ملك والعقربة
★الحلقة الرابعة★
من تاليفي، ،
محمد منصور. ** منص **
وقبل ما نبدأ الحلقة نوحد الله ونصلي علي خير خلق الله سيدنا محمد. وعلي بركة الله نبدأ
بسم الله توكلت علي الله. وهو رب العرش العظيم
خلصت حلقة امبارح علي ملك اللي بعد ما خرجت من المسابقة بامر من سلمي اتفاجات بيها سلمي بعد اسبوع علي المسرح وسيد بيعلنها انها نجمة الموسم دة. طيب ازاي دة حصل هاحكي بس هانرجع بالاحداث لاسبوع بالظبط ليلة ما وقعت ملك علي المسرح مغمي عليها وهي منهارة بسبب خسارتها للمسابقة ومن جوة اوضة من الاوض كان مشمش قاعد قدام ملك اللي كانت بتعيط بحرقة مش مصدقة اللي حصل وقال لها مشمش اللي كان صعبان عليه ملك
انتي اقوي من كدة وانتي احسن واحدة قدمت في البرنامج دة وكفاية حب الناس ليكي
ملك
انا مش قوية. انا بنت نفسها تفرح وتكمل فرحتها لكن الدنيا حالفة لتفضل ضدتي حتي اللي بحبه مش معايا علشان اقوي بي
مشمش
انتي مش محتاجة حد تتقوي بي. ولو صدقتي موهبتك ونفسك هاتعرفي ان خسارتك جوة بفعل فاعل
ملك
تقصد ان حد قاصد انه يخرجني من المسابقة
في الوقت دة يقف مبروك قدام منهم ويقول
العقربه هي وراء كل اللي حصل لك
ملك
سلمي
مبروك
ماشاء الله عليكي. لقطيها
ملك
كان باين عليها اوي. انها مش حابه نجاحي. بس لية. ولية استاذ سيد الشرنوبي وافق انها تعمل فيا كدة
مبروك
بلاش اسئلة اجابتها تزعلك اكتر. روحي دلوقتي وممكن بكرة الحال يتغير
ملك
هو فين استاذ سيد
مبروك
انتي صعبانه عليه ومش قادر يبص في عيونك.
ملك
للدرجة دي سلمي دي تقدر تتحكم في كل شئ
مبروك
لغاية دلوقتي تقدر لانها النجمة لكن ارجع واقول لك ماحدش بكرة يعرف مخبئ اية
وفعلا مشيت ملك ومعه مشمش والياس متمكن منها ورجعت الشغل وقبلت ادم اللي بص لها وقال باستهزاء
تعيشي وتاخدي غيرها
ملك
انا ما خسرتش علشان موهبتي ضعيفة انا خسرت علشان الشر اللي في الكواليس
ادم
عارف. انت احلي صوت في كل اللي غنو لكن تفضل الكوسة شعار للبلد. صدقيني لما قولت لك، ،،،،،
ملك مقاطعه له
ان شاء الله. انا هانجح يا ادم فاهم وهاكون مكان سلمي ابو سالم وبكرة تفتكر الكلام دة. ملك الحريري مش ازاز علشان تتكسر ملك الحريري تقدر وهقدر وهعدي سواء انت كنت معايا او لا.
وقالت ملك باستهزاء
وبالمناسبة شكرا اوي انك كنت معايا في اكتر وقت انا كنت محتاجالك في
وسابته ملك ومشيت وادم بص ناحيتها وهو بيقول
ابقي قابليني، ،،،،
ومن جوة مكتب سيد يقعد سيد مع مبروك وقدام منهم ملك ومعه طارق وهادي وكان سيد بيقول
علشان كدة يا ملك انا اتصلت بيكي وطلبت تيجي مكتبي
ملك
معني كدة ان مكملة في المسابقة بس من غير ما سلمي تعرف
طارق
بالظبط
مبروك
ومش بس كدة. كمان في اليوم دة هانعلنك نجمة الموسم ومن بكرة هاتبدي بروفات علي اغاني الالبوم الاول ليكي
ملك وهي فرحانه جدا
بجد
سيد
هو الشغل في هزار
هادي
كلنا بنراهن عليكي لانك عندك كريزما وحضور علي المسرح هايخيلكي في حتة تانية
ملك
يارب اقدر انجح
طارق
باذن الله هتقدري والا ساعتها سلمي هتخلص ساعتها علي اللي فاضل منك
مبروك
قد التحدي يا ملك
ملك باصرار
قده،،،،،
ونرجع تاني بعد الاسبوع ما خلص واعلن سيد فوز ملك واحنا دلوقتي جوة مكتب سيد الشرنوبي تقعد سلمي في أنتظار سيد وبتبص في ساعتها وهي بتنفخ وهنا تسمع صوت سيد ومعه طارق وهادي وملك ومشمش ومبروك وهم يتكلمون امام باب المكتب ثم يفتح سيد الباب ويشاور لملك بالدخول وهو يقول
اتفضلي يا نجمه
فتبص لهم سلمي بغيظ شديد وتقول ل سيد
انا سلمي ابو سالم افضل مستنياك هنا ساعه بحالها وانت داير تلف مع البت دي
