وراء الشيش لقيته بص ناحية شباكي اتخضيت وخوفت ليكون شافني هايقول علية اية اكيد بنت مش متربية وانا مش كدة وفضل قلبي يدق من الخضة. دة عمره ما عملها اشمعني المرة دي بص ناحية شباكي ولقيت بعد ماهو خرج خالتي حلويات بتلبس الايشارب بتاعها وراحت ناحية بيتنا وخبطت علي الباب وفتحت له مرات اخويا نحمده واستقبلتها في المندرة بتاعت البيت وفضلو يتكلمو ويتكلمو وانا بحاول اسمع اي حاجة لكني مش سامعه لغاية ماصوت خالتي حلويات علي وقالت

انا غلطانة اني جيت واتكلمت معاكي

نحمده

حلويات صوتك ميعلاش في بيتي. واحسن لك تخرجي بالذوق بدل ما فرج عليكي خلق الله 

حلويات

بقي ليكي بيت بتطرديني منه. الله يرحم لما كنتي بتيجي وتتحيالي علية اكلمك عاشور علشان بس يبص لك

نحمده

ايام بقي وراحت لحالها وبقيت مرات المعلم عاشور كبير معلمين النحاس في سيدي عبد الرحمن ومش هاخلي علي اخر الزمن يحط ايدة في ايد غطاس زي ابنك ويدي له اخته

حلويات

وهو ماله رزق هو رزق يتعيب دي سيد البلد كلها باخلاقة

نحمده ضاحكا

يا حلويات انتي هاتعمليهم علية دة انتي بتكملو عشائكم نوم. بت زي توبه يوم ما تتجوز تتجوز من واحد عليه العين مش رزق غطاس السفنج

حلويات

بقي كدة طيب يا نحمده. مردودالك في عيالك. ولا يوه نسيت انتي ارض بور مالكيش في الخلفة

نحمده بعصبية

بقول لك اية يا ولية انتي خدي بعضك واخرجي بكرامتك بدل ما بهدلك

حلويات باستهزاء

لا وعلي اية. الطيب احسن. صحيح قولها زمان خاف من اللي يشبع بعد جوع

بيني وبينكم اضايقت اوي هي لية اصلا نحمده يبقي ليها حكم عليه في موضوع زي دة ونزلت لها وانا علي اخري وقولت لها

ممكن اعرف انتي مين عينك محامي ليا علشان تقولي اة ولا. لا في موضوع يخص جوازي

بصيت لي من فوق لتحت وقالت

الله. دي انتي بقي كنتي بتروحي عندها علشان رزق. بقي انتي يا عيلة يا مفعوصة تعرفي تتكلمي في جواز ولا عال دة لما يجي اخوكي يشوف له صرفة معاكي. عيشنا وشوفنا البت تقول اة ولا. لا في جوازها 

قولتها

نحمده. انتي من هنا ورايح مالكيش دعوي باي حاجة تخصني والا هافرج عليكي بحري كله

قربت مني والشر كان في عينيها ومسكتني من شعري وقالت

انتي يا بنت امباراح تفرجي علية بحري. دة انتي عايزا تتربي من جديد علشان تعرفي مين هي نحمده

وفضلت نحمده تضرب فيا وانا عماله اصرخ واصرخ وباستنجد باي حد يمكن يلحقني من ايديها لكن المفترية ضربتني لغاية ما فتحت لي حاجبي وهنا جه اخويا بعد ما عرف من ابن جارتنا اني بصرخ وبص لينا عاشور احنا الاثنين وقال

والله عال نسوان بيتي صوتهم يطلع برة. اية البيت دة ما فيهوش راجل

نحمده بكهن

اختك قليلة الرباية كانت بتروح عند حلويات وتشاغل ابنها رزق

قولتها وانا بعيط

والله ما حصل دي كدابة.

