القناوي والموال المر
★الحلقة الثامنة★
من تاليفي، ،
محمد منصور. ** منص **
وقبل ما نبدأ الحلقة نوحد الله ونصلي علي خير خلق الله سيدنا محمد. وعلي بركة الله نبدأ
بسم الله توكلت علي الله. وهو رب العرش العظيم،،،
ومن قدام بيت خميس يقف البوكس ويخرج ياسين من بيت خميس والكلابشات في يدة وهو لايزال في حالة ذهول مما حصل وازاي فاطمة تعمل كدة وهو مش مصدق نفسه وهنا يحضر بدوي ويقف قدام اخوة ويقول
لية يا خوي قتلتها
فيبص له ياسين ولا يرد مش مصدق اللي حصل وبيفكر ازاي في حياته ناس بالشر دة. ويركب البوكس وينطلق بي البوكس وبدوي يقول باعلي صوت عنده
هاجيب استاذ تحسين واحصلك علي القسم
ويخرج بدوي الموبيل بتاعه ويتصل بصديق فيلاقي الموبيل بتاعه مقفول فيقول بزهق
وبعدهالك يا صديق. ما حبكش دلوقتي موبيلك يتقفل
ويرن علي تحسين فيرد علية تحسين ويقول
استاذ تحسين حصلني بالله عليك علي قسم قنا
تحسين
من غير ما تقول انا عرفت باللي حصل ورايح علي القسم ،،
ومن داخل شقة ياسين تجلس ملك علي الركنة الموجودة في الصاله وتتصل بياسين علي موبيلة اكتر من مرة وكان الموبيل يرن وماحدش بيرد فترمي الموبيل علي الركنة من الضيق وتقول
كدة برضو يا ياسين تسيبني قلقانة عليك. مافيش غير اني اتصل بحسين يمكن يرد علية هو ويعرف يهدي ويمنعه من اللي ناوي يعمله في حربية
وتتصل ملك بحسين ويرد عليها حسين قائلا
الو. ازيك يا ملك عاملة اية مع ياسين
ملك بلهفة
الحقني يا حسين.
حسين
اية يا ملك في اية.
ملك
حربية قتلت الحصان بتاع ياسين وياسين خد سلاحه وحالف ليقتلها وانا بتصل بي بقاله ساعه وهو مش عايز يرد علية.
حسين بخضة
ياسين اتجنن خلاص. هي حصلت يقتل
ملك
مش عارفة يا حسين اقول لك اية. اللي زي حربية دي تستاهل الحرق. بس برضو مش قادرة اسامح ياسين اللي مافكرش فيا وجري وراء انتقامه للحصان بتاعه ونسي انه ممكن مستقبله كله يضيع وانا اضيع من بعد منه لدرجة اني حسيت اني انا ماليش خاطر عند ياسين وعادي لو، ،،،،،
فيقاطعها حسين ويقول
ما تقوليش ولا كلمة زيادة انتي ماتعرفيش انتي غالية ازاي عند ياسين. بس هو صاحبي كدة. طيب جدا جدا. لكن وقت ما حد بيجي علية بيتحول وبيبقي مش شايف قدامه من شدة عصبيتة. واقفلي يا ملك انتي دلوقتي وانا هاتصل بي. وماتزعليش منه. ولازم تتاكدي ياسين ما بيحبش حد في الدنيا قدك وانتي عارفة ومتاكدة
ملك
ماشي يا حسين. اتصل بي ولو رد عليك طمئني
حسين
حاضر
وينهي حسين المكالمة ويتصل علي موبيل ياسين فتقول له شيماء
