ملك والعقربة
★الحلقة السادسة★
من تاليفي، ،
محمد منصور. ** منص **
وقبل ما نبدأ الحلقة نوحد الله ونصلي علي خير خلق الله سيدنا محمد. وعلي بركة الله نبدأ
بسم الله توكلت علي الله. وهو رب العرش العظيم
وسامحت ملك أدم. وعدي كام يوم وخرج من المستشفي وراح شقته وفي ليلة وهو قاعد في شقته سمع صوت خبط علي باب الشقة فقام فتح ولقي قدام منه سلمي بتبص له من فوق لتحت وبتقول
تعرفني مكانها وابعت لها اشجان علشان تقتلها زي ما اتفقنا وانت اللي تلحقها. احب افهم
فيضحك ادم ضحكة الشيطان ويقول
خشي يا قلبي وهافهمك
فتدخل سلمي الشقة وادم بيقول
تشربي سخن ولا بارد
فتبص له سلمي وتقول
انا شربت بما في الكفاية. فهمني علشان لو فاكر انك تقدر تلعب بيا. تبقي غبي
ادم
مع اني ما بحبش حد يغلط فيا لكن انا عذرك. ومن الاخر كدة انا روحت لك الفيلا بتاعتك لما عرفت باللي بينك وبين ملك من مشمش وعملتك كوبري علشان ارجع لها وانا اللي مسكت ايد اشجان وخلبتها تحط السكينة في بطني بس بالعقل علشان عايز اتعور بس مش اموت. وكل دة علشان اخلي ملك تسامحني واتجوزها. وماكنش من مصلحتي انها تموت دلوقتي دي برضو حبيبتي
سلمي بعصبية شديدة
انت يا واطي تلعب بسلمي ابو سالم
ادم
ومالعبش لية طالما ينفع يتلعب بيكي.
ويمسك ادم سلمي من ذراعها ويقول
وغلطي فيا مرتين. التلته بروحك
وزقها ادم ناحية باب الشقة وحست سلمي انه فعلا ما بيهزرش فقررت تجر معه ناعم وقالت
انت لما جيت لي فهمتني ان طريقنا واحد وانك عايز تفش غلك في ملك علشان سابتك بعد مابقي معها فلوس
ادم
حصل ورجعت حسبتها تاني لقيت بموت ملك هاطلع خسران طيب لية ما اتقل شوية علي موتها واطلع كسبان
سلمي
مش فاهمه
ادم
لما تكبري شوية عن كدة هافهمك. ونصيحة بلاش تنكشي ورايا او تفكري انك تحكي مع حد اني كنت معاكي والا هاحكي انا كمان واقول مين طلع اشجان من المستشفي.
بصت له سلمي من فوق لتحت بصة تحرق وقالت
معقوله واحد زيك. تطلع دماغه سم بالشكل دة
ادم
اللي عملته فيا الدنيا والفقر يخلي الكيوت اللي زيي يبقي ملعون، ،،،،،،،،،
وبعدها باسبوع ومن جوة فيلا ملك بالتجمع الخامس تقعد ملك مع مشمش الذي كان باين عليه الحزن وملك بتقول
مالك زعلت ليه كده
مشمش بتاثر شديد
لا ما فيش.
ويبلع ريقة بالعافية ويقول
يعني انتوا خلاص حددته ميعاد الفرح
ملك
اه يوم الخميس اللي جاي
مشمش والدموع محبوسه في عيونه
مبروك ياملك وربنا يتمم بخير بس انا كان ليه عندك طلب
ملك
قول يا مشمش
مشمش
عايز افضل قريب منك عايز كل يوم اشوفك انتي عارفه اني بحبك ازاي زي اختي وعلشان كده ان عايز اشتغل امن علي بوابه فيلتك لو ينفع
ملك
لا طبعا انت مقامك عندي أكبر من كده انت هاتكون مسئول عن الدعايه
فيضحك مشمش ويقول
ملك انا ماليش في اللي انت بتقولي ده انا الحاجه الوحيده اللي اعرف اعملها اني اكون جنبك علشان احميكي لو اقدر فلو ليا خاطر عندك وبتحبيني خليني الامن بتاع فليتك والاوضه اللي في الجنينه ابقي انام فيها
فتبص له ملك وتقول
للدرجه دي بتحبني
مشمش وقلبة بيتقطع
زي اختي مش أكتر
ملك
خلاص انا هاعمل لك اللي انت عايزه علشان انا كمان اتعود علي انك تكون جنبي
مشمش بابتسامه بطعم الدموع
ربنا يخليكي ليا. يا اختي
ملك
ويخليك ليا يا مشمش. ويا احلي اخ
ويخرج مشمش من الفيلا بعد ما يسلم عليها وتنزل دموعه زي النهر ويقعد علي الرصيف قدام الفيلا ويقول لنفسه
مالك زعلت لية. دة انت اللي وصلت ادم لملك بايدك وكنت السبب في انهم يتقابلو من تاني
ويسكت قليلا ويرجع يقول
هي بتحبه هو وبعاده عنها كان فارق معها جدا رغم كل اللي وصلت له من نجاح لكن قلبها كان ديما حزين نقصها ادم وانا رغم كل اللي عملته معها ماقدرتش تنسي. يبقي اراي اعشم نفسي بيها وهي قلبها مش فيها.