نحمده

انا برضو اللي كذابة. اقول له حلويات كانت هنا النهاردة عايزا اية

قولت لها

ما تقولي هو اية اللي حصل يخوفني

نحمده لعاشور 

حلويات جت لينا النهاردة بتطلب ايد توبه. لرزق. توبه بنت المعلم جريشة والمعلم عاشور تتجوز غطاس سفنج يدوبك اللي بيجيبو ياكله هو وامه عاش حاف. وطبعا اللي جري حلويات وابنها علينا. هي اختك. اللي كل يوم والتاني كانت عندهم

بص لي عاشور وقال

الكلام دة صحيح

قولت له

انا كنت بروح لخالتي نحمده علشان بحب اقعد معها مش اكتر. لكني والله ما اعرف انها هاتطلب ايدي لرزق

عاشور وهو بيقرب مني وشايفة في عيونه الشر.

يعني نحمده معها حق مرواحك عندهم كتير خلاهم يصدقو انهم شبهنا وممكن نحط ايدينا في ايديهم. بنت المعلم جريشة تبقي مرات غطاس سفنج

وضربني بالقلم قلم خلاني دوخت ووقعت علي الارض وانا بصرخ وبقول

هو انت كمان هاتضربني دة انا هربانه من عندك امك علشان ضرب جوز امك ليا. وجيت لك وعيشت عندكم زي الخدامه واخرتها تضربني هو انا عملت اية لدة كله. وفيها اية لما اتجوز رزق

مسكني من شعري وبص لي بشر

يعني انتي موافقة 

نحمده

مش بقولك الموضوع شكله في ريحة مش كويسة. وياما قولت. لك بلاش تخليها تفضل رايحة جاية كدة عند حلويات. لان الحكاية فيها رزق مش حلويات 

في هذة اللحظة يسمعوا صوت خبط علي باب البيت فيروح عاشور ويفتح الباب علشان يلاقي رزق قدام منه فيقول باستهزاء 

اهلا بالراجل الجدع

فيبص رزق لتوبه اللي واقعه علي الارض ولسة بتجيب دم من حاجبها ويقول لعاشور

انا واقف برة وسمعت اسم امي واسمي اتكرر كتير ومش مهم انت ومراتك بتقولو اية عليه. انما اللي يهمني امي سيرتها ما تجيش علي سيرة اي انسان مهما كان هو مين. وان اختك تتأذي بسببي. اختك ماتعرفش اني هاتقدم لها وماكنتش بتيجي عندنا علشان تشغلني. وعيب لما تسيب واحدة حتي لو كانت مراتك تعيب في شرف اختك واختك اصلا لو كدة فهي ما تنفعش تكون مرات رزق. يعني اللي المفروض تتضرب هي اللي بتشنع علي اختك مش اختك يا معلم ياللي رجاله بشنبات بتقف بس لما تشوف بتقرب منهم. 

ساعتها حسيت ان الكلام وجع عاشور. وبص بارتباك وبص لنحمده ومابقاش عارف يقول اية ورزق قال

المجدعه والمرجله مش بمعايا كام ولا انا شغال اية ولا ابن مين. من انت ابن المعلم جريشة اللي جه بحري واشتغل صبي دكان النحاس وكبر واتعلم وبقي اكبر من المعلم اللي علمه. دة كدة يعيب المعلم جريشة.  

عاشور

انت عايز اية يا رزق

رزق

انا جاي اطلب ايد اختك علي سنه الله ورسوله

نحمده

ماعندناش بنات للجواز 

رزق

اية يا معلم عاشور من امتي النسوان بترد علي كلام الرجاله

فيبص عاشور لنحمده ويقول

خدي توبه وانجري خشي جوه

نحمده

انجر

عاشور بعصبية شديدة

ايوة تنجري وكلمه تاني وعهد الله اطلقك فيها

دخلت نحمده جوه وانا من بعدها دخلت وانا ببص بطرف عيني للراجل اللي بجد اللي عرفت اختاره. ووقفت وراء باب اوضي وسمعت اخويا بيقول

طلبك مش عندي يا رزق

رزق

لية بس يا معلم عاشور اية اللي يعيبني

عاشور

انت بتغيب في عرض البحر بالتلت شهور ويمكن ستة واسمع ان في غطاسين كتير زيك واشطر منك عينهم راحت بسبب الغطس في عمق خطر عليكم وكمان في اللي نزلو البحر ماطلعوش