هو في اية
حسين وهو حاطط الموبيل علي ودانه
فاكرة حربية اللي كان بيحكي لنا عنها ياسين
شيماء
طبعا فاكرها. ودي تتنسي
حسين
قتلت حصان ياسين وياسين خد السلاح وحالف ليقتلها
شيماء بتاثر شديد
لا حول ولاقوة الا بالله. وعملها اية الحصان
حسين
اهو افتري
وينزل حسين الموبيل من علي ودانه ويتصل كمان مرة بياسين وهو يقول
رد يا ياسين، ،،،،،،،،،
ومن داخل مستشفي قنا واثناء ما كانت حربية تجلس مع خميس. ومراتة وعديلة مستنيا اجراءات خروج جثة ابنها من المستشفي تتم تلاقي جارتهم ام شادي تدخل عليهم المستشفي وتقول لهم
الحقي يا حربية الحق يا خميس
حربية بخضة
خير يا ام شادي
ام شادي
ياسين قتل فاطمة
فيقفوا جميعا من هول الخبر وتقول حربية
بتقولي اية يا مراة يا خرفانه انتي
ام شادي
مش تخريف والله ياسين لقي باب بيتكم مفتوح دخل علي فاطمة اختكم وقتلها
حربية
راح لحد بيتنا وخد بتار رعد من فاطمة عايز يحرق قلبي اكتر ما هو محروق علي ابني. وطبعا قتلها وهرب الجبان
ام شادي
لا. فضل قاعد في الدار مستني الحكومة وجت خديتة
حربية بجنون
كنه فاكر ان الحكومة هاتحمي مني. ان كان هو في أيد الحكومة فمراتة برة واني هاحزنة عليها
وتستعد حربية للانصراف فيقف خميس قدام منها
واخرة الدم اية يا حربية
حربية
ان شاء لله مايبقاش لي اخر. واوعي من وشي
وتبعد حربية خميس من وشها وتستعد للخروج من المستشفي ولكن خميس يمسكها من ذراعها وبحدة ويقول
مش هاتروحي في حتة وتار فاطمة هتاخدة الحكومة
حربية باستغراب
بتقول اية انت
خميس
بقول اللي سمعتي. فاطمة وابنك عامر ماتو بذنب الحصان اللي انتي قتلتي بجبروتك
حربية
كنت عايزني اعمل اية بعد ماجه ارضي واستفزني
خميس
الارض دي انتي وجمال اشتريتوها بفلوس ارض ياسين يعني هي من حق ياسين مش من حقك
حربية
انت مالك نخيت لية ما انت كنت كيف الجبل واقف في ظهري
خميس
هو انتي. اية ممكن يهدك اكتر من الموت. ربنا انتقم منك في ابنك واختك وانتي لساكي عايزة دم تاني عايزة المرة الجاية انتقام ربنا يكون في مين فينا. انا ولا اختك عديلة ولا انتي. اللي بيحصل دة ذنب رعد. اللي مات ظلم وعدوان منك
حربية
وبقيت انا العفشة في اخر الحكاية
خميس بحدة
اومال مين. مين اللي سعي للخراب من الاول مين اللي قتل حيوان ضعيف كل ذنبة ان صاحبة اسمه ياسين. ومين اللي قوي فاطمة وساقها سم الغل والكره لياسين مع انها بتعشقة مش انتي. ومين اللي دور علي المرار الطافح لياسين مش انتي. ولا دلوقتي انتي الملاك وهو الشيطان.
