حلقتين مع بعض اهو اكراما لكل اللي متابع القصة. الحلقة السابعة والثامنة
تيك توك
حكاية توبه
★الحلقة السابعة★
من تاليفي، ،
محمد منصور. ** منص **
وقبل ما نبدأ نوحد الله ونصلي علي خير خلق الله سيدنا محمد. وعلي بركة الله نبدأ
بسم الله توكلت علي الله. وهو رب العرش العظيم
خلصت الحلقة اللي فاتت علي توبه. اللي البوليس جه خدها من الفيلا ومابقتش عارفة اية اللي بيحصل ولية بيتعمل فيها كدة. وركبت توبه البوكس وقبل ما تركب هي كانت دموعها بتسبقها علي البوكس. واتحرك البوكس بتوبه وراح لمديرية امن اسكندرية واتجررت توبه من هدومها وكانها مجرمه وطلعو بيها لغاية مكتب ظابط اسمه فاروق وزقها العسكري ناحية الحيطة اللي قدام المكتب وقال لها
اترمي هنا لغاية ما خد اذن من حضرة الظابط
اتخبط توبه في الحيطة وقالت وهي بتتوجع من الخبطة
طيب ابوس ايدك قولي انا عملت اية
لكن العسكري ماردش عليها وحطيت توبه ايديها علي بطنها اللي الخبطة سمعت فيها وخرج العسكري من الاوضة وبص لتوبه وراح ناحيتها ومسكها من ذراعها ودخلها لمكتب الظابط فاروق. وكان قاعد جوة المكتب ظابطين. الاول يدعي حمزة. والظابط الاخر يدعي فاروق اللي بص لتوبه وبص للاوراق الخاصة بيها واللي كانت قدام منه وقال لها
توبه حجاج،،،،،،
فقطعته توبه وقالت
اللي انت هتقوله دة مش اسمي لان حجاج مش ابويا.
فاروق
اومال اللي يحب يندهك يقول اية
توبه
توبه. وبس لاني معرفش ليا اب. وممكن اعرف انا مقبوضه عليه لية
فاروق
يعني مش عارفة
توبه
ماعرفش والله العظيم
فاروق
الابليكشن اللي انتي طلعتي عملت لي اعلان دة ابليكشن شمال. وعبارة عن غرف فيديو واللي بيدخل الغرف دي يقدر يمارس الدعارة الالكترونية بمنتهي البساطة.
حمزة
هنستني اية يا فاروق باشا. من واحدة زباله زيها كانت مع ابوها،،،،،،،
توبه مقاطعه له
مش ابويا. لية الناس مش عايزا تصدق اني توبه بنت عبلة وماعرفش ليا اب
فاروق
مش قضيتنا. انتي بنت مين القضية بتاعتنا قضية الاتجار بالبشر
توبه باستغراب
يعني اية الاتجار بالبشر
حمزة
دي كدة يا قمورة. زيها زي اللي فاتحة بيت للدعارة وبتاخد فلوس من وراء اللي بيجو البيت دة. في مقابل المتعة الحرام
توبه
كل دة بسبب الاعلان اللي عملته
فاروق
واكتر من كدة.
توبه
انا والله العظيم ماكنت اعرف ان الابليكشن دة ببعمل دة كله. كل اللي اعرفه ان سامح فريد جوزي طلب مني اعمل الاعلان دة وبس
فاروق
لا. والله اشحال سامح فريد نفسه هو اللي مقدم فيكي البلاغ للنائب العام وهو السبب في القبض عليكي والبرنامج بتاعه اعلن ان الحلقة الجاية من برنامجه هاتكون عن الفضيحة دي
لفت الدنيا بتوبه ومابقتش قادرة تقف وقالت بصعوبه
سامح. هو اللي بلغ عني. طيب لية وازاي يعمل كدة
حمزة
راجل نظيف ومايحبش المشي العوج انا متابعة من زمان علي التيك توك وهو اول واحد اتكلم فضيحتك وقرر انه يوصل للحقيقة. والحقيقة اللي هو قالها بلسانه انك شمال يابت واننا ما ينفعش نتغش فيكي
فتبص له توبه وهي مصدومه وتقول
ولما انا شمال زي ماهو قال. كان بيتجوزني لية
حمزة
بطلي افتري بقي علي الراجل. انتي عايزنا ازاي نصدق ان ممكن سامح فريد يتجوز واحدة زيك
توبه
متجوزني وحامل منه كمان
فاروق
اسمعي يا بت انتي. اللي بينك وبين سامح دة احنا ملناش علاقة بي. والتهمه لبساكي لبساكي. يعني جهزي نفسك للسجن
توبه
هاروح الاحداث
فاروق
لا. السجن العام انتي خلصيتي تميتي ال 16. س.