ويتقطع قلبه كمان وكمان ويقول
ربنا يسعدهم هو لايق عليها اكتر هو وسيم وطول بعرض وهي قمر 14. يعني يوم ما تبص وتحب لازم تحب اللي زي ادم لكن انا وحش وقصير وجسمه قليل
ويعيض مشمش بشدة وقلبه يتقطع اكتر واكتر ويقول
بس قلبي كبير وبيحبك يا ملك وماحدش في الدنيا دي كلها يحبك قدي. لكن ارجع واقول مبروك يا حبيبتي جوازك من اللي بتحبي وفرحتك طالما مع غيري مش هابقي اناني واحرمك منها
ويقوم مشمش ويقف علي رجله ويبص للفيلا وبالتحديد ناحية شباك اوضة ملك ويمشي في طريقة لوحده،،،،،،،
وتعدي الايام ويجي يوم الخميس ومن جوة قاعه افراح كبيره تقعد ملك في الكوشه وجنب منها ادم ويحضر فرحهم نجوم كبار من الوسط الفني ووسط الافراح والمزيكا والرقص تحضر سلمي وتروح ناحيه ملك في الكوشة وتقف قدام ملك وتقول
مع انك معزمتنيش بس انا احسن منك وجاي أقول لك مبروك
ملك باستهزاء تقول
هو انتي محتاجه عزومه يا طنط
فتضحك سلمي ضحكه خبيثه وتقول
حبيبه طنط
وتبوسها سلمي بوسة كلها شر وتبص ناحية أدم وادم بيبص لها بحذر شديد وسلمي بتمد ايدها وبتسلم عليه وبتقوله
مبروك يا قمر
ادم وهو بيمسك أيدها وبيضغط عليها بقوة وبيقول
الله يبارك فيكي يا نجمه
فتبص له ملك بغضب شديد فيبص لها ادم ويسيب أيد سلمي فتروح سلمي ناحيه ودان ملك وتقول
عريسك قمر والطنط مش هاترتاح الا لما تاخده منك
فتبص لها ملك وتقول في ودان سلمي
القمر بيحب ملك ومافيش حاجه في ايد ملك حد يعرف ياخدها حتي لو انتي ياطنط
سلمي
تراهني علي انه ها يبقي ملكي
ملك
ساعتها بس ها يبقي رخيص عشان راح للرخيصة
سلمي وهي بتضحك وتقول
عموما الرخيصة هتاخده منك مش هو وبس وكمان هتاخد حياتك قريب اوي يا قمر ويوم ما تشوفيني تاني هاجي لك ومعايا ملك الموت
وتضحك سلمي وتبص ناحيه ادم وتقول
هاشوفك قريب يا قمر
وتسيبهم وتمشي وملك تبص ل ادم اللي كان عمال يبص علي سلمي وبيسال نفسه جاية تعمل اية دي. وسمع ملك بتقول
لو عجباك اوم روح معها
ادم
مين دي اللي عجباني انا من بعدك انتي ما فيش واحده تعجبني،،،،،،، ،
ويخلص الفرح ويسافر العروسين الي شرم الشيخ علشان يقضوا شهر العسل. وتمر الايام وينتهي شهر العسل وترجع ملك الي فيلتها ومعها ادم وتعيش معهم في الفيلا امها وفي ليلة ومن جوة اوضة نومهم في الفيلا يقعد ادم مع ملك ويقول لها
ملك انا كنت عايز اتكلم معاكي في موضوع يخص مستقبلي
ملك
خير يا ادم
ادم
بصراحه كده انا كنت محتاج 5 مليون جنيه عشان افتح مشروع أبتدي بي حياتي
ملك
مشروع ايه ده
ادم
هافتح مطعم كبير
ملك
مأاحنا اتفقنا هتشتغل معايا وتبقي وكيل اعمالي ومسئول عن كل حاجه
ادم
وهي دي شغلانه افضل رايح جاي وراكي زي صبي الرقاصه
ملك بغضب