حربية
كنك عايز تسكت وتسيب تار فاطمة عند ياسين
خميس
انا ماليش تار عند ياسين والحكومة هاتجيب حقي منه لو هو ظالم انما لو مظلوم ربنا هاينصرة. وانتي لو قربتي من ياسين ومراتة هاقتلك
حربية
ياااااا. للدرجة دي خوفت من ياسين لما عرفت انه راح البيت بسلاح. كني الطرحة هاتبقي عليك احلي من العمه
فيضربها خميس بالقلم وبمنتهي القوة ويقول
انا لو خوفت خوفت من عذاب ربنا خوفت من انتقامة اللي بيتبع الظالم واللي يساعدة في ظلمة يبقي ظالم زية وانا مش عايز ابقي ظالم كفاية بقي الفترة اللي عيشتها ماشي وراء منك وانتي مغميا عينية ولا كاني كلبك المطيع
فتبص له حربية بجبروت رهيب ،،،،،،،،،،
ومن داخل القسم يجلس تحسين مع بدوي وقدام منهم يجلس ياسين اللي في حالة ذهول شديد وبيقول
تخيلة بني ادمة تقتل نفسها علشان بس تودي انسان في داهية أية الغل دة. كنت عملتها اية لدة كلة لاني اول واحد يخطب ويسيب خطيبتة علشان الدنيا تقوم وما تقعدش بالشكل دة. اية اللي حصل في الدنيا
بدوي
اهدئة يا خوي فاطمة عاشت واتربت في حضن الحرباية حربية وهي اللي شربتها الغل دة كله
تحسين
ياسين انت لازم يمسك قضيتك محامي تمام. علشان قضيتك مش سهلة
ياسين
والمحامي بس هايعمل اية دي القضية لبساني لبساني
تحسين
مش عايزك تقلق محامين الجنائي هما ليهم سكك وثغرات تطلع اي برئ من تهمتة. بس سيبني بس ادور علي احسن محامي جنائيات في القاهرة
بدوي
ولية بس ما نجبش واحد من قنا
تحسين
انا عارف كل اللي في قنا ومافيش حد منهم يقدر يمسك قضية كبيرة زي دي
بدوي
طيب مين يقدر
تحسين
من النهاردة لبكرة هاكون وصلت لمحامي يقدر يثبت براءة ياسين مع ان اللي بيحكي ياسين صعب حد يثبتة او يصدقة
بدوي
ما تسودهاش
تحسين
ربنا ما يجيب سواد. وانا متاكد ان ياسين ابن حلال ومستحبل ربنا هايسيبة وقادر سبحانة وتعالي يظهر برائتة
ياسين
يارب.
ثم يبص ياسين لبدوي
وانت يا بدوي عايزك تروح بنفسك وتطمئن علي ملك انا ماعرفش فاطمة ممكن تكون عملت فيها اية
بدوي
ما تقلقش مراتي مع ملك وهي بخير ،،،،،،،،،،،
ومن داخل شقة ياسين يقف بدوي قدام مراتة ويقول لها بعصبية
يعني اية يا ولية انتي. ملك خرجت من الشقة وماتعرفيش راحت فين
مرات بدوي
والله يا خويا انا قومت اعمل لها شاي وكنت سايبها علي الكنبة هنا رجعت لقيت الكنبة معلهاش حد وباب الشقة مفتوح وهي مش في الشقة نزلت ودورت عليها في البيت من تحت ملقتهاش
بدوي
هي عرفت ان ياسين قتل فاطمة
مرات بدوي
البلد كلتها بتتكلم في الموال دة. اكيد سمعت من هنا ولا هنا
بدوي
وليه بس تخليها تسمع اللي بيتقال في البلد. دة انا مأكد عليكي انك تحوطي عليها وماتخلهاش تحس بحاجة. دي لستها عروسة واللي شافتة في اول ايام جوزها كتير بصراحة وماحدش يستحملة. طيب انا اعمل اية دلوقتي اقول لياسين علي ان ملك سابت البيت ولا اعمل اية بس
هو انت يا خوي مرار لما كمان ازود عليك مرار ان ملك سابت البيت ومشيت، ،،،،،،،،
وبعدها بكام ساعة ومن داخل شقة ملك في القاهرة تقف ملك قدام باب الشقة وتخبط علي الباب فتفتح لها والدتها وتدعي مديحة فتبص لها مصدومة وتقول لها
ملك انتي اية اللي جابك
فتدخل ملك الي الشقة فتقفل مديحة باب شقتها مسرعه بعد ما شافت جيرنها باصين علي ملك وهي راجعة من غير جوزها. وبجلبية بيتي. واكيد الكلام هايكتر،،،،،،،،
ومن داخل اوضة نوم ملك تنام ملك علي سريرها وتصرخ وتعيط فتاخذها مديحة في حضنها وهي تقول
ملك مالك.