وينهده الظابط للعسكري ويقول له وهو بيبص لتوبه
خدها علي الحجز
العسكري وهو بيمسك ذراع توبه قالت توبه وهي بتعيط بحرقة
بس انا معملتش حاجة علشان اخش السجن وماعرفش اي حاجة في النت. ولا يعني ابليكشن حتي واللي وراء الاعلان دة سامح فريد هاتو سامح فريد واسالو وهو يقول لكم علي كل حاجة هو اللي خلاني اصور الاعلان والله العظيم انا بريئة والله العظيم ماليش دعوي
لكن العسكري يخرج بتوبه من المكتب ويبص فاروق لحمزة ويقول
حاسس ان البت دي مضحكوك عليها
حمزة
واللي هيضحك عليها سامح. دة اعلامي محترم
فاروق
ياخوفي من المحترمين.
حمزة
تقصد ان البت دي اتلعب بيها.
فاروق
لية لا.
حمزة
طيب يعني اية.
فاروق
طالما جت سيرة سامح فريد في القضية يبقي لازم يجي ونوجهم ببعض ونشوف مين صادق ومين كذاب،،،،،،
في نفس الوقت كان سامح فريد واقف قدام فريق الاعداد بتاع البرنامج بتاعه والمخرج المسئول عن البرنامج واسمه عزام وكان سامح بيعرض لهم فيديو الاعلان الجديد يتاع الحلقة اللي فيها هايتكلم عن فضيحة توبه الجديدة وبيقول سامح بعصبية
ازاي اعلان زي دة يتصور من غير موافقتي لا وكمان ينزل علي القناة. هو انا للدرجة دي ماليش لزمة
عزام المخرج
مش بمزاجنا دة اوردر جه من سعد باشا واحنا نفذنا
سامح
سعد باشا.
وسيبهم سامح ومشي وهو غضبان وراح لمكتب سعد باشا واول ما وصل عدي السكرتيرة غصب عنها رغم انها حاولت تمنعه يدخل ودخل مكتب سعد وبص لسعد وقال
ممكن افهم انت ناوي علي اية
شاور سعد للسكرتيرة وقال لها
اخرجي انتي
وخرجت السكرتيرة وبص سعد لسامح وقال له
واضح اوي انك شوفت برومو الحلقة الجديدة من البرنامج بتاعك وماعجبكش
سامح
واية اللي يعجبني في اللي اتعرض دة. عايزني اسلمها بايدي وكمان اطلع في حلقة اقطع فيها وفي اللي فاضل منها
سعد
وفيها اية. احنا من الاول واحنا بنبيع ونقطع فيها. جاي علي اخر حتة فيها وضميرك يصحي
سامح
بس انا مش هقدر اعمل كدة
سعد
مش بمزاجك فين عقد ما بينا والحلقة هتتذاع في وقتها ولو لسة فاكر ان توبه ليك. انسي توبه دلوقتي عرفت انك انت اللي بلغت عنها وكمان عرفت انك اللي فضحتها يعني اكيد مش ضايقة تشوف وشك.