هو انت شايفني رقاصه يا ادم. ولا اية ولما انت شايفني رقاصه اتجوزتني ليه وليه قبل ما نتجوز كنت موافق تشتغل الشغلانه دي ولا خلاص بقيت مراتك وراح بقي وقت الطبطبة
ادم
ملك انا ماقولتش انك رقاصه لكن انا راجل ودمي حر ومش هاينفع اشوفك كل شويه واقفه مع سيد بتضحكوا وواقفه مع فلان بتتكلمي ومع ده ومع غيره انا مش هاستحمل المنظر ده
ملك
ايوه. قبل الجواز ماكنتش عايز تقول لا علي المنظر ده انما دلوقتي تقول لا وباعلي صوت منا خلاص بقيت مراتك وكمان بتطلب فلوس علشان تعمل مشروع انسي انا مافيش مليم من فلوسي هيتاخد مني بلوي الدراع وده اخر كلام عندي. وحته بقي انا بضحك مع فلان وبتكلم مع فلان فأنا بتكلم معاهم في الشغل مش بنتكلم في حاجه تانيه تخليني مكسوفه لو حد عارفها. وهي دي حياتي لو عجبك تكمل معايا علي كده كمل مش عجبك يبقي كل واحد في طريق
فيبص لها ادم ولايرد ويخرج من الاوضة منفعلا فتبكي ملك بشده وتقول لنفسها
لية ديما تكون انت السبب في كسرة فرحتي. حب اية دة بس اللي الفرحة متحرمة في ،،،،،،،
وفي نفس الليلة كان ادم واقف قدام بوابة فيلا سلمي وسلمي بتفتح له البوابة بنفسها وبتقول
كنت عارفة انك مش هتتاخر كتير لغاية ما ترجع لي
ادم
انا فكرت كتير ولقيت ان طريقي نفس طريقك. تتجوزيني
سلمي
انا ما نكرش انك عاجبني. واد موز كدة ودماغك سم وكارزيما . بس مهري انت عارفة
ادم
روح ملك
سلمي
مش بقول لك كارزيما
ادم
انا ما بقتلش
سلمي
سلمهالي وانا اقتلها بايدي
ادم
للدرجة دي كرها ملك
سلمي
طلعت من تحت الارض علشان تحرمني من كل شئ ملكي عايزني اطبطب عليها.
ادم
نتجوز وهاسلمك ملك تعملي فيها اللي انتي عايزا
سلمي
انت مستعجل بقي علي الجواز وخلاص
ادم وهو بيقرب من سلمي
بصراحة انتي صاروخ وانا بحب اللي في سنك
فتضحك سلمي وهي بتقول
كذاب اوي. زي كل اللي اتجوزتهم قبل منك. بس ما يمنعش اننا نعيش كام يوم مع بعض بس في الاول اعرف دماغك فيها اية وهاتخليني اخلص ازاي من ملك. وخلي بالك انا فلوس ما طلعش يعني جو ان اصرف عليك دة اعتبره باب مقفول يا موز
ادم بخبث
ومين قال اني بدور علي الفلوس.
سلمي في سرها
دة انت كلب فلوس بس معلش استحملك لغاية ما اطلع من وراك للي انا عايزا. ،،،،،،،،،
وقبل الفجر بساعه كانت اشجان بتنط من علي سور المستشفي وبتركب عربية ملاكي كانت مستنيها وشافها امن المستشفي في اللحظة الاخيرة وحاول انه يلحق العربية لكنه ماقدرش وخرج موبيله واتصل بدكتور نبيل وقال له
مصيبة يا دكتور
نبيل
اية اللي حصل
فرد الامن
اشجان نطت من علي صور المستشفي وركبت في عربية ملاكي كانت واقفة مستنيها
نبيل بعصبية
وماقدرتش تعرف مين اللي كان في العربية دة
فرد الامن
ملحقتش
نبيل
طبب خد رقم العرببة
فرد الامن
لا.