وتخربش ملك نفسها بمنتهي الغل فتقول لها مديحة بخوف شديد
ملك. ردي علية بتعملي لية كدة. وفين ياسين جوزك
ملك وهي منهارة من العياط
انا مش عايزة ياسين ولازم يطلقني. انتي فاهمة يطلقني.
مديحة
يطلقك اية بس دة انتو لسة متجوزين. يادي الفضايح هو اية اللي حصل يا ملك يا بنتي
ملك بصريخ
هايطلقني انتي سامعة. عرفي كدة. انا مش طايقة اسمع اسمه او اشوف شكله.
مديحة
طيب اهدئي. وانا هاعمل لك كل اللي انتي عايزا
وتظل ملك تعيط وتصرخ وتبص لامها. ،،،،،
ومن داخل شقة حسين واثناء ما كان حسين يتناول وجبة العشاء مع شيماء مراتة يرن موبيل شيماء في اوضة نومهم فيقول حسين
ودة مين اللي بيرن دلوقتي
شيماء وهي تستعد للنهوض
هاقوم اشوف مين
حسين وهو يمنعها من النهوض يقول
كملي اكلك وانا هاقوم اشوف مين
ويقوم حسين ويتجة ناحية الاوضة ويلاقي المتصل مديحة ماما شيماء فيقول بصوت عالي لكي تسمعه شيماء
دي مامتك
شيماء باستغراب
ماما. وبتتصل لية دلوقتي
وتقوم وتروح ناحية الاوضة وتمسك الموبيل وترد مسرعا قائلا
الو يا ماما
مديحة بصوت مخضوض وخائف وهي بتعيط
الحقيني يا شيماء اختك ملك جت عندي ومن ساعة ما جت وهي بتصرخ وبتقول طلقوني منه انا مش طايقة شكله
شيماء باستغراب
ملك عايزة تطلق طيب لية
مديحة
ماعرفش انا مش قادرة عليها تعالي بسرعة وهاتي حسين والدكتور بسرعة يا شيماء
شيماء بلهفة
مسافة السكة يا ماما وهانكون عندك انا وحسين
وتنهي شيماء المكالمة وتبص لحسين وتقول
هو اية اللي بيحصل
حسين
شر وشيطان دخل بين ملك وياسين وربنا يستر من الايام اللي جاية، ،،،،،،،،
ومن داخل اوضة ملك يقف الدكتور قدام ملك وبعد ما تم الكشف عليها اداها حقنة مؤهدئة وبدأت تنام ملك من تاثير الحقنة وملك تبص لعيلتها الواقفين وتغمض عيونها وتدخل في حاله من الهدوء والتراخي فيخرج الدكتور من الاوضة هو وحسين وملك ومديحة وتبص مديحة للدكتور وتقول
هاتبقي كويسة صح
الدكتور بابتسامة خفيفة
باذن الله هاتبقي كويسة. بس لازم ما تتعرضش للضغط العصبي اللي اتعرضت لي دة علشان ما تتكررش حالة الانيهار العصبي دة تاني
ويستأذن الدكتور وينصرف وتبص مديحة لحسين وتقول بحرقة
ممكن اعرف بقي اية اللي حصل من صاحبك يوصل ملك للحاله دي
فيبص حسين لشيماء فتقول شيماء
هايكون حصل اية بس يا ماما.
حسين
بصي يا ماما. انا مش هاضحك عليكي علشان ما تعودش ان اكذب عليكي. وهاقول لك كل اللي اعرفة
ويحكي حسين لمديحة كل اللي يعرفة ويكمل قائلا.
ومن ساعتها وانا بتصل بياسين ومش عايز يرد علية
مديحة
قتل يا حسين هي حصلت قتل. انت السبب في الجوازة دي وانت اللي شكرتلي في. يطلع قتال قتلة.