سامح
انت بتقول اية
سعد
يااااااا. علي دماغي نسيت اقول لك ان ليا ابن اخ شغال في مديرية امن اسكندرية. اسمه حمزة قطع اخر حبل بينك وبين توبه. وتوبه قالت في التحقيق انها ماتعرفش حاجة وانك انت اللي قولت لها تعمل كدة. يعني باعتك انت بقي مش هاتبيع
سامح
توبه ما قالتش الا الحقيقة
سعد
خلاص في المديرية. ابقي اقول كدة وتخرج هي وتدخل انت مكانها
سامح
انت لية بتصعبها عليه. انت عارف اني بحبها كنت سيبتها ليا وخليت اي حاجة تانية نلهي بيها الناس علشان الاعشاب المسرطنة تخش مصر
فيقوم سامح من علي كرسي مكتبه ويروح ناحية سامح ويقول له
روح اقعد علي الكرسي
استغرب سامح وبص لكرسي المكتب اللي كان مطلي بمية الذهب ومن اغلي الكراسي الموجودة في العالم فكرر سعد كلامه وقال
روح اقعد ولا خايف الكرسي يطلع واسع عليك
فراح سامح ناحية الكرسي وقعد علي الكرسي وحس بنشوة العظمة وقال له سعد
انا لما كنت في سنك اتمنيت كتير حجمي يكون في مقاس كرسي زي دة وفضلت احارب واحارب لغاية ما وصلت للكرسي دة وعلشان توصل لازم تدوس علي قلبك باوسخ جذمة عندك. دوس علي قلبك
وراح سعد لسامح وبص في عيونه وقاله
انت فيك كتير مني. وانا صغير وكان نفسي ابني يطلع زيك لكن ربنا ابتلاني بعيل بيهد كل اللي ببني. علشان تنجح وتعلي اوعي يبقي ليك نقطة ضعف. انسي توبه وعدي ودوس دوس واكبر واكبر واوعي الكام مليون اللي معاك يجمدوا قلبك انت لسة ولا حاجة. يلا قوم واجهز وعايزك تعمل حلقة تكسر الدنيا زي كل حلقاتك اللي قبل كدة
قام سامح من علي الكرسي وهو زي المسحور ومشي ناحية باب المكتب وسمع سعد بيقول
بكرة الصبح اعمل حسابك هاتكون مع حمزة في المديرية اوعي تهد كل اللي اتبني، ،،،،،،
وفي نفس الوقت كان اشرف مع امين شرطة معرفة اسمه عم نسيم واشرف كان بيقول له
والله يا عم نسيم انا مش عارف اشكرك ازاي انك هاتخليني اشوف توبه
عم نسيم
طالما فاروق باشا مش هنا كل شئ سهل. حاكم هو ما بيهزرش في الشغل. بس برضو تقصر معها علي قد ما تقدر
اشرف
اوام اوام بس اطمئن عليها
وبعدها بيوم ومن جوة الحجز تقعد توبه علي جنب وهي متعورة. في ودانها وبتجيب دم بسبب ان في واحدة في التخشيبة ضربتها وخدت منها الحلق اللي كان في ودانها واتفتح باب الحجز ودخل عم نسيم وقال
توبه
بصت له توبه وقالت
نعم
عم نسيم
تعالي
قامت توبه بصعوبه وراحت ناحية عم نسيم اللي بص لحالها والدم اللي نازل من ودانها وقال لها
مين اللي عمل فيكي كدة
توبه وهي بتعيط
مافيش. مافيش
بص عم نسيم للحريم اللي في الحجز وقال
يا زبالة يا رمم. توبه تخصني واللي هايمسها بشر هازعله
وخد توبه من ايدها ومشي بيها وتوبه بتقول
هو انت مين اللي بعدك ليا. سامح
عم نسيم
لا. يا بنتي في واحد قريبك عايز يشوفك
وراح بيها عم نسيم ناحية اشرف اللي كان واقف علي جنب واول ما شافها جري ناحيتها وهي اول ما شافته عيطت وكان هاين عليها تترمي في حضنه لكنها فضلت واقفة وبتبص له وساكتة وقرب منها اشرف وقال لها
ازيك يا توبه
توبه
انت طيب ازاي دة انت بعت لي رساله مع سامح بانك ما يشرفكش تعرفني
اشرف باستغراب
سامح مين دة.
توبه
سامح اللي بعت ليك المنطقة علشان يعرفك اني محتاجلك تساعدني وانت رديت عليه وقولت له ،،،،،،
وقبل ما تكمل توبه قال اشرف
توبه انا سافرت لك البلد وكان نفسي اشوفك لكني عرفت انك خرجتي من دوار جدك هربانه وماشوفتش سامح دة واي كلام قاله علي لساني كذب
سرحت توبه وقالت لنفسها
حتي في دي كمان سامح طلع غشاش. وفي الوقت دة شاف اشرف الدم اللي نازل من ودان توبه فخرج منديل وكتم الدم وهو بيقول لها
مين اللي عمل فيكي كدة
توبه
امي اللي ولدتي وهي عارفه اني بنت حرام. انما انت عرفت ازاي اني انقبض عليه. واية اللي جابك
اشرف
عرفت من النت انك انقبض عليكي وكلمت عم نسيم امين الشرطة وهو اللي دلني عليكي. واللي جابني دة
وشاور اشرف بصباعه علي قلبه فقالت توبه
هو لسة فاكرني
اشرف
هو عمره منساكي. وديما كان بيسالني عنك وندمان انه في يوم اتلخبط وضيعك منه لكن خلاص اللخبطة راحت وبقيت عارف انا عايز اية.