رزق

ابطل غطس. اكراما لعيون توبه

عاشور

وهاتشتغل اية

رزق

اشتري فلوكة صغيرة اطلع اصطاد عليها وانا رزقي

عاشور

اجوز اختي لصياد

رزق

ومالهم الصيادين مش بني ادميين

عاشور

رزق خلص حالك مع البحر وبعد كدة نتكلم

رزق

يعني اصفي حسابي مع الشركة الطيلاني واجي لك

عاشور

صفي بس انت حسابك وبعديها يعدلها ربنا.

رزق

لا. اسمعها منك توبه ليا

عاشور

خلص بس وتوبه ليك 

وخرج رزق من عندنا وانا فرحانه وحاسه اني خلاص الدنيا ضحكت لي. لكن اللي حصل بعد اربع شهور كان كلام تاني فرح وزيطة وعروسة بتتجهز والعروسة دي انا لكن العريس مش رزق. اخويا اتقدم له معلم كبير في حلقة السمك اسمه شردي. وهو راجل متجوز تلت مرات قبل كدة وداخل علي الستين و انا بنت 18. يعني فرق اربعين سنة تقريبا يعني من سن جدي طيب ازاي دي تبقي جوازة ماحسيتش بنفسي غير وانا بهرب وروحت لخالتي حلويات اسالها علي رزق قالت مسافر ودي كانت اخر رحلة لي. لاني اللي عرفته بعد كدة ان الشركة الايطالي اللي هو شغال فيها رفضت انه يسيب الشغل كدة مرة واحدة وحكمت علية علشان ياخد بقيت فلوسه لازم يطلع الرحلة دي. فخالتي خدتني وخبتني في بلد جنب مننا اسمها راس الحكمة عند اختها وانقلبت سيدي عبد الرحمن علية واخويا عاشور حلف براس ابوه انه هايقتلني ويشرب من دمي بسبب الفضيحة اللي كنت السبب فيها ورجع رزق من الرحلة واتجوزني علشان يقدر يحميني من عاشور وقال لي وقال لامه

انا هارجع سيدي عيد الرحمن. لاني مش جبان علشان اهرب

حلويات

وعاشور اللي ممكن يقتلك ويقتل توبه بسبب اللي حصل

رزق

ما يقدرش يقرب لها دي مراتي علي سنة الله ورسوله. وقبل ما يلمسها هاكون واخد روحه

وفعلا رجعنا سيدي عبد الرحمن وكل اهل البلد بيبصو لي وانا ايدي في ايد رزق ومستخبية في وراح لغاية بيت عاشور وبص له وقاله

اختك مراتي وانا حبيت اعرفك علشان رزق مش جبان علشان يستخبي منك او من غيرك

لسة عاشور هايهجم علية مسك رزق ايدة وبعدها عني وقال له

لا. كان زمان اللي انت عايز تعمله دة لكن دلوقتي لا. دي في عصمه راجل. راجل ما بيرحعش في كلامه زيك يا معلم 

عاشور

انا برجع في كلامي

رزق

ايوة. لما اخرج من بيتك اخر مرة وانت مديني كلمة شرف ان توبه ليا وارجع القيكي كنت هاتديها لغيري يبقي انا كنت ساعتها بتكلم مع 

عاشور بعصبية

خلصنا يا رزق وبلاش الغلط. واختي اهه معالك وطالما اخترتك وعاديت اهلها يبقي في ستين داهية