شيماء
لا. يا ماما. ياسين ابن ناس واطيب خلق الله. ومش معني ان ملك قالت خد سلاحه ورايح يقتل مرات اخوة. يبقي هو فعلا قتلها
مديحة
طيب لوماقتلهاش ممكن تعرفيني اختك اية اللي يجابها من قنا بجلبية البيت وبالليل متاخر كدة. ولية ياسين ما بيردش علي حسين في الموبيل
حسين
انا هاروح الشغل بكرة ياذن الله وهاخد اجازة من الشغل تلت ايام وهاسافر قنا اشوف اية الحكاية بالظبط
مديحة
عين العقل وطالما مسافر وهتقابله عرفة ان ملك عايزا تطلق وخلينا نخلص طالما هو بقي قتال قتله
حسين
اشوفو بس يا ماما وافهم منه في اية واية اللي حصل وساعتها نبقي نتصرف علي حسب ظروفة
مديحة
حسين انا ماليش دعوي بظروفة. دخلت بنتي ملك علية النهاردة بالشكل دة مالهاش عندي الا حل واحد انه يطلقها وزي ما دخلنا بالمعروف نخرج بالمعروف
فيبص حسين لشيماء ومابقاش عارف يقول اية ولا شيماء عارفة تقول اية، ،،،،،،،،
وليلا وبعد الساعه الواحدة صباحا واثناء ما كانت مديحة نائمة جنب بنتها في اوضة نومها تحس ملك بأن في ايد تحسس علي جسمها فتصحي من النوم مفزوعا وتبص بجانبها فلا تجد احد فبعد لحظات من نظرتها يمينا ويسارا ترجع تنام مرة اخري. وبمجرد ما تغمض عيونها تحس بانفاس ساخنة. فتصحي وهي بتصرخ فتصحي مديحة علي صراخ بنتها وتبص لها وتقوم بسرعة وتاخدها في حضنها فتقول ملك بفزع شديد وهي بتبص لكل ركن في
الاوضة.
في حد كان معايا في السرير.
مديحة
ملك يا حبيتي الاوضة فاضية وانا نايمة جنب منك.
ملك وهي ترتعش
يا ماما والله في حد كان بيحسس علي جسمي وحسيت بانفاسة
مديحة
لاحول ولاقوة الا بالله.
ملك وهي تصرخ
بس ما تقوليش كدة.
مديحة بخوف شديد علي بنتها
طيب اهدئي اهدئي وحاولي تنامي. انا بس لو اعرف اية اللي حصل يخليكي تعملي كدة في نفسك
وتظل ملك في حضن امها ساكتة وتبص لكل ركن في الاوضة بخوف شديد، ،،،،،،،
وتمر الليلة ويطلع النهار وبعد اذان الظهر. ومن داخل بيت حربية. يرجع اهل حربية الي البيت بعد دفن عامر ابن حربية . وتبص حربية لاخوها خميس. وتقول له
مش هاتروح المديرية وتعرف هانستلم الامانه بتاعت فاطمة امتي علشان ندفنها
خميس بعد ما يتنهد
انا سالت المخبر حمدان وقالي مش اقل من يومين تلاتة لغاية ما الطب الشرعي يخلص تشريحها
حربية
هي كمان هاتتشرح
خميس
اومال اية مش جريمة قتل
حربية
وكون ان فاطمة جتتها بتتشرح دة ما يخليكش،،،،،،
خميس بصوت يزلزل البيت ومقاطعة لها
ويمين الله هاتنطقي كلمة تاني في الحوار دة لاهانسي انك اختي وارميكي برة الدوار
حربية
هو انتي يعني كنت عرفت هاقول اية
خميس
عارف هو انتي هاتكلمي الا علي ياسين واللي عمله اكتمي احسن ليكي
وهنا تحضر الي البيت امراة عجوزة ونحيفة شكلها مريب تدعي ام صفية. فتبص لها حربية بمنتهي الفزع ويقول خميس لما يشوفها
اية اللي جابك يا مراة انتي هنا
ام صفية
جاية اعزي حربية. اية بلاش
حربية
اتفضلي يا خالتي ام صفية