توبه
بعد كل اللي وصلت له. دة الظابط بيقولي اني متهمة بقضية الاتجار بالبشر. انا العيلة اللي لسة من كام سنة كنت بلعب بعروستي في الاوضة اعرف اتاجر بالبشر
اشرف
انت اتظلمتي كتير اوي يا توبه
توبه وهي بتعيط بحرقة
مافيش اكتر من اني عرفت حقيقة جوزي اللي شايلة ابنه في بطني ورغم كدة باعني وبلغ عني
اشرف وهو مصدوم
انتي اتجوزتي يا توبه
توبه بصوت حزين
اتجوزت سامح فريد.
وتصرخ توبه من الحرقة وتقول
اتجوزت اللي شهر بيا وبفضحتي اتجوزت اللي بلغ عني شوفت ان ديما اللي بيقعو في سكتي ولاد حرام زيي. مرة حجاج والتاني سامح
اشرف
وانا زيهم يا توبه
توبه وهي بتحط ايديها علي بوق اشرف
لا. انت لا. انت كنت صريح معايا من الاول حتي لما سبتني كنت صريح معايا وعمرك ما خدعتني
اشرف
بس انا المرة دي جاي لك وناوي ما سبكيش ابدا
توبه
انا المرة دي اللي هاسيبك
ورجعت توبه للحجز واشرف بيقول لها
رايحة فين بس
توبه
راجعه للحجز لاني مش هاينفع اعشم نفسي بيك وانا مش هاكون ليك.
جري وراها اشرف وقال
توبه انا بحبك
توبه وهي بتعيط
حبك جه متاخر بعد ماخلاص انكتب عليه اترمي في السجن انساني يا اشرف وعيش مع غيري
وتدخل توبه الحجز واشرف بيقول
مش هاعيش غير ليكي فاهمه وباذن الله هاخرجك ولو ماقدرتش هاهربك مش هاتدخلي السجن يا توبه مش هاتدخلي السجن ولا لدقيقة واحدة. وسامح فريد حسابه معايا انا بعد اللي عمله فيكي
ولسة هايلف اشرف ويمشي لقي قدام منه سامح بيبصة بصة مش مفهومة واشرف بيبص له بغل وماقدرش يمسك نفسه وهجم عليه وخنقة بايده ونسي انه في المديرية وقال له
بقي انت راجل. كدة تستغل بت غلبانه زي توبه
وتبص توبه من شباك باب الحجز علي اللي بيحصل وتشوف العساكر. وهي بتهجم علي اشرف ومعهم امين الشرطة عم نسيم اللي قال لاشرف وهو بيبعده عن سامح
اشرف انت فاكر نفسك في الشارع.
اشرف بعصبية
ما انت يا عم نسيم ماتعرفش قليل الاصل دة عمل اية في توبه
عم نسيم
مهما عمل مش في المديرية الكلام دة. ماتخلنيش اندم اني عملتك علي انك راجل كبير وجبت تشوفها
سامح بعصبية
وانت تقرب لها اية علشان تدافع عنها بحرقة كدة
اشرف
انا قريبها من البلد. وجيت اخد حقها منك
سامح
قريبها زي ما حجاج ابوها. مش كدة برضو
فيحاول اشرف الهجوم علي سامح مرة تانية وهو بيقول بلغة تهديد
ماعرفهاش قبل كدة بس انا اللي هاجيب حقها منك. يا اوطي خلق الله
وهنا يظهر في الممر الظابط فاروق ومعه زميلة حمزة ويقول فاروق باعلي صوت عنده
اية اللي بيحصل قدام الحجز دة. احنا فين في سوق
فيقف الكل انتباة للظابط فاروق ويبص فاروق لعم نسيم ويقول له
في اية يا امين نسيم واية اللمه اللي قدام الحجز دي
عم نسيم
دي مشكلة بسيطة بين اشرف جاري واستاذ سامح الاعلامي
حمزة
وسببها اية المشكلة دي
نسيم
توبه يا حمزة باشا
فاروق
طيب سامح وعارفين علاقته بتوبه
ويبص فاروق لاشرف وهو بيقول
انما انت بقي تعرفها منين
اشرف
معرفة قديمة
حمزة باستهزاء
باين كدة ان توبه هانم كل اللي تعرفهم رجاله
وراح حمزة ناحية اشرف وقال
وانت يا روح امك يلا امشي من هنا. بدل ما انسي انك جار الامين نسيم والبسك قضية
اشرف
لية يعني هو انا كنت،،،،،،،
وهنا يدخل عم نسيم ويمنع اشرف من الكلام وهو بيقول
كلامك اوامر يا حمزة باشا.
