حور

 

أميرة وادي الذنوب 

                ★الحلقة التاسعة★

من تاليفي، ، 

محمد منصور. ** منص **

وقبل ما نبدأ نوحد الله ونصلي علي خير خلق الله سيدنا محمد. وعلي بركة الله نبدأ 

بسم الله توكلت علي الله. وهو رب العرش العظيم

                          

                          ‏ 

خلصت الحلقة اللي فاتت علي نادر وهو بيقول لعلياء 

ازاي ماتعرفهوش وانتي بتقولي ان رقمه مستجل عندك

علياء

ماهو ده اللي هايجنني مين سجل رقمه عندي وفلوس ايه اللي عايزها وبيقول عليها حقه

نادر بعصبيه شديده

شوفي بقي ايه الاتفاق اللي كان بينك وبينه. باين كده اني انا كنت مغشوش فيكي 

علياء بدهشه

تقصد ايه بكلامك ده

نادر

اقصد انك كنتي بتخونيني يا علياء مع اللي اسمه جمال ده 

فيبص غانم ل نادر ويقول

نادر انت بتقول ايه . علياء مراتك اشرف ست انا شوفتها في حياتي وعمرها ماكانت في يوم من الايام زوجه خاينه ليك

نادر بعصبيه اكتر

لا والله. راجل يجي لها بعد نص الليل تحت شباك اوضتها ويختلفوا مع بعض علي سر ما بينهم وتقول لي شريفه

علياء بعصبيه

ايوه. شريفه وانا ماعرفش الراجل ده عايز تصدق صدق مش عايز انت حر 

ولكن نادر يبص لها ومايردتش ويسبها ويخرج من الاوضة وهو في منتهي العصبيية. فيبص غانم لعلياء ويقول

ما تزعليش من نادر هو اعصابة تعبانه. شوية انا هاخرج وراء احاول اهدئي وارجعه ليكي

ويخرج غانم من الاوضة وعلياء بتبص ناحية الباب وبتعيط صعبان عليها ان نادر شك فيها وتقول لنفسها

كده برضو يا نادر تشك فيها انا اخونك ومع مين ده. لكن مين ده وعايز مني ايه وحق ايه اللي عايزه انا لازم اعرف الحقيقه اكيد كل الاسئله دي هلاقي اجابتها في مذكرات امي 

وتطلع ناحية اوضة اميرة وتخرج المذكرات من الخزنه وتبدا تقراء ،،،،،

ضحك حميده وكانه مش فارق معه كلامي وخرجت من المكتب وهو بيعلي ضحكته كمان وكمان وحسيت اني فعلا كلامي مش فارق معه وأنا بقي لو كنت ناويه ارحم هاله مش هارحمها بعد استهزاء حميده بيا وانكتب عليه حرب جديده مع هاله وحميده. واول ماخرجت من المطعم حسيت ان في حد بيراقبني لكن مين ده ماعرفش شكله مش باين ماحطتش في دماغي ورجعت شقتي وقعدت افكر اوصل ازاي لي هاله وعملت اتصالتي بالناس اللي كنت اعرفهم لكن حميده منع الناس دي من انهم يساعدوني وطردتني بره المحل قدام كل العمال. واضيقتك جدا وقولت لنفسي انا لازم اخد حقي من حميده ومن هاله وركبت العربيه بتاعتي وانا في الطريق الي شقتي رن الموبيل بتاعي بصيت لقيت الدكتور عمر بيتصل بيا بصراحه فرحت. اخر واحد استني منه اتصال ورديت بسرعه وسمعت احلي الو في حياتي وبدا يسالني علي صحتي وعلي ايدي عامله ايه وبدا يحصل ما بينا اتصالات كتير بقيت اصحي علي مكالمه منه وانام علي مكالمه منه اهتمام غير عادي وعرفت ساعتها ان الاهتمام هو الحب وبعد ماكان قلبي اتقفل ضد اي حب لقيت ابواب قلبي بتنفتح من تاني لحب ماكنتش عامله حسابه وعمري ما صدق ان دكتور محترم وراجل شهم زي عمر يعجب بواحده زيي لكنه هو كمان حبني ونسيت الدنيا وكل ما فيها نسيت خالد واللي عامله نسيت عيالي اللي ماتوا نسيت هاله نسيت عز نسيت حميده ده انا بالعكس بقي نفسي اشوف هاله عشان اشكرها علي انها السبب في اني عرفت عمر وعدي 6 اسابيع وجه الميعاد اللي هاروح في لعمر المستشفي عشان افك الجبس وروحت له وفك الجبس لكن ايدي كانت لسه مكسوره فجبسها عمر تاني وقعد يتكلم معايا عن حاله ايدي واني لازم اشرب لبن كتير عشان العضمه المكسوره تلم وهو عمال يتكلم معايا وانا مش عايزا يخلص كلام وباصه في عيونه العسليه وهو عمال يتكلم ويوصف لي حالتي وهو لاحظ اني باصه له بصه غريبه فضحك وغمازته بانت وقال 

أنتي سامعه انا بقول ايه

قولت وانا محرجة 

ايوا انا معاك

ضحك تاني وقال

طيب انا كنت بقول ايه

مابقتش عارفة اقول اية لكني قولت 

بتقول ان ايديه مكسوره ولازم اكل كويس

ضحك قوي. وقلبي طار من مكانه وراح له وهو قال 

 

انتي فعلا لازم تاكلي كويس بس انا ما قولتش لسه لازم تاكلي كويس

ضحكت من الاحراج ولقيت نفسي بقول له

بصراحه انا ماكنتش مركزه معاك

عمر

اومال كنتي مركزه في ايه.