فيقف خميس وهو يبص لام صفية بقرف ويقول لحربية
تعزي وتغور تمشي من هنا مش ناقصين بلاوي احنا
ام صفية
مالك يا خميس يا ولدي مش حابب مجيتي لية
خميس
انتي عارفة لية. وبلاش اكتر في الكلام
ويدخل خميس الي اوضة ويقفل الباب وراء منه فتجلس ام صفية جنب حربية وتقول لها حربية بصوت واطي
اية اللي جابك. انا مش دفعتك كل اللي انتي قولتي
ام صفية
انا مش جاية اخد حساب العمل اللي انتي عملتي. انا جاية اخد حساب العمل اللي عملته فاطمة
فتصدم حربية وتقول
هي فاطمة عملت عمل
ام صفية
ايوة. عملت عمل بالخراب والمس بالجن العاشق لمرات ياسين
حربية
وعملتة امتي دة
ام صفية
عشية قبل موتها بكام ساعة وحطيتة علي عتبة شقة ياسين
حربية
وهي لية تعمل كدة. ما انا قولت لها هاعمل انا العمل اللي يجيب اجل الاتنين حسنية وملك
ام صفية
ماعرفش بقي. انا كل اللي اعرفة اني عايزا بقيت حقي
حربية
دة انتي ولية ما عنديكش تمييز دة ظرف طلبتي في فلوس
ام صفية
دة حقي وانا عندي مصاريف كتير ومحتاجة فلوس
حربية
خلاص. بطلي ندب وقولي ليكي كام عند اختي وانا بالليل هاجي لغاية عندك واديكي حسابك ،،،،،،،،،
ومن داخل اوضة نوم فاطمة تدخل حربية الي اوضة النوم وتقعد علي سرير فاطمة وهي حزينة علي اختها وتبص علي السرير وتقول
هاجيبلك حقك يا فاطمة من اللي اذاكي وانتي عايشة ومخلصهوش ياذيكي كمان قتلك.
وتمشي ايدها علي السرير اللي كان مبلول وتقول
لسات فرشتك فيها عرقك يا غالية
ولكنها تلاحظ ازازة الدواء بتاعت فاطمة تحت مخدتها وكانت مفتوحة بعض الشي وهي اللي بلت الفرشة فتمسك ازازة الدواء وتقول
الدواء دة كان للصدر انا عارفة واللي بياخد منه بيعرف ينام. دة هو اللي كان بيريح فاطمة في اخر ايامها لما اخاد منه شوية يمكن اعرف انام. ،،،،،،،،،،
ومن داخل مكتب المامور يجلس صديق مع رجل من سنة وهو محامي جنايات صديقة جدا ويدعي أحمد وتحسين وقدام منهم يجلس ياسين ويقول احمد لصديق
مش هاقدر اخبي عليكم بس موقف ياسين صعب جدا.
صديق
ما فيش حاجة اسمها صعب. كل قضية وليها حل
احمد
الحل الوحيد في القضية دي اننا نثبت ان فاطمة هي اللي نزلت لياسين مش ياسين اللي طلع لها. ودي صعب نثبتة الا لو في حد شاف الحوار اللي حصل بين ياسين وفاطمة ودة ماحصلش.
ياسين
بس والله العظيم انا ما قتلتها
احمد
انا مصدقك بس لازم المحكمة تصدقك ودة يحصل ازاي وانت بصماتك جوة المكان ورايح لهم بالسلاح وناس شهدت بكدة وكمان ضربت نار علي فاطمة. والجيران شافوك وانت واقف قدام منها. بس ارجع واقول من الاول انت الغلطان انك سبت غضبك يسوقك للشر ودي كانت النتيجة. هاتلبس قضية ما عملتهاش
صديق
دة كدة. قتل عمد. يعني ياسين هياخد اعدام
فيهز احمد راسة ولا يرد لان كلام صديق صح. ،،،،،،،،
وبعدها بكام ساعة يجلس حسين مع ياسين في مكتب المامور بعد استاذنة مرة اخري. ويقول ياسين
دة كل اللي حصل يا صاحبي وانا برئ من دمها.