وخد عم نسيم اشرف ومشي وبص فاروق لسامح وقاله
طبعا احنا اسفين علي اللي حصل دة
سامح بثبات انفعالي وهو بيعدل هدومة
لا. عادي انا واخد علي كدة.
حمزة
اي حد بيدور علي الحقيقة مش كل الناس بتحبه
سامح
اكيد. بس ممكن اعرف انتم طلبتوني لية
فاروق
معقولة نتكلم واحنا واقفين كدة. اتفضل في مكتبي
وخد فاروق سامح ودخل بي المكتب ومن وراهم حمزة وتوبه كانت بتبص عليهم. ،،،
وفي نفس الوقت ومن قدام المديرية كان عم نسيم بيوبخ اشرف وبيقول له
حمزة دة ظابط مؤذي واحمد ربنا اني كنت معاك والا كان زمانك مرمي في الحجز
اشرف
انشا لله اكون في جهنم. بس المهم اني اقدر اساعد البت المظلومة دي واخرجها من هنا
عم نسيم
اللي انت بتفكر في وبتقوله ممكن يكلفك انك تقضي كام سنة من عمرك في السجن وتحزن امك عليك وانت وحيدها.
اشرف
يا عم نسيم انا لو ماكنتش اتخليت عن توبه في الوقت اللي هي كانت محتاجني في ما كنش حصل لها دة. كله انا السبب في اللي وصلت له
عم نسيم
باين عليك تعرفها من زمان وقلبك عشقها
اشرف
الوقت اللي قضيته معها ما يتعدتش علي صوابع الايد الواحدة بس والله بالنسبة لي يساوي عمر
عم نسيم
طيب يا اشرف روح دلوقتي لمصلحتك وانا هاعرفك كل جديد في قضيتها
اشرف
اروح واسيبها
عم نسيم
ايوة تروح علشان حمزة باشا لو شافك هايزعلك. انا زي ابوك واعرف كل الظباط اللي هنا بلاش تخلي حمزة يركز معاك.
اشرف
وتوبه
نسيم
قولت لك هاعرفك عن قضيتها كل جديد. ولو عايز تخدمها شوف لها محامي يحضر معها التحقيق
اشرف
محامي.،،،،،،،
وفي نفس الوقت كانت. توبه واقفة قدام سامح في مكتب فاروق وبيقول سامح وهو قلبه بيتقطع
كل اللي بتقوله كذب
فتعيط توبه ويبص لها فاروق وهي عماله تبص لسامح مش مصدقة قد اية هي انخدعت في وقال لها فاروق
اية رايك يا توبه لسة عند كلامك
حمزة
هي معقوله تتكلم تاني دي تبقي بت بجحة اوي.
بص سامح لحمزة وهو هاين عليه ياكله بسنانه لكن توبه قالت بصعوبه
فعلا انا لو اتكلمت ابقي بجحة اوي.
وبصت توبه لسامح بحرقة وقالت
بس زي ماانت ما تعرفنيش انا كمان مش عايزا اعرفك ولا عايزا اللي في بطني منك
وضربت نفسها بمنتهي القوة في بطنها وصرخت من الوجع وجري ناحيتها سامح بلهفه وخوف عليها وعلي اللي في بطنها وبص فاروق وحمزة للي حصل وضربت توبه نفسها كمان مرة فقال سامح
بس بقي
بصت له توبه وقالت
مش عايزا يتولد وهو مش عارف لي اب. وبعدين انت مالك قلقان عليه لية كدة. هو انت تعرف كذابين زيي
لكن سامح ارتبك وهو ماسك ايدين توبه بقوة وبيبص في عيونها وقال
علشان حرام تقتلي عيل ملهوش ذنب
لكن توبه ضحكت اوي ضحكة بطعم المر ضحكة طالعه من وجع القهر واستغرب كل الموجودين علي اللي بتضحك وهي بتعيط وبتقول
انا كمان ما كنش ليا ذنب اتولد بسبب غلطة. لكن الحمد لله الدم بينزل ويارب يكون ابننا بيموت
وبدأ نزيف شديد ينزل من توبه وكانها حاله اجهاض فقال فاروق باعلي صوت
يا عسكري.