فتبص لها ملك بصة كيد وتقول
أنا أسمي ملك الحريري يا طنط
سلمي بغضب شديد
طنط
مشمش بغيظ
اه طنط. دة انتي في سن تيته رهيبة
فيضحك الحاضرين فتقف سلمي وتروح ناحيه ملك بمنتهي العصبية فيمنعها مشمش من الاقتراب من ملك ويقف قدام سلمي وهو بيقول
عيب انتي ست كبيره بلاش اقل منك
فتبعد سلمي مشمش عنها وتبص في عيون ملك وتقول
انا هاوريكي طنط لما بتحب تربي واحده زيك بتربيها أزاي
فتضحك ملك بلامبالاة. وتبعد عنها وترجع سلمي تبص ل سيد وتقول
سيد أنا عايزاك
فيبص لها سيد ويقول
مش فاضي بعدين يا سلمي علشان انا دلوقتي ها قعد مع واحده احسن منك ممكن تمشي دلوقتي وتبقي تفوتي عليه بعدين
ويبص لملك ويقول
أتفضلي يا نجمه
وتقعد ملك مكان سلمي وسلمي بتبص لهم كلهم وهم يحتفلون بملك فيروح مشمش ناحيه سلمي ويقول لها
اوعي تمشي انا هبعت اجيب هوهوز حلاوة نجاح ملك. وعامل حسابك في كيس
فتبص له سلمي بقرف وترجع تبص لسيد واللي معه وتقول لنفسها
بقي كدة. تمام اوي
وتخرج من المكتب وتففل الباب وراء منها بمنتهي العصبية فيتخض مشمش ويقول
يا بنت الحيوان الباب باظ
فيبص طارق ل سيد ويقول
رديت لسلمي القلم صح
سيد
خليها تتربي هي فاكره اننا هانعيش عبيد تحت رجليها علشان هي النجمه الاولي في مصر خلاص زمن سلمي خلص وبح ومن النهارده ملك هي النجمه الاولي لمصر عايز الالبوم الاول لملك يكسر الدنيا
هادي وهو بيبص لملك باعجاب
أحلي البوم علشان احلي صوت انا سمعته
فيقف مشمش امام هادي ويقول
لا. للتحرش
فيضحك كل الحاضرين ....،،، ،
وبعد مرور 3 ساعات ترجع ملك الي البيت ومعها مشمش وكانت ملك في غايه الفرح والسعاده. فتلاقي أدم واقف
قدام باب البيت مستنيها فتبص لمشمش ويبص مشمس ل ادم اللي كان بيقول لملك
وحشتيني
فتضحك ملك ويضحك مشمش ويقول مشمش
عايزه حاجه يا ملك
ويبص مشمش ل ادم ويقول باستهزاء
قول تاني وحشتني كدة. اصلها طالعه منك طينه
أدم
أهدئه يا عم مشمش انا عارف اني غلطان
ولكن مشمش لا يرد عليه ويسببة ويمشي فيقف ادم قدام ملك ويمسك أيدها ويبص في عيونها ويقول
حقك عليه يا حبيبه قلبي
فتبعد ملك أيدها وتقول
انا تعبانه وعايزه أنام
وتسيبة ولسة هاتمشي جري ادم وراء منها ووقف قدامها وقال
انا مش هاسيبك الا لما تسمحيني
ملك بصوت حزين
اسامحك. سايبني لوحدي في اهم فتره في حياتي وانا واقفه علي مسرح والناس بتسمعني وادور عليك وسط الناس دي علشان تشجعني الاقيك مش وسطيهم وعايزني أسمحك اشمعني النهارده جاي تدور عليه علشان هاكون مشهوره ومعايا فلوس كتير ساعتها انفع اكون مراتك صح
ادم
ملك انا بحبك.. فلوس ايه اللي أتجوزك عشانها
ملك
أدم الحدوته خلصت وما فيش حاجه بيني وبينك وبلاش تجري ورايا لانك بقيت بالنسبة لي مجرد زميل كنت شغاله معه فندق وخلاص الفترة دي خلصت
وتسيبة وتمشي وتخش بيتها وادم بيبص عليها
وتمر الايام وتبدا ملك التحضير لي اول البوم لها وفي نفس التوقيت كانت سلمي تحضر لي البومها وتقرر ان تنزل البومها في نفس توقيت نزول البوم ملك لكي تثبت لسيد وطارق وهادي ان سلمي لسة نجمه مصر الاولي وبالفعل ينزل البوم ملك والبوم سلمي ويبدا الصراع الفني بينهما وكان صراع فني رهيب ولكن البوم ملك يحقق مبيعات لم تحدث من قبل لمطربه صاعده وتشتعل نار الغيره في قلب سلمي اللي متوعدتش انها تكون نمره أتنين في اي سباق فني وتشرق شمس ملك في سماء الفن لتغطي علي سلمي وتصبح ملك حديث الشارع والمطربه المطلوبه في كل الافراح والحفلات وتمر الايام وتنزل ملك البومها الثاني ويحقق نجاح أكثر من البومها الاول وسلمي تحقق المركز