حسين
يبقي ملك عرفت انك قتلت فاطمة وعلشان كدة ،،،،
ويسكت حسين فيقول ياسين
علشان كدة اية. كمل
حسين بارتياك
يا عم انا اقصد انها علشان كدة زعلت يعني
ياسين
من حقها تزعل يارتني كنت سمعت كلمها وما خرجتش من البيت
حسين
اللي حصل بقي. المهم انت دلوقتي. تبقي كويس و تخرج من الورطة دي علي خير
ياسين
يارب. واقول لملك ما تزعلش مني. ولما اخرج باذن الله هاعوضها عن الايام دي
حسين
اخرج انت بس وهي اول ما تشوفك هاترجع معاك علي طول
ياسين بحدة
ترجع معايا.
حسين لما حس انه لخبط
انا اقصد انها ترجع معاك كويسة يعني مش زعلانه
ياسين
لا. انا ما تقصدش كدة. هي ملك عندكم ولا اية
حسين
ياسين ورحمة ابوك بلاش تفكر ولا تتكلم في اي حاجة تاني غير ازاي تخرج من هنا علي خير
ياسين
حسين. ملك سابت شقتها وراحت لكم القاهرة
حسين
بصراحة اة.
ياسين بعصبية
لا. ست اصيلة وعرفت ازاي تكون جنب جوزها في شدتة
حسين
بلاش تحسبها كدة. ملك دلوقتي متلخبطة
ياسين
تخرج من بيتي من غير اذني لية. هي متجوزة خروف
حسين
يا ياسين بلاش،،،،،
ياسين مقاطعة له
ولا المهندسة ما يشرفهاش ان جوزها يبقي مسجون
حسين
لا خالص دي ملك بتحبك
فيقف ياسين ويبص لحسين ويقول
اللي بتحب تكون في ظهر اللي بتحية وقت ضيقتة قبل وقت فرحة ولا هي شاطرة بس في الكلام الحلو وساعة الجد سابتني ومشيت. قول للمهندسة لو ما يشرفهاش ان جوزها يكون مسجون انا كمان ما يشرفنيش انها تكون مراتي.
ويخرج ياسين من الاوضة وهو قلبة بيتقطع من العذاب،،،،
وليلا من داخل بيت خميس تقف بنت خميس الكبيرة وتدعي. امل وهي في الرابعة عشر من عمرها مع والدها خميس وتقول له
اني كنت خايفة وما طلعتش من وراء الستارة لما لقيت عم ياسين داخل الدوار بالسلاح وسمعت كل حاجة قالتها خالتي فاطمة لي ونزلت من فوق ووقفت قدامه وحطت ايدها علي يدة وخليتة يضربها بالنار. واني خوفت اتكلم
خميس
اني كان قلبي حاسس ان ياسين برئ. اول ما النهار يطلع هاتيجي معايا علي المركز وتحكي كل اللي حصل
ووسط الظلام تظهر حربية وراء احدي الجدران وتقول
دة بموتك يا خميس لو طلعت ياسين منها، ،،،،،،،،،،،،
استنوني بكرة باذن الله. والحلقة الاخيرة
يارب تكون الحلقة عجبتكم. مستني رايكم.
من تاليفي، ،
محمد منصور. منص
بصراحة انا مبهورة تحفة
ردحذفحربية شيطان وياسين ربنا حايظهر براته
ردحذفروعه روعه روعه
ردحذفتحفه بجد
ردحذفتسلم أناملك
ردحذفيارب يعين ياسين على كم الشر ده وينجيه وياخدك ياحربيه
ردحذفررررروعة جميلة جدا كملي
ردحذفروعه
ردحذفجميل ومشوق، ربنا يوفقك
ردحذفكتر من رائع عشره علي عشر ه
ردحذفتم تم تم تم تم تم تم تم تم تم تم تم تم تم تم
ردحذفهايل
ردحذفحقيقى جميلة جدا جدا
ردحذفبالتوفيق يارب
فظيعه روعه بجد
ردحذف