فدخل العسكري بسرعه فقال له فاروق
اطلب الاسعاف بسرعه
وتفضل توبه تضحك زي المجنونه وسامح بيبص لها وهو هايتجنن وبيبص للدم اللي بينزل منها وبيقول بصوت حزين
لية عملتي كدة لية لية
وتعدي كام دقيقة ويوصل المسعفين وياخدوا توبه ولسة سامح هايخرج من المكتب وراء توبه قال فاروق لي
اظن في كلام انت محتاج تقوله
فيبص له سامح ويقول
كلام اية
فاروق
ان مش كل اللي اتقال علي لسان توبه كذب وانها فعلا كانت مراتك
حمزة
بتقول اية بس يا فاروق بقي معقوله الاعلامي الكبير سامح فريد يكون متجوز. الجربوعه دي. دة لو قال كدة يزعل ناس هو مش هايحب زعلهم
يبص سامح لحمزة اللي كان بيبرق له وكانه تهديد فيقول فاروق
ناس مين دول مش هايحب زعلهم
حمزة
الجمهور بتاعه يا فاروق
فاروق
حمزة مال الجمهور دلوقتي واللي احنا في. اللهفة بتاعت استاذ سامح لهفة اب ابنه بيموت قدامه ولو ما كنش اللي بطن توبه ابنه في الحلال. فهو ابنه اسف يعني في الحرام لكن في كل الاحوال كان في علاقة بين استاذ سامح وتوبه
فيبص حمزة لسامح فيقول سامح لفاروق
حضرة الظابط انا مافيش اي علاقة لا في الحلال ولا في الحرام بيني وبين توبه ودة اخر كلام عندي. افتكر اني اقدر امشي دلوقتي
فاروق وهو مش مصدقه
تقدر تمشي اتفضل. بس نطمئن علي توبه واللي في بطنها وبعدين نتكلم
لكن سامح ما يردش ويفتح باب المكتب ويخرج وحمزة يقول لفاروق
لم الدنيا دة اعلامي كبير ما تهيجش الدنيا علينا
فاروق
بس دة كذاب
حمزة
ما يكذب يا فاروق. يعني توبه هي اللي صادقة كلهم كذابين خلينا نقفل محضرنا ونحول القضية للنيابة ونفوق لغيرها
فيبص فاروق لحمزة وهو مش مقتنع بكلامه وعايز يوصل للحقيقة ،،،
وبعدها بشوية ووقت ماكان سامح راكب عربيته وراجع فيلته اتصل بي سعد ورد سامح فقال سعد بعصبية شديدة
انا اظاهر عليه كنت مغشوش فيك. واديتك اكبر من حجمك
سامح باستغراب
اية اللي حصل لدة كله
سعد
اية اللي انت عملته في مكتب الظابط دة. اهو بقي مصدق توبه وشاكك فيك
سامح
واضح ان حمزة دة بينقل اللي بيحصل بالظبط
سعد بعصبية شديدة
احنا مش هانسيب المصيبة اللي عملتها ونتكلم في حمزة
سامح
هو انت كنت عايزني اعمل اية لما لاقي توبه بتنزل ابني قدام عينية
سعد
كنت عايزك تبقي انشف من كدة ما تخليش الظابط يمسك عليك غلطة ممكن تكون في مصلحة توبه
سامح
وهايحصل اية يعني
سعد
اي محامي باتنين جنية ونص ممكن يستغل اللي حصل دة ويخرج توبه براءة
سامح
وانت طبعا يا سعد باشا مش عايز الحوار يخلص بان توبة مظلومة وماتعرفش وساخة الابليكشن اللي هي اعلنت عنه
سعد
لسة بتفهم. و دة علشان مصلحتنا كلنا ومصلحة مصدقية القناة والبرنامج اللي انت شغال في. ولا انت كرشك اتملي وما بقتش محتاج فلوس تاني
سامح
انا ما بقتش عارف انا عايز اية
سعد
لا. اعرف وبسرعه قبل ما الراجل الكبير يعرف انك مابقاش ليك لزمة وساعتها ترجع واحد ملهوش لزمة كبيرة اوي كام واحد من عيلته متابعينه علي التيك توك.