قولت بحب جامد حب حبيته 

في عيونك أصلهم حلوين قوي

ضحك قوي وغمازته بانت كمان وكمان وانا مش قادره امنع قلبي يدق بحروف اسمه وهو بيقول

طيب يا ستي شكرا. ممكن بقي تبطلي تبصي في عينيه وتركزي في ايدك المكسوره دي والكسر اللي مش عايز يلم

قولت 

عمر. اشمعني انا

عمر

اشمعني ايه.

اميرة 

ليه مهتم بيا كده وكنت ديما بتسال عليه

قال عمر وهو باصص في عيوني

عشان بحبك

قلبي زغرط زغروطه تحيي افراح الدنيا كلها وعيوني دمعت بس من الفرحه وقولت

وانا كمان بحبك

وفضلت اقرب من عمر وهو يقرب مني ورغم اني كنت بتكلم معه كتير الا اني عمري ما حكيت له عن الماضي بتاعي عشان خوفت اخسره لما يعرف اني قتلت واشتغلت في كباريه. وبعد 3شهور من الكلام والخروج بيني وبين عمر قابلته مره في مطعم علي النيل وهو باصص في عيني لقيته بيقول لي

اميرة. تتجوزيني

استغربت وقولت 

اتجوزك. بس انت ما تعرفش انا كنت ايه وعملت ايه في دنيتي

عمر

كل اللي فات بتاعك ومن حقك انما اللي جاي ده من حقي انا والمهم دلوقتي موافقه اكون جوزك

قولت بفرحة 

طبعا موافقه 

عمر

بس انا متجوز وعندي ولد اسمه نادر. تقبلي تكوني مراتي التانيه

من غير مافكر قولت

موافقه موافقه موافقه.  

وقومت من مكاني واترميت في حضنه ومش فارقه معايا انا فين ومين باصص عليه لكني فجاة افتكرت اني لسه مرات عز فقولت له

بس انا لسه مرات عز اللي انت كنت بتعالجه

عمر

وفيها ايه اطلبي الطلاق ونستني شهور عددك ونتجوز

قولت 

بس بعد اللي حصل وانا ماعرفش طريق لعز

عمر

 اتصرفي انا خلاص بقيت مش قادر اعيش من غيرك

بعد ما فكرت للحظات قولت لنفسي

هو حميده اللي يعرف يوصل لعز ويخلي يطلقني

وخرجت من عند عمر واستنيت الليل يليل وروحت المطعم وعملت المستحيل لغايه مارضي حميده يقابلني وطلبت منه انه يطلقني من عز وهو قال لي انا هاشوف الموضوع ده وبعديها بيومين رجعت له وسالته عمل ايه قال لي

عز مش عايز يطلقك. وبيقول لك احمدي ربنا انه لسه سايبك عايشه لغايه دلوقتي

قولت 

هو اشتراني بالورقه اللي معه دي. انا من حقي اطلق واعيش حياتي زي ما انا عايزه

حميده

والله انا رسول وما علي الرسول الا البلاغ

قولت وانا بترجا 

ابوس ايدك تخلي يطلقني انا عايزا اعيش حياتي بعيد عن المشاكل 

حميده

انا ماقدرش اغصب راجل علي انه يطلق مراته بالعافيه ده حتي يبقي حرام عليه. ولتاني مره انا مجرد رسول 

قولت بعصبية 

طيب اسمعني كويس يا عم الرسول. قول لعز قدامك 48 ساعه. يااما يطلقني يا اما هابقي ارمله