الثاني في المبيعات بعد ملك ووصل الحال بسلمي الي انها تتطلب من مديري الحفلات الشغل وتطلب من اصحاب البرامج الظهور في البرامج حتي تشعر انها لاتزال نجمه وفي احدي الايام كان المؤلف الكبير ماجد عوض يكتب مسلسل يحكي قصه حياه شاديه يجهز للعرض في. شهر رمضان فحست سلمي انها لو بقيت بطلة المسلسل دة هاترجع تاني للساحه. الفنية بمنتهي القوه فراحت لماجد عوض. فيلته ودخلت عليه المكتب فلقت ملك ومعها سيد قاعدين مع ماجد عوض فنظرت لهم سلمي باندهاش شديد وقالت بعصبية
انتوا بتعملوا أيه هنا
ماجد بنرفزه
سلمي انت ازاي تتكلمي كده مع ضيوفي ومين سمح لك تدخلي مكتبي
سلمي بعصبية اكتر
ضيوف أيه. والبت دي بتعمل أيه هنا
ملك بحدة
انا مش بت قولت لك قبل كده
ماتبصش لبها سلمي وتقول لماجد
أيه اللي بيحصل هنا
و تشوف قدام ماجد علي المكتب اوراق مسلسل شاديه
فتمسك سلمي الورق وتقول
هو في ايه يا ماجد اوعي تقول انك جايب البت دي علشان تعمل مسلسل شاديه المسلسل ده. انا الوحيدة اللي انفع اكون بطلته
ماجد
سلمي. انا مؤلف ومخرج المسلسل ومسلسل زي دة محتاج شابه تعمله عشان بيعرض حياه شاديه في كل مراحل عمرها انتي ماتنفعيش لدور زي ده. وبعد اذنك تتكلمي باسلوب احسن من كده مع ضيوفي او تطلعي بره
سلمي وهي ترمي اوراق المسلسل وتقول بنرفزه
اطلع بره ،،، انت تاني واحد يطردني علشان الحيوانه دي هي ايه مرافقة كل واحد منكم يوم
فتقف ملك منفعله.وتروح ناحية سلمي بمنتهي العصبية وتضربها بالقلم لدرجة ان من قوة القلم نزفت لثة سلمي فحطت سلمي ايدها علي الدم ومسحته في نفس الوقت اللي كانت ملك بتقول لها
انا مش رخيصه زيك علشان ارافق رجاله في الحرام ومش حيوانه انا أسمي ملك الحريري المطربه الاولي في مصر
وتبص لها ملك في عيونها بتحدي رهيب تحدي مخيف فتبتسم سلمي وهي بطلع منديل من شنطتها وبتمسح الدم وتقول
وأنا أسمي سلمي أبو سالم وزي مادخلتي حياتي وسرقتي مني كل حاجه كانت ملكي انا كمان هادخل حياتك وهاسرق منك كل حاجه ملكك
وتسيبهم وتمشي وهي ناوية علي الشر ، ،،،،،
وتاني يوم تروح سلمي ل مستشفي المجانين وتسال عن أشجان مرات سيد الشرنوبي. وتلاقي اشجان في جنينة المستشفي بعد ما امر الدكتور بفك رباطها وخروجها من الاوضة علشان تتمشي شوية فقعدت سلمي قدام منها وقالت لها
انا جايلك من عند سيد الشرنوبي جوزك
فتبص لها أشجان بلهفه وتقول
سيد هو فين. ده واحشني قوي هو ها يفضل راميني هنا
سلمي
لازم يرميكي وميسألش عليكي علشان في حيه. كل ما يجي علشان يشوفك تمنعه وتحوشه وتقول له رايح تعمل أيه عند المجنونه
فترتسم ملامح الغضب علي وش أشجان وتقول بحدة
أ مين دي اللي خطفت سيد مني
وتمسك أشجان سلمي من ذراعها بمنتهي العصبية وهي تقول
مين هي عرفيني
فتخرج سلمي من شنطتها صوره لملك وهي تمسك أيد سيد وتحي جمهورها فتختطف أشجان الصوره من سلمي
وتبص لملك بغضب شديد وتقول
أنا عايزا أنهش لحمها
سلمي
أنا هاخرجك من هنا علي مسؤليتي علشان تلحقي جوزك حبيبك سيد
وفعلا ما تعديش الليلة وتقدر سلمي بالفلوس تهرب اشجان من المستشفي. وبخروج اشجان تبتدي حكاية جديدة. ومن النهاردة كل اللي فات حمادة وكل اللي جاي حمادة تاني خالص.
وياتري اية اللي مستني ملك علي أيد أشجان عايزين تعرفوا تابعوني واوعي تروحو بعيد.
لو عجبتكم الحلقة ياريت تعرفوني رايكم بلايك او كومنت.
كالعادة مبدع
ردحذفجميلة اوي
ردحذفتم تم تم تم تم تم تم تم تم تم تم تم تم تم تم تم تم تم تم تم تم تم تم تم تم تم
ردحذفجميلة جدا كملي
ردحذفرووعه يا منص
ردحذفانت دايما عندك مفاجأت
ردحذف