ويسكت سعد للحظة بالظبط ويقول بلغة تهديد
اسمع يلا. وافهمني كويس. قسما برب العزا لو فكرت تضعف قدام قلبك تاني لاهرسك وادوس علي وشك
وانهي سعد المكالمة. وسامح رمي الموبيل جنب معه ومابقاش عارف بكرة مخبي اية، ،،،،،
وبعدها بيومين ومن جوة المستشفي المحجوزة فيها توبه
كان اشرف طالع للاوضة المحجوزة فيها توبه وطلع 100 ج. للعسكري اللي واقف علي الاوضة لمرقبتها ودخل لها الاوضة وكانت توبه راقدة علي ظهرها ومركبة تحاليل واول ما شافت اشرف اتعدلت واشرف راح ناحيتها وقال
زي ما انتي.
نامت توبه تاني وقالت
انت عرفت ازاي اني هنا
اشرف
من عم نسيم. انتي اية اللي حصلك ازاي يهون عليكي اللي في بطنك ويوصل بيكي الحال انك تفكري تقتلي
توبه وهي حزينه
انا ماعرفش ازاي عملت كدة بس ما استحملتش كمية الظلم اللي واقعه عليه ولقيت نفسي زي المجنونه وبعمل كدة
اشرف
ومات
توبه
لا. لسة في بطني انكتب له عمر جديد. كان نفسي اريحة من المصير اللي مستني ويتولد ويلاقي نفسه ملهوش اب معترف بي
اشرف
في وقتها يحلها اللي خلقه
وفي نفس الوقت يسمعوا صوت خبط علي باب الاوضة فيقول اشرف
باين عليه العسكري بيستعجلني
لكن الباب اتفتح ودخل رجل في الاربعينات من عمره لابس بدله من اغلي البدل وساعه غاليه جدا ووسيم ويدعي باسل عمران فيبص لتوبه ويقول
انا باسل عمران المحامي
فتبص توبه لاشرف باستغراب شديد وتقول توبه
بس انا، ،،،،،،
باسل وهو ببقرب منهم يقول
انتي متعرفنيش بس انا اعرف حكايتك من النت وحاسس انك مظلومة وقررت ادافع عنك
اشرف
كدة ببلاش
باسل
مافيش حاجة ببلاش بس قضية توبه متشافة وناس كتير متبعها. وانا هاستغل شهرت توبه في شهرتي واسمي يكبر في المحاكم المصرية وماتقلقوش انا مش محامي كسر ولا واقع انا برضو محامي شاطر وتوبه محتاجة ليا لاني الوحيد اللي اقدر اطلعها من الورطة دي بس تساعدني. وقبل دة كله توافق اني اكون المحامي بتاعها
تبص توبه لاشرف تاني وهي مش فاهمه ولا مستوعبه اية اللي بيحصل لكن اشرف يقول لها
مش هاتخسري قد اللي خسرتي واحنا محتاجين محامي يكون معانا في قضيتنا
توبه
قضيتنا
اشرف بحب شديد
اة قضيتنا. انا وانتي واحد واللي يمسك يمسني يا توبه
ويبص اشرف للمحامي ويقول
احنا موافقين يا استاذ باسل
باسل
اسمعها من توبه
توبه
موافقة
باسل
عظيم كدة بقي ناخد القضية واحدة واحدة واول شي هانعمله هانطلب خروجك بكفالة من سرايا النيابة بسبب صغر سنك وعلشان كمان انك حامل
توبه
وبعد كدة
باسل
تولدي وبعد كدة نجهز للخطوة التانية وهو اننا نقلب دماغ سامح فريد ونخليها عليها وطيها.