وخرجت من المكتب وانا ناويه علي الشر طالما الشر مش عايز يبعد عني. وبدات افكر ازاي اوصل لعز واخلي يطلقني ذؤق او عافيه وبدات اراقب حميده لمده أسبوعين بحالهم لكني ما وصلتش لعنوان هاله او عنوان عز وطول الفتره دي وعمر كل كلامه معايا عن جوازنا وانه ازاي بيستني اليوم ده بفارغ الصبر . وخطرت ليا فكره ممكن تخلي هاله تظهر وهي انها تغير علي حميدة. والغيرة عامية روحت لصحفي معرفه كان بيسهر عندي في المحل وطلبت منه يساعدني وخد صوره لبنت من بنات المطعم كانت معايا من زمان وصوره لحميده وقولت له ينزل خبر جواز البنت دي من حميده في كل الصحف المهمه وخبر يكون في الصفحه الاولي واديته فلوس كتير نظير اللعبه دي وفعلا عمل الصحفي اللي اتفقت معه عليه ونزل الخبر الصبح في كل الصحف تقريبا وفي الصفحه الاولي وكان لازم اعمل الخطوه التانيه في الخطه بتاعتي وهي اني اخلي حميده مايكنش في شقته طول اليوم والحاجه الوحيده اللي تخلي ينزل علي ملا وشه ان مثلا المطعم يكون بيتحرق وبالفلوس عملت ماس كهربائي بمساعده ناس من اللي جوه المطعم وولع المطعم ونزل حميده من شقته بسرعه وراح علي المطعم وفضلت واقفه قدام المطعم مستنيه السناره اللي رميتها بالطعم تصطاد هاله وفعلا بعديها بساعتين. ظهرت هاله وكانت في حاله عصبيه وغضب شديد ونزلت من عربيتها ومعها جرونال ودخلت المطعم وهي متعصبه وفضلت واقفه مستنيه خروج هاله من المطعم. وبعد 1/2 ساعه خرجت هاله من المطعم وهي لسه متعصبه وركبت عربيتها ومشيت وانا مشيت ورائها وعرفت عنوان فيلا جوزها وعن طريق امن الفيلا عرفت ان جوزها مسافر بره مصر وعرفت ان عز قاعد معاها في الفيلا دي وعرفت كمان ان هاله عندها بنت عمرها 4 سنين اسمها سلمي وهنا الصداع مسك دماغي وقالت الشيطانه اللي جوايا

فرصتك جيت لك وجه الوقت تاخدي حق بنتك

قولت 

اسكتي

الشيطانه

مش هاسكت الا لما تجيبي حق بنتك وزي ما هاله قتلت بنتك اقتلي بنتها

بدا الكلام يرن في وداني. وقلبي افتكر علياء اللي اتحرمت منها بسبب هاله لكن حبي لعمر خلاني اشيل فكره القتل دي خالص من عقلي وكل اللي انا عايزا عز يطلقني واتجوز عمر وقولت بلاش اضيع وقت وطلبت من امن الفيلا اني اقابل عز وقولت لفرد الامن اسمي ودخل فرد الامن. ورجع ودخلت لعز لقيته قاعد علي كرسي بعجل وجنب منه هاله اللي كانت بتبص لي بضيق وبتقول

انتي عرفتي عنوان الفيلا ازاي. لكن طالما جيتي برجلك لغايه عندي. يبقي المره دي ما فيش حد هايحوشك من ايدي حتي حميده اللي كان حايشني عنك عشان كان بيقول كفايه انك قتلتي بنتها مش لازم كمان نخلص عليكي. لكن خلاص حميده مبقاش لي لزمه في حياتي

لكني ما بصتش ليها ولا رديت عليها وبصيت لعز وقولت 

عز. انت رجليك راحت وانا والله العظيم مش السبب. وانا بنتي راحت وانت واختك كنتو السبب يعني لو هنتحاسب انتو اللي المفروض تدفعوا تمن اللي راحت لكن انا مسامحه عشان مش عايزا دم تاني يكون في حياتي علشان كده. انا جيت لك يا عز لغايه عندك. وعايزاك تطلقني 

عز

عايزا تطلقي ليه. جالك عريس

هاله

اكيد جالها عريس. 

قولت 

ولا عريس ولا حاجه انا ليه افضل مراتك واحنا عمرنا ما هايكون بينا ود ولا هايتقفل علينا باب من تاني 

عز

شوفي يا زباله. انتي تطلقي او تفضلي مراتي ده مش هايفرق معاكي كتير 

مافهمتش عايز يقول اية وقولت له

مش فاهمه تقصد اية 

هاله

افهمك. عز يقصد انك مش هاتخرجي من هنا عايشه

وبصيت لقيت باب الفيلا بيتقفل وهاله بتقرب مني والشر في عينيها. ،،،  

وهنا مسكت علياء دماغها وحطيت المذكرات جنبها ونامت. وتاني يوم ظهر جابر في الفيلا ومعه محامي شكله شمال واسمه طلبه ووقف جابر في وسط الفيلا وبدا ينادي علي علياء بطريقه بشعه فخرجت له علياء ونزلت له ووقفت قدامه وقالت

طارق مالك عمال تنادي عليه كده بصوت عالي 

جابر 

عايزك تصحي وتلحقي تلمي هدومك 

علياء باستغراب

الم هدومي يعني اية 

جابر

طبعا. تلمي هدومك انتي مالكيش حق في الفيلا دي لاني انا الوريث الشرعي والوحيد لأميرة امي حبيبتي

فتبص له علياء باستغراب شديد ،،،،،،،

ولغاية هنا. خلصت حلقتنا اللي يارب تكون عحبتكم ولو في العمر بقية هاكمل لكم الحكاية دية. سلام 

الحلقة العاشرة