نبيل
انت اية لزمتك لما مريضة تهرب قدام منك وما تعرفش تلحقها.
فرد الامن
يا دكتور نب،،،،،،،،،،،
ولكن نبيل يقاطعه قائلا
بلا دكتور نببل بلا زفت اقفل
وقفل فرد الامن واتصل الدكتور علي سلمي واول ما ردتت قال بعصبية
اسمعيني كويس. اشجان ترجع المستشفي الليلة والا هاحكي للبوليس وسيد علي كل حاجة
سلمي باستغراب
اشجان اية وبتاع. انا بتجوز ومش فاضية للرغي بتاعك دة
الدكتور نبيل
هو انا عبيط علشان اصدق انك مش وراء اللي حصل
سلمي
والله تصدق ما تصدقش هو دة اللي عندي. واقفل بقي علشان انا مش فاضية لك
وتقفل سلمي في وش الدكتور نبيل فيضايق نبيل جدا ويقول
بقي كدة يبقي عليه وعلي اعدائي
ويتصل نبيل بسيد وهو ناوي يقول له علي كل حاجة. وفي نفس الوقت كانت سلمي قاعده مع ادم علي السرير وادم بيقول لها
حكاية هروب اشجان دي تقلق. اوعي تكوني بتلعبي من ورايا
سلمي
والله ابدا. انا قفلت حوار اشجان دة نهائي وحمد ربنا ان الحوار ما تكشفش
ادم
حاجة تحير بصراحة اومال مين بس
سلمي بعد تفكير للحظات
مافيش غيرها.
ادم
تقصدي ملك. طيب لية تخطف اشجان
سلمي
علشان تخلص مني
ادم
لا. مش للدرجة دي ملك ملهاش في الدم
سلمي
لية ما تكنش عرفت بانك بقيت جوزي وقررت تخلص مني
ادم وهو بيقوم من علي السرير. وبيلبس هدومة
دي تبقي مصيبة سوداء.
سلمي وهي بتبص له
انت رايح فين دلوقتي
ادم وهو بيخرج من الاوضة
رايح اتاكد
وخرج ادم من الاوضة باقصي سرعه. وفي الوقت دة يرن موبيل سلمي وتلاقي رقم سيد فتقول لنفسها باستغراب
سيد. معقوله يكون نبيل قاله. اكيد قاله. اجمدي يا سلمي ما ضحكيش حد عليكي
وترد سلمي بجبروت واول ما تفتح الخط تسمع صوت سيد يقول بعصبية
اخر حاجة كنت ممكن اتخيلها ان يوصل بيكي الحقد والغل من ملك لدرجة انك تفكري تقتليها
سلمي
انت كبرت وبقيت تخرف يا سيد
سيد
انتي اللي كبرتي وخرفتي. وباللي انتي عملتي دة حفرتي قبرك بايدك وكتبتي نهايتك. بفضيحة
سلمي بعصبية
انت بتهددني يا سيد ولا اية. باين عليك نسيت نفسك
سيد
فين مراتي يا سلمي
سلمي باستهزاء
استني ادورلك عليها في جيبي. ولا صحيح نسيت دي مجنونه يعني ممكن تكون قاعدة فوق دولاب
سيد
ليك نفس تهزري وتضحكي. طيب وعد مني لخلي ايامك كلها حزن واولها الليلة دي اللي مش هاتخلص الا وانتي بايته في التخشيبة
وقفل سيد في وش سلمي. وسلمي ترمي الموبيل علي السرير وهي في منتهي العصبية وتقول
كله بقي يلطش فيكي يا سلمي
وتسمع سمع صوت باب الاوضة بيتفتح فتقول
مين، ،،،،
وبعدها بكام ساعه تروح قوه من الشرطه ومعهم ظابط الي فيلا سلمي فيلاقو باب الفيلا مفتوح فيدخلوا الفيلا ويدورا في كل مكان في الفيلا عن سلمي وتقع عين الظابط علي دم قدام اوضة نوم سلمي فيفتح باب الاوضة ويلاقي سلمي علي السرير غرقانه في دمها، ،،،،،،،،،
خلصت حلقتنا ومستني رايكم وتوقعواتكم للي جاي. وعرفوني مين قتل سلمي
الحلقة الاخيرة من الموسم الاول
تم
ردحذفجميلة اوي
ردحذفجميله جدا جدا
ردحذفسلم ايدك حلووه جداا
ردحذفابدعت
ردحذفانا بحب الالغاز
ردحذف