توبه باستغراب
يعني اية
باسل بابتسامه خفيفة
اولدي بس الاول. وبعد كده. نتكلم ،،،،،،
وفعلا تمت الاجراءات واتوافق علي خروج توبه من سرايا النيابة بكفالة 5000 ج. واللي دفع الكفاله باسل وعرف سعد باللي حصل وقال لحمزة
واللي اسمه باسل دة بيساعدها لية
حمزة
باسل محامي شمال ولسة خارج من السجن بسبب انه ضرب ممرض عمله عاهة مستديمة ليلة ما بنته ماتت. وبيلعب بكارت التريند اللي ركبا قضية توبه واهو يبقي علي الساحه من تاني ويرجع يتقال اسمه
سعد
وتفتكر انه ممكن يخرجها من القضية
حمزة
صعب جدا انها تخرج منها توبه مسجونة مسجونة بس ظروف حملها ها ياجل الموضوع شوية مش اكتر
سعد
وماله واهو نبيع علي حس التاجيل دة. وتخلي بالك يا حمزة لو حسيت ان باسل دة هايقدر يقلب التربيزة تعرفني علشان اللي فوق مني مش عايزنها تخرج دلوقتي وعلشان ما تبقاش القناة بتاعتي شهرت بسمعه بنت مظلومه
حمزة
ياباشا ما تقلقش. الواد دة شمال وهو بيتسلي وبس صدقني،،،،،
وتعدي الايام والشهور وطول الفترة دي كانت توبه قاعدة في اوضة علي سطح بيت اشرف ومحدش كان يعرف وكل فترة والتانية كان اشرف يطلع لها بالاكل والشرب وفي ليلة قالت له توبه
تعبتك معايا يا اشرف
اشرف وهو بيحط الاكل قدامها
تعيشي وتتعبيني. وربنا ينصرك ويثبت برائتك ونتجمع علي خير
توبه
يعني ممكن في يوم تتجوزني
اشرف
والله لو واحدة مشهورة زيك ترضي انا هاقول لا لية
وابتسمت توبه ابتسامه المر وقالت
مشهورة
وعيطت توبه فقال لها اشرف
حقك عليه والله انا بهزر
ويمسح اشرف دموع توبه فتقول له
انزل علشان مامتك ما تقلقش عليك
اشرف
انزل واسيبك كدة
توبه
انا بخير والله. انزل ومتنساش تقفل عليه بالقفل زي كل يوم علشان انت امبارح خليت مامتك تشك ان في حد في الاوضة
اشرف
ماتقلقيش هي من المرات القليلة اوي اللي بتطلع فيها السطوح. انا نازل علشان ما تقولش انا غبت دة كله لية
ويخرج اشرف من الاوضة ويقفل الاوضة بالقفل وتعدي الايام والشهور وتولد توبه في عيادة خاصة والخبر اتنقل عن طريق النت. اللي لسة بيتابع كل اخبار توبه. وعرف سامح بانها ولدت. وجاب عنوان العيادة فراح لها وهناك شاف باسل واشرف فقال لهم
فين توبه
اشرف
وبتسال عليها لية
سامح
مالكش دعوي انت. دة موضوع بيني وبينها
باسل
اكيد عرفت انها خلفت وجاي تاخد ابنك
سامح
وانت مين انت كمان
باسل
انا المحامي بتاعها
لكن تويه سمعت صوت سامح وخرجت ومعها الواد علي ذراعها فبص سامح للطفل وقلبه حن لي واتمني يشيله فقالت توبه وهي بتبص للعيل
جاي علشان دة صح
سامح
انتي مش هاتعرفي تربي
باسل
وانت اللي هاتعرف.
سامح
دة ابني وانا اولي بي
اشرف
غريبة مع انك قولت انها مش مراتك
ارتبك سامح وحاول يوصل لتوبه وياخد الواد من علي ذراعها وقال
اللي قولته حاجة وان دة ابني حاجة تانية
لكن توبه تبعد عن سامح ويمنعه اشرف من الوصول لها وهي بتقول وبتبص لكاميرا متعلقة قدام اوضتها لكنها مخفية
وزي ماكلنا شوفنا الحقيقة بتبان واحدة واحدة ودة اول شئ في الحقيقة ان اللي علي ذراعي ابنه يعني كنا متجوزين.
فيبص سامح مكان ما بصت توبه وشاف الكاميرا واتصدم
وقالت توبه
انت دلوقتي في بث مباشر علي التيك توك. شرفتنا يا سامح باشا
فيمد ايدة سامح ويخلع الكاميرا من الحيطة ويكسرها تحت رجله ميت حته وحته فيضحك اشرف ويقول
كويس انك كسرت واحدة. طيب والباقي
ويبص اشرف للسقف ويبص يمين وشمال كذا كاميرا في جميع اركان الحيطة فيصرخ سامح ويقول
يا ولاد الكلب
توبه بجحود
والواد دة مش ابنك دة ابن حجاج زي ما انت قولت
ولا نسيت
بص لها سامح وهو هايتجنن. ،،،،،
ولغاية هنا. خلصت حلقتنا اللي يارب تكون عحبتكم ولو في العمر بقية هاكمل لكم الحكاية دية. سلام
إرسال تعليق