قولت له وانا بعيط

انا ماليش غيرك يا اخويا ومش عايزا انقطع من بعدك

عاشور

خلصنا البيت دة انتي مالكيش في حاجة من هنا ورايح واخوكي عاشور مات

ومشيت انا ورزق وانا مضايقة بصراحة اخويا عاشور طول عمره حنين عليه لولا العقربة مراته اللي كانت ديما بتسخنه علية وخلصنا من مشكلة اخويا طلع لنا المعلم شردي اللي ازاي انا اسيبه واهرب ليلة كتب كتابه عليه وطلع شيطان ما يعرفش ربنا خلي الانجليز يولعوا في الفلوكة الصغيرة اللي اشترها رزق وكان بيصطاد عليها واهو كنا عايشين من خيرها ومش بس كدة قفل المعلم شردي كل ابواب عبد الرحمن في وش رزق واهو المعلمين بيجاملو بعض والغلابة يروحو بلاش عديت علينا ايام بناكل العيش الحاف وساعات ما بنلقيش العيش الحاف واهو اشتغل رزق شيال في مينا الاسكندرية وفضلنا عايشين علي كدة 3 شهور لغاية ما حملت وفرحت اوي وفرحت رزق لكن فرحة رزق كان نقصها انه يشتري المركب الايطالي اللي ييطلعو بيها السفنج واللي الشركة الايطالي عرضها للبيع ب 5000 ج. ماهنش علية اشوف رزق مضايق وشايل الهم خد بعضي من وراء وروحت لاخويا عاشور واول ما دخلت البيت قبلتني نحمده وقالت

هو مش اخوكي قال لك مالكيش مكان في البيت دة

قولت لها

انا مش جايلك انتي انا جايا لاخويا

وهنا لقيت عاشور خارج من اوضة وكان باين في عينية اني وحشتة فقولت له

وحشتني يا عاشور

عاشور

جاية عايزا اية يا توبه

توبه

جايا افرحك انا حامل يا عاشور. وناوية والنية لله لو ولد هاسمي عاشور

فدمعت عيون عاشور وقال

حامل.  

اضيقت نحمده وقالت

اة. انتي جاية بقي تفرحي ولا تشمتي فيا

ماردتش عليها لاني عارفة قد اية انها كونها ما بتحملش دي حاجة وجعها ومخليها تحس ديما بالنقص وقال عاشور

مبروك. برضو ما قولتيش جاية وعايزا اية

قولت له

محتاجة 5000. ج.

نحمده

دة رزق بقي سلطك علي اخوكي وقال لك روحي هاتي نصييك منه بان علي اصله. 

وتبص نحمده لعاشور وتقول

مش قولت لك انا مش هايعدي كام شهر ويبعدها لك

عاشور لتوبه 

كنتي قولي لرزق يستني سنة من بعد جوازكم علشان ما يبقاش مفضوح اوي كدة

قولت له

ورب الكعبة رزق ما يعرف اني جايلك. ولو عرف ماكنش هايرضي اني اجي لك. بس المعلم شردي بيحاربه في اكل عيشة والشركة الايطالي عامله مزاد وهاتبيع هناك مركب ولو رزق اشتغل علي مركبه هايبقي حالنا احسن من كدة وابني ما يجيش للدنيا يلاقي ابوه مش قادر ياكله. وهما سلف وهارجعهملك اول ما اركب تشتغل

عاشور

عايزاني اساعد رزق بعد ما كان السبب في فضحتي.  

قولت له

رزق ما كنش يعرف اني هاهرب من الفرح رزق كان ليلتها في عرض البحر انا اللي هربت من نفسي ما هو برضو ما يرضيش ربنا اتجوز راجل من سن جدي. انا قبل ما اكون اختك انا اتولد علي ايدك يعني بنتك

وبدأ قلب عاشور يلين لكن نحمده قالت

ايوة يا بت ايوة اعمليهم علينا وهو اخوكي عبيط بقي ويصدق ان حبيب القلب ما عصكيش عليه.

عاشور

توبه ما لكيش فلوس عندي لا سلف ولا حقك من ورث ابوكي

ضحكت نحمده وبصيت لي بشماته وبصيت انا لعاشور وقولت

كدة يا اخويا. كتر الف خيرك

وخرجت من عنده وانا مش مصدقة اني هونت علية لكن عدي اسبوع بالظبط وجه وقت المزاد واللي المعلم شردي دخل في علشان يكيد رزق وخلاص لكن الغريية ان في حد اسمه المعلم شباطة وقف قدام شردي في المزاد ورسي المزاد علية. وجه المعلم شباطة دة لغاية عندنا البيت وكتب المركب بيع وشراء باسم رزق. استغرب رزق اوي وقال له المعلم شباطة

عاشور بيقول. دة حق اخته في ورث ابوها وماينفعش يكون جوز اخته في ضيقة وما يقفش جنبه. وخلي اخته تخلي بالها من عاشور اللي في بطنها وتقول له خالك جدع ماهنتش عليه اخته

ساعتها فرحت اوي لما سمعت الكلمتين دول. واشتغلت المركب لمدة سنة كاملة وشرفنا عاشور الصغير وفضلنا عايشين في خير الله وفضله ونعمته لغاية ماجه يوم وانقطع حبل الاكسجين اللي متوصل برزق واتمنع الاكسجين عن رزق والرجاله اللي علي المركب لحقو رزق علي الاخر لكن العمق اللي كان علية وحرمان جسمه من الاكسجين سبب لرزق عمي. ما بقاش يشوف وكان لازم يعمل عملية في خلال سنة علشان يرجع يشوف تاني في اللحظة دي روحت لعاشور اخويا استلف منه حق العملية لقيت نحمده خدتت منه اللي وراء واللي قدامه حتي المحل بقي بتاعها مش بتاعه خد اخويا ورجعت بي بيتي وفضلت اراعي في وارعي جوزي لحد ماقررت اني افضل علي المركب وسط الغطاسين لا. وكمان اتعلمت الغطس وازاي اطلع بالسفنج وكنت في الوقت دة اول غطاسة تنزل تصطاد سفنج. من قاع البحر بس كان لازم اقف جنب رزق واوفر له حق العملية في اسرع وقت في نفس الوقت رجع لليلد غطاس كان عايش ديما في اوروبا واتعلم الغطس علي اصوله ورجع معه انابيب الاكسجين اللي بتتعلق علي ظهر الغطاس حاجات اول مرة نشوفها والغطاس دة كان اسمه سامي. وسامي دة يبقي ابن المعلم شردي وكانت في الاول عايز يساعدني بس علشان خاطر اني ست حلوة وممكن يعرف ياخد مني اللي هو عايزة لكنة لما عرفني علي حق وشاف رزق وعرف قد اية انا بحبه احترمني جدا وبدا يساعدني لوجه الله. وبصراحة بالمعدات اللي كانت معه كنا بنطلع سنفج اسرع واكتر وفي وقت اقل وعرف المعلم شردي باللي حصل لرزق واني انا قدرت اجمه تقريبا تلت اربع حق العملية. واني مش طالعة اخر رحلة دي لاني هاكون مع رزق عند الدكتور قرر انه يغرق المركب بكل اللي فيها وعمل لنا تلف في مقدمة المركب وماكنش يعرف ان ابنه معانا. والموجة عليت واحنا في وسط البحر ومقدروش الرجاله يسيطروا علي المركب وهنا نزل سامي في المية وبدأ يعالج التلف اللي سببه المعلم شردي في المركب. لكن الموج بلعه وماطلعش تاني وعرف شردي باللي حصل لابنه وبسببه اتجنن وضحي سامي. بنفسه وكان السبب في انه يلحق المركب وترجع سليمة. وزعلينا كلنا علية جدا كان غير ابوة خالص. كان راجل بجد. لكن عمره خلص. وروحنا القاهرة وعملنا العملية لرزق ورجع يشوف تاني وفرحت اوي ورجعنا بلدنا ورجعت انا تاني ست البيت وهو ركب المركب وبدأ يحدثها بمعدات جديدة ومشيت الدنيا وانا لسة عايشة لدلوقتي ومعايا رزق وحبيت احكي لكم حكايتي يمكن تعجبكم. وتتعلمو منها ان الست لازم تكون في ظهر الراجل بتاعها طالما هو راجل ويستاهل انها تكون في ظهره.

خلصت حكاية توبه. اللي في الاصل مسلسل اذاعي باسم ابواب البحر